18
Iawe God dewa kadiwaida dabuaidasade
9 Tane do Moses Israel apanawa diamone wanase, “E Iawe God bola enaledia bedewe odane wanlempe mai uwa daitada sape waimoia dewau kadiwaida waweitane rua dewasana, dia. 10 Mai mida da, di diaida:
otopa ba anoopa pulolepie ia emawe supi,
ba eueuwa da ewepie dima ando segalepia umanawa wapi,
ba aleu da mampo gagalolempa, dima ando segalepia umanawa atenlempa baiwa,
ba dewa isiwa atenlempa baiwa ginauri dewamompa,✡Ekisod 22.18 11 do aleu da nambea ba nosinosila boniu mampo gagalolempa.
Ita do me aleu da nambea ba nosinosiwa boniu nisomopio me bedewe odapue wampu, ba wene apanawa aiawa etepie sumanaiwalepi, di diaida.
12 Apana mida dewa inainamba ema dewamodia Iawe God emawe me ipa nuadabualalaida. Apana bola sa bedewe waimoia dewa inainambu ema dewamoi, sa baiwa Iawe God mo tanamopio nomopue antopuo aupo e odane bola wadane waina. 13 E walama uduudu Iawe God aiawa etonune ruawaitonune dodomanaida wanlempa.✡Matiu 5.48 14 Apana bola sa bedewe waimoia, mo aleu kadiwa ita boni mampo gagalowa ita do wene apanawa aiau eteie sumanaibuntoi. Tane e tauma bola wadane manlawosana baiwaitilana, sa baiwa Iawe e Godila anaanalede mai mo dewau kadiwa waweitane rua dewasana, dia.”
God peroweta dea Moses rua wapiaubepi
15 Ita Moses wane wanase, “Iawe God peroweta dea e eba apanalaida ne ruana bedelawo sonabepie manlawosapi, me gagalolempo aiawa uduudu etanadewaitana.✡Aposel 3.22; 7.37 16 Ipawa walama sawo e wadi Sainai atowe e uduudu auwelana ita eba Iawe God iririsale walanase,
‘No mai dewanewo osowe Iawe no Godimba aiawa etata ba ia debama idi bumedia ewata, no ando bontata sawa.’
17 Iawe God ne mainawo wane wanase,
‘Dima mo waiena ipa euda. 18 Ne peroweta dea e ruaa mo muba dambuida bedewee sonabepe ita wanamopa. Ita ne aiana me bedewesapo ita ne wadina ruaida uduudu apana benemamompo etompa. 19 Me ipa peroweta, sa baiwa ne ebonawo gagalolempo apana me aiawa etepie tane mai ruawalepia ne apana sa matangelasapa.✡Aposel 3.23 20 Tane naita peroweta da asowawalepie ne dima wadina epie meba insaisawe gagalolempa me bolepi. Ita do god lagawaau ebouwo gagalolempa, mo ideita me bosapu.’
21 Tauma e eba waitaraitana, ‘No ambi atentata, me benema ema Iawe God mampea wade ba, dia?’ 22 Ita peroweta Iawe God ebowe gagalolempo ita dima me wadia mai segaleipona dia, aia sa ipa mai Iawe God mampea waipona, tane meba insaisawe gagaloleide. Sa baiwa me mai sawaitana, dia.”