102
ܨܠܘܬܐ ܕܡܘܠܝܨܐ ܐܝܡܢ ܕܦܐܫ ܕܘܪܕܫ̃ܐ ܘܫܦܟ݂ ܩܕܡ ܡܪܝܐ ܩܒ݂ܠܬܗ.
1 ܝܵܐ ܡܵܪܝܵܐ، ܫܡܹܥ ܨܠܘܿܬܝܼ،
ܘܓܥܵܝܬܝܼ ܠܟܸܣܠܘܼܟ݂ ܥܵܒ݂ܪܵܐ.
2 ܠܵܐ ܛܲܫܹܝܬ ܦܵܬܘܼܟ݂ ܡܸܢܝܼ ܒܝܵܘܡܵܐ ܕܥܵܝܩܵܐ ܐܸܠܝܼ،
ܡܲܟܸܦ ܐܸܠܝܼ ܢܵܬܘܼܟ݂،
ܒܝܵܘܡܵܐ ܕܩܵܪܹܝܢ ܡܲܠܝܸܙ ܓ̰ܲܘܸܒ ܠܝܼ.
3 ܣܵܒܵܒ ܬܝܼܡ ܠܗܘܿܢ ܝܵܘܡܵܢܝܼ̈ ܐܲܝܟ݂ ܬܸܢܵܐ،
ܘܓܲܪ̈ܡܝܼ ܐܲܝܟ݂ ܝܵܩܕܵܢܵܐ ܝܩܝܼܕ ܠܗܘܿܢ.
4 ܦܝܼܫ ܠܹܗ ܡܸܚܝܵܐ ܠܸܒܝܼ ܐܲܝܟ݂ ܓܸܠܵܐ ܘܒܪܝܼܙ ܠܹܗ،
ܗܲܠܔ ܕܡܘܼܢܫܹܐ ܠܝܼ ܠܹܐܟ݂ܵܠܵܐ ܠܲܚܡܝܼ.
5 ܡ̣ܢ ܩܵܠܵܐ ܕܬܲܢܲܚܬܝܼ،
ܫܥܹܐ ܠܹܗ ܓܸܠܕܝܼ ܠܓܲܪ̈ܡܝܼ.
6 ܕܡܹܐ ܠܝܼ ܠܩܵܩܵܐ ܕܒܲܪܝܼܵܐ،
ܗܘܹܐ ܠܝܼ ܐܲܝܟ݂ ܩܘܼܦܬܵܐ ܕܚܵܪ̈ܵܒܹܐ.
7 ܦܝܼܫ ܠܝܼ ܪܥܝܼܫܵܐ؛
ܗܘܹܐ ܠܝܼ ܐܲܝܟ݂ ܛܲܝܪܵܐ ܒܢܲܦ̮ܫܹܗ ܥܲܠܔ ܐܓܵܪܹܐ.
8 ܩܵܡ ܠܵܝܡܝܼ ܠܝܼ ܕܸܫ̃ܡܸܢܝܼ̈ ܟܠܹܗ ܝܵܘܡܵܐ،
ܡܲܣܚܸܪ̈ܵܢܝܼ ܡܘܼܦܠܸܚ ܠܗܘܿܢ ܫܸܡܝܼ ܒܠܵܘܛܬܵܐ.
9 ܣܵܒܵܒ ܩܸܛܡܵܐ ܐܲܝܟ݂ ܠܲܚܡܵܐ ܐܟ݂ܝܼܠܔ ܠܝܼ،
ܘܫܬܵܝܬܝܼ ܒܕܸܡ̈ܥܹܐ ܡܙܝܼܓ݂ ܠܝܼ،
10 ܡ̣ܢ ܥܸܠܬܵܐ ܕܟܲܪܒܘܼܟ݂ ܘܚܸܡܬܘܼܟ݂،
ܒܗ̇ܝ ܕܩܵܡ ܡܲܪܡܹܝܬ ܘܪܲܦܹܝܬ ܠܝܼ.
11 ܝܵܘܡܵܢܝܼ̈ ܐܲܝܟ݂ ܛܸܠܵܢܝܼܬܵܐ ܒܸܓܢܵܝܵܐ ܝܢܵܐ،
ܘܐܵܢܵܐ ܐܲܝܟ݂ ܓܸܠܵܐ ܒܸܒܪܵܙܵܐ ܝܘܸܢ.
12 ܐܝܼܢܵܐ ܐܲܢ݇ܬ، ܝܵܐ ܡܵܪܝܵܐ، ܠܥܵܠܲܡ ܝܬܝܼܒ݂ܵܐ ܝܘܸܬ،
ܘܕܟ݂ܵܪܘܼܟ݂ ܠܕܵܪܵܐ ܘܕܵܪܵܐ ܝܠܹܗ.
13 ܐܲܢ݇ܬ ܒܸܬ ܩܵܝܡܹܬ، ܒܸܬ ܪܲܚܡܸܬ ܥܲܠܔ ܨܸܗܝܘܿܢ،
ܣܵܒܵܒ ܥܕܵܢܵܐ ܝܠܵܗ̇ ܠܸܥܒ݂ܵܕܵܐ ܚܢܵܢܵܐ ܥܲܠܘܼܗ̇، ܒܗ̇ܝ ܕܐܬܹܐ ܠܵܗ̇ ܥܕܵܢܵܐ ܪܫܝܼܡܬܵܐ.
14 ܣܵܒܵܒ ܟܹܐ ܒܵܣܡܵܐ ܠܗܘܿܢ ܪܹ̈ܓܵܘܵܬܘܼܟ݂ ܒܟܹܐܦܘܼ̈ܗ̇.
ܘܥܲܠܔ ܥܲܦܪܘܼܗ̇ ܟܹܐ ܥܵܒ݂ܕܝܼ ܚܢܵܢܵܐ.
15 ܘܒܸܬ ܙܵܕܥܝܼ ܐܸܡܘܵܬܹ̈ܐ ܡ̣ܢ ܫܸܡܵܐ ܕܡܵܪܝܵܐ،
ܘܟܠܵܝܗܝ ܡܲܠܟܹ̈ܐ ܕܐܲܪܥܵܐ ܡ̣ܢ ܐܝܼܩܵܪܘܼܟ݂.
16 ܣܵܒܵܒ ܒܸܬ ܒܵܢܹܐ ܡܵܪܝܵܐ ܠܨܸܗܝܘܿܢ،
ܒܸܬ ܦܵܐܹܫ ܚܸܙܝܵܐ ܒܫܘܼܒ݂ܚܹܗ.
17 ܫܡܝܼܥܵܐ ܠܹܗ ܨܠܘܿܬܵܐ ܕܡܸܣܟܹܢܹ̈ܐ،
ܘܠܵܐ ܡܘܼܣܠܹܐ ܠܹܗ ܠܨܠܘܿܬܵܝܗܝ.
18 ܒܸܬ ܦܵܝܫܵܐ ܟܬܝܼܒ݂ܬܵܐ ܐܵܗܵܐ ܠܕܵܪܵܐ ܕܐܵܬܹܐ،
ܘܥܲܡܵܐ ܕܦܵܐܹܫ ܒܸܪܝܵܐ ܒܸܬ ܫܲܒܸܚ ܠܡܵܪܝܵܐ.
19 ܣܵܒܵܒ ܓܘܼܫܸܩ ܠܹܗ ܡ̣ܢ ܡܪܵܘܡܵܐ ܕܩܘܼܕܫܹܗ،
ܡܵܪܝܵܐ ܡ̣ܢ ܫܡܲܝܵܐ ܠܐܲܪܥܵܐ ܚܝܼܪܹܗ،
20 ܠܸܫܡܵܥܵܐ ܫܲܦܠܲܦܬܵܐ ܕܐܲܣܝܼܪܵܐ،
ܠܸܫܪܵܝܵܐ ܠܒܢܲܝ̈ ܡܵܘܬܵܐ،
21 ܕܗܲܩܝܼ ܓܵܘ ܨܸܗܝܘܿܢ ܫܸܡܵܐ ܕܡܵܪܝܵܐ،
ܘܬܸܫܒܘܿܚܬܹܗ ܓܵܘ ܐܘܿܪܸܫܠܸܡ،
22 ܐܝܼܡܲܢ ܕܓ̰ܵܡܥܝܼ ܥܲܡܡܹ̈ܐ ܥܲܡ ܚܕܵܕܹ̈ܐ،
ܘܡܲܠܟܘܵܬܹ̈ܐ، ܠܸܦܠܵܚܵܐ ܠܡܵܪܝܵܐ.
23 ܫܡܝܼܛ ܠܹܗ ܚܲܝܠܝܼ ܒܪܲܗܛܵܐ ܕܚܲܝܝܼ̈،
ܡܘܼܟܪܝܼܵܝ ܠܹܗ ܝܵܘܡܵܢܝܼ̈،
24 ܒܸܬ ܐܵܡܪܹܢ، ܝܵܐ ܐܲܠܵܗܝܼ، ܠܵܐ ܫܵܩܠܹܬ ܠܝܼ ܒܦܲܠܓܵܐ ܕܝܵܘܡܵܢܝܼ̈،
ܒܕܵܪܵܐ ܕܕܵܪܹ̈ܐ ܝܢܵܐ ܫܸܢܘܼ̈ܟ݂.
25 ܡ̣ܢ ܙܲܒ݂ܢܵܐ ܩܲܕܝܼܡܵܝܵܐ، ܫܘܼܬܐܸܣܵܐ ܠܘܼܟ݂ ܐܲܪܥܵܐ،
ܘܫܡܲܝܹ̈ܐ ܦܘܼܠܚܵܢܵܐ ܕܐܝܼܕܵܬܘܼ̈ܟ݂ ܝܼܢܵܐ،
26 ܐܵܢܝܼ ܒܸܬ ܛܵܠܩܝܼ، ܐܝܼܢܵܐ ܐܲܢ݇ܬ ܦܵܝܫܵܢܵܐ ܝܘܸܬ،
ܘܟܠܵܝܗܝ ܐܲܝܟ݂ ܓ̰ܘܼܠܵܐ ܒܸܬ ܒܵܠܝܼ،
ܐܲܝܟ݂ ܠܒ݂ܘܼܫܵܐ ܒܸܬ ܫܲܚܠܸܦܸܬ ܠܗܘܿܢ، ܘܐܵܢܝܼ ܒܸܬ ܦܵܝܫܝܼ ܬܝܼܡܹܐ.
27 ܐܝܼܢܵܐ ܐܲܢ݇ܬ ܗܲܪ ܗ̇ܘ ܝܼܘܸܬ،
ܘܫܸܢܘܼ̈ܟ݂ ܠܹܐ ܬܵܝܡܝܼ.
28 ܒܢܘܿܢܹ̈ܐ ܕܪܹ̈ܓܵܘܵܬܘܼܟ݂ ܒܸܬ ܥܵܡܪܝܼ ܒܫܲܝܢܵܐ،
ܘܙܲܪܥܵܝܗܝ ܩܲܕܡܘܼܟ݂ ܒܸܬ ܡܩܲܘܹܐ.