69
ܠܪܝܫ ܓܘܕܐ ܕܙܡܪ̈ܐ. ܥܠܔ ܫܘܼܫܲܢܝܼܡ. ܡܙܡܘܪܐ ܕܕܘܝܕ.
1 ܦܲܪܸܩ ܠܝܼ، ܝܵܐ ܐܲܠܵܗܵܐ،
ܣܵܒܵܒ ܡܛܹܐ ܠܗܘܿܢ ܡ̈ܝܼܵܐ ܗܲܠܔ ܓܵܢܝܼ.
2 ܛܒܝܼܥ ܠܝܼ ܓܵܘ ܛܝܼܢܵܐ ܥܲܡܘܼܩܵܐ ܘܠܲܝܬ ܕܘܼܟܬܵܐ ܕܟܠܵܝܬܵܐ،
ܥܒ݂ܝܼܪܝܼ ܒܥܘܼܡܩܹ̈ܐ ܕܡ̈ܝܼܵܐ ܘܛܵܘܦܵܢܵܐ ܩܵܡ ܟܲܪܦܸܫ ܠܝܼ.
3 ܟܟ̰ܝܼܚ ܠܝܼ ܒܩܪܵܝܬܝܼ، ܚܪܝܼܟ݂ ܠܵܗ̇ ܒܵܠܘܿܥܬܝܼ،
ܚܒܹܐ ܠܗܘܿܢ ܥܲܝܢܝܼ̈ ܒܸܣܦܵܪܵܐ ܠܐܲܠܵܗܵܐ.
4 ܒܘܼܫ ܪܵܒܵܐ ܝܢܵܐ ܡ̣ܢ ܡܸܙܝܵܬܹ̈ܐ ܕܪܹܝܫܝܼ ܣܵܢܝܵܢܝܼ̈ ܕܠܵܐ ܥܸܠܬܵܐ،
ܙܘܼܪܒܸܢܗܘܿܢ ܛܲܠܩܵܢܝܼ̈، ܕܸܫ̃ܡܸܢܝܼ̈ ܕܒܕܘܼܓܠܵܐ،
ܡܘܼܕܸܪܝܼ ܡܸܢܕܝܼ ܕܠܹܐ ܝܘܸܢ ܗܘܵܐ ܟ̰ܠܝܼܓ̰ܵܐ.
5 ܝܵܐ ܐܲܠܵܗܵܐ، ܐܲܢ݇ܬ ܟܹܐ ܝܵܕܥܹܬ ܣܲܟ݂ܠܘܼܬܝܼ،
ܘܓܢܵܗܝܼ̈ ܡܸܢܘܼܟ݂ ܠܹܐ ܝܢܵܐ ܛܸܫܝܹܐ.
6 ܠܵܐ ܢܵܟ݂ܦܝܼ ܒܘܼܬ ܕܝܼܝܼ ܣܵܒܪ̈ܵܢܹܐ ܐܸܠܘܼܟ݂،
ܝܵܐ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ؛
ܠܵܐ ܦܵܝܫܝܼ ܢܟ݂ܝܼܦܹܐ ܒܘܼܬ ܕܝܼܝܼ ܛܵܥܝܵܢܹ̈ܐ ܕܐܸܠܘܼܟ݂، ܝܵܐ ܐܲܠܵܗܵܐ ܕܐܝܼܣܪܵܐܹܝܠܔ.
7 ܣܵܒܵܒ ܒܘܼܬ ܕܝܼܘܼܟ݂ ܩܘܼܒܸܠܔ ܠܝܼ ܠܵܘܡܵܐ،
ܟܘܼܣܹܐ ܠܵܗ̇ ܢܟܸܦܬܵܐ ܠܦܵܬܝܼ.
8 ܩܵܪܝܼܒܵܝܵܐ ܗܘܹܐ ܠܝܼ ܠܐܲܚܘܿܢܘܵܬܝܼ̈،
ܘܢܘܼܟ݂ܪܵܝܵܐ ܠܒܢܘܿܢܹ̈ܐ ܕܝܸܡܝܼ.
9 ܣܵܒܵܒ ܛܢܵܢܵܐ ܕܒܲܝܬܘܼܟ݂ ܩܵܡ ܐܵܟܹܠܔ ܠܝܼ،
ܘܠܵܘܡܹ̈ܐ ܕܠܵܝܡܵܢܘܼ̈ܟ݂ ܢܦܝܼܠܔ ܠܗܘܿܢ ܥܲܠܝܼ.
10 ܘܒܟܹܐ ܠܝܼ ܓܵܘ ܓܵܢܝܼ ܒܨܵܘܡܵܐ،
ܘܗܘܹܐ ܠܹܗ ܠܠܵܘܡܵܐ ܐܸܠܝܼ.
11 ܘܥܒ݂ܝܼܕ ܠܝܼ ܠܒ݂ܝܼܫܬܝܼ ܣܲܩܵܐ،
ܘܗܘܹܐ ܠܝܼ ܐܸܠܵܝܗܝ ܠܡܲܬܠܵܐ.
12 ܟܹܐ ܗܲܡܙܸܡܝܼ ܒܘܼܬ ܕܝܼܝܼ ܝܵܬܒ݂ܵܢܹ̈ܐ ܒܕܲܪܘܵܙܵܐ،
ܘܗܘܹܐ ܠܝܼ ܙܡܵܪ̈ܝܵܬܹܐ ܠܫܵܬܝܵܢܹ̈ܐ ܕܫܲܟ݂ܪܵܐ.
13 ܐܝܼܢܵܐ ܐܵܢܵܐ، ܨܠܘܿܬܝܼ ܐܸܠܘܼܟ݂ ܝܠܵܗ̇، ܝܵܐ ܡܵܪܝܵܐ، ܒܙܲܒ݂ܢܵܐ ܡܩܲܒܠܵܐ،
ܝܵܐ ܐܲܠܵܗܵܐ، ܒܦܸܪܝܘܼܬܵܐ ܕܛܲܝܒܘܼܬܘܼܟ݂،
ܓ̰ܲܘܸܒ ܠܝܼ ܒܫܲܪܝܼܪܘܼܬܵܐ ܕܦܘܼܪܩܵܢܘܼܟ݂.
14 ܦܲܨܝܼ ܠܝܼ ܡ̣ܢ ܛܝܼܢܵܐ ܕܠܵܐ ܛܵܒܥܹܢ،
ܦܵܝܫܹܢ ܦܘܼܨܝܵܐ ܡ̣ܢ ܣܵܢܝܵܢܝܼ̈، ܘܡ̣ܢ ܥܘܼܡܩܵܐ ܕܡ̈ܝܼܵܐ.
15 ܠܵܐ ܟܲܪܦܸܫ ܠܝܼ ܛܵܘܦܵܢܵܐ ܕܡ̈ܝܼܵܐ،
ܘܠܵܐ ܒܵܠܹܥ ܐܸܠܝܼ ܥܘܼܡܩܵܐ،
ܘܠܵܐ ܐܵܟ̰ܹܡ ܥܲܠܝܼ ܒܹܐܪܵܐ ܦܘܼܡܹܗ.
16 ܓ̰ܲܘܸܒ ܠܝܼ، ܝܵܐ ܡܵܪܝܵܐ، ܒܗ̇ܝ ܕܨܦܵܝܝܼ ܝܠܵܗ̇ ܛܲܝܒܘܼܬܘܼܟ݂،
ܐܲܝܟ݂ ܦܸܪܝܘܼܬܵܐ ܕܪ̈ܲܚܡܘܼܟ݂ ܕܘܼܪ ܐܸܠܝܼ.
17 ܘܠܵܐ ܛܲܫܹܝܬ ܦܵܬܘܼܟ݂ ܡ̣ܢ ܪܹܓܘܼܟ݂،
ܣܵܒܵܒ ܥܝܼܩ ܠܵܗ̇ ܐܸܠܝܼ؛ ܡܲܠܝܸܙ ܓ̰ܲܘܸܒ ܠܝܼ.
18 ܩܲܪܒܸܢ ܠܓܵܢܝܼ، ܦܲܨܝܼ ܠܵܗ̇،
ܡ̣ܢ ܕܸܫ̃ܡܸܢܝܼ̈ ܦܲܪܸܩ ܠܝܼ.
19 ܐܲܢ݇ܬ ܟܹܐ ܝܵܕܥܹܬ ܠܵܘܡܝܼ، ܘܢܟܸܦܬܝܼ، ܘܡܲܣܠܲܝܬܝܼ،
ܩܲܕܡܘܼܟ݂ ܝܼܢܵܐ ܟܠܵܝܗܝ ܡܲܠܝܸܨܵܢܝܼ̈.
20 ܠܵܘܡܵܐ ܬܒ݂ܝܼܪܹܗ ܠܸܒܝܼ ܘܩܵܡ ܡܲܡܪܸܥ ܠܝܼ.
ܣܦܝܼܪܝܼ ܠܚܲܕ ܕܡܲܩܸܕ ܠܸܒܵܐ ܥܲܠܝܼ، ܐܝܼܢܵܐ ܠܲܝܬ،
ܘܠܝܵܗܒ݂ܵܢܹ̈ܐ ܕܠܸܒܵܐ، ܐܝܼܢܵܐ ܠܵܐ ܡܘܼܫ݇ܟ̰ܸܚ ܠܝܼ.
21 ܘܝܘܼܗܒܹܠܔ ܠܗܘܿܢ ܡܪܵܪܹ̈ܐ ܩܵܐ ܐܟ݂ܵܠܬܝܼ،
ܘܩܵܐ ܨܲܗܘܝܼ ܩܵܡ ܡܲܫܬܝܼ ܠܝܼ ܚܲܠܵܐ.
22 ܗܵܘܹܐ ܦܵܬܘܿܪܵܝܗܝ ܠܦܲܚܵܐ ܩܲܕܡܵܝܗܝ،
ܘܗܵܘܹܐ ܫܠܵܡܵܝܗܝ ܠܩܘܼܠܬܵܐ.
23 ܚܵܒ݂ܝܼ ܥܲܝ̈ܢܵܝܗܝ ܡ̣ܢ ܠܸܚܙܵܝܵܐ،
ܘܐܲܡܝܼܢܵܐܝܼܬ ܪܵܓܹܕ ܚܲܨܵܝ̈ܗܝ.
24 ܡܲܫܦܸܟ݂ ܟܲܪܒܘܼܟ݂ ܥܲܠܵܝܗܝ،
ܘܚܸܡܬܵܐ ܕܟܲܪܒܘܼܟ݂ ܡܵܛܝܵܐ ܠܗܘܿܢ.
25 ܗܵܘܹܐ ܡܲܥܡܪܵܝܗܝ ܚܵܪܵܒܵܐ،
ܒܡܲܫܟܢܵܝ̈ܗܝ ܠܵܐ ܗܵܘܹܐ ܥܵܡܪܵܢܵܐ.
26 ܣܵܒܵܒ ܠܗ̇ܘ ܕܐܲܢ݇ܬ ܡܚܹܐ ܠܘܼܟ݂، ܪܕܝܼܦ ܠܗܘܿܢ،
ܘܟܹܐ ܗܲܩܝܼ ܒܘܼܬ ܟܹܐܒܹ̈ܐ ܕܡܵܢܝܼ ܕܕܘܼܪܒܸܢܘܼܟ݂.
27 ܗܲܒ݂ܠܔ ܥܵܘܠܵܐ ܥܲܠܔ ܥܵܘܠܵܝܗܝ،
ܘܠܵܐ ܫܵܒ݂ܩܹܬ ܥܵܒ݂ܪܝܼ ܒܙܲܕܝܼܩܘܼܬܘܼܟ݂.
28 ܫܒ݂ܘܿܩ ܦܵܝܫܝܼ ܓܪܝܼܕܹܐ ܡ̣ܢ ܟܬܵܒ݂ܵܐ ܕܚܲܝܹ̈ܐ،
ܘܥܲܡ ܙܲܕܝܼܩܹ̈ܐ ܠܵܐ ܦܵܝܫܝܼ ܟܬܝܼܒܹܐ.
29 ܐܝܼܢܵܐ ܐܵܢܵܐ، ܡܸܣܟܹܢܵܐ ܝܘܸܢ ܘܕܘܼܪܕܸܫ̃ܵܐ،
ܦܘܼܪܩܵܢܘܼܟ݂ ܡܲܪܸܡ ܠܝܼ ܠܫܲܝܢܵܐ، ܝܵܐ ܐܲܠܵܗܵܐ.
30 ܒܸܬ ܫܲܒܚܸܢ ܠܫܸܡܵܐ ܕܐܲܠܵܗܵܐ ܒܙܡܵܪܬܵܐ،
ܘܒܸܬ ܓܲܪܘܸܣܸܢܹܗ ܒܫܲܟܲܪܬܵܐ.
31 ܐܵܗܵܐ ܒܸܬ ܫܵܦܪܵܐ ܠܡܵܪܝܵܐ ܒܘܼܫ ܡ̣ܢ ܕܒ݂ܵܚܬܵܐ ܕܬܵܘܪܵܐ،
ܝܲܢ ܡܘܼܓ̰ܵܐ ܡܵܪܹܐ ܩܲܪ̈݇ܢܵܢܹܐ ܘܣܸܡܵܬܹ̈ܐ.
32 ܒܸܬ ܚܵܙܝܼ ܡܸܣܟܹܢܹ̈ܐ ܘܒܸܬ ܦܵܨܚܝܼ.
ܝܵܐ ܛܵܥܝܵܢܹ̈ܐ ܕܐܲܠܵܗܵܐ، ܚܵܝܹܐ ܠܸܒܵܘܟ݂ܘܿܢ.
33 ܣܵܒܵܒ ܟܹܐ ܫܵܡܹܥ ܡܵܪܝܵܐ ܠܣܢܝܼܩܹ̈ܐ،
ܘܠܐܲܣܝܼܪ̈ܘܼܗܝ ܠܹܐ ܡܲܣܠܹܐ.
34 ܫܲܒܚܝܼ ܠܹܗ ܫܡܲܝܵܐ ܘܐܲܪܥܵܐ،
ܝܵܡܵܬܹ̈ܐ ܘܟܠܔ ܕܪܵܚܹܫ ܓܵܘܵܝܗܝ.
35 ܣܵܒܵܒ ܐܲܠܵܗܵܐ ܒܸܬ ܦܲܪܸܩ ܠܨܸܗܝܘܿܢ ܘܒܵܢܹܐ ܡܕܝܼܢܵܬܹ̈ܐ ܕܝܼܗܘܼܕܵܐ،
ܘܒܸܬ ܝܵܬܒ݂ܝܼ ܬܵܡܵܐ ܘܝܵܪܬܝܼ ܠܵܗ̇.
36 ܘܙܲܪ̈ܥܹܐ ܕܪܹ̈ܓܵܘܵܬܘܼܗܝ ܒܸܬ ܝܵܪܬܝܼ ܠܵܗ̇،
ܘܡܲܚܸܒܵܢܹ̈ܐ ܕܫܸܡܹܗ ܒܸܬ ܫܵܪܝܼ ܓܵܘܘܼܗ̇.