4
1 Á Basana zununuↄ, à yã́ɛ bee ma,
á nↄɛ pↄ́ a mɛ̀kpa Samali sĩ̀sĩpↄlɛuↄ!
I gbãamↄ wɛ̃nadeↄnɛ,
i taasideↄ wɛtã,
i o á zã́ↄnɛ aa idã dↄ à mi.
2 Ma Dii Lua ma lɛgbɛ̃̀ ń ma kuaadoakɛo,
ma mɛ̀ gↄↄ lɛ́ mↄ́wá
wa kokoaka á gbɛ̃́ kↄ̃naↄzi,
wi á sɛ́lɛ táánↄ ń mↄ̀ kòoloↄ.
3 Á baade a bↄ a aɛdↄawa súsu bĩ́ifoou,
wi táánↄ zĩ̀zↄↄ ũ.
Ma Dii mámɛ má ò.
Isailiↄ swã́gbãakɛa
4 À gi àↄ gɛ́ Bɛtɛli, í tàaekɛ we.
À gi àↄ gɛ́ Giligali, í ɛa tàaekɛ lↄ.
Àliↄ sa'o á diiↄwa we lá gu lɛ́ dↄ,
íↄ á pↄ́ kwide kpa we wɛ̃̀ àaↄ̃ ń wɛ̃̀ àaↄ̃o.
5 Àli pɛ̃ɛ sɛa kpasa sa'okĩiwa sáaukpabↄ ũ,
í pↄ́ pↄ́ iↄ ma gba kpàwakɛ wà ma,
á Isailiↄ, asa bee kɛa á yei.
Ma Dii mámɛ má ò.
6 Wɛ̃́lɛ píiu má tò á lɛkpɛ lɛ́ yↄ́ lↄo,
ualɛ ń ualɛo má tò a kua blɛwa,
kási i ɛa su ma kĩ́io.
Ma Dii mámɛ má ò.
7 Kɛ́ à gↄ̃̀ mↄ àaↄ̃ wà pↄkɛkɛ,
ↄ̃ ma á tɛ̃́ lou.
Má tò lou mà wɛ̃́lɛeↄu,
à gì mai wɛ̃́lɛeↄu.
Má tò à mà buaeↄ,
à gì mai buaeↄ, ↄ̃ gu giigàga.
8 Á gbɛ̃eↄ bã̀abãabò,
aa gɛ̀ wɛ̃́lɛ ń wɛ̃́lɛo í wɛɛlɛi,
aai e à mↄ̀máo,
kási i ɛa su ma kĩ́io.
Ma Dii mámɛ má ò.
9 Mi to pↄ́wɛn gbↄ̃si ń pↄ́ fukpaao
á kaaↄ ń á vɛ̃ɛbuↄ le mↄ̀ↄmↄↄ.
Kwaↄ á kaadↄɛnaↄ ń á kuↄ blè,
kási i ɛa su ma kĩ́io.
Ma Dii mámɛ má ò.
10 Ma gagyãↄ kàágu,
lá má kà Egipiↄguwa.
Ma á ɛ̀waasoↄ dɛ̀dɛ zĩ guu,
má tò wà á sↄ̃́ↄ nàaa.
Má tò yai gĩ dà á bòoa,
á ní lɛ́ dↄkĩi eo,
kási i ɛa su ma kĩ́io.
Ma Dii mámɛ má ò.
11 Ma á gbɛ̃eↄ suumpa,
lá ma Sↄdↄũ ń Gↄmↄↄo suumpawa.
A gↄ̃ gòmiↄna pↄ́ wa ga bↄ̀ tɛ́u ũ,
kási i ɛa su ma kĩ́io.
Ma Dii mámɛ má ò.
12 A yã́i Isailiↄ, má yã́piↄ kɛɛ́.
Lá má yã́piↄ kɛɛ́ Isailiↄ,
àↄ kú ń mapi á Lua yã́kpalɛkɛaánↄ sↄuo.
13 À ma! Mi gbɛ̀sĩsĩↄ kása,
mi to zàa'ĩana fɛlɛ,
mi to gbɛ̃nazĩna dↄ̃ lá a làasoo dɛ,
mi to gu dↄ, mi ɛa to gu si,
mi táa'o dṹnia gulɛsĩↄwa,
ma tↄ́n Dii Lua Zĩgↄ̃de.