5
Wɛ̃nakɛa Isailiↄnɛ
Isailiↄ, à yã́ɛ bee ma,
málɛ wɛ̃nalɛ daánↄ.
Wi Isailiↄ nɛ sↄlↄlↄ yãao,
ãma à lɛ̀lɛ sa mɛ́ a fɛlɛ lↄo.
Wà aà tò wúlɛa a bùsuu we,
gbɛ̃e ku à ↄkaaàzio.
Ma Dii Lua ma mɛ̀,
wɛ̃́lɛ pↄ́ a zĩgↄ̃ↄ bↄ̀lɛ gbɛ̃ↄn ↄ̀aa sↄo,
gbɛ̃ↄn basↄo mɛ́ a su.
Wɛ̃́lɛ pↄ́ a zĩgↄ̃ↄ bↄ̀lɛ gbɛ̃ↄn basↄo,
gbɛ̃ↄn kwi mɛ́ a su.
Ma Dii málɛ yã́ɛ bee o Isailiↄnɛ:
À ma kĩ́i wɛɛlɛ, íↄ ku.
Ásu gɛ́ lousisii Bɛtɛlio,
ásu gɛ́ Giligali sↄ̃o,
ásu tↄ̃u Bɛɛsɛbao,
asa wa tá ń Giligalideↄ zĩ̀zↄↄ ũɛ,
mɛ́ Bɛtɛli a gↄ̃ bɛzia ũɛ.
 
À Dii kĩ́i wɛɛlɛ, íↄ ku.
Tó màa no,
a mↄ kũ Yosɛfu buiↄwa tɛ́ ũ,
a kũ Bɛtɛliwa, gbɛ̃e a fↄ̃ dɛo.
I yã́'ĩikpa yãnadeↄwa,
mɛ́ i yãkɛa a zɛ́wa málɛ.
Dii saankifɛ̃nɛnaↄ kɛ̀
ń saankonɛandeo.*
Ì to gusia níinii li gudↄa ũ,
ì to gu ìↄ si.
Ì ísia í kãaa musu,
ì to à ma lou ũ bùsu píi guu.
Aà tↄ́n Dii.
Ì to kaalɛ bilɛ gbãadeↄwa,
ì wɛ̃́lɛ bĩ́ideↄ ásookɛ.
10 Ápiↄ sↄ̃ iliↄ ye sĩan'ona gĩyãio,
i za gbɛ̃́ pↄ́ ì bↄbↄ ń vãikɛnaↄgu.
11 Lá i gbãable wɛ̃nadeↄwa,
i pↄ́wɛna símá,
á kpɛ́ pↄ́ á bò ń gbɛ̀ ãao,
á e zↄ̃lɛ ń guuo,
á pↄeã vɛ̃ɛ pↄ́ á bà,
á e à a imio.
12 Asa Dii á tàae zↄ̃ↄ dↄ̃
ń á duuna pↄ́ lɛ́ vĩoo.
I gbɛ̃maaↄ wɛtã,
i to gbɛ̃dɛna fĩabo, í aà gbaɛ,
i gí taasideↄnɛ ń ń yã́ nao.
13 A yã́i tò laaide dãↄ lɛ́ ìↄ kpaaũa tia kɛ́wa,
asa gↄↄɛ beeↄ vãiɛ.
14 À wɛɛlɛ àↄ yãmaakɛ,
i kɛ a vãi no,
kɛ́ à e àↄ ku,
Dii Lua Zĩgↄ̃de iↄ kúánↄ,
lá i o a kúánↄwa.
15 Àↄ za yã́ vãiu, íↄ ye a maai,
íli yã́gↄ̃gↄ̃ a zɛ́wa yã́kpalɛkɛkĩi.
Wìliↄ dↄ̃o, Dii Lua Zĩgↄ̃de a gí Yosɛfu bui kↄ̃naↄ wɛ̃nagwaio.
16 A yã́i Dii Lua Zĩgↄ̃de mɛ̀,
wa búbuapɛ gãaɛↄ píi,
waↄ o zɛ́kpaaↄ guu: Wéee! Wéee!
Wa sɛ̃̀wanaↄ sísi aa ↄ́ↄlↄ,
wa o gɛ'ↄↄlↄnaↄnɛ aa búbuapɛ.
17 Búbuapɛa aↄ ku vɛ̃ɛbuↄu píi,
asa Dii mɛ́ a pã́ á bùsua.
Dii mɛ́ ò.
18 Waiyoo gbɛ̃́ pↄ́ lɛ́ Dii gↄↄ nidɛ!
Àkɛa álɛ Dii gↄↄpi nidɛi?
Gusia gↄↄɛ, i kɛ gupua no.
19 Aↄ dɛ lá gbɛ̃́ lɛ́ bàalɛ nↄ̀ↄmusuɛ,
ↄ̃ à gɛ̀ kpà wài pãleawa,
ge lá à gɛ̀ gɛ̃̀ kpɛ́u à ↄnà gĩwa,
ↄ̃ mlɛ̃ aà sòwaɛ.
20 Dii gↄↄpiá gusiaɛ,
i kɛ gupua no, gusia níiniiɛ.
Baa gupuan beeena aↄ vĩo.
 
21 Ma Dii ma mɛ̀,
má za á dikpɛↄu, má gíiɛ,
má ye á kↄ̃kãaapiↄ gĩyãio.
22 Baa tó a sa pↄ́ wì a pↄ́ kátɛu à tɛ́kũ òa ń pↄ́wɛntio, má sio.
Baa tó a sáaukpa sa'òa ń pↄ́ mɛkpaao,
má wɛ́sɛ mà gwao.
23 À gomala ń á lɛ̀sikↄ̃fĩo,
má swã́sɛ á mↄↄna ↄ́io.
24 À to yã́zɛde dagua
lán swa gbakakaawa,
à tó á yãkɛa a zɛ́wa ligua
lán swa pↄ́ a í lí baowa.
25 Isailiↄ, i kɛ mámɛ a sa'òa
a ma gba pↄ́ guwaiwaiu wɛ̃̀ blao.
26 Tã́a Mↄlↄku kpɛ́ á sɛa
ń saana pↄ́ a zɛò taao.
Á dii pↄ́ á pì ázĩaɛpiↄ yã́i
27 ↄ̃ má tó wà táánↄ Damasi baale.
Ma Dii mámɛ má ò.
Ma tↄ́n Lua Zĩgↄ̃de.
* 5:8 Yob 9.9, 38.32 5:22 Isa 1.11-14 5:26 Zĩn 7.42-43