Bibeli Luayãtaalá Soũↄ 112

112

Gbɛ̃́ pↄ́ Dii vĩa vĩ

1 Àleluya!

Báaaden gbɛ̃́ pↄ́ Dii vĩa vĩ,

mɛ́ Diipi yãdilɛaↄ ì kaaàgu ũ.

2 Aà nɛ́ↄ gↄ̃ gbãadeↄ ũ ń bùsuu,

asa nↄ̀sɛpuade buiↄá báaadeↄnɛ.

3 Pↄ́mↄama ń àizɛɛo di aà bɛɛ,

aà yãkɛa a zɛ́wa láaa vĩo.

4 Baa gusiau gu ì pu gbɛ̃maaↄnɛɛ,

nↄ̀sɛpuade pↄ́ sùuu ń sósobio vĩↄ.

5 Gbɛ̃́ pↄ́ gbɛ̃kɛ vĩ ì pↄ́ sɛ̃anɛ́,

ì a yã́ↄ kɛ a zɛ́wa, yã́ ì bↄɛ̀ maaɛ.

6 Gbɛ̃maa lí fu bauo,

aà yã́ aↄ dↄńguɛ gↄↄpii.

7 Bao ĩ́i lí aà vĩakũo,

aà sↄ̃ ìↄ dilɛa, ìↄ Dii náai vĩ.

8 Aà sↄ̃ lí vĩo, vĩa lí aà kũo,

e à gɛ tidↄò a ibɛɛↄla.

9 Ì pↄ́ fã́ɛ taasideↄnɛ,

aà yãkɛa a zɛ́wa láaa vĩo.*

Aà mi ìↄ daa ía ń gawioɛ.

10 Gbɛ̃vãi líↄ ye aà ea yã́io,

ì lɛ́sakãaàzi, ì lↄ̀ↄ gá.

Yã́ pↄ́ vãikɛna wɛ́ dↄi ì midɛwàɛ.

* 112:9 2Kln 9.9