Bibeli Luayãtaalá Soũↄ 115

115

Dii mɛ́ ì báaadańgu

1 I kɛ wá tↄ́ mɛ́ a bↄo Dii,

i kɛ wá tↄ́ mɛ́ a bↄo.

Ǹ nzĩa tↄbↄ n gbɛ̃kɛ ń n náaio yã́i.

2 Àkɛa buipãleↄ ì wá la aa mɛ

wá Lua kú má niɛi?

3 Wá Lua ku musu,

yã́ pↄ́ a yei ì kɛɛ.

4 Aa ń diiↄ pì ń ã́nusuo ń vuao,

gbɛ̃nazĩna ↄgbɛɛ.*

5 Aa lɛ́ vĩ, aali yã'oo,

aa wɛ́ vĩ, aali gu'e sↄ̃o.

6 Aa swã́ vĩ, aali yãmao,

aa ní vĩ, kási aali pↄ́ gĩmao.

7 Aa ↄ vĩ, aali kã́ pↄ́wao,

aa gbá vĩ, kási aali táa'oo.

Aali kolokɛkɛo.

8 An pinaↄ gↄ̃ńwaɛ

ń gbɛ̃́ pↄ́ lɛ́ ń náaikɛↄ.†

9 Isailiↄ, à Dii náaikɛ!

Ɔ̃mɛ á sɛ̀ngbao ũ, ì dↄálɛ.

10 Aalona buiↄ, à Dii náaikɛ!

Ɔ̃mɛ á sɛ̀ngbao ũ, ì dↄálɛ.

11 Dii vĩakɛnaↄ, à Dii náaikɛ!

Ɔ̃mɛ á sɛ̀ngbao ũ, ì dↄálɛ.

12 Wá yã́ lí sã́ Diiguo,

a báaadawágu.

A báaada Isaili buiↄgu,

a báaada Aalona buiↄgu.

13 Dii a báaada a vĩakɛnaↄgu,

nɛ́fɛ̃nɛn gbɛ̃zↄ̃ↄ.‡

14 Dii kã́fĩakɛɛ́,

ápiↄ ń á nɛ́ↄ.

15 Dii mɛ́ a báaadaágu,

musu ń tↄↄlɛo Kɛnapi.

16 Musuá Dii bɛɛ,

ↄ̃ à tↄↄlɛ nà gbɛ̃nazĩnaↄnɛ ń ↄzĩ.

17 I kɛ gɛↄ mɛ́ lí Dii táasilɛo,

gbɛ̃́ pↄ́ kú bɛdauↄ ìↄ ku kílikiliɛ.

18 Wápiↄ, wáↄ Dii sáaukpa

za gbã e gↄↄpiiɛ.

Àleluya!

* 115:4 Zia 9.20 † 115:8 Soũ 135.15-18 ‡ 115:13 Zia 11.18, 19.5