26
Gbɛ̃maa wabikɛa Diiwa
Davidi lɛ.
1 Yãnakpaa Dii,
asa ma yãkɛ̀ a zɛ́wa,
ma n náaikɛ̀ seasai.
2 Ma lɛ ǹ ma gwa Dii,
ní ma nↄ̀sɛ ń ma làasooↄ gwa.
3 N gbɛ̃kɛ ìↄ dↄaamɛɛ,
mi zĩkɛ n sĩanawa.
4 Mili zↄ̃lɛ ń ɛɛdeↄo,
mili bɛbɛ ń mↄafilideↄo.
5 Má za duunkɛnaↄ kãaaau,
mili zↄ̃lɛ ń gbɛ̃vãiↄo.
6 Ma a ↄ pìpi tàaesai seela ũ,
málɛ lia n gbagbakĩizi, Dii,
7 kɛ́ mà e n sáaukpa lɛsia guu,
mí n yãbↄnsaɛↄ kpàwakɛ.
8 Dii, má ye n kpɛ́ pↄ́ niↄ kuuzi,
gu pↄ́ n gawi ì pilau.
9 Ńsu ǹ ma naaa ń duunkɛnaↄo,
ńsu ǹ ma baa daaa ń gbɛ̃dɛnaↄo.
10 Vãi làasoo mɛ́ ìↄ dↄaanɛ́,
an ↄ ìↄ pai ń gbagusaɛↄ.
11 Mapi sↄ̃ mi yãkɛ a zɛ́wa,
wɛ̃nadↄ̃mɛɛ ní ma suaba.
12 Ma zɛkĩi è gumaau,
má Dii sáaukpa balu guu.