27
Dii mɛ́ ma gupua ũ
Davidi lɛ.
Dii mɛ́ ma gupua ũ, ma Suabana ũ,
dé má vĩakɛɛ̀i?
Dii mɛ́ ma ulɛkĩi ũ,
dé vĩa mɛ́ a ma kṹi?
Tó gbɛ̃vãiↄ sìmazi ma taitaia yã́i,
ge tó ma ibɛɛↄ ń ma wɛ̀lɛↄ ã̀naa,
aa gɛ̃mbↄlɛ aa lɛ́lɛ.
Baa tó zĩgↄ̃ↄ koezↄ̃̀mazi,
ma sↄ̃ a vĩo.
Baa tó gbɛ̃́ↄ fɛ̀lɛa ń zĩo,
ma sↄ̃ aↄ dilɛaɛ.
Yã́ mɛ̀ndo málɛ a wabikɛ Diiwa,
yã́pi málɛ wɛɛlɛ maamaa.
Má ye màↄ ku Dii ua e ma gↄↄ lɛ́waɛ,
kɛ́ màↄ aà aɛya aà kpɛ́u we,
mí wɛ́pɛ aà kɛfɛnkɛwa.
A ma ulɛ a kpɛ́u taasikɛgↄↄ,
a ma gwa a zwã̀akpɛu,
i ma zɛ gbɛ musu aafia.
Ma mi a fu ma ibɛɛ pↄ́ liaamaziↄla,
mí sa'o Dii ua ń gulakɛao,
mí lɛsi mà aà táasilɛ.
 
Tó ma lɛzùnzi Dii, wea.
Ma wɛ̃nagwa ní ma yãma.
Ma nↄ̀sɛ lɛ́ lɛdaa mà n aɛya,
Dii, málɛ n aɛya.
Ńsu mikpɛdↄ mapi n zↄ̀blenaɛo,
ńsu bↄ ma kpɛ ń pↄfɛ̃oo.
Ma Dↄnlɛden n ũ, ńsu ma vũaao,
Lua ma Suabana, ńsu ma to weo.
10 Tó ma de ń ma dao pãkpàmazi,
Dii a ↄliamazi.
11 Dii, ma da n zɛ́wa,
dↄaamɛɛ zɛ́ súsu guu ma kpàkpanaↄ yã́i.
12 Ńsu to ma ibɛɛↄ ń pↄeã kɛao,
asa seelade ɛgɛnaↄ lɛ́ yãdↄa,
mɛ́ gbɛ̃́ pãsĩↄ lɛ́ pↄbↄ ń níu.
13 Má yã́ɛ bee náai vĩ kɛ́ má e:
Dii a maakɛmɛɛ dṹniaɛ bee guu.
14 Wɛdↄ Diizi.
Zɛ gbãa, ní sↄ̃dilɛ.
Wɛdↄ Diizi.