44
Isailiↄ wɛ̃nakɛa
Kole buiↄ lɛ.
Lua, yã́ pↄ́ ń kɛ̀ wá deziↄ gↄↄ,
aa òwɛ̃ɛ wá swã́ mà.
N ↄpɛ̀ buipãleↄwa n ĩadàmá,
n wá deziↄ kàlɛ ń gbɛu aa ↄtàu.
An fɛ̃nda mɛ́ ń ká bùsupiwao,
an gã̀sa gbãa ↄ̃ aa zĩblèòo.
N zĩa gã̀sa gbãa mɛ́ kɛ̀,
n kuańnↄ gupùnɛ́, kɛ́ ń yeńzi yã́i.
 
Ḿmɛ ń ma kía ũ ma Lua,
ni to Yakↄbu buiↄ zĩble.
Ń n báaao wi ↄpɛ wá ibɛɛↄwa,
ń n tↄ́o wi ↄ̃zↄ̃ wá wɛ̀lɛpiↄwa.
I kɛ ma sá málɛ a náaikɛo,
i kɛ ma fɛ̃nda mɛ́ ì ma bↄo.
Asa ḿmɛ ni wá sí wá ibɛɛↄwa,
ni wida wá zangudeↄwa.
Lua, wiↄ n táasilɛ gↄↄpii,
wiↄ n tↄbↄ láasai.
 
10 Ń beeo n ↄpɛ̀wá ń tò wí wá kṹ,
nili bↄ ń wá zĩgↄ̃ↄ lↄo.
11 Ń tò wa pↄ̀ↄbↄzãkɛ̀ wá ibɛɛↄnɛ,
ń tò wá zangudepiↄ wá pↄ́ↄ nàaa.
12 N ń gbá zɛ́ aa wá dɛdɛ lán sãↄwa,
n wá fãaa buipãleↄ guu.
13 N n gbɛ̃́ↄ yìa àa'aa,
ni ài'e ń yíaa yã́ musuo.
14 Ń tò wá saɛdeↄ wá sↄ̃sↄ̃,
gbɛ̃́ pↄ́ liaawáziↄ wá láanikɛ̀.
15 Ń tò wa gↄ̃ yãa ũ buipãleↄnɛ,
gbɛ̃́ↄ ìↄ midɛwɛ̃ɛ.
16 Miↄ kú ń wío gↄↄpiiɛ,
ma gɛɛ gↄ̃̀ kpa ma wɛ́i,
17 ma láanikɛnaↄ ń ma sↄ̃̀sↄ̃naↄ yã́i
ń ma ibɛɛ pↄ́ aa ye tↄsiaↄ yã́o.
 
18 Bee wá lé píi,
baa kɛ́ n yã́ i sã́wáguo,
mɛ́ wi ń bàakuawanↄ yã́ gbooo.
19 Wá nↄ̀sɛ i liaamao,
wi kɛ̃ n zɛ́wao.
20 N wá wiwi n wá ká gu gbɛ̃gbondeu,
n gusia zↄ̃ↄ kũ̀aawá.
 
21 Tó wá Lua tↄ́ sã̀wágu,
ge tó wa wɛdↄ̀ dii zĩ̀lozi yãaɛ,
22 Lua a gí eie?
Asa ↄ̃mɛ wá nↄ̀sɛ yã́ dↄ̃ píi.
23 N yã́i wá kú ga lɛ́zĩ gↄↄpii,
wì wá dilɛ lán sã pↄ́ wa ń kòlokpaↄwa.*
 
24 Vu, Dii! Àkɛa ńlɛ i'oi?
Fɛlɛ! Ńsu wá vũaa gↄↄpiio.
25 Àkɛa n mikpɛlìwɛ̃ɛi?
Wá wɛ̃nakɛa ń wá wɛtãao sã̀ngu yã̀?
26 Wa gↄ̃ ye bùsutiu,
wa gↄ̃ wúlɛa tↄↄlɛ.
27 Fɛlɛ dↄwálɛ!
Mↄ ǹ wá misi n gbɛ̃kɛ yã́i.
* 44:23 Lom 8.36