Bibeli Luayãtaalá Soũↄ 45

45

Kía nↄsɛlɛ

1 Gbɛ̃́ yenzide lɛ pↄ́ Kole buiↄ dà.

2 Yãna lɛ́ pipi ma sↄ̃ guu,

ↄ̃ málɛ lɛɛ bee da ń kío.

Ma lɛ́ na lán ladↄ̃n maa lákɛ̃bↄwa.

3 N kɛfɛnkɛ dɛ gbɛ̃́piia,

n lɛgbɛ'i ìↄ na,

báaa pↄ́ Lua dàngu láaa vĩo.

4 Zĩgↄ̃ pãsĩ, ǹ ń fɛ̃nda sɛ ǹ loo

n kíakɛgawi seela ũ.

5 Di sↄ̃́ kpɛ gɛ zĩble n gawi guu

sĩana ń yã́zɛdeo yã́i.

Yã́ pↄ́ ì dimá kɛ ń n ↄplaa gbãao.

6 Kí, n kaↄ lɛ́ sↄ̃́nɛ,

a gɛ̃ n ibɛɛↄ sↄ̃ kṹ,

buiↄ kwɛ n gbázĩ.

7 Lua, ńyↄ̃ↄ zↄ̃lɛa báawa gↄↄpiiɛ,

niↄ n kíakɛ lípana kũa yã́zɛde ũ.

8 Ń ye yã́zɛdei, ń za vãigu.

A yã́i tò Lua, n Lua, n kpa kpalau,

à pↄna pìsima dɛ n gbɛ̃́ↄla.*

9 Lí'ↄ gĩnana pìsi ń pↄkasaↄwa,

mↄↄna'ↄ a n pↄ kɛ na

n kpɛ́ pↄ́ wa kɛ̀kɛ ń wesa swaao guu.

10 Kí nɛnↄɛↄ ku n nↄ yenzideↄ guu,

n nↄ dafu kú n ↄplaai,

a Ofii bùsu vua zãblebↄↄ daa.

11 Nɛnↄɛna, swã́kpa ǹ ma!

N mae bɛ ń n gbɛ̃́ↄ yã́ su dↄaanɛo.

12 N kɛfɛnkɛ lɛ́ kí mɛ lua,

misiilɛɛ̀, asa n diin aà ũ.

13 Tiideↄ mↄ gbadanɛ,

ↄdeↄ n aɛ wɛɛlɛ.

14 Kí nɛnↄɛpi zↄ̃lɛ kpɛa ń gawio,

wà vua ba kɛ̃̀ aà pↄkasaↄwa.

15 Wàlɛ mↄaànↄ kípiɛ

ń aà pↄkasa wɛ̃̀sãdeↄ daa.

Nɛ́ wɛ̃́ndiapi mↄtɛnziↄ tɛaàzi,

aalɛ mↄaànↄ aà kĩ́i.

16 Wàlɛ gɛ̃ńnↄ kibɛ,

wàlɛ pↄnakɛ ń gulakɛao.

17 N nɛgↄ̃ɛↄ gↄ̃ n maeↄ gɛ̃ɛ ũ,

ńyↄ̃ ń dilɛdilɛ kíaↄ ũ dṹnia guu píi.

18 Má tó n tↄ́ àↄ dↄ gbɛ̃́ↄgu láasai,

bui píi iↄ n sáaukpa gↄↄpii.

* 45:8 Ɛbɛ 1.8-9