68
Lua zↄ̃ↄkɛ
Davidi lɛ.
Lua lɛ́ fɛlɛ, aà ibɛɛↄ lɛ́ fãaa,
aà zangudeↄ lɛ́ bàalɛɛ̀.
Lá súɛlɛ ì gɛ̃ ń ĩ́anao,
kɛnɛ́ màa, Lua,
lá zↄ́ nísi ì yↄ tɛ́ saɛ,
vãikɛnaↄ midɛ n aɛ màa.
Gbɛ̃maaↄ sↄ̃ aa pↄnakɛ,
aa yáalↄ Lua aɛ,
aa vĩvĩ ń pↄna zↄ̃ↄo.
 
À lɛsi Luaɛ à lɛ́mawà.
A di luabɛpuana kpɛ, à aà tↄbↄ.
Aà tↄ́n Dii, à kúkuakɛ aà aɛ.
Kua aà gu pↄ́ a kua adoa guu,
Luaá tonɛↄ maeɛ,
gyaaↄ zɛnnↄdeɛ.
Lua ì bɛkpa zĩ̀loↄnɛ,
ì zĩ̀zↄↄ bↄlɛ à ń da namau.
Swã́gbãadeↄ sↄ̃ aaↄ ku gugiiuɛ.
 
Lua, kɛ́ n dↄaa n gbɛ̃́ↄnɛ,
kɛ́ n bɛɛlɛńnↄ guwaiwaiu,
tↄↄlɛ lùalua, lou kwɛ̀ n aɛ,
n Lua pↄ́ n yã'ò Sinai gbɛ musu,*
Lua, Isailiↄ Lua.
10 Lua, n ɛ̀fãai pìsinɛ́ kↄ̃sↄ̃kↄ̃sↄ̃,
ↄ̃ n ń bùsu kpɛɛna gbà gbãa.
11 N gbɛ̃́ↄ zↄ̃̀lɛ a guu Lua,
n wɛ̃nadeↄ gbà pↄ́ n maakɛa yã́i.
 
12 Dii yã'ò,
ↄ̃ bíla gↄ̃̀ aà baokpanaↄ ũ.
13 Kíaↄ ń ń zĩgↄ̃ↄ lɛ́ tílɛ kpakpa,
gↄ̃ɛ pↄ́ gↄ̃̀ bòouↄ lɛ́ ń pↄ́ↄ kpaalɛ.
14 Baa kɛ́ a i sã kaaↄ sↄ̀ↄu,
ã́nusu kú ma felena gã̀sĩaa,
a kã́ↄ lɛ́ tɛkɛ lán vuawa.
15 Kɛ́ Gbãapiide kíaↄ fã̀aa,
aa lì tↄↄlɛa lán Zalamↄ gbɛ̀ nɛɛziwa.
 
16 Basana gbɛ̀sĩsĩ dɛ a kĩniↄla,
Basana gbɛ̀sĩsĩ misonaↄ dasi.
17 Á gbɛ̀ misonaↄ, bↄ́yãi álɛ wɛbii
gbɛ pↄ́ Lua sɛ̀ a kiblekĩi ũwai?
Dii mɛ́ aↄ ku we gↄↄpii.
18 Dii sↄ̃́goↄ lɛ́ vĩo, à kà miliↄ̃ do.
Dii bↄ̀ò za Sinai,
à mↄ̀ pìla a gu pↄ́ a kua adoau.
19 N dɛdɛ musu ń zĩ̀zↄↄ,
n gba sì gbɛ̃́ↄwa falu ũ,
baa swã́gbãadeↄ,
ↄ̃ n zↄ̃lɛ we, Dii Lua.
 
20 Wà Dii sáaukpa, Lua wá Suabana,
ìↄ wá aso kũawɛ̃ɛ lá gu lɛ́ dↄɛ.
21 Wá Luaá Lua pↄ́ ì gbɛ̃́ suabaɛ,
Dii Lua mɛ́ ì wá bↄ ga lɛ́zĩ.
22 Lua a a ibɛɛↄ mi wíwinɛ́,
gbɛ̃nazĩn mikã dↄ̀ɛ pↄ́ aa tɛ́ ń duunawaↄ.
23 Dii mɛ̀: Má á bↄlɛ Basana bùsuu,
má á bↄlɛ ísia títiu,
24 kɛ́ à á gbáↄ pípi ń á ibɛɛↄ auo,
á gbɛ̃ↄ lɛ́naↄ i ń baa ewà.
 
25 Lua, wa n gbɛ̃́ↄ è aa dↄ̀dↄkↄ̃wa,
ma Lua ma Kía, aalɛ mↄ́ n kúkĩi.
26 Lɛ̀sinaↄ dↄaaa, pↄlɛnaↄ tɛ zã́,
wɛ̃́ndia sɛ̃́sɛ̃mpanaↄ ku guo.
27 À Lua tↄbↄ balu guu,
à Dii kpɛla Isailiↄ kↄ̃kãaau.
28 Nɛ́ gↄ̃zãna Bɛ̃yãmɛɛ buiↄ mɛ́ dↄaaa,
bee gbɛa Yuda kíaↄ ń ń gbɛ̃́ↄ
ń Zabulↄni bui kíaↄ ń Nɛfatali bui kíaↄ.
 
29 Á Lua dìlɛɛ́ àↄ gbãa.
Lua, bↄ ń n gbãa pↄ́ ń ↄ̀lↄwɛ̃ɛo.
30 Kíaↄ mↄnɛ ń ń gbaↄ
n kpɛ́ pↄ́ kú Yelusalɛũ yã́i.
31 Zↄa dↄ ílɛnↄbↄ Egipiwa,
zↄadↄ buiↄ swanaↄ ń ń gbɛ̃́ↄwa.
Ãnusu gopana tↄ̃́má,
gbɛ̃́ pↄ́ zĩkaa ì kɛnɛ́ naↄ fãaa.
32 Egipiↄ gbɛ̃́ↄ zĩma,
Etiopiↄ wã aa ↄdↄnzi, Lua.
 
33 Dṹnia kpalablenaↄ, à lɛsi Luaɛ,
à Dii táasilɛ.
34 A di lounaa kpɛ musumusu za zizi,
à ma, àlɛ pũna gbã́ugbãu.
35 À Lua gbãa galikɛ,
wa aà zↄ̃ↄkɛ dↄ̃ Isailiↄwa,
aà gbãa ku luabɛpuanau.
36 Lua, kua n kúkĩi ń zↄ̃ↄ,
Isailiↄ Lua ì gbãa ń ikoo kpa a gbɛ̃́ↄwa.
Wà Lua sáaukpa!
* 68:9 Bↄa 19.18 68:19 Ɛfɛ 4.8