69
Wabikɛa Luawa kua ĩadama guu
1 Davidi lɛ.
2 Lua, ma suaba,
asa í ma kũ ma nↄɛɛ.
3 Dɛɛ lɛ́ ma mↄ́, ma ka zã̀,
tepɛkĩi kuo.
Ma kpalɛ ísiu,
ísↄ̃ lɛ́ damala.
4 Ma wiilɛ̀ ma kpasa,
ma kòlo nàaa,
ma wɛdↄ̀ ma Luazi
e ma wɛ́ gɛ̀ lɛ́ wo.
5 Gbɛ̃́ pↄ́ aa zamagu pãↄ dasi dɛ ma mikãa,
ma ibɛɛ pↄ́ aa ye ma dɛ pↄewiwinɛ́saiↄ lɛ́ vĩo.
Pↄ́ pↄ́ mi a kpã́i'oo ↄ̃ aa mɛ̀ mà a nɛ'i mà kpá.
6 Lua, ń ma mìsaiyãↄ dↄ̃,
ma tàaeↄ ulɛanɛo.
7 Dii Lua Zĩgↄ̃de, gbɛ̃́ pↄ́ an wɛ́ dↄnziↄ
ńsu to wí ń kṹ ma yã́io.
Isailiↄ Lua, gbɛ̃́ pↄ́ aaì n kĩ́i wɛɛlɛↄ
ńsu to an tↄ́ ↄ̃̀ↄkpa ma yã́io.
8 Asa n yã́i mi sↄ̃́sↄ̃a fↄ̃i,
ↄ̃ ma gɛɛ gↄ̃̀ kpa ma wɛ́i.
9 Ma gↄ̃ zĩ̀lo ũ ma gbɛ̃́ↄ guu,
ma gↄ̃ gbɛ̃ando ũ ma da bɛdeↄ guu.
10 N kpɛ́ yã́ ma kũ gbãa,
àlɛ ma ibaba,
n sↄ̃̀sↄ̃naↄ n sↄ̃́sↄ̃a gↄ̃̀mɛɛ.
11 Mi lɛye pↄsia guu,
ↄ̃ wìↄ ma sↄ̃sↄ̃.
12 Mi zwã̀nkasaↄ fĩfĩa,
ↄ̃ wìↄ ma kɛ pↄ́ↄpↄↄ.
13 Gbɛ̃́ pↄ́ zↄ̃lɛ gãaɛↄ ì ma pe,
ígbãaminaↄ ì lɛdamanↄ.
14 Dii, málɛ wabikɛma,
ńsu to à bↄ n pↄ kpɛo,
wea Lua, n gbɛ̃kɛ zↄ̃ↄ yã́i,
ní ma suaba sĩana.
15 Ma bↄ bɛ̀lɛu,
ńsu to mà kpálɛuo.
Ma bↄ ísiu,
ma si ma zangudeↄwa.
16 Ńsu to ísↄ̃ damalao,
ńsu to mà kpálɛ ísiuo,
ńsu to wà tɛ̃́ɛna kamalao.
17 Wea Dii, asa n gbɛ̃kɛ maa,
ma wɛgwa n sùuu zↄ̃ↄ guu.
18 Ńsu mikpɛli n zↄ̀blenaɛo,
wea kpakpa, asa ma gↄ̃ yeelɛaɛ.
19 Sↄ̃mazi, ma misi,
ma suaba ma ibɛɛↄ yã́i.
20 Ń ma sↄ̃́sↄ̃a ń widaaao ń ma kpɛbↄao dↄ̃,
ńlɛ gbɛ̃́ pↄ́ aa yã́kũamanↄↄ e.
21 Sↄ̃́sↄ̃a ma sↄ̃ zↄ̃̀, ma gↄ̃ yɛ̃̀ɛɛsai,
gbɛ̃́ pↄ́ a ma wɛgwa ↄ̃ má wɛ̀ɛlɛ, mi eo,
gbɛ̃́ pↄ́ a ma nↄ̀sɛ nínimɛɛ ↄ̃ ma wɛdↄ̀i, a kuo.
22 Aa ɛsɛ vãi kàmɛɛ blɛu,
kɛ́ imi ma kũ gbãa, aa vɛ̃ɛ kũ̀ma kpàa.
23 To an dikpɛkɛa gↄ̃nɛ́ bai ũ, wà ń kṹ,
to an kua aafia yã'inɛ́.
24 To an wɛ́ siakũ, kɛ́ aasu gu'eo,
to an wó gↄ̃ koolonnↄ gↄↄpii.
25 Ǹ n kpɛ̃nɛmuu bↄbↄmá,
ǹ n pↄkũma pãsĩ pisimá.
26 An bòo gↄ̃ bòo zia ũ,
an gbɛ̃e su àↄ ku kɛ́ à zↄ̃lɛ ń kpɛ́u lↄo,
27 asa aaì ĩada gbɛ̃́ pↄ́ ń gbɛ̃̀waɛ,
aaì gbɛ̃́ pↄ́ ń zↄ̃̀ wãwã galikɛ.
28 Ǹ ń yã́ píi tàaeↄ dańla,
an baa su àↄ ku n gbɛ̃suabaa guuo.
29 Ǹ ń tↄ́ waa wɛ̃ni taala guu,
an tↄ́ su àↄ ku lá doũ guu ń gbɛ̃maaↄ tↄ́oo.
30 Lua, má kú taasi ń yã'ↄ̃mao guu,
ma sɛ lɛsĩ mà bↄu aafia.
31 Má Lua tↄbↄ lɛsia guu,
má aà sáaukpa mà aà kã́fĩ.
32 Bee a ka Diigu dɛ sa'oa ń zuoa,
a kɛɛ̀ na dɛ zugaaena kↄ́badea.
33 Taasideↄ e, aai pↄnakɛ,
á luakĩiwɛɛlɛnaↄ á sↄ̃ i níni.
34 Asa Dii ì wɛ̃nadeↄ yãma,
ìli saka a gbɛ̃́ pↄ́ dɛ zĩ̀zↄ ũↄguo.
35 À aà táasilɛ musu ń tↄↄlɛo,
ísia ń pↄ́ pↄ́ kú a guuↄ píi.
36 Asa Lua a Siↄna suaba,
a ɛa Yuda wɛ̃́lɛↄ kálɛ,
aà gbɛ̃́ↄ i zↄ̃lɛu ń pↄ́ ũ.
37 Aà zↄ̀blenaↄ nɛ́ↄ mɛ́ aa gↄ̃ vĩ,
gbɛ̃́ pↄ́ ye aà tↄ́ naipiↄ iↄ ku a guu.