Luda yã takada kũ Bisã yão BONAA 11

Misila daudunↄ gagana yã

1 À sù à lè Dikiri gĩnakɛ à pì Musanɛ: Mani wari dↄ Firi'aunaa kũ Misila bùsuuo gɛ̃̀n do dↄ, ani gbasa à á gbarɛ. Tó àtɛni á gbarɛ, ani pɛ́áwamɛ! 2 Ǹ o gbɛ̃nↄnɛ ń baadi gↄ̃gbɛ̃ kũ nↄgbɛ̃o andurufu pↄ́nↄ kũ wura pↄ́nↄ gbɛka á Misila gbɛ̃dakea. 3 Mani tó Isarailanↄ kɛ kũ Misilanↄo nna. Musa sↄ̃, àdigↄ̃ bɛ̀ɛrɛ vĩ Misila gũn Firi'auna ìbanↄnɛ kũ a gbɛ̃nↄ.

4 Akũ Musa pì Firi'aunanɛ: Dikiri pì, gwãani lizãndo áni vĩ Misila bùsula, 5 Misila daudunↄ ni gaga ń pínki sɛna zaa Firi'auna kũ à vutɛna kpataa nɛ́a ari à gɛ̀ɛ pɛ́ nↄgbɛ̃ zĩkɛri kũ òdi wísi lↄ́nↄ nɛ́a kũ pↄ́kãde nɛ́ sà káakunↄ ń pínki. 6 Oni wɛ̃nda ↄ́ gbãna dↄ Misila gu sĩnda pínkia, a taka dí kɛ yãro, ani kɛ ziki doro. 7 Ama Isarailanↄ tɛ́ bee gbɛ̃ ni won kɛ bisãsiri ke pↄ́kãdearo, de ǹgↄ̃ dↄ̃ kũ Dikiri Misilanↄ dↄ̃kↄ̃nɛ kũ Isarailanↄ yãi. 8 N ìba dínↄ ni su ma kĩnaa ń pínki ò kútɛmɛnɛ, ò pi mà gɛ́ kũ ma gbɛ̃nↄo ń pínki. Abire gbɛra sà mani gɛ́. Akũ Musa bò Firi'auna kĩnaa kũ pↄfɛ̃ zↄ̃kↄ̃ↄo.

9 Dikiri pì Musanɛ yã: Firi'auna ni n yã maro, de ma daboyãkɛnanↄ kɛ dasi Misila. 10 Musa kũ Harunao daboyã pìnↄ kɛ̀ Firi'auna arɛ pínki, akũ Dikiri a kùgbãna kũ̀. À gì Isarailanↄ gbarɛi ò bo a bùsun.