12
Vĩnla dikpɛ
1 Dikiri yã ò Musanɛ kũ Harunao Misila à pì:
2 Mↄ díkĩna nigↄ̃ deárɛ mↄ káaku ũ wɛ̃̀ kũ wɛ̃̀ɛo.
3 À o Isarailanↄnɛ ń pínki, mↄ díkĩna gↄrↄ kuride zĩ ò sã bobo mɛ̀n dodo ↄn kũ ↄnnwo pínki.
4 Tó ↄn gbɛ̃nↄ dasi dí ká ò sã mɛ̀n do só sↄ̃ro, ò kpàatɛ kũ ↄn kũ ò kú kↄ̃ sarɛo a gbɛ̃nↄ lɛ́n, de a kpara sún gↄ̃ro yãi.
5 À sãkaro ke blèkofĩni fíti kũ à mamberu vĩro bo.
6 Isarailanↄ pínki, baadi a pↄ́ gwa ari mↄ díkĩna gↄrↄ gɛ̃ro donsaride zĩ. Ɔkↄsin oni dɛ,
7 oni a aru má kpɛ́ kũ oni a nↄ̀bↄ són kpɛ́lɛlɛ gbĩ̀nↄa, ↄplai kũ ↄzɛo kũ musuo.
8 Gwãani dokↄ̃nↄ pìia oni nↄ̀bↄↄ pì kpá tɛ́a, oni só kũ burodi futɛnasario kũ lá kyã̀kyãao.
9 Àsun só búsu ke fùfukɛnaro. À kpá tɛ́a kũ a mìio kũ a gbánↄ kũ a pↄ́gũnnↄ.
10 Àsun tó gu dↄ a kparaaro. Tó a kpara gↄ̃̀, à a kpáta à tɛ́ kũ.
11 Tó átɛn só, à asa dↄáwa à kyate kpá, á gò gↄ̃ nana á ↄĩ. À só likalika, zaakũ Dikiri Vĩnla sa'opↄmɛ.
12 Gwãani pìia mani vĩ Misilala mà daudunↄ dɛdɛ bùsuu pì gu pínkia kũ pↄ́kãde nɛ́ sà káakunↄ ń pínki, mani wé'i da Misila tãnanↄa. Makũmɛ Dikiri ũ.
13 Aru pì nigↄ̃ de sèeda ũ kpɛ́ kũ á kú a gũnnↄwa. Tó matɛn ↄ tↄ̃ Misilanↄa, tó ma aru pìi è, mani gɛ̃ála, gaga pì ni á lero.
14 À gↄrↄ pì ditɛ ma dikpɛ gↄrↄ ũ dↄngu yãi, àgↄ̃ dikpɛ pì kɛ kɛ̀otokↄ̃nɛ ũ ari á buria.
Burodi Futɛnasari dikpɛ
15 Gↄrↄ suppla gũn à burodi futɛnasari só. A gↄrↄ káaku zĩ à lùbɛnɛ kũ à kú á kpɛ́ gũnnↄ kↄ́tɛ, zaakũ gbɛ̃ kũ à pↄ́futɛnaa sò gↄrↄ suppla pìi gũn, oni a bo Isarailanↄ tɛ́ ò a dɛmɛ.
16 A gↄrↄ káaku zĩ kũ a gↄrↄ suppladeo à kↄ̃ kakara à donyĩ kɛmɛnɛ. Àsun zĩ ke kɛ gↄrↄ kũ̀nↄaro, sé pↄ́blekɛna gbɛ̃ sĩnda pínkinɛ baasiro, a lɛ́n gwe.
17 À Burodi Futɛnasari dikpɛ kɛ, zaakũ zĩ birean ma á bↄ́tɛ Misila lán zĩ̀karinↄ bà. Á burinↄ gↄ̃ dikpɛ pì kɛ kɛ̀otokↄ̃nɛ ũ.
18 Mↄ káaku gↄrↄ gɛ̃ro donsaride zĩ ↄkↄsi, àgↄ̃ burodi futɛnasari só ari a gↄrↄ baro awɛɛdode zĩ ↄkↄsi.
19 Gↄrↄ suppla gũn lùbɛnɛ sún gↄ̃ kú á bɛaro, zaakũ gbɛ̃ kũ à pↄ́futɛnaa sò, gbɛ̃ zĩ̀tↄↄn yòo, beden yòo, oni a bo Isarailanↄ tɛ́ ò a dɛmɛ.
20 Àsun pↄ́futɛna só gↄrↄ pìiaro. Gu kũ á kun pínki, àgↄ̃ burodi futɛnasari só.
Vĩnla dikpɛ káaku
21 Musa Isaraila gbɛ̃ zↄ̃kↄ̃nↄ sìsi ń pínki à pìńnɛ: À gɛ́ à á ↄn sã kũ à dɛ Vĩnla dikpɛkɛpↄ ũ.
22 À sɛ̃̀sↄ̃vlã sɛ́ à zↄ̃ aru kũ à kú ta gũnwa à máma á kpɛ́lɛlɛ gbĩ̀nↄa, ↄplai kũ ↄzɛo kũ a musuo. Á gbɛ̃ke sún bo bàairo ari gu dↄ.
23 Tó Dikiri tɛn pã bùsula àtɛn Misilanↄ dɛdɛ, tó à aru è kpɛ́lɛlɛ gbĩ̀nↄa, ani gɛ̃alamɛ. Ani tó gbɛ̃dɛdɛri gɛ̃ái à á dɛdɛro.
24 Ákↄ̃nↄ kũ á burinↄ àgↄ̃ yã pì kũna kɛ̀otokↄ̃nɛ ũ ari á buria.
25 Tó a gɛ̃ bùsu kũ Dikiri ni á gban lákũ à a lɛ́ sɛ̀árɛ nà, àgↄ̃ donyĩyã pì kũna.
26 Tó á nɛ́nↄ donyĩyã pìi mìi gbɛ̀kaáwa,
27 à ońnɛ kũ Vĩnla sa kũ òdi o Dikiriaamɛ, zaakũ kũ à Misilanↄ dɛ̀dɛ, à gɛ̃̀ ó Isarailanↄ kpɛ́la, adi ó dɛdɛro. Akũ gbɛ̃nↄ kùtɛ ò donyĩ kɛ̀ Dikirinɛ.
28 Kũ ò tà, ò kɛ̀ lákũ Dikiri ò Musa kũ Harunaoonɛ nà.
Misila daudunↄ gaganaa
29 Gwãani lizãndo Dikiri Misila daudunↄ dɛ̀dɛ ń pínki, sɛna zaa Firi'auna kũ à vutɛna kpataa nɛ́a ari à gɛ̀ɛ pɛ́ purusunanↄ nɛ́nↄa kũ pↄ́kãde nɛ́ sà káakunↄ ń pínki.
30 Firi'auna fùtɛ gwãani kũ a ìbanↄ kũ Misilanↄ ń pínki, akũ wɛ̃nda ↄ́ dà Misilala, zaakũ ↄn ke kun gɛ̀ɛ sariro.
31 Gwãanin Firi'auna Musa kũ Harunao sìsi à pìńnɛ: À futɛ kũ Isarailanↄ à bↄtɛ ma gbɛ̃nↄ tɛ́. À gɛ́ donyĩ kɛ Dikirinɛ lákũ a ò nà.
32 À á blènↄ kũ á sãnↄ kũ á zùnↄ sɛ́tɛ lákũ a ò nà. À gɛ́ à sa mana omɛnɛ se.
33 Misilanↄ nàkara gbɛ̃ pìnↄa ò bↄtɛńnɛ ń bùsun likalika, zaakũ ò pì: Óni gaga ó pínkimɛ.
34 Isarailanↄ ń flawadɛnanↄ kà tanↄ gũn lùbɛnɛɛ sari, ò ń utanↄ fĩ̀fĩa ò dàda ń gã̀n.
35 Ò kɛ̀ lákũ Musa òńnɛ nà, ò andurufu pↄ́nↄ kũ wura pↄ́nↄ kũ pↄ́kasanↄ gbɛ̀ka Misilanↄa.
36 Dikiri tò Misilanↄ ń wɛ́ gwà, akũ ò kpàḿma. Lɛmɛ ò Misilanↄ pↄ́nↄ sìḿma lɛ.
Isarailanↄ dana zɛ́n
37 Isarailanↄ dà zɛ́n gɛ̀sɛ, ò bↄ̀tɛ kũ Ramɛsɛo ò tà Suko. Gↄ̃gbɛ̃nↄ gbɛ̃nↄn dúbu wàa aakↄ̃mɛ, nɛ́nↄ kũ nↄgbɛ̃nↄ baasi.
38 Buri zĩ̀tↄnↄ tà kũńwo dasi dↄ. Blènↄ kũ sãnↄ kũ zùnↄn dasi manamana.
39 Ò burodi futɛnasari kɛ̀ kũ flawadɛna kũ ò bòo Misilao. Ò kɛ̀ lùbɛnɛɛ sari, zaakũ ò pɛ̀ḿma Misila kãntomɛ. Odi le ò pↄ́ble kɛ̀ ò sɛ̀ zãna ũro.
40 Isarailanↄ kunna Misila kɛ̀ wɛ̃̀ wàa pla kũ baraakurio.
41 Wɛ̃̀ wàa pla kũ baraakurio pì papanaa gbɛra, dikpɛ pì zĩn Dikiri zĩ̀karii pìnↄ bↄ̀tɛ Misila ń pínki.
42 Gwãani pì kun Dikiri pↄ́ ũmɛ. Isarailanↄ nigↄ̃ ibɛ̃nɛ kɛa ari ń buria, zaakũ gwãani pìin Dikiri Isarailanↄ bona Misila ibɛ̃nɛ kɛ̀.
Vĩnla dikpɛ
43 Dikiri pì Musanɛ kũ Harunao: Vĩnla yã kũ ma dìtɛn dí. Buri zĩ̀tↄ ke sún a nↄ̀bↄ sóro,
44 ama zↄ̀ kũ a lù, tó a tↄ̃̀ zↄ̃na, ani só.
45 Nibↄ ke gbasekɛri sún sóro.
46 À só kpɛ́n, àsun bo kũ a nↄ̀bↄↄ pìio bàairo. Àsun sã pì wá ke ɛ́ro.
47 Isarailanↄ pínki gↄ̃ dikpɛ pì kɛ.
48 Tó gbɛ̃ zĩ̀tↄ kú á tɛ́, tó à ye à Vĩnla dikpɛ kɛ Dikirinɛ, à a bɛ gↄ̃gbɛ̃nↄ tↄ̃̀ zↄ̃ ń pínki à gↄ̃ bede ũ gbasa à kɛ. Gyↄfↄrↄde sún sóro.
49 Bede kũ gbɛ̃ zĩ̀tↄ kũ à kú kãáo, doka dokↄ̃nↄ pìimɛ.
50 Akũ Isarailanↄ kɛ̀ lákũ Dikiri ò Musanɛ nà kũ Harunao ń pínki.
51 Zĩ birean Dikiri Isarailanↄ bↄ̀tɛ Misila gã̀ kũ gã̀ao.