10
Isirelibɑn bɑndɑ kpɑ
1 Isirelin bweseru tɑ rɑɑ sɑ̃ɑwɑ nge resɛm geɑ
ye yɑ rɑ mɑ too.
Adɑmɑ nge mɛ bɑ dɑbiɑmɔ,
nge mɛyɑ bɑ bũu yenu dɑbiɑsiɑmɔ.
Nge mɛ ben tem mu kuurɑmɔ,
nge mɛyɑ bɑ bũu yenu sɔmmɔ kɑ kpee geenu.
2 Tɔn be, bɑ sɑ̃ɑwɑ gɔ̃rusu yirugibu.
Bɑ koo yen ɑre sɔbe.
Yinni Gusunɔ u koo ben bũu yee ni kɑ nin kpee geenu kɔsuku.
3 Bɑ koo tɛ̃ nɛɛ, yèn sɔ̃ sɑ ǹ Gusunɔ nɑsie,
yen sɔ̃nɑ sɑ ǹ sinɑ boko mɔ.
Adɑmɑ tɛ̃n wɑ̃ɑ te sɑ wɑ̃ɑ mini,
mbɑ sinɑ boko koo mɑɑ kpĩ u sun wunɑnɑ.
4 Wee bɑ gɑri kɑm gerumɔ,
mɑ bɑ ɑrukɑwɑni bɔkumɔ kɑ bɔ̃ri weesugii.
Yen sɔ̃, siribu dɑbiɑmɔ nge yɑkɑ kɔ̃susu
si su rɑ kpi gbee te bɑ wukɑ sɔɔ.
5 Kpɑ Sɑmɑrigii be bɑ nɑɑ buu wurɑguu sɑ̃ɑmɔ
ge ge wɑ̃ɑ Betɛli Afɛniɔ bu nɑndɑ
kpɑ bu gɔɔ sinɑ gen sɔ̃.
Gen yɑ̃ku kowobu bɑ koo diiri
bɑ̀ n wɑ gen bɛɛrɛ yɑ kpɑ.
6 Domi bɑ koo kɑ gu dɑ Asiriɔ
bu gu ben sinɑ boko wɛ̃.
Isirelibɑ bɑ koo sekuru wɑ.
Bɑ koo nɑ̀ n dɑɑ yɛ̃ ko
ye bɑ kɑ bũu kuɑ ben suunu sɔɔ.
7 Ǹ n Sɑmɑrin sɔ̃n nɑ, ye kpuro yɑ kpɑwɑ mi.
Domi bɑ koo kɑ yen sinɑ boko doonɑ
nge dɛkɑ ye nim mu kɑ doonɔ.
8 Bɑ koo ben bũu yenu kpuro kɔsuku mi bɑ torɑ.
Kpɑ yɑkɑsu kɑ sɑ̃ki yi kpi mi.
Sɑɑ gɑɑ sisi yè sɔɔ bɑ koo guunu kɑ gungunu sɔ̃ bu nɛɛ,
i sun sɛ̃sikio i wukiri.
Isirelibɑ
bɑ koo gɛ̃ ye bɑ duurɑ
9 Yinni Gusunɔ u nɛɛ,
sɑɑ dɔmɑ tèn di Isirelibɑ bɑ durum kuɑ Gibeɑɔ,
bɑ torɑmɔ bɑ dɔɔwɑ.
N ǹ weenɛ tɑbu bu tɔn kɔ̃so be wɔri mi?
10 Nɛ, Yinni Gusunɔ kon bu sɛɛyɑsiɑ nge mɛ nɑ kĩ,
kpɑ bwesenu nu nɔɔ tiɑ ko nu bu wɔri ben torɑ bɑkɑnun sɔ̃.
11 Isirelibɑ bɑ sɑ̃ɑwɑ nge nɑɑ kpɛmi yi yi rɑ dobi tɑɑku.
Adɑmɑ kon sugu doke ben wĩi burɑ ni sɔɔ.
Kon de Yudɑbɑ bu kɔrɔ ko,
kpɑ be, Yɑkɔbun bweseru bu tem kusɑnu kɔsuku.
12 Yen sɔ̃ tɛ̃, bɛɛ Isirelibɑ i gbee kpɑɑru koowo i gem duure.
Kpɑ i durom gɛ̃.
Domi sɑɑ yɑ turɑ i kɑ gɔsirɑmɑ nɛ, Yinni Gusunɔn mi,
kpɑ n bɛɛ susi n bɛɛ geɑ kuɑ.
13 Adɑmɑ bɛɛ, i kɔ̃sɑ duurɑ mɑ i kɔ̃sɑ gɑ̃.
Mɑ i bɛɛn weesun ɑre di.
I bɛɛn nɑɑnɛ doke bɛɛn tiin dɑm
kɑ tɑbu kowo dɑbi dɑbiru sɔɔ.
14 Yen sɔ̃nɑ tɑbun wurenu koo nɔɔrɑ bɛɛn suunu sɔɔ.
Kpɑ bu bɛɛn gbɑ̃rɑnu kpuro kɔsuku
nge mɛ Sɑlumɑn sinɑ boko u Bɛti Aribɛli wɔri,
mɑ u bii mɛrobu kɑ ben bibu munkɑ.
15 Bɛɛ Betɛligibu, wee ye kon bɛɛ kuɑ bɛɛn nuku kɔ̃surun sɔ̃.
Bururu yɑm sɑ̃reru yɑnde,
tɑbu sɔɔrɑ bɑ koo bɛɛn sinɑ boko go.