9
Yinni Gusunɔn tɔmbu
bɑ koo kpuro biɑ
1 Bɛɛ Isirelibɑ, i ku tɔ̃ɔ bɑkɑru ko gɛ̃ɛbun sɑɑ sɔɔ
nge bwese ni nu tie.
Domi i Yinni Gusunɔ biru kisi.
Mɑ i dɑ i bũnu gɑsirimɔ
i nu siɑrɑmɔ mi bɑ ɑlikɑmɑ soomɔ kpuro.
2 Adɑmɑ ɑlikɑmɑ ye bɑ soomɔ kɑ gum mɛ bɑ gɑmɑmɔ,
yen gɑɑ kun ko n sɑ̃ɑ bɛɛgiɑ.
Mɛyɑ i ǹ tɑm kpɑm wɑsi i wunɑ.
3 Isirelibɑ bɑ ǹ sinɑmɔ tem mɛ Yinni Gusunɔ u bu wɛ̃ sɔɔ.
Bɑ koo wurɑmɑ Egibitiɔ ǹ kun mɛ Asiriɔ.
Kpɑ bu dĩɑ sesenuginu di mi.
4 Sɑɑ ye sɔɔ, bɑ ǹ mɑɑ kpɛ̃ bu yɑ̃kuru ko kɑ tɑm.
Bɑɑ bɑ̀ n tu kuɑ,
tɑ ǹ Gusunɔ wɛ̃remɔ.
Ben yɑ̃ku dĩɑnu nu ko n sɑ̃ɑwɑ nge gɔɔ dĩɑnu.
Wi u nu di, u koo disi duurɑwɑ.
Dĩɑ ni, nu koo win gɔ̃ɔru kpeesiɑ.
Adɑmɑ bɑ ǹ kɑ ye duɔ Yinni Gusunɔn sɑ̃ɑ yerɔ.
5 Mbɑ i ko ko Yinni Gusunɔn tɔ̃ɔ bɑkɑnu sɔɔ.
6 Ì n bɛɛn yɛnusu deri bɑnsu,
Egibitigibɑ koo bɛɛ dɑm koosiɑ ben mi.
Adɑmɑ yen wuu ge bɑ mɔ̀ Mɛnfisi gɑ ko n sɑ̃ɑwɑ nge bɛɛn sikiru.
Awĩi yi koo bɛɛn ɑrumɑni di.
Kpɑ sɑ̃ki yi kpi bɛɛn kunɔ.
7 Sɑɑ yɑ turɑ yè sɔɔ Yinni Gusunɔ u koo siri.
Sɑɑ yɑ tunumɑ yè sɔɔ u koo bɑɑwure kɔsiɑ ye u kuɑ.
Bɛɛ Isirelibɑ i ko ye wɑ.
Wee bɛɛn torɑnu kɑ bɛɛn tusirun kpɑ̃ɑrun sɔ̃,
i rɑ n tɑmɑɑ Gusunɔn sɔmɔ u wiirɑwɑ.
Wi, wi Yinni Gusunɔ u kɑ gɑri kuɑ u tɑm nɔrɑwɑ.
N deemɑ bɛɛ, i torewɑ n kpɑ̃, mɑ i nùn tusɑ.
8 Adɑmɑ sɔmɔ wi u bɛɛ kirɔ mɔ̀,
u wɑ̃ɑ kɑ Gusunɔ.
Kɑ mɛ, i nùn yinɑ bɛriɑmmɛ mi u dɔɔ kpuro.
I rɑ mɑm nùn seesiwɑ Gusunɔ win Yinnin sɑ̃ɑ yerɔ.
9 Wee i dɑ i kɔ̃sɑ kuɑ nge mɛ i rɑɑ kuɑ Gibeɑɔ.
Yinni Gusunɔ kun bɛɛn torɑnu duɑri.
U koo bɛɛ sɛɛyɑsiɑ nin sɔ̃.
Yinni Gusunɔ u nuki sɑnkirɑ
10 Yinni Gusunɔ u nɛɛ, sɑnɑm mɛ nɑ gbiɑ nɑ Isirelibɑ wɑ,
nɛn nɔni sɔɔ, bɑ sɑ̃ɑwɑ nge resɛm mɑrum
mɛ bɑ wɑ mi gɑ̃ɑnu ku rɑ kpi.
Mɑ nɑ mɑɑ ben bɑɑbɑbɑ wɑ nge figie mɑrum gbiikum.
Adɑmɑ ye bɑ tunumɑ Bɑɑli Peoriɔ,
miyɑ bɑ tii bũu wi bɑ mɔ̀ Bɑɑli wɛ̃.
Mɑ nɑ bu tusɑ nge bũu wi.
11 Tɛ̃ Isirelibɑn bɛɛrɛ yɑ koo doonɑ nge gunɔ mɔrin wuuru.
Ben kurɔbu bɑ ǹ mɑɑ guri suɑmɔ bu sere mɑ.
12 Bɑ̀ n mɑɑ bibu seeyɑ, kon de bu gbiwɑ bu sere bukurɑ.
Bɑ koo wɑhɑlɑ bɑkɑ wɑ nɑ̀ n bu biru kisi.
13 Nge mɛ nɑ Isirelibɑ wɑɑsinɑmɔ,
bɑ sɑ̃ɑwɑ nge dɑ̃ɑ
ni bɑ duurɑ tem gem sɔɔ.
Adɑmɑ bɑ koo ben bibu yibɛrɛbɑ nɔmu bɛriɑ
be bɑ koo bu go.
14 Osee u nɛɛ, Yinni Gusunɔ, bɑ̀ n koo Isirelibɑ sɛɛyɑsiɑ,
sɛɛyɑsiɑ birɑ̀ bɑ koo gɔsi.
A de ben kurɔbu bu nukuru yɑri,
kpɑ ben bwɑ̃su su gberɑ.
15 Yinni Gusunɔ u nɛɛ,
geemɑ ben nuku kɔ̃suru kpuro tɑ sɔ̃ɔsirɑ Giligɑliɔ.
Miyɑ nɑ bu wɑ mɑ nɑ bu tusɑ.
Kon bu girɑ nɛn wuswɑɑn di ye bɑ kuɑn sɔ̃.
Nɑ ǹ mɑɑ bu kĩ.
Domi ben sinɑmbu kpurowɑ bɑ mɑn seesimɔ.
16 Nɑ be, Isirelibɑ sɛɛyɑsiɑ.
Bɑ sɑ̃ɑ nge dɑ̃ɑ te tɑ gberɑ nuurun di kpuro.
Tɑ ǹ mɑɑ binu mɑrumɔ.
Bɑɑ bɑ̀ n mɑɑ bibu mɑrɑ, kon de bii be bɑ kĩ mi, bu gbiwɑ.
17 Osee u nɛɛ, Gusunɔ nɛn Yinni u bu yinɑ
yèn sɔ̃ bɑ ǹ win gɑri swɑɑ dɑki.
Bɑ koo kowɑ yɑɑyɑɑre kowobu bwesenun suunu sɔɔ.