8
Ye ɑ duurɑ yerɑ kɑɑ gɛ̃
1 Yinni Gusunɔ u nɛɛ,
i kɔbɑ soowo.
Wee yibɛrɛbɑ bɑ nɛn sɑ̃ɑ yeru wuusimɑ nge kɑsi.
Domi Isirelibɑ bɑ nɛn ɑrukɑwɑni kusiɑ.
Mɑ bɑ nɛn sɔ̃ɔsiru yinɑ.
2 Bɑ koo mɑn nɔɔgiru suemɑ bu nɛɛ,
bɑ nɛ ben Yinni yɛ̃.
3 Adɑmɑ bɑ geɑ deri,
mɑ yibɛrɛbɑ bɑ koo bu nɑɑ swĩi.
4 Bɑ tii sinɑmbu kuɑ
bɑ ǹ mɑn sɑɑwɑrɑ kue.
Mɑ bɑ bũnu sekɑ kɑ sii geesu kɑ wurɑ.
Yen sɔ̃nɑ bɑ koo kɑm ko.
5 Bɛɛ Sɑmɑrigibu, nɑ bɛɛn nɑɑ wurɑgiɑ ye tusɑ.
Nɑ mɑɑ kɑ bɛɛ mɔru mɔ̀.
Sɑɑ yerɑ̀ i ko i sinɑ bɑ ku n bɛɛ tɑɑrɛ wɛ̃.
6 Wi u bwɑ̃ɑrokunun sɔmburu yɛ̃ Isirelibɑ sɔɔ
wiyɑ u nɑɑ wurɑgiɑ ye kuɑ.
Yɑ ǹ sɑ̃ɑ Gusunɔ.
Yen sɔ̃nɑ bɑ koo ye kɔsuku muku muku.
7 Wee i woo duurɑ,
yen sɔ̃nɑ i ko i woo bɔkɔ gɛ̃.
Mɔndu gɑrɑ nɛɛ, dobi bɛm sɑri ku rɑ n som mɔ.
I n mɑɑ yɛ̃ mɑ bɛɛn gbeɑn dĩɑnu nù n dɑɑ geɑ kuɑ,
sɔbɑ bɑ koo nu gurɑ.
8 Isirelibɑ bɑ derɑ bɑ bu mwɛ.
Be wee bwesenu sɔɔ nge weke te goo kun mɑɑ kĩ.
9 Domi bɑ dɑ Asiriɔ nge gbeeku kɛtɛku ge gɑ tii kpɑre.
Bɑ dɑ bɑ somiru kɑsu mi.
10 Bɑ bwese tukunu gobi kɔsiɑ bɑ n kɑ nɔɔ tiɑ sɑ̃ɑ.
Adɑmɑ kɑ mɛ, kon bu mɛnnɑ,
kpɑ Asirin sinɑ boko u bu yoo sɔmɑ koosiɑ.
11 Isirelibɑ bɑ bũu turɑnu kuɑ nu dɑbi.
Niyɑ nu derɑ bɑ durum mɔ̀.
12 Bɑɑ nɑ̀ n bu nɛn woodɑbɑ yoruɑ sere kɑ yen gɑri piiminɔ,
bɑ rɑ ye gɑrisiwɑ nge ye yɑ wee tɔn tukon min di.
13 Bɑ rɑ yɛɛ go bu kɑ mɑn yɑ̃kuru kuɑ,
kpɑ bu yin yɑɑ tem.
Adɑmɑ ben yɑ̃ku ni, nu ǹ mɑn doremɔ.
Nɑ ǹ ben torɑnu duɑri.
Kon bu sɛɛyɑsiɑ.
Yen sɔ̃nɑ bɑ koo gɔsirɑ bu dɑ Egibitiɔ.
14 Isirelibɑ bɑ tii sinɑ kpɑɑru bɑniɑ.
Mɑ bɑ nɛ ben tɑkɑ kowo duɑri.
Yudɑbɑ bɑ mɑɑ ben wuu dɑbinu gbɑ̃rɑru toosi.
Adɑmɑ kon ben wusu dɔ̃ɔ sɔkiri kpɑ u ben dii geenu di.