7
1 kpɑ n bu bɛkiɑ,
sɑɑ yerɑ ben durum mɑɑ sɔ̃ɔsirɑ Sɑmɑriɔ.
Gbɛnɔbu bɑ dumɔ diɑɔ bɑ gbɛnimɔ.
Mɑ ben gɑbɑ yibɑ swɛɛ sɔɔ.
2 Adɑmɑ ben goo sɑri wi u rɑ tii sɔ̃ u nɛɛ,
nɑ yɑɑye kɔ̃sɑ ye bɑ mɔ̀.
Tɛ̃, wee bɑ mwɑɑrɑ ben kom kɔ̃sum mɛ sɔɔ.
Nɑ ye kpuro wɑɑmɔ.
3 Ben nuku kɔ̃su kookoosu kɑ ben weesu
su sinɑ boko kɑ ben wirugibu nuku dobu wɛ̃ɛmɔ.
4 Be kpuro bɑ sɑ̃ɑwɑ sɑkɑrɑ kowobu bɑ sum
nge pɛ̃ɛ wɔ̃ɔ yeru te pɛ̃ɛ kowo u dɔ̃ɔ doke u deri.
Mɑ u dɑ u win pɛ̃ɛ som burɑ u yi sere mu kɑ se.
5 Bɑ̀ n ben sinɑ bokon tɔ̃ɔ bɑkɑru mɔ̀,
ben sinɑ ɑsɑkpɔbu kɑ sunɔn tii bɑ rɑ tɑm nɔwɑ
kpɑ bɑ n tɔmbu yɑɑ kɑsikimɔ.
6 Be bɑ rɑ nɔɔ tiɑ ko bu kɑ tɔmbu seesi,
bɑ sɑ̃ɑ nge pɛ̃ɛ wɔ̃ɔ yeru.
Wɔ̃kuru, ben wɔrugɔru tɑ rɑ yɛmiɛwɑ
kpɑ yɑm sɑ̃re bururu tu se nge bɑ gɑ̃ɑnu dɔ̃ɔ doke.
7 Be kpuro bɑ sumwɑ nge dɔ̃ɔ.
Bɑ rɑ ben kpɑrobu gowɑ
kpɑ ben sinɑmbu bɑ n wɔrukumɔ tiɑ tiɑ.
Adɑmɑ ben goo ku rɑ mɑɑ mɑn somiru kɑnɛ.
8 Yinni Gusunɔ u mɑɑ nɛɛ,
Isirelibɑ bɑ kɑ bwese tukunu mɛnnɑ.
Mɑ bɑ kuɑ nge kirɑ te bɑ ǹ gɔsie.
9 Bwese tuku ni, nu bu dɑm mwɑɑrimɔ.
Adɑmɑ bɑ ǹ yɛ̃ mɛ.
Tɔkɔrɑ bu deemɑmɔwɑ,
ɑdɑmɑ bɑ ǹ tubɑ.
10 Ben tii suɑbu sɔ̃ɔsirɑmɔ.
Domi bɑ ǹ gɔsirɑmɛ nɛ Gusunɔ ben Yinnin mi.
Kɑ yen de kpuro, bɑ ǹ mɑn kɑsu.
11 Bɑ sɑ̃ɑwɑ nge totobɛrɛ
te tɑ ǹ bwisi mɔ.
Bɑ Egibitigibu somiru kɑnɑmɔ,
mɑ bɑ dɑɑmɔ Asiriɔ.
12 Adɑmɑ bɑ̀ n swɑɑ wɔri nɑ rɑ bu tɑɑ bɛriewɑ
n bu mwɛɛri nge gunɔsu.
Kpɑ n bu sɛɛyɑsiɑ nge mɛ bɑ bu nɔɔsiɑ.
13 Bɑ kɑm kuɑwɑ mi, domi bɑ mɑn dukɑ suurimɔ.
Bɑ mɑn seesi, bɑ mɑn weesu kuɑ.
N deemɑ nɛnɑ kon dɑɑ bu fɑɑbɑ ko.
14 Bɑ̀ n mɑn somiru kɑnɑmɔ, bɑ ku rɑ tu ko gɔ̃ruɔ.
Adɑmɑ bɑ rɑ sinɛwɑ bɑ n tii muririmɔ.
Kpɑ bɑ n yĩiyɔ yeyɑ yɑ koo de ben gbeɑ yu ɑlikɑmɑ kɑ resɛm geɑ mɑ.
Nge mɛyɑ bɑ rɑ n mɔ̀ bu kɑ mɑn seesi.
15 N deemɑ nɛnɑ nɑ bu nɔni doke nɑ bu dɑm wɛ̃.
Adɑmɑ kɑ mɛ, bɑ mɑn kɔ̃sɑ bwisikusimɔ.
16 Bɑ gɔsirɑ goon mi giɑ.
Bɑ sɑ̃ɑ nge tɛn te tɑ ǹ geɑ sɑ̃ɑ.
Yen sɔ̃, bɑ koo ben wirugibu go tɑbu sɔɔ
ben gɑri kɑm gerubun sɔ̃.
Yerɑ yɑ koo de bu bu yɛ̃ɛ Egibitiɔ.