26
Aisake yana fwaya Abimeleki wagaine
1-6 Ada Aisake aimoina wadedeku Biya Laai Loi wagaine gimiyamiya aku loka lakaina giyegemona-vagila fafali Kenani wagaine, anafaiweya tuwaina gimaduyegemona tamana Ebelaamo yana tova wagaine. (2) Ada Yaubada giyegemona Aisake wagaine ada givonena, “Keke unaobu Itipita, aku unamiya fafali gana vewaleni wagaine. (3) Aku tayuwe fafali-nai wagaine maita-moena unamiya, ada gana kwayabuni ke gana lemeni, faina babi taidei matatabuna gana veleni, oye ke kaduwe ya tubudelidelimomo wagaidiya. Yaku vonadabadaba-nai gana luyabuna gavana gavonadabadabayena tama Ebelaamo wagaine mamauwe. (4) Ada ya tubudelidelimomo adiyoo gana kiveinalina anafaiweya ailabama gabameya, ke babi taidei matatabuna gana veledi, ada ya tubudelideli wagaine-deya babi anayoo matatabuna Yaubada yana nuwakabubu ke yana leme ina nuwagana. (5) Faina Ebelaamo givemoimoineku, ada yaku nuwanuwa gimuliye-dewedewena ke yaku veimeya matatabuna giitaveyabidi.” (6) Taidei faina Aisake ginau Gela anafafali wagaine gimiya, wadedeku Filisitiya anakini Abimeleki giveiveimeya.
7 Ada tova-nai toni melala Aisake vavinena Libeka iitana, au Aisake itolidadanena, ivona, “Ida o vavine?”
Ani givonediga, “Wada bana iya novuku,” faina gimatauta. Keke anafaiweya ginavona, ‘Bana iya vavineku,’ faina ginuwanuwa vaita tamo gaito banae gida luvealikana vavinena Libeka faine, faina banae vavine aiwaka founa.
8 Ada wadedeku Aisake gimiya maita tova manamanawena, e ada seyana tova Filisitiya anakini Abimeleki manuwa anatalafolega wagaine giitaobu ani giitana Aisake vavinena Libeka ginegenegena.
9 E ada Abimeleki Aisake gidouwe gielai ke givonena, “Taumada velemoena vavine! Aku gavana faina uvefwayafwaya uvona, 'Ida bana iya novuku?'”
Ada Aisake gilufata givonena, “Faina ganuwanuwa vaita vavine-nai faine seyana gaito gida luvealikaku.”
10 Ada Abimeleki givona, “Gavana faina taidei anafaiweya udewa wagaimeya? Kai gaito tamo kaliva vavine vovona gida kiluvaluvana aga o ya koyona faina vita gidaela adanuwagana.”
11 E ada Abimeleki veimeya gisena kaliva matatabuna wagaidiya, givona, “Keke tamo gavana wanagai kaliva taidei o kai vavinena wagaine. Kai gaito seyana gavana ginagana wagaidiya aga yaku tolugaviya ina luvealikana.”
12 Tova-nai Aisake aimo fafali-nai wagaine, waifei giyavulena yana bakula wagaine ada malamala-nai wagaine gibavagu iwakana anafaiweya 100, faina Yaubada gilemena.
13 Ada kaliva-nai givekaikaiwabu, ada yana kaikaiwabu giveiveinala analaba au givekaikaiwabu-mowa.
14 Faina yana sifiyavo moyaidi, yana gotiyavo ke yana bulumakau moyaidi, kaduwe yana togugaiyavo moyaidi, e ada tayuwe wagaine meFilisitiya ivebutu iveumagigiyena.
15 E ada gufa kavu matatabuna tuwaina tamana Ebelaamo yana togugaiyavo iyaladi, tainei tamana yana tova wagaine, ani meFilisitiya itavuvedavedamadi babi wagaine.
16 Ada taidei gaitoma-nai muline, kini Abimeleki givonena Aisake, givona, “Fafali taidei una segena aku unanau gava fafali wagaine, faina uvetoyogi-moena wagaimeya.”
Aisake yana kavu evagudi
17 E ada Aisake au fafali-nai gisegena aku ginau Gela anaoya awagadiya wagaine giveebaga ada wadedeku gimiya.
18 Aku tuwaina fafali-nai wagaine tamana Ebelaamo yana togugaiyavo gufa kavu iyaladi, aku tova-nai yana alika muline meFilisitiya babi wagaine itavuvedavedamadi. Ani Aisake yana togugaiyavo kaduwe kavu-dina iyala-vagiledi ada adiyegana-dina givewaga-vagiledi anafaiweya tamana givewagadi mamauwe.
19 Ada Aisake yana togugaiyavo gala wagaine kavu seyana iyalana ani wadedeku gufa tovoga inuwagana.
20 Aku meGela kevakeva aditoitaveyabina ke Aisake yana kevakevayavo aditoitaveyabina nodi igavekwavekwageya gufa faine ada meGela ivona, “Ida ime yama gufa!” E ada kavu-nai Aisake givewagana ‘Eseki’, faina nodi ivevonavonayena.
21 Ada Aisake yana togugaiyavo kavu velugana kaduwe iyala-vagilena ani gufa-nai faine igavekwavekwageya-vagila. E ada Aisake givewagana ‘Sitina’.
22 Ada Aisake tayuwe fafali-nai gisege-ku ginau seyana babi kavovona wagaine kavu anaveto giyalana, ada tova tayuwe wagaine meFilisitiya au iita-moena. Tainei faina Aisake givewagana ‘Lioboti’, faina givona, “Yaubada bademowa mwatugu giveleda ke yada iwakana kana nuwagana fafali taidei wagaine.”
23 Ada Lioboti-deya gilaka ginau Biyasiba wagaine ginamiya.
24 Wadedeku giyegemona anabogi-nai Yaubada giyegemona wagaine ada givonena, “Iya tama Ebelaamo yana Yaubada. Keke una matauta, faina Iya o nodi, ada gana lemeni ada ya tubudelideliyavo adiyoo gana kiveinalina yaku togugai Ebelaamo faine.”
25 E ada wadedeku ebavebolavoi gididina ke Yaubada wagaine gioduodu. Ada wadedeku yana manuwa sinininila gibubuna ada yana togugaiyavo gufa kavu seyana iyalana.
26 Ada gimiyamiya aku seyana tova Gela-deya kini Abimeleki gielai wagaine wa anatokivetuvetunuga anayegana Ausati ke yana tolugaviyayavo aditoveimeya anayegana Fikoli.
27 Ada Aisake gitolidadanedi, givona, “Gavana vuvuna waela wagaikuya? Nagona imi waagouga wagaikuya ada wavenegaku nonogana waelai.”
28 Ani ilufata, ivona, “Aitanuwagana oye Yaubada nodi, ada yama nuwanuwa oye ke imeyavo nodi kada vevonadabadaba ke veyavo anavonadabadaba kada bubuna wagaideya oyeni ada imeyavo,
29 vaita keke tamo gavana koyona unagai wagaimeya, anafaiweya ime bademowa keke tamo gavana koyona adagai wagainiya aku tova matatabuna agugai iwakana wagainiya ada kukuyeya aimilini. Ada Yaubada Banae oye giawanuwakabubuyeni.”
30 Ada Aisake veyavo anakanibutu gibubuna faidiya, ke ikani e ada idau.
31 Mala gilavuna malabutuya Aisake ke Abimeleki ivevonadabadaba, muline Aisake giimilidi kukuyeya iyewadi.
32 Tayuwe yadayada-nai wagaine Aisake yana togugaiyavo iela iifufuyena gufa kavu iyalana faine, ivona, “Gufa ayalanuwagana!”
33 Ada gufa kavu-nai anayegana givewagana Siba. Ada tova tayuwe ke tova taidei wagaine melala-nai ivewagana Biyasiba.
Iso mali vevine ginagidi
34 Ada Iso anamalamala foti (40) wagaine, vevine adiselu ginagidi keke yana yoo wagaine. Ineinagona anayegana Yuditi, tamana Beeli, banae Itaiti yana tubudelideli wagaine. Ineimuli anayegana Basimata, tamana Eloni, banae kaduwe Itaiti yana tubudelideli-nai wagaine.
35 Ada taidei vevine-dina adiselu tova moyaina Aisake ada vavinena Libeka nodi ikikivenuwavita lakaina.