27
Aisake yana vonadabadaba anavonanuwakabubu Iyakobo givaina.
1 Tova-nai Aisake bademowa givesilakai ada kaduwe matana gikoyo, ada natuna tomoinagona Iso gidouwe gielai ke givonena, “Natuku.”
Gilufata, givona, “Iya idauwe, kamaku.”
2 Ada Aisake givona, “Uitana, bademowa gavesilakai ada keke yaku tova alika gada alamane.
3 E ada ya fewa ke ya tufi wafosena unavaidi ada unanau fafali kavovona wagaine tamo kevakeva walawalaa faikuya unamunu una aliyena.
4 Ada una kidewedewena anakani nuwavaivaina yaku nuwanuwa anafaiweya ada una aliye ganakani, e ada vonanuwakabubu gana veleni aku muliya ganaalika.”
5 E, Aisake natuna Iso giifuifufuyena aku Libeka ivanevanenega. Ada Iso gitauya ginau fafali kavovona wagaine gina lukevakeva,
6 aku Libeka inau ke natudi Iyakobo iifufuyena, ivona, “Uitana, tama givonevonena tawaga Iso ani ime anogali-kavuyena.
7 Tama givonena vaita kevakeva walawalaa ginamunu gina aliye gina kidewedewena anakani nuwavaivaina tama yana nuwanuwa anafaiweya ada ginanauwe ginavele ginakani, e ada tawaga gina vonanuwakabubuyena Yaubada matane aku muliya ginaalika.
8 E ada natuku, bonama una nogalina ke gavana anavoneni mamauwe unagugai.
9 Ada unamaduna goti natudi luwei iwakadi una munudi una aliyedi anakidewedewedi adikani nuwavaivaina tama yana nuwanuwa anafaiweya.
10 Ada unawai unanauwe tama ginakani, e aku Yaubada gina veole gina awanuwakabubuyeni muliya-yo ginaalika.”
11 Ani Iyakobo inana wagaidiya givona, “Aku bana kawaku Iso vovona kolokolona, aku iya vovoku keke kolo, vovo-moeku.
12 Ada kai kamaku gina kidadaniku, aga aimo gina inanaku iya keke Iso, ada tayuwe wagaine keke gina vonanuwakabubuyeku aku aiyada gina alatabutabuyeku faina gavefwayafwaya wagaine.”
13 Ada inana ivonenaga, “Natuku, kai gina alatabutabuyeni aga wada ime amaalatabutabu, aku gavana anavoneni mamauwe una gugaiyena. Unana goti natudiyavo kabisodi luwei una munudi una aliyedi.”
14 E ada au ginau goti natudiyavo iluwei gimunudi gialiyedi inana wagaidiya, ada ikidewedewena anafaiweya tamana yana nuwanuwa.
15 Muliya Libeka iluku yadi manuweya Iso ananuya iwakadi ivai ialiyedi, ada natudi kwamaneya ivele giosedi.
16 Ada kaduwe goti-dina kwafilidi wavutuvutuna ivaidi Iyakobo nimana ke odona keke kolo wagaidiya ikivefosena.
17 E ada aa anakani nuwavaivaina ke beledi tufona ikabudi ani nodi ivaidi natudi Iyakobo nimane isei gina nauwena.
18 Ada ginau tamana Aisake wagaine ke givona, “Kamaku.”
Ada tamana gilufata, givona, “Iya idauwe natuku, aku o gavakwamana?”
19 Ani Iyakobo tamana wagaine givona, “Iya Iso, natu ya tomoinagona. Bademowa gagugaiyena uvoneku anafaiweya. Ada unatoga dewadewa maita yaku kevakeva una kanina, ke ya vonanuwakabubu una veleku.”
20 Aku Aisake natuna gitolidadanena, givona, “Natuku, gavaiyamu-yo kevakeva umadunuwaga-moe?”
Ani Iyakobo gilufata, givonaga, “Kauveya ya Yaubada giveleku anaiwakana.”
21 Ada Aisake givona, “Unaelai lilivakuya ada gana kidadanini ke gana alamanena anavelemoena oyeni natuku Iso o kai keke.”
22 E ada Iyakobo ginau tamana Aisake lilivane ada tamana gikidadanina ke givona, “Bona ananogala vaita Iyakobo bonana aku nima analutovona anafaiweya Iso nimana.”
23 Ada tayuwe wagaine keke gida inana vaita banae velemoena Iyakobo, faina nimana kolokolodi anafaiweya tawagana Iso nimana. E ada kabisona gida vebutu gida vonanuwakabubuyena
24 aku gitolidadane-vagilena, givona, “O velemoena natuku Iso?”
Ani Iyakobo gilufata, givona, “Ika, iyayeku.”
25 Ada givonaga, “Natuku, ya kevakeva una aliye maita gana kanina, muliya gana vonanuwakabubuyeni.” E ada Iyakobo tamana kevakeva givele gikani, ke waini givele giyuga.
26 Ada tamana givonena, “Unaelai lilivakuya ada una veyaugiku.”
27 Ada Iyakobo ginau tamana wagaine ke aiyaina giveyaugina. Tova-nai ananuya magana Aisake giyauna, au givonanuwakabubuyena ada givona,
“Ee, natuku vovomagana anayauga anafaiweya
fafali guyaguyana magana anayauga
Yaubada yana nuwakabubuya.
28 Yaubada gaveolena ke gabama bulugina tova matatabuna
gina veleni ke ya babi gina kiveguya-vagaina ada
una nuwanuwagana witi lakaina ke waini evaguna.
29 Ada gaveola vaita yoo moyaidi ina vetogugai wagainiya,
ke kaliva inaoduvemoimoina wagainiya.
Ada una vekauveya tubuiyamomo wagaidiya
ke ya gabuyavo ina oduvemoimoina wagainiya.
Ada badi gavega ina alatabutabuyeni,
aimoina alatabutabu ginanau wagaidiya.
Aku badi gavega ina vonanuwakabubuyeni,
aimoina vonanuwakabubu inanuwagana.”
30 Aisake yana vonanuwakabubu giluyabuna muline, Iyakobo giyegemona tamana wagaine-deya, ani tawagana Iso lukevekeveya giyewa gielai.
31 Ada banae kaduwe aa anakani nuwavaivaina bademowa gikidewadewa, ke ginauwena tamana wagaine. Ada givonena, “Kamaku, unatoga dewadewa aku yaku kevakeva maita una kanina, ke una vonanuwakabubuyeku.”
32 Ada tamana gitolidadanena, givona, “O gaito?”
Ani gilufata, givona, “Iya natu Iso, ya tomoinagona.”
33 Ada au Aisake givetatava lakaina ke givona, “Aku gaito, ani kevakeva gimunu gikidewedewe ada gialiye wagaikuya? Muliya-yo ulukuelai, bademowa gakani ada gavonanuwakabubuyena. Ada banae aimo vonanuwakabubu wagaine gina miyamiya.”
34 Ada Iso ginogalina tamana yana vona, au gitagilumaibulu ada tamana givonena, “Iya! Kamakuyo, Iya kaduwe unavona nuwakabubuyeku.”
35 Aku givona, “Keke akufaiweya. Taini giela givefwayafwaya, ada avonanuwakabubu givaina.”
36 Ada Iso givonaga, “Keke fwaya, au anayegana Iyakobo giwai-dewedewena. Bademowa taidei tova anavelu gifwayaku. Nagona tomoinagona anavutuga gilemaku, ada kaduwe malinai akuvonanuwakabubu givaina.” E ada tamana gitolidadanena, givona, “Keke tamo faikuya gava vonanuwakabubu uda seyewe?”
37 Ani Aisake gilufata Iso wagaine, givona, “Uitana, bademowa gaawavekauveyayena wagainiya, ke anatubulugayavo matatabuna anafaiweya yana togugaiyavo, ada kaduwe bademowa gaatuegena witi ke waini wagaine. Ada keke tamo gavana gidatufo ke ganagai fainiya.”
38 Aku Iso tamana wagaine givona, “O kamakuyo, wagainiya kai vonanuwakabubu seya-moena? Iya kaduwe uda vonanuwakabubuyeku!” Ada Iso gitagiya moiyalina.
39 Ada tamana Aisake givonenaga,
“Babi guwana iwakana ke gabama getana anabuluga
wagaidiya-deya aimo unamiya atuwada.
40 Ada oyeni ani aimo gaviyeya
unamiya, ke taini wagaine una vetogugai.
Aku tova-nai una gadibudibusoyogena yana veimeya
aga wana vetutudaka, ada keke kaduwe
yana veimeya wagaine una miyami.”
Iyakobo giota ginau Lebani wagaine.
41 E, ada Iso giagouga Iyakobo wagaine faina banae anavonanuwakabubu tamadi bademowa givelena. Ada nuwainagene givona, “Kamaku yana alika bademowa givelilivana, ada ananuwavita faine. Aku tova-nai nuwavita anatova gina avaina muline, akutubuluga Iyakobo gana luvealikana.”
42 Aku seyana gaito Libeka giawatalatalainedi gavana natudi tomoinagona Iso yana nuwanuwa ginagai. Ada Libeka natudi kwamaneya idouwe gielai ke ivonenaga, “Unaitana, tawaga Iso ginuwanuwa gavaiyamu gina luvealikani, ada taidei nuwanuwa-nai wagaine tauna nuwana gikikiveiwakanena.
43 E ada natuku, gavana anavoneni mamauwe unagugai. Una maduota unanau Elani novuma Lebani wagaine.
44 Unanau wadedeku ada maita nodi wanamiya analaba tawaga nuwana gina veiwaka.
45 Ada aimo tawaga yana nuwakoyo wagainiya gina avaina ke gavana ugana wagaine nuwana ginavulu, muliya matawa ana imilina wagainiya ada una yewaelai idedeku. Faina keke nuwanuwama unaalika ada Iso kaduwe ginaalika, e ada yadayada seyana wagaine amiselu wana miyasegema.”
46 E ada Libeka inau Aisake ivonena, “Itaiti yana tubudelideli anavevine Iso ginagidi. Aku ime keke nuwanuwa-moema kaduwe Iyakobo ginanagi Itaiti yana tubudelideli anavavine taidei fafali-nai wagaine. Kai ginanagi aga tunutunugi-moena anaalika.”