6
Yǝlɑɑ nɑɑtosompɔɣɔlɑɣɑ lǝsʋɣʋ
Wɑɑtʋ ɩnɩ ɩ tɑɑ Tɑcɑɑ tǝŋlɑɑ tɔŋnɑ sɔɔsʋɣʋ. Ḿpʋ́ɣʋ́ pǝ lɑpɑ tɔmɑɣɑ kɛ Yutɑ nyǝ́mɑ mpɑ pɑ yɔɣɔtɑɣɑ Kǝlɛɛkɩ tɔm tɔ nɑ tɛtʋ Yutɑ nyǝ́mɑ pɑ hɛkʋ, sɩ tɛtʋ Yutɑ nyǝ́mɑ ɩɩ pɑɑsǝɣǝnɑ mpɛ pɑ leelɑɑ kɛ teu kɛ pɑɑ ɩfemle nte tǝ tɔɣɔnɑɣɑ tɑlʋɣʋ tɑɑ. Tǝnɑɣɑ tillɑɑ nɑɑnʋwɑ nɑ nɑɑlɛ ɩnɩ ɩ kotɑ Tɑcɑɑ tǝŋlɑɑ kpekǝle tǝnɑ nɑ pɑ́ tɔ-wɛ sɩ: Pǝ tɑ mʋnɑ sɩ tǝ́ yele Ɩsɔ Tɔm pɑɑsǝnɑʋ nɑ tǝ́ lɑkɩ kʋtɔɣɔŋ tɔm. Pǝ tɔɔ tɔ, ɑpɑlɑɑ mɛ, ɩ́ nyǝnɩ nɑ ɩ́ lǝsɩ mǝ tɑɑ kɛ́ yǝlɑɑ nɑɑtosompɔɣɔlɑɣɑ, mpɑ yǝlɑɑ sɑmɑ nɑ Feesuɣu Nɑŋŋtʋ toŋ tɔɔ pɑ kiŋ nɑ pɑ́ wɛnɑ lǝmɑɣɑsɛɛ kɛ sɔsɔm tɔ, nɑ tǝ́ tʋ-wɛɣɛ tǝmlɛ tǝnɛ. Ɩlɛ sɑɑ ɩnɩ tɑ́ɑ́ hiki cɑɣɑlɛ nɑ tǝ́ pɑɑsǝɣǝnɑ Ɩsɔ sǝlǝmʋɣʋ nɑ wɑɑsʋ lɑpʋ kɛ tɑm.
Ḿpʋ́ɣʋ́ pɑ kpekǝle tǝnɑ lɑŋlɛ hɛɛnɑ tɔm ntɩ, ɩlɛnɑ pɑ́ lǝsɩ Ɩtiyɛɛnɩ. Yʋlʋ ɩnɩ ɩ tisɑ ɩ yuŋ kɛ Ɩsɔ tɔɔ kɛ́ teu, nɑ Feesuɣu Nɑŋŋtʋ toŋ tɔɔ ɩ kiŋ. Pɑ lǝsɑ tɔtɔɣɔ Filipʋ, nɑ Pʋlʋkʋlʋ, nɑ Nikɑnɔɔ, nɑ Timɔŋ, nɑ Pɑlǝmenɑsɩ, nɑ Antiyɔkɑ Nikolɑɑ, wei ɩ kɑ sʋʋ Yutɑ nyǝ́mɑ mpɑɑʋ tɑɑ kɛ́ kʋsʋʋ kɛ hɑtoo lɔŋ tɔ. Ɩlɛnɑ pɑ́ ponɑ-wɛɣɛ tillɑɑ kiŋ, nɑ pɛlɛ pɑ́ sǝlǝmǝnɑ-wɛɣɛ Ɩsɔ nɑ pɑ́ tǝnɩ pɑ tɔɔ kɛ́ niŋ.
Ḿpʋ́ɣʋ́ Ɩsɔ Tɔm tɔŋnɑ yɛkʋɣʋ nɑ tǝ puki, nɑ Tɑcɑɑ tǝŋlɑɑ nyɔɔŋ tɔŋnɑ sɔɔsʋɣʋ kɛ sɔsɔm kɛ Yosɑlɛm tɑɑ. Hɑlǝnɑ kɔtǝlɑɑ pɑɣɑʋ tisi nɑ pɑ́ mʋ Yesu tɔm kɛ teu.
Ɩtiyɛɛnɩ kpɑʋ
Ɩsɔ wɛ Ɩtiyɛɛnɩ wɑɑlɩ nɑ ɩ́ hikiɣi tomɑ kɛ sɔsɔm, nɑ ɩ́ lɑkɩ piti tǝmɑ nɑ Ɩsɔ kɔkɔlɔ nyǝm kɛ yǝlɑɑ hɛkʋ tɑɑ. Ḿpʋ́ɣʋ́ Yutɑ nyǝ́mɑ tǝkotile nte pɑ yɑɑ sɩ Yomɑɑ Kʋhɛtɑɑ tǝkotile tɔ, tǝ tɑɑ yǝlɑɑ nɑpǝlɩ mpɑ pɑ kɛ́ Silɛɛnɩ nɑ Alɛkǝsɑntilii nyǝ́mɑ tɔ, pɑ́ nɑ Silisii nɑ Asii tɛtʋ pǝ Yutɑ nyǝ́mɑ nɑpǝlɩ pɑ kʋlɑ Ɩtiyɛɛnɩ tɔɔ, nɑ pɑ́ nɑ-ɩ pɑ́ sʋʋ tɔm hɔm tɑɑ. 10 Amɑ Ɩtiyɛɛnɩ kǝlɑ-wɛ nɑ tɔm. Pǝ tɑɣɑ pʋlʋ, Feesuɣu Nɑŋŋtʋ hɑnɑ-ɩ lǝmɑɣɑsɛɛ nɑ ɩ́ yɔɣɔtǝɣǝnɑ. 11 Ḿpʋ́ɣʋ́ yǝlɑɑ mpɛ pɑ hɑ yǝlɑɑ kɛ liɣitee sɩ pɑ́ yɔɣɔtɩ sɩ: Tǝ nɩɩwɑ ɩ sɑɣɑtɑ Moisi nɑ Ɩsɔ. 12 Nɑ pɑ sɔsɑ yǝlɑɑ nɑ nyʋɣʋ nyǝ́mɑ nɑ Ɩsɔ tɔm sɛɣɛsǝlɑɑ sɔsɑɑ, nɑ pɛlɛ pɑ́ kʋlɩ Ɩtiyɛɛnɩ tɔɔ, nɑ pɑ́ kpɑ-ɩ nɑ pɑ́ ponɑ-ɩ tǝhʋʋlɛ sɔsɔɔlɛ tɑɑ. 13 Ḿpʋ́ɣʋ́ pɑ cɑɑ yǝlɑɑ nɑpǝlɩ sɩ pɛlɛ pɑ́ suu Ɩtiyɛɛnɩ kɛ tɔm sɩ: Apɑlʋ ɩnɛ ɩ sɑɣɑtǝɣɩ tɑ́ Ɩsɔ tǝsɛɛlɛ sɔsɔɔlɛ kʋpɑntɛ tǝnɛ nɑ Ɩsɔ Tɔm kɛ tɑm kɛ́. 14 Hɑlɩ tǝ nɩɩ ɩ yɔɣɔtɑɑ sɩ: Nɑsɑlɛtɩ Yesu ɩnɩ ɩ kɑ́ yɔkɩ tɑ́ Ɩsɔ tǝsɛɛlɛ sɔsɔɔlɛ tǝnɛ, nɑ ɩ́ lɑɣɑsɩ kɔtɑsɩ nsi Moisi nɑɑ hʋlɑ-tʋ tɔ.
15 Ḿpʋ́ɣʋ́ tǝhʋʋlɛ tɑɑ cɑɣɑlɑɑ tǝnɑ pɑmɑ Ɩtiyɛɛnɩ tɔɔ kɛ́ ɩsɛ, nɑ pɑ́ nɑ́ sɩ ɩ ɩsɛntɑɑ mʋ ɩsɔtɑɑ tillu wɛɛtʋ.