7
Ɩtiyɛɛnɩ wɑɑsʋ
1 Tǝnɑɣɑ kɔtʋlʋ sɔsɔ pɔɔsɑ Ɩtiyɛɛnɩ sɩ: Tɑmpɑnɑ pǝ lɑpɑ mpʋ?
2 Ḿpʋ́ɣʋ́ Ɩtiyɛɛnɩ cɔwɑ sɩ: Mɑ tɛɛtʋnɑɑ nɑ mɑ cɑɑnɑɑ mɛ, ɩ́ tʋ ŋkpɑŋŋ nɑ ɩ́ nɩɩ. Teeli Ɩsɔ lɩɩ tɑ cɑɑnɑɑ cɑɑnɑɑ cɑɑ sɔsɔ Apǝlɑhɑm tɔɔ kɛ́ ɩ kɑ wɛʋ Mesopotɑmi nɑ pǝ́cɔ́ ɩ́ kʋlǝɣɩ nɑ ɩ́ puki Hɑlɑŋ kɛ cɑɣɑʋ tɔ.
3 Nɑ ɩ́ tɔmɩ-ɩ sɩ: Kʋlɩ nɑ ń yele nyɑ́ tɛtʋ nɑ nyɑ́ nyǝ́mɑ. Mɑɑ hʋlɩ-ŋ tɛtʋ nti tǝ tɑɑ n kɑ́ polo ń cɑɣɑ tɔ.
4 Ḿpʋ́ɣʋ́ Apǝlɑhɑm kʋlɑ Kɑlǝtee tɛtʋ tɑɑ nɑ ɩ́ polo ɩ́ cɑɣɑ Hɑlɑŋ. Apǝlɑhɑm cɑɑ sǝpɑ, ɩlɛnɑ Ɩsɔ lǝsɩ-ɩ Hɑlɑŋ tǝnɑ nɑ ɩ́ kɔnɑ-ɩ timpi mǝ wɛ kɑɣɑnɑ ɩsǝntɔ tɔ.
5 Ɩsɔ tɑ́ hɑ-ɩ tɛtʋ ntɩ tǝ tɑɑ kɛ́ pʋlʋ mɑɣɑmɑɣɑ. Pɑɑ tɛɛliyɑ sɩ ɩ́ sopi sopuɣu mɑɣɑmɑɣɑ. Amɑ Ɩsɔ tɔmɑ-ɩ kʋtɔm kɛ́ sɩ ɩ kɑ́ hɑ-ɩ tɛtʋ ntɩ. Ɩ mɑɣɑmɑɣɑ ɩ piyɑ kɑ́ tɛnɑ nɑ pɑ́ tɩ-tɩ tɔtɔɣɔ ɩ sǝm wɑɑlɩ. Pǝ́cɔ́ wɑɑtʋ ɩnɩ Apǝlɑhɑm fɛɩnɑ pǝyɑɣɑ.
6 Ɩlɛ nti Ɩsɔ heelɑ-ɩ tɔɣɔlɛ sɩ: Nyɑ́ piyɑ kɑ́ cɑɣɑ cɑɣɑlǝtʋ kɛ lɛlɑɑ tɛtʋ tɑɑ, nɑ pɛlɛ pɑɑ lɑ-wɛɣɛ yomɑɑ. Pɑɑ tʋ-wɛɣɛ wɑhɑlɑ kɛ pɩɩsɩ nɑsǝlɛ (400) tǝcu kɛ́ tǝnɑ.
7 Amɑ Ɩsɔ tɔmɑ sɩ ɩ kɑ́ pɔɔsɩ piitim mpi pɩɩ tʋ-wɛɣɛ yomle kɛ mpʋ tɔ. Pǝlɛ pǝ wɑɑlɩ ɩlɛ pɑɑ lɩɩ tǝnɑ nɑ pɑ́ kɔɔ tɛtʋ tǝnɛ ɩnɩ tǝ tɑɑ nɑ pɑ́ pɑɑsǝnɑ Ɩsɔ sɛɛʋ.
8 Ḿpʋ́ɣʋ́ Ɩsɔ lɑpɑ nɑ pɛlʋɣʋ pǝsɩ Apǝlɑhɑm kɛ kɔtɑɣɑ ŋkɑ kɑɑ tɔɔsǝɣɩ-ɩ nti ɩ́ nɑ Ɩsɔ pɑɑ yɔɣɔtɑɑ nɑ pɑ́ sɩɩ tɔ. Pǝ tɔɔ kɛ́ Apǝlɑhɑm kɔmɑ ɩ́ lʋlɩ Ɩsɑɑkɑ tɔ, ɩ pɛlɑ-ɩ ɩ kʋyɛɛŋ pǝlefɛi nɑɑnʋwɑ wule. Ɩlɛnɑ Ɩsɑɑkɑ nɑ́ɑ́ pɛlɩ ḿpʋ́ɣʋ́ Yɑkɔpʋ, nɑ Yɑkɔpʋ nɑ́ pɛlɑ ḿpʋ́ɣʋ́ ɩ piyɑ nɑɑnʋwɑ nɑ nɑɑlɛ mpɑ pɑ kɛ tɑ kpekɑ cɑɑnɑɑ cɑɑnɑɑ sɔsɑɑ tɔ.
9 Tɑ cɑɑnɑɑ cɑɑnɑɑ mpɛ pɑ lɑpɑ Yosɛɛfʋ kɛ ɩsǝsɛɛmlɛ nɑ pɑ́ pɛɛtɩ-ɩ, nɑ pɑ́ ponɑ-ɩ Icipiti kɛ yomle. Amɑ Ɩsɔ kɑ wɛ Yosɛɛfʋ wɑɑlɩ,
10 nɑ ɩ́ yɑpɑ-ɩ ɩ wɑhɑlɑnɑɑ tǝnɑ tɑɑ. Pǝ kɔmɑ nɑ Yosɛɛfʋ tɑlɑ Icipiti wulɑʋ sɔsɔ kiŋ tɔ, Ɩsɔ lɑpɑ nɑ wulɑʋ lɑŋlɛ hɛɛnɑ ɩ yɑɑsi nɑ ɩ lɑɣɑtʋ. Hɑlǝnɑ Icipiti wulɑʋ nɑnɑ-ɩ kʋfǝnɛɛ kpɑʋ, sɩ ɩ́ nyǝnǝɣɩ Icipiti tɛtʋ tǝnɑ nɑ ɩ mɑɣɑmɑɣɑ ɩ tǝyɑɣɑ pǝ tɔɔ.
11 Ḿpʋ́ɣʋ́ nyɔɣɔsɩ ɑnɑɑm lɩɩ Icipiti nɑ Kɑnɑɑŋ pǝ tɛtʋ tǝnɑ tɑɑ. Pɩɩ hɑŋɑ teu kɛ́ tǝkoŋkoŋ hɑlǝnɑ tɑ cɑɑnɑɑ cɑɑnɑɑ mpɛ pɑ́ pɛɛkɩ mpi pɑɑ tɔɣɔ tɔ nɑ pɑ́ kpisi.
12 Pǝ kɔmɑ nɑ Yɑkɔpʋ nɩɩ sɩ tɔɣɔnɑɣɑ pee wɛ Icipiti, ɩlɛnɑ ɩ́ kʋsɩ tɑ́ cɑɑnɑɑ cɑɑnɑɑ mpɛɣɛ tɔm kɑncɑɑlɑɣɑ nyǝm nɑ ɩ́ tili.
13 Pɑ kɔmɑ nɑ pɑ́ mǝlɩ tɔm nɑɑlɛ nyǝm, ɩlɛnɑ Yosɛɛfʋ lɑ́ nɑ ɩ tɑɑlʋnɑɑ nyǝmɩ-ɩ. Nɑ pǝ lɑpɑ tɔtɔ nɑ Icipiti wulɑʋ sɔsɔ mɑɣɑmɑɣɑ nɑ́ɑ́ cɛkǝnɑ ɩ piitim.
14 Ḿpʋ́ɣʋ́ Yosɛɛfʋ tilɑ ɩ cɑɑ Yɑkɔpʋ nɑ ɩ nyǝ́mɑ tǝnɑ wɑɑlɩ nɑ pɑ́ kɔɔ. Pɑ wɛ yʋlʋnyɔɔŋ nɩɩtoso nɑ nɑɑnʋwɑ nɑ kɑkpɑsɩ.
15 Mpʋ pǝ lɑpǝnɑ Yɑkɔpʋ nɑnɑ Icipiti pote, nɑ ɩ́ cɑŋ ɩ́ sɩ tǝnɑ. Tɑ cɑɑnɑɑ cɑɑnɑɑ nɑ́ sǝpɑ tǝnɑ tɔtɔ.
16 Pɑ kpɑkɑɣɑɑ-wɛɣɛ nɑ pɑ́ mǝlǝɣǝnɑ Sikɛm, nɑ pɑ́ piŋ-wɛɣɛ pǝlɑɑʋ ŋku Apǝlɑhɑm kɑ yɑpɑ Hemɔɔ nyǝ́mɑ kiŋ nɑ liɣitee tɔ kʋ tɑɑ.
17 Pǝ kɔmɑ nɑ pǝ́ tɑlɑ nti Ɩsɔ kɑ tɔmɑ sɩ ɩ kɑ́ lɑ Apǝlɑhɑm tɔ tǝ lɑpʋ tɔ, tɑ́ piitim nyǝ́mɑ hukɑ sɔsɔm, pɑ pɑɣɑʋ kɛ Icipiti wɛ sɔɣɔntʋ.
18 Ḿpʋ́ɣʋ́ wulɑʋ sɔsɔ kʋfɑlʋ nɔɣɔlʋ nɑ́ cɑɣɑɑ, ɩ́lɛ́ ɩ tɑɑ nyɩ Yosɛɛfʋ.
19 Wulɑʋ ɩnɩ ɩ lɑpɑ tɑ́ piitim kɛ ɑcilɑɣɑtʋ. Ɩ tʋ tɑ cɑɑnɑɑ cɑɑnɑɑ kɛ wɑhɑlɑ kɛ teu nɑ kʋcɑɑlʋɣʋ, sɩ pɑ́ lɔ pɑ ɑhʋlʋmnɑɑ nɑ pɑ́ sɩ.
20 Wɑɑtʋ ɩnɩ ɩ tɑɑ kɛ́ pɑ lʋlɑ Moisi. Ɩ kɑ kɛ́ pǝyɑɣɑ kʋpɑŋkɑ ŋkɑ kɑ te Ɩsɔ kɛ́ teu tɔ. Ḿpʋ́ɣʋ́ Moisi nyǝ́mɑ tɔɔ-ɩ ɩsɔtʋnɑɑ tooso kɛ́ pɑ tɛ.
21 Pǝ kɔmɑ nɑ pɑ́ lɔ-ɩ tɔ, Icipiti wulɑʋ sɔsɔ pɛɛlɔ hiinɑ-ɩ nɑ ɩ́ tɔkɩ-ɩ ɩsɩɩ ɩ mɑɣɑmɑɣɑ ɩ kʋlʋlʋ.
22 Mpʋ pǝ lɑpǝnɑ Moisi nyǝmɑ́ Icipiti nyǝ́mɑ nyǝm tǝnɑ. Hɑlǝnɑ ɩ́ lɑ́ yʋlʋ wei ɩ́ yɔɣɔtɑ nti tɩɩ hotiɣi ɑtɛ tɔ, nɑ ɩ́ pǝsɑ tǝmɑ.
23 Pǝ kɔmɑ nɑ Moisi pɩɩsɩ tɑlɑ nɩɩlɛ, ɩlɛnɑ ɩ́ hʋʋ sɩ ɩ kɑ́ polo nɑ ɩ́ wiili ɩ Ɩsɛɣɛlɩ nyǝ́mɑ lɛlɑɑ.
24 Moisi polɑɑ ɩlɛnɑ ɩ́ mɑɣɑnɑ Icipiti tʋ nɔɣɔlʋ ɩ́ lɑkɩ pɑ tɑɑ nɔɣɔlʋɣʋ mʋsʋŋ. Ɩlɛnɑ ɩ́ mʋ wei pɑ lɑkɩ ḿpʋ́ɣʋ́ mʋsʋŋ tɔ ɩ tɔm nɑ ɩ́ sɩɩnɑ ɩ tɩ, nɑ ɩ́ lɛɛtɩ Icipiti tʋ, nɑ ɩ́ cɑŋ ɩ́ kʋ-ɩ.
25 Moisi kɑ nyǝmɑɣɑ sɩ ɩ Ɩsɛɣɛlɩ nyǝ́mɑ kɑ́ nyɩ sɩ ɩnǝɣɩ Ɩsɔ lǝsɑɑ sɩ ɩ́ wɑɑsɩ-wɛ. Amɑ pɛlɛ pɑ tɑ nyɩ mpʋ.
26 Kʋ femɑ ɩlɛnɑ ɩ́ mɑɣɑnɑ Ɩsɛɣɛlɩ nyǝ́mɑ nɑɑlɛ nɑ pɑ́ mɑkɩ, ɩlɛnɑ ɩ́ polo pɑ loluɣu. Nɑ ɩ́ tɔ-wɛ sɩ: Apɑlɑɑ mɛ, mǝ kʋlʋm kɛ́, ɩlɛ pepe tɔɔ kɛ́ ɩ́ lɑkɩ tǝmɑɣɑ mʋsʋŋ?
27 Amɑ mʋsʋŋtʋ wei ɩ lɑkɑɣɑ ɩ tɔɣɔntǝlɛ kɛ mʋsʋŋ tɔ ɩ nyɑsɑ-ɩ tɔm sɩ: Mɑ nɑ-ŋ, tɑ́ wulɑʋ nɑ tɑ́ tɔm hʋʋlʋ.
28 Tete n tɛmɑ Icipiti tʋ kɛ kʋɣʋ tɔɣɔlɛ sɑŋɑ n nyǝmɑ́ sɩ n kɑ́ tɛɛsɩ mɑ nɑ?
29 Moisi nɩɩ mpʋ, ɩlɛnɑ ɩ se kpɑkpɑɑ nɑ ɩ́ polo ɩ́ cɑɣɑ Mɑtiyɑŋ tɛtʋ tɑɑ. Mɑtiyɑŋ tǝnɑɣɑ ɩ lʋlɑ ɑpɑlʋ piyɑ nɑɑlɛ.
30 Pǝ kɔmɑ nɑ pɩɩsɩ nɩɩlɛ cɔɔ, ɩlɛ kʋyɑkʋ nɑkʋlɩ ɩ wɛ wʋlɑɣɑ tɛtʋ tɑɑ kɛ́ pʋɣʋ Sinɑyi kiŋ. Ḿpʋ́ɣʋ́ hotiyɑ nɑkǝlɩ kɑ sʋʋ kɔkɔ mʋɣʋ, ɩlɛnɑ ɩsɔtɑɑ tillu lɩɩ ɩ tɔɔ kɛ́ hotiyɑ ŋkɛ kɑ kɔkɔ tɑɑ.
31 Moisi nɑwɑ mpʋ, ɩlɛnɑ pǝ́ lɑpɩ-ɩ piti. Tǝnɑɣɑ ɩ tuusɑɑ sɩ ɩ wiiliɣi teu, ɩlɛnɑ ɩ́ nɩɩ Tɑcɑɑ nɔɣɔ sɩ:
32 Mɑɣɑlɛ nyɑ́ cɑɑnɑɑ cɑɑnɑɑ Ɩsɔ, Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ. Tǝnɑɣɑ sɔɣɔntʋ kpɑ Moisi kɛ sɔsɔm nɑ ɩ́ seliɣi, hɑlǝnɑ ɩ́ kpisi nyǝnʋɣʋ.
33 Ɩlɛnɑ Tɑcɑɑ tɔ Moisi sɩ: Wɔɣɔsɩ nyɑ́ ntɑŋkpɑlɑ, timpi tɑɑ n sǝŋɑ mpʋ tɔ pǝ kɛ́ tɛtʋ kɑtɛ nyǝntʋ kɛ́.
34 Mɑ nɑwɑ mɑ yǝlɑɑ mpɑ pɑ wɛ Icipiti tɔ pɑ wɑhɑlɑ, mɑ nɩɩ pɑ wulɑ. Ɩlɛnɑ mɑ́ tii sɩ mɑ yɑkɩ-wɛ. Tɔʋ, kʋlɩ, mɑ tiliɣi-ŋ Icipiti.
35 Moisi wei ɩnɩ ɩ tɔm Ɩsɛɣɛlɩ nyǝ́mɑ kɑ kisɑɑ tǝkpɑtɑkpɑtɑ nɑ pɑ́ tɔmɩ-ɩ sɩ: Tǝ nɑ-ŋ, tɑ́ wulɑʋ nɑ tɑ́ tɔm hʋʋlʋ tɔ, kʋlʋm ɩnǝɣɩ Ɩsɔ tɑɣɑnɑ kʋsʋɣʋ nɑ ɩ́ tili pɑ kiŋ, sɩ ɩ́ lɑ pɑ wulɑʋ nɑ ɩ́ wɑɑsɩ-wɛ nɑ ɩsɔtɑɑ tillu wei ɩ kɑ lɩɩ ɩ tɔɔ kɛ́ hotiyɑ kiŋ tɔ ɩ toŋ tɑɑ.
36 Ɩnɩ ɩ lɑpǝnɑ piti tǝmɑ nɑ Ɩsɔ kɔkɔlɔ nyǝm nɑ ɩ́ lǝsɩ-wɛɣɛ Icipiti tɛtʋ tɑɑ. Ɩ lɑpɑ mpʋ tɔtɔɣɔ sǝsǝncɑɑsɩ teŋku tɑɑ nɑ wʋlɑɣɑ tɛtʋ tɑɑ, hɑlɩ pɩɩsɩ nɩɩlɛ.
37 Moisi ɩnɩ ɩ heelinɑ Ɩsɛɣɛlɩ nyǝ́mɑ sɩ: Ɩsɔ kɑ́ kɔnɑ-mɛɣɛ Ɩsɔ kʋyɔɣɔtʋtʋ tɛlǝsʋlʋ nɔɣɔlʋ wei ɩ wɛ ɩsɩɩ mɑ́, nɑ ɩ kɑ́ wɛɛ mǝ mɑɣɑmɑɣɑ mǝ piitim tʋ tɔ.
38 Kʋlʋm ɩnɩ ɩ kɑ wɛnnɑ Ɩsɛɣɛlɩ nyǝ́mɑ mpɑ pɑɑ kotɑ wʋlɑɣɑ tɛtʋ tɑɑ tɔ pɑ kiŋ. Ɩ́ nɑ ɩsɔtɑɑ tillu wei ɩ kɑ yɔɣɔtǝnɑ-ɩ pʋɣʋ Sinɑyi tɔɔ tɔ pɑ wɛnnɑ tɑ́ cɑɑnɑɑ cɑɑnɑɑ kiŋ kɛ tǝnɛ ɩnɩ. Moisi ɩnɩ ɩ mʋnɑ Ɩsɔ Tɔm nti tǝ lɑkɩ tǝmlɛ kɛ sɔsɔm tɔ sɩ ɩ tɛlǝsǝɣɩ-tʋ.
39 Amɑ tɑ́ cɑɑnɑɑ cɑɑnɑɑ tɑ nɩɩnɑ-ɩ. Pɑ kisɑ-ɩ nɑ pɑ́ kpɑɣɑ pɑ lɑɑkɑlǝnɑɑ nɑ pɑ́ mǝŋnɑ Icipiti.
40 Hɑlǝnɑ pɑ́ yɔɣɔtɩ Alɔŋ sɩ: Lu-tʋɣʋ tʋɣʋ nɑ tǝ́ nyǝnǝɣɩ-kʋ. Pǝ tɑɣɑ pʋlʋ, tǝ tɑ nyɩ mpi tɑ́ Icipiti tɑɑ lǝsǝlʋ Moisi tɛmnɑɑ tɔ.
41 Ḿpʋ́ɣʋ́ pɑ lupɑ nɑule nɑ pɑ́ pǝsɩ-tɛɣɛ pɑ tʋɣʋ nɑ pɑ́ lɑɑ-tɛ. Hɑlǝnɑ pɑ́ yɔɔlǝnɑ pɑ niŋ kʋlupum mpǝɣɩ teu.
42 Ḿpʋ́ɣʋ́ Ɩsɔ lɑpɑ-wɛɣɛ ɑwusɑ nɑ ɩ́ yele-wɛ sɩ pɑ́ nyǝnǝɣɩ ɩsɔtʋlʋŋɑsɩ kɛ pɑ tɩɩŋ, ɩsɩɩ pɑɑ ŋmɑɑʋ Ɩsɔ kʋyɔɣɔtʋtʋ tɛlǝsǝlɑɑ tɑkǝlɑsɩ tɑɑ tɔ sɩ:
Ɩsɛɣɛlɩ nyǝ́mɑ mɛ,
mɑɣɑ ɩ́ lɑpɑ kɔtɑsɩ nɑ ɩ́ fɛɛnɩ
wʋlɑɣɑ tɛtʋ tɑɑ kɛ́ pɩɩsɩ nɩɩlɛ tɑɑ?
43 Aɑɩ, tʋɣʋ Molɔkɩ cokǝle nɑ mǝ tʋɣʋ
Lefɑŋ ɩsɔtʋlʋŋɑ lɛɛsʋɣʋ kɛ
ɩ́ kpɑɣɑɑ nɑ ɩ́ pɑɑsǝɣǝnɑ.
Ɩ tǝnɑɣɑ mpʋ, pǝ tɑɣɑ wei ɩ́ lupɑ sɩ
ɩ́ tǝŋǝɣɩ tɔɣɔlɛ?
Pǝ tɔɔ kɛ́ mɑɑ yele nɑ pɑ́ ponɑ-mɛɣɛ Pɑpiloni,
hɑlǝnɑ ɩ́ tɛɛ pǝ wɑɑlɩ.
44 Wʋlɑɣɑ tɛtʋ tɑɑ tǝnɛ ɩnɩ tɑ́ cɑɑnɑɑ cɑɑnɑɑ kɑ wɛnɑ cokǝle, nɑ tǝ tɑɑ nɑ seliyɑ kpɑɑtɑnɑɑ. Pɑɑ sikɑ-tɛɣɛ teitei kɛ́ ɩsɩɩ Ɩsɔ kɑ heeluɣu Moisi tɔ. Teitei ɩsɩɩ nte tǝ tɑkɑ Moisi kɑ nɑwɑ tɔ.
45 Tɑ́ cɑɑnɑɑ cɑɑnɑɑ cɛlɑ-tɛɣɛ pɛlɛ pɑ wɑɑlɩ nyǝ́mɑ. Ɩlɛnɑ pɛlɛ pɑ́ kpɛnnɑ-tɛɣɛ timpi Yosuwee tɛɛ-wɛɣɛ nɔɣɔ nɑ Ɩsɔ yɑsɩ piitimnɑɑ kɛ pɑ ɩsɛntɑɑ nɑ pɑ́ tɔɣɔ tɛtʋ tɔ. Nɑ tǝ́ wɛɛ tǝnɑɣɑ mpʋ, hɑlǝnɑ Tɑfiiti wɑɑtʋ.
46 Ɩsɔ lɑŋlɛ hɛɛnɑ-ɩ teu, ɩlɛnɑ Tɑfiiti nɑ́ɑ́ sǝlǝmɩ-ɩ nɔɣɔ, sɩ ɩ lɑkɩ ɩnɩ wei ɩ kɛ́ Yɑkɔpʋ Ɩsɔ tɔɣɔ tǝcɑɣɑlɛ.
47 Pǝ nɑ pǝ mpʋ tɔ, Sɑlʋmɔŋ ŋmɑnɑ-ɩ kutuluɣu ŋkʋ.
48 Amɑ pǝ tɑɣɑ ɩsɔtɑɑ Ɩsɔ Sɔsɔ ɩnɩ ɩ cɑkɩ kutuluŋ wei yǝlɑɑ niŋ ŋmɑwɑ tɔ ɩ tɑɑ se. Hɑlɩ Ɩsɔ kʋyɔɣɔtʋtʋ tɛlǝsʋlʋ mɑɣɑmɑɣɑ yɔɣɔtɑ mpʋ sɩ:
49 Tɑcɑɑ yɔɣɔtɑɑ sɩ:
Ɩsɔtɔnʋɣʋ ntɛ́ mɑ kumte.
Atɛɣɛlɛ mɑ nɔɔhɛɛ tǝsɩɩlɛ.
Ɩlɛ kutuluɣu ŋku kʋ tɑkɑ kɛ́ ɩ́ pǝsǝɣɩ nɑ ɩ́ ŋmɑ-m?
Nɑ leɣelɛ mɑ tǝhɛɛsǝlɛ?
50 Pǝ tɑɣɑ mɑ́ lɑpǝnɑ pǝ tǝnɑɣɑ mpʋ nɑ mɑ niŋ?
51 Tɔʋ, yǝlɑɑ mpɑ mɛ ɩ́ tɛmɑ keeluɣu tɔ, mǝ lɑŋɑ lɑpɑ kpɩɩsǝŋ nɑ mǝ ŋkpɑŋŋ tɛɛlɩ nɑ ɩ́ kisi Ɩsɔ Tɔm. Ɩ́ kpɛɛsǝɣǝnɑ Feesuɣu Nɑŋŋtʋ kɛ tɑm, mǝ cɑɑnɑɑ kɑtɛ kɛ ɩ́ kpɑɣɑɑ.
52 Mǝ cɑɑnɑɑ nɑɑsɑ Ɩsɔ kʋyɔɣɔtʋtʋ tɛlǝsǝlɑɑ mpɛ pɑ tǝnɑ nɑ pɑ́ sɔɔ kʋlʋm kɛ? Pɑ kʋ mpɑ pɑ heelɑɣɑ sɩ tɑmpɑnɑ tǝŋlʋ ɩnɩ ɩ kɑ́ kɔɔ tɔ. Kʋlʋm ɩnǝɣǝlɛ mǝ lɑpɑ kɔlɔmɔtɔ kɛ nɔɔnɔɔ nɑ ɩ́ kʋ.
53 Hɑlɩ mɛɣɛ ɩsɔtɑɑ tillɑɑ tɛlǝsɑ Ɩsɔ kʋsǝsɩɩtʋ. Pǝyele ɩɩ cɑɑkɩ tǝ tɔkʋɣʋ.
Ɩtiyɛɛnɩ sǝm
54 Yutɑ nyǝ́mɑ nɩɩ mpʋ, ɩlɛnɑ pɑ́ɑ́nɑ́ huu pɑ tɑɑ, nɑ pɑ́ sɑlɑ pɑ niŋ kɛ Ɩtiyɛɛnɩ tɔɔ nɑ pɑ́ tɑŋɑɑ.
55 Ḿpʋ́ɣʋ́ Feesuɣu Nɑŋŋtʋ tomɑ kʋlǝnɑ Ɩtiyɛɛnɩ kɛ teu. Ɩlɛnɑ ɩ́ teki ɩ ɩsɛ nɑ ɩsɔ nɑ ɩ́ nɑ Ɩsɔ teu sɔsɔɔm nɑ Yesu sǝŋɑ ɩ ntɔɣɔŋ tɔɔ.
56 Tǝnɑɣɑ ɩ tɔmɑ sɩ: Ɩɩ nɑɑ, ɩsɔtɔnʋɣʋ tʋlɑɑ, nɑ mɑ́ nɑɑ Yʋlʋ Pǝyɑɣɑ nɑ kɑ́ sǝŋɑ Ɩsɔ ntɔɣɔŋ tɔɔ.
57 Ḿpʋ́ɣʋ́ Yutɑ nyǝ́mɑ mɑpɑ kɑpusi kɛ teu, nɑ pɑ́ tǝkɩ pɑ ŋkpɑŋŋ nɑ pɑ́ huli Ɩtiyɛɛnɩ.
58 Nɑ pɑ́ tuli-ɩ nɑ pɑ́ lɩɩnɑ ɩcɑtɛ wɑɑlɩ, nɑ pɑ́ sʋʋ-ɩ pɛɛ yɑɣɑʋ sɩ pɑ́ kʋ-ɩ. Mpɑ pɑɑ kɛ́ pǝ ɑseetɑ nyǝ́mɑ tɔ, pɛlɛ pɑ sɩɩnɑ ɩfepu wei pɑ yɑɑ sɩ Sɔɔlɩ tɔɣɔ pɑ wontu.
59 Pɑ tɔŋnɑ Ɩtiyɛɛnɩ kɛ pɛɛ yɑɣɑʋ, ɩlɛnɑ ɩ́ sǝlǝmɩ sɩ: Tɑcɑɑ Yesu kɛlɩ-m.
60 Ɩlɛnɑ ɩ́ luŋ ɑkulɑ nɑ ɩ́ yɔɣɔtǝnɑ nɔɣɔ sɔsɔɔŋkɑ sɩ: Tɑcɑɑ, tɑɑ nyǝnɩ pɑ ɩsɑɣɑtʋ tǝnɛ. Ɩtiyɛɛnɩ yɔɣɔtɑ mpʋ, ɩlɛnɑ ɩ́ hɛɛ.