17
Lɛlʋ tusuɣu sɔɣɔntʋ
(Mɑtiyee 18:6-7,21-22; Mɑlǝkɩ 9:42)
1 Ḿpʋ́ɣʋ́ Yesu tɔmɑ ɩ ɩfɑlɑɑ sɩ: Mpi pɩɩ tusi yǝlɑɑ kɛ ɩsɑɣɑtʋ tɑɑ tɔ pǝ kɑɑ lɑŋ. Amɑ ye pǝ cǝpɑ wei nɑ ɩ́ lɑ nɑ ɩ tɔɣɔntǝlɛ lɑ ɩsɑɣɑtʋ, pʋntʋ kɑ́ nɑ.
2 Ye yʋlʋ ɩnɩ ɩ kɑ́ lɑ nɑ piyɑ sǝnɛ sɩ tɑɑ nɑkǝlɩ pǝntɩ, pǝ nǝɣǝsǝnɑ pɑ́ tʋ pʋntʋ luɣu tɛɛ kɛ́ nɑmlɛ nɑ pɑ́ tʋsɩ-ɩ teŋku tɑɑ.
3 Ɩ́ lɑ lɑɑkɑlɩ.
Ye nyɑ́ tɔɣɔntǝlɛ lɑpɑ-ŋ ɩsɑɣɑtʋ, yɑɑ-ɩ nɑ ń hʋlɩ-ɩ sɩ ɩ lɑpɑ mpi tɔ pǝ fɛɩ teu. Ye ɩ tisɑɑ nɑ ɩ́ lɑɣɑsɩ ɩ kʋlɑpʋtʋ, n kʋ-tǝɣɩ nyɑ́ tɑɑ tǝkpɑtɑɑ.
4 Ye wʋlɛ kʋlʋmtǝlɛ tɑɑ ɩ pǝntǝnɑ-ŋ tɔm nɑɑtosompɔɣɔlɑɣɑ, nɑ ɩ́ kɔŋ tɑm nɑ ɩ́ wiiki sɩ mɑ pǝntɑɑ kɛ́, n kɑ́ hʋlɩ-ɩ suulu kɛ́.
Tɑɑ tɛmnɑʋ kɛ Ɩsɔ
5 Ḿpʋ́ɣʋ́ tillɑɑ tɔmɑ Tɑcɑɑ sɩ: Lɑ nɑ tɑ tɑɑ tɛmnɑʋ kɛ Ɩsɔ sɔɔsɩ.
6 Tǝnɑɣɑ Tɑcɑɑ cɔwɑ sɩ: Ɩsǝnɑ ɩ́ tɛmnɑ Ɩsɔ kɛ́ mǝ tɑɑ tɔ ye pɩɩ tɩɩ tɑlɑ ɩsɩɩ sɔɔɣɑ pile kɛ yɑsǝlɑɣɑ, pɑɑ tʋɣʋ ŋku kʋ sǝŋɑ ɩsǝntɔ tɔɣɔ ɩ́ tɔmɑ sɩ: Kpɛsɩ tǝnɑ nɑ ń polo ń sǝŋ teŋku tɑɑ, pǝ lɑkɩ ḿpʋ́ɣʋ́.
Tǝmlɛ tʋ kʋlɑpǝlɛ
7 Mǝ tɑɑ ɑwe wɛnɑ yom nɑ ɩ́ hɑlǝɣɩ ɩ tɑwɑ nɑ ɩ́ tiikiɣi ɩ kɑlɑkǝŋ, nɑ ɩ́ lɩɩnɑ tɑɑlɛ kɛ kpɑkpɑɑ, nɑ pʋntʋ pɑɑtǝnɑ-ɩ heeluɣu sɩ: Kɔɔ lɔŋ nɑ ń cɑɣɑ nɑ ń niki tɔɣɔʋ?
8 Aɑɩ, ɩ tɔŋɩ-ɩ kɛ́ sɩ: Sɑɑ-m, ɩlɛnɑ ń lɑɣɑsɩ nyɑ́ wontu nɑ ń kɔŋnɑ-m tɔɣɔnɑɣɑ, nɑ mɑ́ tɔɣɔ nɑ mɑ́ nyɔɔ. Mɑɑ hɑɣɑɑ ɩlɛ, nyɑɑ cɑɣɑ nɑ ń tɔɣɔ nɑ ń nyɔɔ.
9 Ɩ kɑ́ nɔkɩ-ɩ sɛɛʋ sɩ ɩ lɑpɑ mpi ɩ tɔmɑ-ɩ sɩ ɩ́ lɑ nɑ ɩ́ lɑ tɔ?
10 Mpʋ ɩnɩ tɔtɔɣɔ nɑ mɛ, ye ɩ́ kɔmɑ nɑ ɩ́ tɛ mpi Ɩsɔ kɑ tʋ-mɛ tɔ pǝ lɑpʋ, ɩ́ tɔ sɩ: Tǝ kɛ́ tǝmlɛ nyǝ́mɑ kɛ yem kɛ́, nti pɩɩ wɛɛ sɩ tǝ lɑ tɔ, tǝ tike kɛ tǝ lɑpɑ.
Tɔnʋɣʋ tɔɔ ɑsilimɑ kʋtɔŋ nyǝ́mɑ wɑɑsʋɣʋ
11 Yesu kʋlɑɑ nɑ ɩ́ puki Yosɑlɛm, ɩlɛnɑ ɩ́ tǝŋnɑ Sɑmɑlii nɑ Kɑlilee pǝ hɛkʋ tɑɑ.
12 Ɩ sʋʋkɑɣɑ ɩcɑtɛ nɑtǝlɩ tǝ tɑɑ, ɩlɛnɑ tɔnʋɣʋ tɔɔ ɑsilimɑ kʋtɔŋ nyǝ́mɑ nɑpǝlɩ pɑ́ tɔ nɑ pɑ́ suli-ɩ. Pɑ wɛ yǝlɑɑ nɑɑnʋwɑ. Ḿpʋ́ɣʋ́ pɑ sǝŋɑ pooluŋ,
13 nɑ pɑ́ kpɛɛsɩ-ɩ sɩ: Tɑcɑɑ Yesu, wii tɑ́ pǝtɔɔtǝlɛ.
14 Tǝnɑɣɑ Yesu nɑ-wɛ ɩlɛnɑ ɩ́ tɔ-wɛ sɩ: Ɩ́ polo nɑ kɔtǝlɑɑ wiili-mɛ.
Asilimɑ kʋtɔŋ nyǝ́mɑ tɔŋnɑ pote, ɩlɛnɑ pǝ wɑɑ-wɛ.
15 Pɑ tɑɑ lɛlʋ nɑwɑ sɩ pǝ wɑɑ-ɩ mpʋ, ɩlɛnɑ ɩ́ mǝlǝnɑ ɩ wɑɑlɩ kɛ kpɑkpɑɑ, nɑ ɩ́ sɑŋ Ɩsɔ nɑ nɔɣɔ sɔsɔɣɑ.
16 Ḿpʋ́ɣʋ́ ɩ hotɑ Yesu tɛɛ nɑ ɩ́ sɛɛ-ɩ sɩ ɩ́ nɑ tǝmlɛ. Apɑlʋ wei ɩ mǝlɑ mpʋ nɑ ɩ́ sɛɛ Yesu tɔ, ɩ kɛ́ Sɑmɑlii tʋ.
17 Tǝnɑɣɑ Yesu tɔmɑ sɩ: Pǝ tɑɣɑ ɑsilimɑ kʋtɔŋ nyǝ́mɑ mpɛ pɑ nɑɑnʋwɑ hikinɑ ɑlɑɑfǝyɑ? Nɑ pɔɣɔlɑɣɑfɛɩ nɑɑnʋwɑ ɩnɛ ɩ wɛ le?
18 Ɩsɩɩ pɑ tɑɑ nɔɣɔlʋ tɑ tɩɩ toosi kɛlɛ sɩ ɩ mǝlǝɣɩ nɑ ɩ́ sɛɛ Ɩsɔ kɛ́ ɩ́ nɑ tǝmlɛ, ye pǝ tɑɣɑ kpɑɩ tʋ ɩnɛ ɩ pɑɑsi?
19 Ɩlɛnɑ Yesu heeli ɑsilimɑ kʋtɔŋ tʋ sɩ: Kʋlɩ, n tɛmɑ Ɩsɔ nɑ nyɑ́ tɑɑ tɔ ɩ yelɑɑ nɑ ń hiki ɑlɑɑfǝyɑ.
Ɩsɔ Kɑwulɑɣɑ kɔntɛ tɔm
(Mɑtiyee 24:23-28,37-41)
20 Ḿpʋ́ɣʋ́ Fɑlisɑnɑɑ pɔɔsɑ Yesu sɩ: Pǝlee kɛlɛ pɩɩ tɑlɑ Ɩsɔ Kɑwulɑɣɑ tɔɣɔʋ ɩlɛ? Tǝnɑɣɑ Yesu cɔ-wɛ sɩ: Pǝ tɑɣɑ sɩ Ɩsɔ tɔkɩ ɩ Kɑwulɑɣɑ nɑ yǝlɑɑ nɑɑ tǝkeelee se.
21 Pǝ tɑɣɑ ɩsɩɩ pɑɑ yɔɣɔtɩ sɩ kɑ wɛ cǝnɛ yɑɑ hɑtoo tǝnɑ. Pǝ tɑɣɑ pʋlʋ tɔɔ, ɩ́ nyɩ teu sɩ Ɩsɔ tɔŋnɑ ɩ Kɑwulɑɣɑ tɔɣɔʋ kɛ mǝ hɛkʋ tɑɑ.
22 Yesu tɛmɑ ḿpʋ́ɣʋ́ yɔɣɔtʋɣʋ, ɩlɛnɑ ɩ́ heeli ɩ ɩfɑlɑɑ sɩ: Pɩɩ kɔɔ nɑ mɛ ɩ́ nyɩɩlɩ sɩ Yʋlʋ Pǝyɑɣɑ mɑ́ mɑ kʋyɑkʋ ɩ́ kɔɔ nɑ ɩ́ nɑ-kʋ. Amɑ ɩ́ kɑɑ nɑ.
23 Pɑɑ heeli-mɛ sɩ ɩ́ pɑɑsǝnɑ hɑtoo tǝnɑ, yɑɑ ɩ́ pɑɑsǝnɑ cǝnɛ. Amɑ mɩɩ tɑɑ polo sɩ ɩ́ pɛɛkǝɣɩ.
24 Yʋlʋ Pǝyɑɣɑ mɑ́ mɑ kʋyɑkʋ wule pɩɩ lɑ kɛ́ ɩsɩɩ tɛʋ nyǝɣǝsʋɣʋ tǝŋmɛlɛʋ nɑ pǝ nɑ́ nɑ pǝ cɔɔ ɑntulinyɑ tǝnɑ tǝpɑɩ tɔɣɔ.
25 Amɑ mɑɑ tɔɣɔ kʋnyɔŋ kɛ sɔsɔm, nɑ tɑ́ kʋfɑlɑŋ yǝlɑɑ pɑnɛ pɑɑ lɔ-m tǝkpɑtɑɑ.
26 Ɩsǝnɑ pɩɩ lɑpɑ Nowee pɔɔlɛ tɑɑ tɔ, mpʋ ɩnɩ pǝ mɑɣɑmɑɣɑ pɩɩ lɑnɑ Yʋlʋ Pǝyɑɣɑ mɑ́ mɑ kʋyɛɛŋ tɑɑ.
27 Pǝ kɛɛsɑ Nowee wɛɛ ɑnɩ ɑ tɑɑ tɔ, pǝ tɔkɑɣɑ kɛ́ nɑ pǝ nyɔɔkɩ, nɑ pǝ́ hɑɑkɩ tǝmɑɣɑ ɑlɑɑ nɑ pǝ́ kpɑkǝɣɩ mpʋ yooo, hɑlǝnɑ kʋyɑŋku Nowee sʋʋ ɑtɑkɑɑ pɔɣɔlʋɣʋ sɔsɔɔʋ tɑɑ nɑ pǝ yele-wɛ, nɑ lʋm kɔɔ nɑ pǝ́ tɔɣɔ pɑ tǝnɑ tǝpɑɩpɑɩ tɔ.
28 Pɩɩ lɑ teitei kɛ́ ɩsɩɩ pɩɩ lɑpʋ Lɔɔtɩ pɔɔlɛ tɑɑ tɔ. Pǝ tɔkɑɣɑ ḿpʋ́ɣʋ́ nɑ pǝ́ nyɔɔkɩ, nɑ pǝ́ pɛɛtǝɣɩ nɑ pǝ́ yɑkɩ, nɑ pǝ́ hɑlǝɣɩ tɑwɑ nɑ pǝ́ ŋmɑɑkɩ kutuluŋ.
29 Amɑ kʋyɑŋku Lɔɔtɩ lɩɩ Sɔtɔm tǝkɛʋ tɔ, ɑsimti nɑ kɔkɔ pǝ lɩɩnɑ ɩsɔtɑɑ tǝyooo ɩsɩɩ tɛʋ, nɑ kɑ́ nyɑɣɑ pɑ tǝnɑ tǝpɑɩpɑɩ.
30 Kʋyɑŋku Yʋlʋ pǝyɑɣɑ mɑ́ mɑɑ kɔɔ tɔ, mpʋ pǝ mɑɣɑmɑɣɑ pɩɩ lɑnɑ.
31 Pǝ wʋlɛ ntɛ́ ye pǝ mɑɣɑnɑ yʋlʋ wɛ kutuluɣu pɑtɑ tɔɔ nɑ ɩ wontu wɛ tǝyɑɣɑ tɑɑ, pʋntʋ ɩ́ tɑɑ tɔ sɩ ɩ tiiki nɑ ɩ́ sʋʋ tǝyɑɣɑ nɑ ɩ́ kpɑɣɑ ɩ wontu nti tǝ wɛɛ tɔ. Nɑ ye pǝ pɑmmɑ tɑɑlɛ kɛ ɩ wɛɛ, ɩ́ tɑɑ tɔ sɩ ɩ mǝlǝɣɩ tǝyɑɣɑ.
32 Ɩ́ tɔɔsɩ Lɔɔtɩ ɑlʋ tɔm.
33 Wei ɩ́ pɛɛkǝɣɩ ɩ weesuɣu tǝcututu ɩ tɛŋnɑ sǝpʋ kɛ́. Nɑ wei ɩ́ lɑpɑ ɩ tǝɣɩ ɑwusɑ, ɩnɩ ɩ kɑ́ hikinɑ weesuɣu.
34 Pǝ wʋlɛ ntɛ́ pǝ ɑhoo, pɩɩ pɑnɑ yǝlɑɑ nɑɑlɛ hǝntɑ nyɑ́ɑlʋɣʋ kʋlʋmʋɣʋ tɔɔ, nɑ pǝ́ kpɑɣɑ lɛlʋ, nɑ pǝ́ yele lɛlʋ.
35 Pɩɩ pɑnɑ ɑlɑɑ nɑɑlɛ wɛ nɑmɑ tɔɔ, nɑ pǝ́ kpɑɣɑ lɛlʋ nɑ pǝ́ yele lɛlʋ. [
36 Pɩɩ pɑnɑ ɑpɑlɑɑ nɑɑlɛ wɛ tɑɑlɛ tɑɑ, nɑ pǝ́ kpɑɣɑ lɛlʋ nɑ pǝ́ yele lɛlʋ.]
37 Ḿpʋ́ɣʋ́ ɩ ɩfɑlɑɑ pɔɔsɑ-ɩ sɩ: Tɑcɑɑ, leɣelɛ mpʋ ɩnɩ pɩɩ lɑ ɩlɛ?
Tǝnɑɣɑ Yesu cɔ-wɛ sɩ: Timpi pʋlʋ sǝpɑ nɑ pǝ́ hǝntɑɑ tɔ, tǝnɑɣɑ yepelekunɑɑ kotiɣi.