Ado Mala Hedabi Uluguea Dëdëi Amo
Ado Dëdëi Dibe Amoïe Neala Olelo Oboba
Ado Mala Hedabi Uluguea dëdëi dibe gowegida, Isilale udia dolöge, udia dolö odoage, sulubadelaïe damula aulo, Yesu neala säla dëdëla negei dialea. Yesuea ïe hamoi amo mi gäwila hamosalea, ea udia dolöma sähalea, busadäoi nefolalebe amolima Ado Mala Hedabi säla ïmäia, Eleloi Gesamia e memeleila säila dëdëla negei dialea. Ulugu 4.18 bimalo. Dofä gelola. Udia dolö ilia yöi elö elöla hïdo elöi amo gausegi, ea ili ugila negemolö amoïe Yesuea bobasëi amoïeda, Ulugu beba gowegi Uluguea sedalu säida yafie dialea.
E sosogo amolia Yesuea nelebo hamose amoligi, ema hïdo elöla obeägï. Segeyo Melia e neegela ägüsolo amo galage, udia dolöea obeägï amoda Ulugu 1.42-48ge, 2.10ge bimalo, amase, beba wegi made wagala, Yesu Hebeni fedasolo amo galage, ilia hïdo elöla obeägïmelë. Ulugu 24.52 bimalo.
Nelebo yafie Yesuma hamoi amolige, ado yafie Yesuea säi amolige, Ulugu eamu dëdëla negei dialea. Uluguea säi dibe we gadoida, beba odoagida maade. Uluguea hïdo dëdëi amoligi odoada gowe ili. Yesu neegela ägümolöïe selesaia fiia ado säla ï amoge, sugua sibi sigi aligiloea Yesu neegela ägüi bea asi amoge, Yesuea ado besula Yu dolö idiafa nufi dibegi, Samelia dolö afädëa ugila negei amoge, amase, malö üfï afädë dabadigi nelo amo, bu eedo neebea obëgëi amoge, Yesuea ado besu odoa säi amolige, Uluguea hïdomu dëdëi. Amase, dagisi muni nelo Sagiasima besela galai amoge, Ulugu bebagimu dëdëi dië bimolömelë.
Beba gogida, Uluguea ado geloi dëdëla negei dibe amolida gowe ili. Godema gelola adomolöïege, Eleloi Gesamia hamoi hamolo amoïege, nilïa nafade hamoi amo Godea hëlo neebe amoïege, ado geloi amoli dëdëla negei dialea. Uluguea, dolöeamu made, nelebo udiafalïa hamoi amoge, ado yafie dëdëla negei dialeamelë.
Uluguea säi amoda, beba wegimu wagai made. Yesu e Hebeni fedala asibua, abosolo dolö amolia nelebo hamosa nelo amoge, Ulugu eamu beba elögi dëdëla negei dialeamelë. Abosolo Dolö Amolia Hamoi Amo bimalo.
1
Beba goweda Uluguea Diofilasama dëdëla ï
1-2 Mi gäwila hamoi amo siia bealahilä, ado mala amoïe hamoi hamolasilo besela galala nefolalo amolia nilïma säla ï amo gadola, nilï neebeawi gausiala digai amoïe dolö yafiea dëdëmolö helësësa nelomelë.
3-4 Amaimo, dafidilo Diofilasa-o, nelebo sulubadela mi gäwila hamoi amo nihï mi fädäla nabaha nelo amea, ado dima olelei amo dia dofä gabula helësëmäiaïe, nage dima mogola dëdëla ïmolöla helësëimelë.
Elisabedea ödägi gelo Yone neegela ägüi amoïege, Melia Yesu neegela ägüi amoïege säi dialea
(Ulugu 1.5–2.52)
Selesaia fii afädëa Segelaeama ado säla ïahalea, Yone neegela ägümolömelëla säi
5 Heledo e Yudiaïe gini nelo amo gaaluda, gobela ïlo afädëïe ëi Segelaea nelo. Eda gobela ïlo Abia ea beaha neloamadi gobela ïlo nelo. Ïe udia amoïe ëida Elisabede. Eege ïe yaua mäu Alono nelo.
6 Eleda Godeïe siigi asigi mogoi nelo. Elea amala neada, Dafidilo Geloiïe ado säla negei dibe amoge, ado malage, elea sulubadela bëgëla hamolo nea, elema asiai maade, hedabi nelo.
7 Gasoda, ele malö maade sulo. Mida, Elisabede e malö maade, haua salea, helegela ëdëi sali hamoi sulo.
8 Segeyo afädëgi, Abiamadi nefolalo amolia odala ï gobela ïmolö amo galada, Godeïe siigi nea, Segelaeaea odala ï amo gobela ïmolö nelo.
9 Gobela ïlo amolile mala amo bëgëla, Dafidilo Geloiïe mosö auli dibea ami höba gafisigä hedabi fedamäia gobemolö amo dolö nowëa walebelela sadu hamola beahamelebe, Segelaeaea nogila digala gobela ïmolö melï.
10 Hä, e isogi nogila digala gafisigä fedamäia gobese amo gaaluda, udia dolö gegedoi amoli sulubadela mosö amo baagido segea nea, Godema adosa nefolalo.
11 Segelaeaea amala hamosa nebegi, gafisigä fedamäia gobelo auli amoïe dafädimadi, Dafidilo Geloiïe selesaia fii afädë Segelaea neebea ami maala ulufadigila nelo.
12 Segelaeaea e beala, edefademalä fudugila bedäi.
13 Fudugila bedäsebegi, selesaia fii amea ema sähalea, Segelaea-o, dia bedämabu. Dia Godema adoi amoda Godea hä, nabi. Dïe udia Elisabedea dïe dolö malö afädë sogobamolömelë. Malö amoïe ëida Yone negemalo.
14 Dïe iso asigi ea hedabolasila obeägïlasimolömelë. Udia dolö yafie nefolalebe amoliage, e neegela ägüse amogi obeägïmolömelë.
15 Mida, Dafidilo Geloiïe siigi eda ëi sälo namolö. Eada wani ödäge, gagaolo ödäge molö mademelë. Eda emea made ägüla maala isogi seëgi, ema Eleloi Gesami nobai namolömelë.
16 Eada Isilale udia dolö yafie asigi besulasila, ilile Dafidilo Geloi Gode mia sigi obëgësa maademolömelë.
17 Eda malage geloige Elaia nelo amohï gadoi nea, Dafidilo Geloi hobeala misiäia, dafidila awäha namolömelë. Eada eedolali asigi besulasila, eedolalia ilile malësäma helësëlasimäiage, amase, udia dolö ado neadigilo neebe amolige, asigi besulasila asigi gäwi neebe amolia asigi falagasela helësëlo amo gadola helësëmäiage, ea ili helësëlasimolömelë. Dafidilo Geloi misiäia beaha nea, ea udia dolö hamogilahilä dadaiala namialamolömelëla selesaia fii amea säla ï.
18 Amala säsebegi, Segelaeaea selesaia fii amoma nabahalea, Neda ëdëi sali, amase, nïe udiage sesalebe hamoi sebe amo, dia walio ado säi amoda, dofä gabula nada abilia helësëmolödula nabi.
19 Amala nabasebegi, selesaia fii amea säla obëgësalea, Neda Gabelelo. Gode neebea amimu aligilo. Ado hedabi we dima säla ïmäia, ea ne fisiga weimelë.
20 Ä, dia nabuö. Na ado säi amo dia dofäla made helësëse goeada, walio dïe nafi dofogahago. Na ado säsebeweda, Godea daiala negei segeyo gausiala digasolo amo gala, gausiala digamolömelë. Dia adola made nea, nelebo Godea hamomolömelëla na dima säla ïasewe gausiasolo amo gala, dia adomolömelëla säla ï.
21 Segelaeaea amala hamosa neebe amo gaalu, udia dolö e beaha nefolalo amolia Godeïe mosö isogi sedadeseweda abeahäla hamosadula helësëlahilä, asigiamu hogosa nefolalo.
22 Hobeala, Segelaea e segea doadigila fedalahilä, ilibalä adomolö ulï nelo. Adoea sämolö amo ulï nea, ea sämolö helësëi amo naaboeamu oodo bibila säla ïasebegi, ilia helësësaleada, Godeïe mosö isogi idogoi sosoäla awäla melï gabula helësëi.
23 Holöfalï nelolahilä, ïe hamoi hamolo segeyo amoligi hamosa maadela, Segelaea e hï mosöa obëgëi.
24 Hobeala, ïe udia Elisabedeïe isogi malö fagulo hagui aube bia mosöamu musügä sulo. Amala salea Elisabedea sähalea,
25 Dafidilo Geloia ne ugila negesebe weada, segeyo wegi ea ne helësëla, udia dolöïe siigi ne hewalasilo amo haisa maadeila säi.
Selesaia fiia, Melima Yesu neegela ägümolömelëla säla ï
26 Elisabede e malö fagulo hagui aube gafe sebegi, Godea selesaia fii Gabeleloma, di Galiliïe sege ëi Nasalese gaamugi mosaloi.
27 E udia dolïsä afädë Gini Debidi sosogo nelo amogali säi sebea ami asi. Dolö amoïe ëida Yosebe. Dolïsä amoïe ëida Meli.
28 Amala hamoi sebegi, Gabelelo e dolïsä amo sebea ami awälahilä, ea säla olesalea, Udia malö, di go gabio. Dafidilo Geloi e dibalä gedola nea, edefademalä obeägïsa namiäia, di neala dofä obeägïlasimelëla säi.
29 Ado säi amo Melia nabala edefademalä fudugila bedäla, ea säla olei amoda, abeahäladula asusugala helësësa sulo.
30 Amala helësësa sebegi, selesaia fii amea ema sähalea, Meli-e, dia bedämabu. Godea di helësëla, dimada obeägïsa neamelë.
31 Dia malö fagulo hagui sulolahilä, dolö malö ägümolömelë. Malö amo ägüseda, ïe ëi Yesu negemalo.
32 Malö amoda, ëi sälo namolömelë. Udia dolö sulubadelaea eda Dofä Ilibia Edefade neebe amoïe malö neala sämolömelë. Dafidilo Geloi Godea e ïe yaua mäu Debidiïe beaha aligilo filodaia samialamolömelë.
33 Eda Yeigabaïe mosö amoli beaha namolöi namolömelë. Ea Beaha Maadela Sigi Neebe amoda, namolöi namolömelëla säla ï.
34 Amalebegi, Melia selesaia fii amoma nabahalea, Neda dolö made fii sebe amo. Walio dia ado säi amoda, abilia hamola hamomolödula nabi.
35 Amala nabasebegi, selesaia fii amea ema säla obëgësalea, Eleloi Gesami dima digalahilä, Dofä Ilibia Edefade neebe amoïe geloi dima salugamolömelë. Ameada, dia malö ägümolö amoda, asigi mogoi hedabi negei neëgida, Godeïe malö neala säha namolömelë.
36 Di sosogo Elisabededa sesalebe sulo gaso, walio e fagulo hagui sebe ameage dolö malö ägümolömelë. Siiba, odoa ilia ema malö sogobalo made, hauala sälo amo, walioda e fagulo hagui sebegi, hä, aube gafe saleamelë.
37 Godea nelebo hamomolöi made, ulï afädëda maademelëla säla ï.
38 Amala säsebegi Melia säla obëgësalea, Neda Dafidilo Geloiïe hamoi hamolasilo udia saleawe. Dia säsebego gadola nema hamosa maademäiamelëla säi. Amala säi amo nabalahilä, e dïgïla selesaia fii e asi.
Meli e Elisabede sebea söfë asi
39 Selesaia fii amo asi baagido, Meli e nowela fodolofalï Yudiaïe sege gau dibe amo fedala digala digila awäla, gaamu afädë dibea ami besela galai.
40 Gaamu amogi besela galala Segelaeaïe mosöa nogila digalahilä, Elisabede e säla olei.
41 Melia säla olei amo Elisabedea nabi amole, ïe isogi malö dubo sulo amea fologolahilä, Elisabedema Eleloi Gesami nobai. Amasebegi,
42 Elisabedea gelolafalï sähalea, Dida udia odoa sebe amoli gadoi made. Godea dima edefademalä obeägïlasi gabu. Dia malö ägümolö amomage Godea obeägïlasimolömelë.
43 Nada hedabi edo hamoi amoïe, nïe Dafidilo Geloiïe eme di ne sebeawi misi.
44 Dia säla olei amo na naba gai amole, malö dubo nïe isogi sebe amea obeägïsalea fologoimelë.
45 Dafidilo Geloia dima hamomolömelëla säla ï amo, dia dofä gausiala digamolö gabula helësëi ameada, dia dofä obeägïsa saleamelëla säla ï.
Melia obeägïla gë udäi
46-49 Amala säla ïasebegi, Melia sähalea,
Neda ïe hamoi hamolasilo udia iso gäwi made sebegi-iii,
hï ne beala bobasëi amea-aaa,
nïe iso asigia Dafidilo Geloiïe ëi gauia adala-aaa,
nïe gesamia nïe damula aulo Godema obeägïsawe-eee.
Gode geloi edefade neebe amea-aaa
ne hïdo elöla ugila negei ameada-aaa,
segeyo wila nofela walio nefolalebeweage-eee
hobeala namolö amoliage-eee,
obeägïlo edefade Godea negali ïla sämolömelë-eee.
Ïe ëida dofä eleloifalï nea-aaa.
50 Udia dolö walio nefolalebeweage-eee,
hobeala namolö amoliage-eee,
ebalä bedäse amolida-aaa,
ea bobasëmolömu gabio-ooo.
51 Ïe naaboea hamoi geloi edefade hamoi-iii.
Asigi dalagala hilile ëi gauia adalo nefolalo amolida-aaa,
haila dusudasilasimelë-eee.
52 Beaha aligilo nefolalo amoli, ea ilile filodaia amila neala nagadaiahalea-aaa,
nagadaialo nefolalo amolida, oböla neala gauia adogoimelë-eee.
53 Udia dolö sïdëa baagoi nefolalo amoligali-iii,
ea nelebo hedabi bolela muäia ïahalea-aaa,
oböla, udia dolö nelebo yafie negei nefolalo amolimada-aaa
ilile naabogi nelebo afädë made gaula-aaa,
memalä ili badumu mosalaimelë-eee.
54-55 Ea ïe hamoi hamolasilo Isilale ili ugila negesalea-aaa,
ilile mäuma hamomolöla säla negei amo gadola-aaa,
Abalahamamage-eee,
ïe yaua mäu amolimage-eee,
bobasësa namolöi namolöla helësësamu neamelë-eeela
Melia säla wagai.
56 Meli e Elisabedebalä aube ohodoa gadoi sulolahilä, hï segea obëgëi.
Elisabedea Yone neegela ägüi
57 Elisabede e malö ägümolö fu besela galasebegi, olobola sulolahilä, dolö malö neegela ägüi.
58 Hä, Elisabedebalä ami sefolalo amoliage, hïle sosogofalï amoliage, Dafidilo Geloia e edefademalä bobasëila säi amo nabalahilä, Elisabedela hiligila obeägïsa nefolalo.
59 Ägüla misi segeyo gödö besela galasebegi, ilia malö dubo amoïe gafodo damumolö misi. Maalahilä, ilia malö amoïe eedo Segelaeaïe ëi negedelä hamosebegi,
60 emea sähalea, Ai, go made. Ïe ëi Yone negemolömelëla säi.
61 Amala säsebegi, ilia ema säla obëgësalea, Di sosogo neebe amogida, ëi goda maademelëla säi.
62 Amala sälahilä, ilia eedoma naaboea oodo bibila nabahalea, Dïe malö goïe ëida nowë negemolö helësësebela nabi.
63 Amala nabasebegi, ea ilima naaboea oodo bibila, beba neala ïmola sälahilä, ea amogi ïe ëida Yone dëdëi. Amala dëdëi amogi ili sulubadela fudugi.
64 Amo gaalu, fodolofalï Segelaea e nafi dofogai amo fisila, bu adomolö hamosebegi, ea Godeïe ëi gauia adala adosa nelo.
65 Amala hamoi amogi, udia dolö elebalä nefolalo amoli bedäla fudugi. Amala hamoi amo sulubadela Yudia sege gau dibeamadi sebe amoli sulubadelaea säla daidosa nelo.
66 Amala hamoimelëla säi nabi amoli sulubadelaea helësëlahilä nabahalea, Malö go fädäla aligiseda, abodo gadoi hamolo namolödula nabaha difolalo. Mida, Dafidilo Geloiïe geloida, malö amobalä dofä nelo amogi.
Segelaeaea ado bea säla säi
67 Malö amoïe eedo Segelaeama, Eleloi Gesami nobai nea, ea bea säla ulufahalea,
68 Isilaleïe Dafidilo Geloi Gode e maala ïe udia dolö neebe amoli sigi obëgëi amogi, nilïa ïe ëi gauia adadi.
69-70 Ea ïe bea sälo memelela odasisi nefolalo amolimadila hamomolömelëla siiba säla negei amoda gowe.
Ïe hamoi hamolasilo Debidiïe sosogomadila, nilïle damula aulo geloi gelola namiäia ea memelei gabuwe.
71 Nilïle ado nii neebe amolile naabogi amilage, nilïma bimolö habobaha neebe amolile naabogi amilage, ea nilï damula moholöïe misi.
72 Ea nilïle mäulali bobasëmolöïege, ea gomalä hamomolömelëla asialo made ado hïdo elöi hï dafidi säla negei amo helësësamu aligimolöïege amala hamoimelë.
73 Asialo made ado ea nilïle mäu Abalahamama migalïa diigila ado gelola sälo amo gadola säla negei amoda gowe.
74-75 Nilïle ado nii nefolalebe amolile naabogi amila damula awäla sigi obëgëmolömelëla säla negei. Amase, nilï nagadaiawi neebewe bedäla made, segeyo sulubadelagi ïe sidaia mala mogoige hedabi eleloige hamosa nea, ïe hamoi hamolasisa namiäiaïe amala hamomolömelëla säla negei.
76 Nïe malö-o, Dafidilo Geloi hobeala misiäia, diada ïe idi hahamogila fofodola dafidi awäha namolö amoïe, ilia dida hä, Dofä Ilibia Edefade neebe amoïe bea sälo afädë nebegola sämolömelë.
77 Ïe udia dolö amolia helësëmäia, dia ilima säla ïahaleada, Dilia nafade hamoi amo ea hësa maadela damula moholömelëla säla ïmolömelë.
78 Nilïle Gode eda hedabi bobasëlo amea amala damula moholömelë. Ea nilï bobasëlo amea, yo edefademalä afädë mudaiala besela galalahilä,
79 udia dolö gasimi sagaiage, baagoloïe sege augi hawage nefolalebe amolimada, ea yo digalasimolömelë. Nilï dalulasiloïe idigi emesala mosäia sigi namolöïe, amala yo digalasimolömelëla
Segelaeaea bea säla negei.
80 Hobeala malö amo ëdëla aligilahilä, ïe gesamige geloi nelo. Amalahilä, Isilale udia dolö neebe amolia siia bimäia, e ulufadigimolö segeyo amo besela galamäia beaha neada, sege nafade udia dolö aligisia made ami nelo.