2
Melia Yesu neegela ägüi
(Madiu 1.18-25)
1 Segeyo amo gaaluda, Olomo dolö ëi Sisa Ogasadasa ea beaha aligilo gini nea, ea udia dolö beaha neebe amoli sulubadela ëi dëdëmolö dialeala säla negei.
2 Gabenaïe ëi Guliniasaea Bolobinisi Silia beaha neebe amo gaalu, gamane dolö ilia ëi dëdëla negemolöda, amo gala mi gäwila negei.
3 Amalebe, udia dolö ili sulubadela hilile segea afufula, ëi negemolö afiai.
4 Hä, Yosebe eda Galilimadi gaamu afädë dilo amoïe ëi Nasalese amila, Yudiamadi Debidiïe gaamu afädëgi asi. Gaamu amoïe ëida Bedeleheme. E Debidiïe yaua mäu nelo amea ami asi.
5 Melida Yosebe egali säi sulo amo nimolö gaalu ameada, Meli fagulo hagui sulo amola helegela ëi negemolö asi.
6 Ele Bedeleheme ami nea, Meli e malö ägümolö fu besela galai.
7 Hä, olobola sulolahilä, dolö malö abulümi afädë ägüsebegi, faguloea usulala sugua gao molö nülo falo gadoi amoïe isogi ami negesi. Amala hamoi amoïe mida, udia dolö amala gegedosalea dilo mosö nelo amo negegi dilo amea amai.
Selesaia fii ilia sugua sibi sigi aligilo amolima ado säla ï
8 Sege amoïe yala baagido nea, sugua sibi sigi aligilo odoa nefolalo amolia gasigi ilile sugua sibi sigi nefolalo.
9 Amala sigi nefolalebegi, Dafidilo Geloiïe selesaia fii afädë maala ulufalahilä, Dafidilo Geloiïe yo digalo hïdo elöi ili neebea ami yo digala besela galasebegi, ili edefademalä fudugila bedäi.
10 Bedäsebegi, selesaia fii amea ilima sähalea, Bedämabu. Nabuö. Na dilima ado hedabi afädë säla ïmolö misi neawe. Ado hedabi ameada, udia dolö fifi asi sefolalebe amoli sulubadela obeägïsa maademolömelë.
11 Segeyo walioda, Debidiïe gaamua udia afädëa malö neegela ägüimelë. Malö ameada, dili sulubadela damula moholö. Eda Dafidilo Geloi Gelesomelë.
12 Ado amo dofä gabula bimäiada, malö dubo amo sugua gao molö nülo falo gadoi amoïe isogi ami faguloea usulala negei dië bimolömelëla säla ï.
13 Selesaia fii amea ado amo säha maadeia gai amole, selesaia fii yafie Hebeniïe ami mafula selesaia fii dafidi maala nelo amobalä fodolofalï maala ulufala nelo. Amala nea, ilia Godeïe ëi gauia adogola sähalea,
14 Gode ilibia neebe amoïe ëi gauia adogosawe. Nagadaia udia dolö neebe amolia Gode obeägïlasilo nefolalebe amolimada, neala dalulasilo diamiäiamelëla
säi.
Sugua sibi sigi aligilo amolia Yesu bea asi
15 Amala sälahilä, selesaia fii amolia ili dïgïla selesaia mosöa obëgëibua, sugua sibi sigi aligilo amolia hilidomu sähalea, Walio Dafidilo Geloia nilïma nelebo besela galaila säi amo bimolöïe, Bedeleheme afiadila säi.
16 Amala sälahilä, ili fodolofalï Bedeleheme afiala Meli Yosebelege malöge ili sebe amo beagolei. Malö dubo amoda, sugua gao molö nülo falo gadoi amoïe isogi negesi dibe melï.
17 Malö amo bealahilä, ïe ado selesaia fiia ilima säla ï amo säla ïaha maadesebegi,
18 ado säi nabi amoli sulubadelaea sugua sibi sigi aligilo amolia ado säla ï amogi fudugisa sefolalo.
19 Amalebe, Meliada, ea nabi amoge, melï amoge, sulubadela ïe isogi nea salalahilä, helësësamu sulo.
20 Sugua sibi sigi aligilo amoli obëgësalea, ilia melï amo sulubadelagige, nabi amo sulubadelagige, Gode eda ilibia neala säla, ïe ëi gauia adogola aligi obëgëi. Ilia melï amoge, nabi amoge, sulubadela ilima säi amo gadola gausiala digai.
Yesuïe ëi negei
21 Malö amo ägüla misi segeyo gödö besela galasebegi, ïe gafodo damumolö segeyogi, malö amoïe ëi Yesu negei. Emea malö amo, aso, fagulo made hagula sebegi, selesaia fiia ëi Yesu negemalola säi amo gadola negei.
Simeono Analea Godeïe mosöa Yesu melï
22 Mosese nebegi Ado säla negei dibe amo gadola segeyo wagasebegi, ele Godeïe siigi nigime baai made namolöïe, Yosebe Melilea malö dubo amo Dafidilo Geloigali odala ïmolöïe, Yalusaleme gaula asi.
23 Dafidilo Geloiïe Ado säla negei dibe amo gadola, udiaea dolö malö abulümi sogobaseda, Dafidilo Geloigali odala ïmalola säla negei amo bëgëla, amala hamoi.
24 Dafidilo Geloiïe Ado säla negei dibe amea sähaleada, Haea maliabu gadoi äudä galëge, haea maliabu gadoi elöïe emalö äudä galëge, ïmalola säla negei amo gadola odala ïmolöïege ami asi.
25 Segeyo amo gaalu dolö afädë Yalusaleme ami sulo. Ïe ëida Simeono. Dolö amoda asigi mogoi nea, Godeïe mala nabahamu aligilo. Eada Isilale udia dolö damula moholö amo misiäia beaha nelo. Emada Eleloi Gesami nobai nelo.
26 Eleloi Gesamia Simeonoma sähalea, Di aso, made baagola neëgi wäla, Dafidilo Geloia Geleso moholömelëla säla negei amo misi neëda, dia bimolömelëla säla ï.
27 Eleloi Gesamia Simeono sigi gaula Godeïe mosö amoïe yala isogi digai. Digalahilä beahamelebe, Ado säla negei dibe amo gadola bëgëla hamomolöïe, eedo emelea Yesu dubo amo gaula misi neebe melï.
28 Bealahilä, Simeonoea malö amo sogobala gaula nea, Godeïe ëi gauia adala sähalea,
29 Dafidilo Geloi-e, dia dafidi ado säla negei dilo amo gadola, dïe hamoi hamolasilo gowea, nïe hame eegela, ne hä, baagomolö amo dofea.
30 Mida, dia nilï damula moholömelëla säi amo nïe siia, hä, beahawe.
31 Dia daiala negei amoda, udia dolö sulubadelaea bimäia hamoi gabuwe.
32 Eda yo digalo nea, udia dolö fii odoa neebe amoli yo digalasimolöge, dihïle Isilale udia dolö neebe amolile ëi gauia adamolöge nebegola
säi.
33 Malö amoïe ado Simeonoea säi amo nabalahilä, ïe eedo emelea asigia fudugisa nelo.
34 Hä, Simeonoea Godea ele neala obeägïlasimäiamelëla sälahilä, malö amoïe eme Melima sähalea, Nabuö. Malö goeada, Isilale udia dolö yafie digalasila, yafie nowelasimolöge, amase, e nofe elöi neebe amo bealahilä, e helësëla udia dolö yafiea dofea madela sämolöge, Godea e memelela ifosi gabugo.
35 Ameada, udia dolö yafiea iso asigigi helësëi amo, ea ulufadigisa maademolömelë. Amase, helebe siia dihïle bobagi gäwimolömelëla Melima säla ï.
36-37 Amo gaalu, bea sälo udia afädëge, ëi Ana sulo. Eda Asa sosogo, Fanueleïe idiwi sulo. E dolö fila awäla dolöbalä gäheo i gifalädalïamu sebegi, dolö amo baagolebeda, e didalo salea, ïe gäheo i nabülasi gödölasiïe odoai biyidiada, sesalebe hamoi sulo. Godeïe mosö amo fisila made, eada Gode helësëla, molö made naala, yoba gasigige Godema adosamu filo.
38 Simeonoea säla wagai amole, Ana e malö dubo amo mia ga madela salea, ea Godema nesegei. Amala nesegelahilä, ea Yalusaleme udia dolö Godea sigi obëgëmäia sisiläfüla beaha nefolalo amoli sulubadelama malö amoïe ado säla ïaha nelo.
Yosebela ili Nasalese obëgëi
39 Elea Dafidilo Geloia Ado säla negei dibe amo gadola hamosa maadelahilä, Galili segeamadi helele segea Nasalese gaamugi obëgëi.
40 Ami awäla nea, malö amo ëdëla aligilahilä, geloi nelo. Ema asigi falagasei nobai nea, Godeïe ugila negelasilo ema negesi nelo.
Malö malïbu Yesu e gobela ïlo mosöa asi
41 Gäheo i sulubadelagi Baagila Asi Segeyo amo besela galasegida, Yesuïe eedo emele, Yalusalememu awäha aligilo.
42 Yesu e gäheo i giwilasi baagilahilä, ilia segeyo edefade amoïe molö nülo mala dilo amo gadola bëgëla, hiligila Yalusaleme afiai.
43 Segeyo edefade amo baagisebegi, eedo emele helele segea obëgësa nelo. Malö malïbu Yesuda, Yalusaleme ami nebegi gaso, eleada ami neala helësëla made, obëgësa nelo.
44 Elea helësësaleada, awäse wegi awäha gabula helësëlahilä, ele obëgësalea segeyo afädë baagi. Made beasebegi awäha nea, mogogi amila ele sosogo amolimage, ele damelë amolimage, dilia melïlela naba hogosa nelo.
45 Elea hogoi amo hogosa neamu made beagolesebegi, oböla, e Yalusaleme hogola obëgëi.
46 Elea hogosa neamu segeyo ohodoa baagilahilä, oböla hobeala beahamelebe, Godeïe mosöa ami säla olelelo amoli mogogi ami salea, ilia säsebe amo nabadigi, ilima ea nabadigisa sebe melï.
47 Yesuea ado säse nabaha sefolalo amolia, e dawa edefade gaui amole, ea naba obëgëi amolegi ili fudugisa sefolalo.
48 Eedo emelea e beagolela, asigia fudugilahilä, emea ema sähalea, Aea, dia alïma amo hamoi amoda, abilia hamosalea amala hamoi. Diado alïada di hogosalea asigi säosäosa nelomelëla säi.
49 Amala säsebegi, ea elema säla obëgësalea, Alia ne hogosolo goda edoïe. Ne Naadoïe mosöa samolöi dialeala alia made helësëla dawa made nealela nabi.
50 Elema ado amala säi amoda, elea mi fädäla made helësëi.
51 Hä, e eedo emelebalä hiligila Nasalese obëgëlahilä, eedo emelea hamomola säsebe amo gadola nabala hamosa nelo. Amo gadola hamosebegi, emea, ea nabi amoge melï amoge sulubadela ïe isogi nea salahamu sulo.
52 Yesu e ëdësalea, dawa amola fädäsebegi, Godeage udia dolöeage ema boba gosala nelo.