10
Yesuea dolö nabülasi gifalädalïaïe odoai äudä mosaloi
1 Hobeala, Dafidilo Geloia dolö nabülasi gifalädalïaïe odoai äudä memelelahilä, ili dafidila mosäia, ea äudä äudäla sege dibeamadige, gaamu dibeamadige, e moholöido amogi dafidi afiamaloi.
2 Ea ilima sähalea, Sagaia molö bëi yafie difolalea gaso, hëhela gegedola negelasimolöïe, hamoi hamolo amolida, ede made gabumelë. Amai gabugi, sagai eedoea ïe sagaia hamoi hamomolöïe, hamoi hamolo hï fisiga gamäia, ema adosa namialo.
3 Dili hä, mosäia. Gaso, nabuö. Sugua sibi malö gadoi ilua ügülo nefolalebea ami, na dili fisiga gahagomelë.
4 Dili afiahaleada, muni saleloge, aduge, emo usililoge, gaula made mosalo. Idiafa udia dolö beaseda, gausiala made, baagimalo.
5 Dili afiala mosö afädëgi nogila digalahilä, dafidi gowedale sämalo. Dalulo mosö wegi sebe dilibalä namiäiala sämalo.
6 Amala sälahilä, mosöa ami sefolalebe amoligi, afädëa dalulo hamei seëda, dilile dalulo amo dolö amea gaula namolömelë. Be, ami sefolalebe amoligi, afädëa dalulo amogi hamei made seëda, dilile dalulo amo dihilima obëgëmolömelë.
7 Amase, mosö dili aligise afädë amogimu diaha namialo. Dili molö molöge, ödä molöge, ilia ïase amo naha namialo. Mida, hamoi hamolo neebe amolida, bidi nimolö dialea. Mosö odoagi, made fifi nawemalo.
8 Gaamu afädëgi besela galasegi, ami fii amolia säla olela, mosöa mofiamola säseda, ami awälahilä, molö ilia ïase amo mualo.
9 Gaamugi ami oloi difolalebe amoli wahilasisaleada, ilima Godea Beaha Maadela Sigi Neebe amo, ga made misi dialeamelëla sämalo.
10 Gaso, dili awäla gaamu afädëgi besela galasegi, dili säla olela, mosöa mofiamola made säseda, mosö baagila, idi dibe amogi awähalea, gomalä sämalo.
11 Dilile gaamu goweïe gulu dao nilïle emogi baai goweda, dilia asiala hamoi amo olesalea, fëfëla salala awähamelë. Godea Beaha Maadela Sigi Neebe amo ga made misi dibe amo hedabola helësëmalola sämalo.
12 Na dilima sähago. Memelela gudimolö segeyo besela galasolo amo gala, Sodomo ilibalä memelela gudimolö amo gadola made, dofä baagila awäla, gaamu amogi nefolalebe amolibalä, gelolafalï memelela gudimolömelëla säi.
Udia dolö asigi made besusebe amoli asigiisebela säi
(Madiu 11.20-24)
13 Yesuea ado aso, sähamu nea sähalea, Gaamu Golasini udia dolö dili, asigii gabu. Amase, Bedesaida udia dolö dilige, asigii gabu. Mida, dili nefolalebea ami geloi melëlo made gadoi hamoi amo gadola, gaamu Daia Saidonolemadi dafidi hamoi galebeda, ilia siiba asigi besula, nafade edefade hamoi amoïe ulufala, hewai fagulo salugalahilä, nisibu uii filabio.
14 Memelela gudimolö segeyo besela galasolo amo gala, Daia ilibaläge, Saidono ilibaläge, memelela gudimolö amo gadola made, dofä baagila awäla, dilibalä memelela gudimolö amoda, gelolafalï memelela gudimolömelë.
15 Amase, Gabaniama dilige, Godea dili gauia adogola selesaia mosöa fedamolöla helësësale. Ai. Dilida heli segea nedala digamolömelë.
16 Afädëa dilile ado nabaseda, nïe adoge nabahagomelë. Afädëa dilima bimolö habobaseda, nemage bimolö habobahagomelë. Gaso, afädëa nema bimolö habobaseda, ne fisiga welo amomage, bimolö habobahagomelëla säi.
Dolö nabülasi gifalädalïaïe odoai äudä asi amoli obëgëi
17 Dolö nabülasi gifalädalïaïe odoai äudä afiai amoli obëgësalea, obeägïla aligi obëgëi. Obëgëlahilä, ilia sähalea, Dafidilo Geloi-e, nilïa dïe ëi säsebegi, mugabe fedai nefolalo amoliage, nilïle ado nabala bëgësiola säi.
18 Amala säsebegi, Yesuea ilima säla obëgësalea, Na beaha nebegi, mugabe Saidani sege yabagelelo wäla, mudaiala digala aligise melïmelë.
19 Hä, nabuö. Dilia baagolo nubage, hamabuluge diëgi daiasala mosäiage, ado nii mugabe Saidaniïe geloi baagila mosäiage, geloi amo gaula namiäia, na dilima ï amomelë. Afädëa dili made neala nafademolömelë.
20 Amaimo, mugabe amolia dilia säse nabase amogida, obeägïla made, Godea dilile ëi selesaia mosöa dëdëla negei dibe amogi, obeägïsa namialola säi.
Yesuea Eedoma obeägïla nesegei
(Madiu 11.25-27; 13.16-17)
21 Segeyo amo gala, Eleloi Gesamia Yesuïe isogi obeägïlasisebegi, Yesuea sähalea, Mudaiaïege nagadaiaïege Dafidilo Geloi Naado-o, na dïe ëi gauia adaha. Mida, asigi falagasei nefolalebe amolimage, nagadaia mala dawadigi nefolalebe amolimage, dia musügä negelahilä, oböla, malësä gadoi nefolalebe amolima, nelebo amoli ulufala olei amogi. Ae, nïe Naado. Dihï hamomolö helësëi amo gadola, amala hamoi gabumelë.
22 Nïe Naadoea nelebo sulubadela nema gausimelë. Afädëa Malö eda gowe neala dawa mademelë. Naadoea hïdomu dawadigi nea. Amase, afädëa Naado eda gowe neala dawa mademelë. Malöea hïdomu dawadigi nea. Amase, Malöea ïe Eedo olemolö helësëse amolima olesegi, iliage e gowe gabula dawadigisa neamelëla säi.
23 Amala sälahilä, Yesuea ïe bëgëla aulo amolima besuia imogola, ilimamu sähalea, Dilida obeägïsa nea, nelebo hamose dilile siia bease gogi.
24 Na dilima säla ïahago. Bea sälo yafieage, gini yafieage, nelebo hamose dilia bease go gadola wäla, bimolöila helësëi gaso, made melï nefolalomelë. Amase, ado mala dilia nabase go gadola wälage, nabulöila helësëi gaso, made nabi nefolalomelëla säi.
Yesuea ado besula, Samelia dolö afädëa Yu dolö ugila negeila säi
25 Segeyo afädëgi, mala säla negei amo olelelo afädëa Yesu fedogola bimolöïe nowela aligilahilä, ema nabahalea, Säla Olelelo-o, ne namolöi namolö neala gaumolöïe, abilia hamomolödula nabi.
26 Amala nabasebegi, Yesuea ema säla obëgësalea, Ado säla negei dibe amogida, edo säla dëdëla negei dibeo. Dia beala, abilia helësëila nabi.
27 Amala nabasebegi, dolö amea säla obëgësalea, Dafidilo Geloi dïe Gode neebe amo dïe bobaeage, iso asigiage, geloiage, helësëloeage, boba hamosa namialo. Amase, dihïdi boba hamolo amo gadola, odoa dibalä nefolalebe amoli, boba hamosa namialola säla negei dibeola säi.
28 Amala säsebegi, Yesuea säla obëgësalea, Dia mogolafalï säimelë. Amo gadola hamosa aligiseda, namolöi namolö gaula namolömelëla säi.
29 Amala säsebegi, dolö amea, ea hamoi amo hedabola hamoila sämolöïe, Yesuma nabahalea, Odoa nebalä nefolalebeda nowëdula nabi.
30 Amala nabasebegi, Yesuea säla obëgësalea, Segeyo afädëgi, dolö afädë Yalusalemela Yaligo moholö digala asi. Awäha nebegi, fa nelo dolö odoaea, e idiafa idia negela gaulahilä, ea nelebo gäi amo sulubadela giila neaha maadela, hï eda nufudala ïalalela, baagomolöi gadoi negesiä asi.
31 Segeyo amo galamu, gobela ïlo dolö afädë idi amogimu digala moholö awähaleamelebe, dolö amo bealahilä, e idi agesugi sisigala awäla baagila asi.
32 Amo gadolamu, Ilibai dolö afädëge amogi awähalea, dolö dibe amo bealahilä, eege idi agesugi sisigala awäla baagila asi.
33 Amai gaso, Samelia dolö afädëge awähalea, dolö dibea ami besela galala, dolö amo bealahilä, ïe asigigi edefademalä bobasëi.
34 E dolö dibea ami awälahilä, welige wani ödäge söga negela, nufi amo usulaha maadei. Amalahilä, dolö amo hïle sugua dögidaia ami negesilahilä, gedola dilo mosöa ami gaula awäla, negesiä sigi nelo.
35 Amalahilä, amo aiyo amogi, Samelia dolö amea muni giwi siliba äudä gaula awälahilä, gedola dilo mosö beaha aligilo amoma ïahalea, Dia dolö gowe hedabola beaha namialo. Dia e sigi nea, dïe muni odoa fisiga gase amoïeda, ne obëgëla maala, na beselala ïmolömelëla säi.
36 Hä, fa neloea dolö amo nufudala ïalalei dibegi, diada, dolö ohodoa amoligi, dolö abodoea hamoi amea damelë hamoi gabula helësësebela nabi.
37 Ea säla obëgësalea, Dolö e bobasëi ameala säi. Yesuea säla obëgësalea, Amo hamoi amo gadola, di awäla amala hamomolö mosalola säi.
Yesu e Mada Melilea mosöa asi
38 Yesula ïe bëgëla aulolali afiala, sege afädëgi besela galai. Amida udia afädë sulo. Ïe ëida Mada. Amea Yesu sigi gaula ea mosöa asi.
39 Amida Madaïe emelë sulo. Amoïe ëida Meli. Amea Dafidilo Geloiïe emo mia ga madela maala salea, ea ado säsebe amo nabaha sulo.
40 Sebegi, Madaea molö molö amo hïdomu daiaha nea, asigia yöia idogolahilä, Yesu sebea ami awäla sähalea, Dafidilo-o, nïe namelëada, na hamosewegi, halïgïla hamosalea made. Na nihïdomu hamosebewe, dia made beasebele. Ema ne ugila negela mosöla sämola säi.
41 Gaso, Dafidilo Geloia säla obëgësalea, Mada-o, Mada-o, nelebo yafie dibe amoïe asigia säosäolahilä, asusuga asusugai neago
42 gaso, nelebo afädëmu hamomolö dibego. Melia nelebo memelela nease goweda, afädëa fedela made nimolöla säi.