9
Yesuea abosolo giwilasi amolima hamoi ï
(Madiu 10.5-15; Maga 6.7-13)
1 Yesuea abosolo giwilasi amoli misialolahilä, ilia mugabe fedai nefolalebe amoli nesila digimäiage, olo elö elöla oloi difolalebe amoli wahimäiage, ilima geloige, beaha aligilo geloige ï.
2 Amalahilä, Godea Beaha Maadela Sigi Neebe amoïe ado mala säla ïïa afiahaleada, oloi difolalebe amoli wahila aligi afiamalola säi.
3 Ea ilima sähalea, Dili afiahaleada, nelebo gaula made mosalo. Galiamoge, aduge, molöge, munige, fagulo äudäge, gaula mosabiola säi.
4 Hä, dili afiala sege afädëgi besela galala, mosö afädëgi nogila digase amogimu diaha nelolahilä, giso näiadodi afiahalea, mosö amo dïgïla mosalo.
5 Dili afiahalea, udia dolö gaamu afädëgi sefolalebe amolia, dili sigi awäla mosöa diahadula made säseda, gaamu amo dïgïla awäsolo amo gala, nilïa asiala hamoi amea gabula helësëmäia, dilile emogi gulu dao baai amo fëfëla salalahilä, afiamalola säi.
6 Amala säsebegi, ili afufulahilä, udia dolö nefolalebeadi ado mala säla ïadigi, sege sulubadelagi oloi difolalo amoli wahila digila nawesa nelo.
Heledoea Yesu nowëdula helësëla, asigia säosäosa nelo
(Madiu 14.1-2; Maga 6.14-16)
7-8 Gamane dafidilo Heledoea, Yesuea nelebo hamosa neala säi amo nabi. Nabahaleada, odoaea sähalea, Ödägi gelo Yone baagoi amo nowela misi neala säla digi. Odoaea sähalea, Elaia ulufadigila misi neala säla digi. Amase, odoaea sähalea, Goda bea sälo dafidi nelo amoligi, afädë nowela misi neala säla digisa dibe amogi, Heledo e asigia säosäosa nelo.
9 Amalebe, Heledoea sähalea, Yoneda na muugi damumalasebegi damui amo, walio nelebo elö elöla hamosa neala udia dolöea säseweda, dolö nowëa hamosa neadula säi. Amalahilä, ea Yesu bimolöïe, fu hogosa nelo.
Yesuea dolö dausini biagali molö ï
(Madiu 14.13-21; Maga 6.30-44; Yone 6.1-13)
10 Abosolo amoli obëgëlahilä, ilia hamoi amo Yesuma säla ïaha maadei. Amalebegi, Yesuea ili sigi gaula, hilidomu gaamu ëi Bedesaida moholö afiai.
11 Udia dolö yafie gegedoi amolia Yesu asi gabula helësëlahilä, e bëgëla afiai. Ili maala besela galasebegi, Yesuea obeägïla säla olelahilä, ilima Godea Beaha Maadela Sigi Neebe amoïe ado mala säla ïadigi, oloi mofiai amoli wahila didigisa nelo.
12 Hä, deadisebegi, giwilasi amolia e neebea awälahilä, ema sähalea, Udia dolö gegedoi nefolalebeweli, udia dolö aligisia made weada, molö naala midilö maade gabugi, gaamu holöfalï dibea amige, sagai mosö dibea amige, hogogola mosäia afiamalamola säi.
13 Amala säsebegi, Yesuea ïe bëgëla aulo amolima sähalea, Ili molö muäia, dilia ïmalola säi. Amalebegi, ilia sähalea, Nilïa beledi bia, seme äudäla amolemu galea. Amai diada, nilïa udia dolö yafie nefolalebe egowelile molö bidia nea mosäia helësësebelela säi.
14 Dolö yafie dausini bia gadoi amoli nefolalo. Yesuea ïe bëgëla aulo amolima sähalea, Dilia ili nabülasi bia biala fifigimalola sämola säi.
15 Bëgëla aulo amolia ea säi amo gadola säsebegi, ili hä, amo gadola fifigi.
16 Amala sefolalebegi, Yesuea beledi bia amoge, seme äudä amoge, gauia adala mudaia sida adogola nea, Godema nesegelahilä, beledi amoge, seme amoge, dagabodasi. Amala hamola, ïe bëgëla aulo amolima ïasebegi, ilia udia dolö sefolalo amoligali sogoi.
17 Amala sogoi amo, ili sefolalo amoli sulubadela naala bolesalea, odoa fea digai amo, bëgëla aulo amolia gegedola, adu giwilasi salala nobala negei.
Fidaea Afädë Memelei amoda, dimelëla säi
(Madiu 16.13-19; Maga 8.27-29)
18 Segeyo afädëgi, Yesula ïe bëgëla aulo amolali sefolalea, Yesu e hïdo Godema adosa sulo. Amala adolahilä, Yesuea ilima nabahalea, Udia dolö nefolalebe amoliada, ne nowë neala säha difolalebela nabi.
19 Amala nabasebegi, ilia säla obëgësalea, Odoaeada, ödägi gelo Yone gabula säla digi. Odoaeada, Elaia gabula säla digi. Amase, odoaeada, bea sälo dafidi nelo amoligi, afädë nowela misi gabula säla digisa dialeamelëla säi.
20 Amala säsebegi, ea ilima nabahalea, Amai diliada, ne nowë neala sähala nabi. Amala nabasebegi, Fidaea säla obëgësalea, Godea Afädë Memelei amoda, dimelëla säi.
Yesu e së naala baagolahilä, bu nowemolö amoïe säi
(Madiu 16.20-28; Maga 8.30–9.1)
21 Amala säsebegi, Yesuea ilima gelolafalï sähalea, Neda gowe gabiola afädëma säla ïmabiola säi.
22 Ea amala sälahilä sähalea, Dolöïe Malö amo së edefade molö dialeamelë. Asigi gäwi dafidilo nefolalebe amoliage, gobela ïlo busa nefolalebe amoliage, mala dawadigi nefolalebe amoliage, ema bimolö habobalahilä, e baagomäia nufulömelë. Amala hamoseda, segeyo äudä nelolahilä, osodagi e nowemolömelëla säi.
23 Amala sälahilä, ea ili sulubadelama sähalea, Afädëa ne bëgëla moholö helësëseda, hï hamea hamela helësëlo amo fisila, segeyo sulubadelagi hïle i fügäi gaula, ne bëgëla moholö dialea.
24 Mida, afädëa hïle namolö amo gaula fëdöla aligimolö helësëseda, ïe namolö amo hogosa helemolömelë. Gaso, afädëa hïle namolö amo ne helësëla fisiseda, ea ïe namolö amo gaula namolömelë.
25 Afädëa nagadaia nelegei sulubadela neala gaula neëgi, hï e hogosa heleseda, nagadaia nelegei amea, e abeahäla ugila negemolödu.
26 Afädëa nïe ëige, nïe adoge sämolö hewaseda, Dolöïe Malö maasolo amo gala, ïe yo digalo hïdo elöibaläge, Eedoïe yo digalo hïdo elöibaläge, selesaia fii hedabifalï amolile yo digalo hïdo elöibaläge, maasolo amo gala, eege amobalä hewamolömelë.
27 Na dilima dofä sähago. Dolö odoa walio wi nefolalebeweli, made baagola, neëgi wäla, Godea Beaha Maadela Sigi Neebe amo bimolömelëla säi.
Yesuïe domalo bedefala elöi
(Madiu 17.1-13; Maga 9.2-13)
28 Yesuea ado amo säha maadela, segeyo gödölasi gadoi nelolahilä, ea Fida Yone Yamesela ili sigi gaula segebidaia Godema adomolö fedai.
29 Fedala, ea Godema adosa nebegi, Yesuïe odagi bedefala, ïe fagulo gäi amo falela, yo digai hïdo elöi eleloi neebe melï.
30 Amo gaalu, dolö äudä ebalä adosa nelo. Amoleda, Mosese Elaiale.
31 Eleda, yo digalo hïdo elöibalä maalahilä, Yesu e naga föi we dïgïla moholö ga maadese amoïe, ebalä ado adosa nelo. Amoda, Yalusaleme ami hamomolö amoïe säi.
32 Fidage ebalä misi amolege, si gafodo gadugisalea süwia adidi difolalo. Ili adidi difolalo amo nowelahilä beahamelebe, Yesuïe yo digalo hïdo elöige, dolö äudä ebalä neebe amolege melï.
33 Dolö äudä amolea Yesu dïgïla, hä, awäse amo gaalu, Fidaea Yesuma sähalea, Dafidilo-o, nilï wi neebeweda hedabi gabu. Nilïa sege mosö ohodoa, afädë digali, afädë Mosesegali, afädë Elaiagalila oledulela nabi. Fidaea amala säi amoda, eada gowe sähala helësëla made säi.
34 Fidaea ado säha neebe amo gaalu, gelë häu maala, ili neebe amo dabei. Dabesebegi, ili bedäi.
35 Gelë iso amogila ado afädë säia idogosalea, Egoweda nïe malö. Nihï memelei nelo amoda gomelë. Dilia ïe ado nabualola säi.
36 Ado säi amo wagaia gase amo gaalu beahamelebe, Yesu e hïdomu neebe melï. Bëgëla aulo amolia nelebo hamose melï amoda, segeyo amo gala odoama made säla ïala, musügä negei.
Yesuea maalïbu afädëma mugabe fedai nesila digi
(Madiu 17.14-21; Maga 9.14-29)
37 Amo aiyo amogi, ili gau amo digafula daala aligisamelebe, udia dolö yafie Yesu idiafa gausiamolöïe mofiai nefolalebe melï.
38 Ili gedoia amila dolö afädëa uuala sähalea, Säla Olelelo-o, na dima gelola nabasebeweda, nïe dolö malö afädëfalï wemu gabugi, dia bimo.
39 Mugabe fedalahilä, fodolofalï uuaha aligilo nea, mugabea amulämelasilahilä, nafiadi dibu besigaha aligilo. Amea fodolo made doadigila awäla, domalo nafadesebemelë.
40 Na dïe bëgëla aulo golima nesila digimola gelola säi gaso, ilia nesila digimolöi made. Ulï gabiola säi.
41 Amala säsebegi, Yesuea säla obëgësalea, Udia dolö asigi afädë made negela, asiala hamolo walio nefolalebela dili-e, na dilile yöi gaula nea, dilibalä segeyo aboläia namolödu. Dïe malö go sigi misiëla säi.
42 Malö amo, hä, sigi gaula, Yesu neebea maaha nebegi, mugabe amea malö amo nagadaia nidala awälahilä, amulämelasi. Amala hamosebegi, Yesuea mugabe amoma nemolahilä, malö amo wahila, eedo amoïe naabogi gausi.
43 Udia dolö ami nefolalo amolia Godeïe geloi edefade amo bealahilä, ili edefademalä fudugi.
Yesu e baagomolömelëla bu agedu säi
(Madiu 17.22-23; Maga 9.30-32)
Udia dolö nefolalo amolia Yesuea hamoi amogi, aso, fudugisamu dibegi, ea ïe bëgëla aulo amolima sähalea,
44 Ado säsewe dilia hedabola nabualo. Dolöïe Malö amoda, ilia odoaïe naabogi gausimolömelëla säi.
45 Amala säi gasoda, ilia goweïe säsebela mi fädäla dawadigi made nelo. Ilia helësëmäia säla ïala made, musügä negela aligisebegi, ilia ema naba obëgëmolö amo bedäi nelo.
Baagila asi neebe amoda, nowëla nabi
(Madiu 18.1-5; Maga 9.33-37)
46 Hä, ïe bëgëla aulo amolia hilidomu sähalea, Nilïgi baagila awäla dafidilo neebe amo eda nowë neala säla gëgësa dilo.
47 Yesuea ilile asigigi helësëi nefolalebe amo bealahilä, malö holöbö afädë naabogi nabelela gaula maala, hï e mia ami ifosi.
48 Ifosilahilä, ïe bëgëla aulo amolima sähalea, Afädëa nïe ëigi, malö holöbö gowema halïgïla namolö misiëla säseda, amoda ne namolö misiëla sähagomelë. Amase, afädëa ne namolö misiëla säseda, amoda ne fisiga welo amo namolö misiëla sähagomelë. Mida, dolö ëi maade, holöbö gidogofalï afädë dili neebe sulubadela mogogi neebe amoda, baagila asi neamelëla säi.
Dilibalä ado nii made neebe amoda, dili sosogo neala säi
(Maga 9.38-40)
49 Amala säsebegi, Yonea sähalea, Dafidilo-o, afädëa dïe ëigila mugabe fedai nesisa neebe amo nilïa bealahilä, dolö amo nilïbalä nawelo made beala, Dia amamabiola säimelëla säi.
50 Amala säsebegi, Yesuea säla obëgësalea, Amamabiola sämabio. Dolö dilibalä ado nii made neebe amoda, dili sosogo neamelëla säi.
Yesu e Yalusaleme awähalea, ïe bëgëla aulo amolige, hiligila afiai
(Ulugu 9.51–19.28)
Samelia udia dolöea Yesu misiäia hamei made nelo
51 E selesaia mosöa gaula fedamolö segeyo amo ga madesebegi, Yesu e Yalusaleme moholö gelola helësëlahilä, awäha nelo.
52 Awäha nea, ea dolö odoama dafidi afiamalola säsebegi, ilia Samelia segeïe gaamu afädë dibea ami, ïe nelebo daiamolö asi.
53 Gaso, Yesu e Yalusaleme moholö awäse ameada, udia dolö ami nefolalo amolia, e made säla olela gausiai.
54 Amala hamosebe amo bealahilä, bëgëla aulo äudä Yamese Yonelea sähalea, Dafidilo Geloi-e, udia dolö gowe ili nuloea naha maademäia, alïa selesaia mosöala nulo fisiga idogomola sädulela nabi.
55 Amala nabasebegi, Yesuea besuia imogola elema nemolahilä,
56 ili sege elögi afiai.
Yesuea e bëgëla moholöïe ado säi
(Madiu 8.19-22)
57 Yesula ïe bëgëla aulolali idiafa afiaha dibegi, dolö afädëa Yesuma sähalea, Di awäsebe go gadola, ne bëgëla maahagola säi.
58 Amala säsebegi, Yesuea ema sähalea, Ilua ügülo sefolalebe amolida, naga hagali hawa dilo galea. Amase, haea sefolalebe amolige, dilo mosö galea. Amalo gaso, Dolöïe Malö eda, busa fugulo negela dilo mosöda, maademelëla säi.
59 Amala sälahilä, Yesuea dolö elöma sähalea, Ne awäsewe gadola bëgëla misiëla säi. Amala säsebegi, dolö amea nabahalea, Dafidilo-o, nïe naadodale baula obëgëmalamolö dofealela nabi.
60 Amala nabasebegi, Yesuea ema säla obëgësalea, Baagoi difolalebe amoliada, hilile baagoi amo baumäia. Diada Godea Beaha Maadela Sigi Neebe amoïe ado mala säla ïmolö mosalola säi.
61 Amase, elöea nabahalea, Dafidilo-o, na di bëgëla moholö gaso, ne sosogoma dafidi dili hawio, namialola sämalamolö dofealela nabi.
62 Amala säsebegi, Yesuea ema säla obëgësalea, Dolö sagai sagalo neebe amea, noo gäwila buugila sagahalea, baagido besula beaha nea sagalo ameada, Godea Beaha Maadela Sigi Neebe amoïe hamoi hamomolöda, ulïmelëla säi.