8
Udia odoaea Yesu bëgëla asi
1 Holöfalï nelolahilä, Yesu e gaamu sulubadelagige, sege sulubadelagige, nawesa neada, udia dolöma Godea Beaha Maadela Sigi Neebe amoïe Ado Mala Hedabi säla ïïa asi. E awäse amo gadola giwilasi amolige,
2 udia odoa mugabe nafade fedaige, oloige sefolalebegi, Yesuea dafidi nesila digila wahi sefolalo amolige, ebalä asi. Gaamu Magadala udia ëi Meli negei sulo amoma, dafidi mugabe gifalädalïa fedai sebegi, Yesuea nesila digi amoge,
3 udia elö Yoanage, eda Gusaïe udia sulo. Egoa ameada gini Heledoïe mosö sigi aligilo nelo. Amase, Susanage, udia yafie odoage ebalä asi. Udia amoliada, ilile nelebo gaui amea, Yesuge, giwilasi amolige, ugila nelegela awäha nelo.
Yesuea ado besula, molö gägä fëfëila säi
(Madiu 13.1-9; Maga 4.1-9)
4 Gaamu dilo amoli sulubadelagila udia dolö yafie Yesu neebea ami mafula gegedoi dibegi, Yesuea ado besula säla ïahalea,
5 Dolö afädëa molö gägä sagaido fëfëla aligi asimelë. Ea fëfëla aligi awäha nebegi, gägä odoa idiafa daala negei amo, udia dolöïe emoea emesala dagui dibegi, haea maala neala naha maadei.
6 Gägä odoada, igi naga abelëidaia daala negelahilä, duulu fedala bäui gaso, ödä maadesalea bausoi.
7 Amase, gägä odoada, ëfë äyo gägäi neebea daala negelahilä, ëfë äyo gägäi amola gedola fedala, yau hai nelo.
8 Gägä odoa naga hedabi dibea daala negei ameada, bäulahilä i afädë afädëlaea gägä hädali afädë afädëla negeimelëla säi.
Yesuea ado besula säha maadelahilä gelolafalï sähalea, Afädëa gëhea nabulöi galëda, hä, nabualola säi.
Yesuea ado besula sämolö mi dibegi säi
(Madiu 13.10-17; Maga 4.10-12)
9 Ïe bëgëla aulo amolia ado besula säi amoïe, ema mi fädäla nabi.
10 Amala nabasebegi, Yesuea säla obëgësalea, Godea Beaha Maadela Sigi Neebe amoïe helësëmolöda dafidi, odoa ulufadigi made, musügä negei dilo amo, diliamu mi dawadigimäia ïmelë. Amaimo, udia dolö odoa ilima ado besulamu säla ïlo amoda,
ilia beaha gaso, galone gowe gabula made bimolömelë. Amase, ilia ado nabaha gaso, asigia fädäla made helësëmolömelëla
säi. Aisaea 6.9
Ado besula säi amoïe mi fädäla säi
(Madiu 13.18-23; Maga 4.13-20)
11 Yesuea ado aso, sähamu nea sähalea, Ado besula säi amoïe mida gowe. Gägä gadoida, Godeïe ado malamelë.
12 Udia dolö odoaea ado mala nabase amolida, gägä fëfëi idiafa digai amo gadoi nea. Ilia nabala asigi afädë negesegi, Godea ili damula auloea, mugabe busaea hobeala maalahilä, ado mala nabi isogi dibe amo neala gaula aulo neamelë.
13 Molö gägä igi naga abelëidaia daala negei amo gadoida, udia dolö odoaea ado mala nabala, obeägïla, aabela neala gaulo. Gaso, ili asigi afädë negei amo, difi made awäla, fedogola melëlo segeyogi, dïgïla aulomelë.
14 Molö gägä ëfë äyo gägäi neebea daala negei amoda gowe gadoi. Udia dolöea ado mala nabelo nea gaso, ili awäla nagadaia namolöïe nelebo odoagi asigia säosäologe, nelegei negelo namolöge, amase, domaloea gelola hameloge, amala helësëse ameada, ado mala nabi amo dedelela yau hahalea, gägä negei amo hedabola bëlo made neamelë.
15 Molö gägä naga hedabia daala negei amo gadoida, udia dolöea iso asigi mogoi hedabi negei neebe amolimelë. Ilia ado mala nabala, fisila made, aso maadela, gelola aligilo amea, gägä yafie negelo neamelëla säi.
Gamali wai musügä made negeloïe säi
(Maga 4.21-25)
16 Yesuea ado aso, sähamu nea sähalea, Afädëa gamali wala sagaseda, faloea made dabelo. Imidi hawage made negelomelë. Amala made. Ea walahilä, udia dolö mumusogi maase amolia yo amo bimäia, aulidaia negelo nea.
17 Nelebo sulubadela musügä negei dibe amoda, ulufadigisa maademolömelë. Amase, dabela negei dibe amoge dawadigisa maadela, ulufadigisa maademolömelë.
18 Amaimo, dilia ado nabahalea, hedabola helësëla nabualo. Afädëa nelebo gaula neebe amomada, odoa baala ïmolömelë. Afädëa nelebo afädë gaui made nea gaso, holöfalï gaula neebe amo dofea gaula neala helësësa neebe amoda, fedela nimolömelë.
Yesuïe edoo emelalida nowë
(Madiu 12.46-50; Maga 3.31-35)
19 Segeyo amo gala, Yesuïe eme edoolali e neebea ami misi. Gasoda, udia dolö yafie gegedola negegi dilo amea, ili e neebea ami nogila digamolö fu made melï.
20 Amalebeda, ili ifo baagido nefolalebegi, afädëa ema sähalea, Dibalä adomolöïe dieme didoolali ifo baagido misi neebela säla ï.
21 Amala säsebegi, Yesuea sähalea, Godeïe ado nabala bëgëla hamosa neebe amolida, nïe neme nedoolalida, amolimelëla säi.
Yesuea fo ödälema säi
(Madiu 8.23-27; Maga 4.35-41)
22 Segeyo afädëgi, Yesula ïe bëgëla aulo amolali dudaia fedala fifigilahilä, Yesuea ilima sähalea, Nilï oeabo dëgëla näiado alogodigogi afiadila sälahilä afiai.
23 Dudaia fifigila afiai gaso, Yesu eda adi dilo. Amala adi dibegi, fo edefade gelola guula maasebe amea, ödä aidagula dudaia häila fedalahilä, ili ödäea nudulä hamoi.
24 Amala hamosebegi, ïe bëgëla aulo amolia Yesu dibea ami awälahilä, e didiigisalea sähalea, Dafidilo-o, Dafidilo-o, nilï ödäea nudulä hamosebela säi. Amala säsebegi, Yesu e nowela fedalahilä, fo guula maase amomage, ödä aidagula fedasebe amomage nemosebegi, fo guula misi amoge boogelela, ödä aidagula fedai amoge aumalasi.
25 Amala hamolahilä ilima sähalea, Dilia asigi afädë negei amoda, abidi dialeala nabi. Amala nabasebegi, ili fudugila bedälahilä, hilidomu didiähalea, Dolö goweda nowëdu. Fole ödälema nemosegi, eleada, ïe ado nabelo gabula säla didiäi.
Yesuea dolö afädëma mugabe fedai nesila digi
(Madiu 8.28-34; Maga 5.1-20)
26 Amala hamolahilä, ili afiala sege Gelasa fii mosöa besela galai. Sege amoda Galili oeabo amo dëgëla alömodi dilo.
27 Yesu e dudaiala agesua daala aligisebegi, dolö afädë gaamugi ami fii mugabe odoa fedai nelo amo maaha nebegi gausiala digai. Dolö amoda, siibafalï fagulo made gäla nelo amo neada, mosöa made diala, igi äbä baagoi giwi gasa dibea amimu diaha aligilo nelo.
28 Dolö amea Yesu beala gelola üalalahilä, Yesuïe emo mia gumusula dia digala gelolafalï sähalea, Yesu, Gode Dofä Ilibia Edefade neebe amoïe Malö, dia nema edo hamomolö. Dia ne së ïmabiola fudugila gelola säi.
29 Yesuea mugabe nafade amoma dolö amo dïgïla mosaloi amea amala säi. Ilia ïe naabo emoge igi ëfëa nafodola negela sigi aligisamu nelo gaso, segeyo yafiegi ema mugabe fedala, igi ëfë hësäla sadia gahamu aligilo. Mugabe amea e yamu galahilä, sege udia dolö aligilo made dibea ami nawelasisamu aligilo.
30 Hä, Yesuea ema, Dïe ëida nowëla nabi. Amala nabasebegi, ea säla obëgësalea, Maleimelëla säi. Mida, ema mugabe yafie fedai amea, amala säi.
31 Amala sälahilä, mugabe fedai amolia Yesuma gelolafalï sähalea, Dia nilï sege uli nafade, mia made dibea ami mosölada, sämabiola säi.
32 Amo gaalu sugua yafie gau ga madela nea, moosa nefolalo. Mugabe amolia Yesuma gelolafalï sähalea, Dia nilïda sugua egowelima nogila fedamolö mosöla sämola säi. Amalebe, Yesuea ilima, Ü, amamalola säi.
33 Amala säsebegi, mugabe amolia dolö amo dïgïla awäla, sugua amolima nogila fedai. Amalebegi, sugua amoli gau domaladi baluluia digafula oeaba nogila digala, ödäea naha maadei.
34 Amala hamose amo bealahilä, sugua sigi aligilo amoli baluluia afufulahilä, gaamu dibea amige, mosö gägäwila asi dibea amige, säla ïaha maadei.
35 Amala säi amo nabalahilä, udia dolö amolia abilia hamoi walebelela, fädäla bea afiai. Ili afiala Yesu neebea beahamelebe, dolö dafidi mugabe fedai nelo amo fagulo salugala, asigi hedabi negela obëgëlahilä, Yesuïe emo mia sebe amo beala, ili bedäi.
36 Melï amolia udia dolö mofiai nefolalebe amolia nabuäia, dolö mugabe fedai nelo amo Yesuea gomalä hamola nesila digisebegi, wahimelëla säla ï.
37 Amasebegi, udia dolö Gelasa segeamadi sefolalebe amoli sulubadela edefademalä fudugila bedälahilä, Yesuma sähalea, Dida wi namolö made. Mosalola säi. Amala säsebegi, Yesu e hä, dudaia fila bu obëgësebegi,
38 dolö dafidi mugabe yafie fedai nebegi nesila digi amea, Yesuma gelolafalï, Ne dibalä mudulela nabi. Amala nabasebegi, Yesuea obëgëmalolahilä, ema sähalea,
39 Di dihï segea obëgëlahilä, Godea dima hamoi amo säla ïmolö mosalola säi. Amala säsebegi, dolö amea hïle gaamu dibe sulubadelamadi, Yesuea ema hamoi amo säla ïïa awäha nelo.
Yalusiïe idiwige, udia Yesuïe fagulogi diigi amoge
(Madiu 9.18-26; Maga 5.21-43)
40 Yesu e dudaia fila oeabo amo agesu näiado alömodi bu obëgësebegi, udia dolö gegedoi amolia, e maase amogi obeägïla, e säla olei. Mida, sulubadelaea e misiäiala beaha sefolalo amea.
41 Dolö afädë misi amoïe ëida Yalusi. Eda gedolo mosö beaha aligilo nelo. Ea Yesuïe emo mia emo gumusula dia digalahilä, ema gelola egedigila sähalea, Na mosöa awähadula säi.
42 Mida, ïe idiwi afädëfalï amomu, ïe gäheo i giwilasi gadoi gasoda, baagomolö ga madefalï dilo.
Amalahilä, Yesu e awäse amo gadola, udia dolö yafie negegila aligi afiaha dilo.
43 Amase, udia afädë gäheo i giwilasigi heale olo olosamu aligilo amoge asi. Dolö afädëa ïe olo amo wahilasimolöi made nelo.
44 Udia amo Yesuïe baagido ga madela maala nea, fagulo sedade didigala gäi amoïe bidigi diigisebegi, heale olo awäha nelo amo fodolofalï hogosa helei.
45 Amala hamosebegi, Yesuea nabahalea, Nema diigise nowëala nabi. Amala nabasebegi, ili sulubadelaea, na made, na madela säla didigasebegi, Fidaea sähalea, Dafidilo-o, dibalä udia dolö yafie negegila aligi afiaha dialea madelela säi.
46 Amala säsebegi, Yesuea sähalea, Afädëa nema diigimelë. Diigisebegi, na helësësalea, geloi nema dibe amogi doadigila asila helësësamelëla säi.
47 Amala säsebegi, udia amea, e musügä made gabula helësëla, emo gigisëlahilä maala, Yesuïe emo mia gumusula dia digai. Udia dolö sulubadela amolile sidaia salea, ea Yesu diigi amoïe mi fädäla sälahilä, ne fodolofalï wahimelëla säi.
48 Amala säsebegi, Yesuea ema sähalea, Nidiwi-e, dihï asigi afädë negei amea, di wahigomelë. Dalulo salugala mosalola säi.
49 Yesuea amala säha nebegi wäla, gedolo mosö beaha aligilo Yalusi amoïe mosöala, dolö afädë maala ema sähalea, Dïe didiwi hä, baagoi dialeamelë. Säla Olelelo gomada, halasala sämabiola säi.
50 Amala säi amo nabalahilä, Yesuea Yalusima sähalea, Bedämabu. Dia asigi afädë negemalo. Amala hamoseda, e wahimolömelëla säi.
51 Amala sälahilä, Yesu e mosöa ami besela galalahilä, odoa ebalä nogila digamäiala fu made ïala, Fida, Yone, Yamese, eedo emela, ilimu nogila digai.
52 Digahamelebe, mumusogi ami udia dolö amoli sulubadelaea didigaola gualösa dibegi, Yesuea ilima sähalea, Didigaomabu. Malö goda baagoi made. Adi dialeamelëla säi.
53 Amala säsebegi, ilia malö amoda, hä, baagoi amodala helësësalea, ebalä öi.
54 Amala hamosebegi, Yesuea udia malö amoïe naabogi gaula nea, Udia malö, di nowemola säi.
55 Amala säia gai amole, udia malö amo hame fisigila besela galalahilä, fodolofalï nowei. Nowesebegi, Yesuea ilima sähalea, E molö muäia ïmalola säi.
56 Amala hamoi amogi, malö amoïe eedole emelele asigigi edefademalä fudugisebegi, Yesuea elema gelola sähalea, Walio hamoi amoda, afädëma säla ïmabiola säi.