7
Yesuea ami beaha aligiloïe hamoi hamolasilo afädë wahilasi
(Madiu 8.5-13)
1 Yesuea ado amo udia dolöma säla ïaha maadelahilä, e Gabaniama awäla besela galai.
2 Amida, ami hädali afädë beaha aligilo nelo amoïe hamoi hamolasilo afädë, ea edefademalä boba hamoi nelo amo, oloi baagomolöfalï dilo.
3 Amala dibegi, odoaea Yesu neala säi amo nabalahilä, beaha aligilo amea Yu udia dolö ilile asigi gäwi dafidilo amolima sähalea, Yesu maala, ïe hamoi hamolasilo oloi amo wahimäia, ema säla ïmolö mosaloi.
4-5 Ili awäla, Yesuma gelola sähalea, Dolö beaha aligilo ameada, Yuda nilï boba hamolahilä, nilïle gedolo mosö ea olasi ameada, dia e ugila negemolöda, dofea galea. Eda hedabimelëla säi.
6 Amala säsebegi, Yesu e, hä, ilibalä asi. Awäla hä, mosö ga madela suägïla nebegi, beaha aligilo amea e damelë odoa amolima ado säsisalea, Yesu gagai awäla ema gomalä säla ïmalo. Dafidilo-o, dida na mosöa baagi sëla moholö gabu. Nafade ne gadoia mosöa di nogila digamolö amoda, dofea made gabumelë.
7 Ne dofea madela helësëse weada, nihï di neebea maala säla moholö amoge dofea made gabumelë. Dia adoeamu säsimäia. Säseda, nïe hamoi hamolasilo amo wahimolö.
8 Na säsebe amoïe mida, gomalä. Nage ami beahamu aligilo geloi nefolalebe amoli hawa aligilo. Amase, ami dolö odoa nefolalebe amoliage, ne hawa aligilomelë. Na afädëma mosöla säseda, e aulomelë. Amase, elöma misiëla säseda, e mulomelë. Na nïe galabaia hamoi gadoi hamolasiloma gowe hamomola säseda, amo gadola hamolomelëla säila säla ïmalola säi.
9 Amala sämalola säla ï amo nabalahilä, Yesu e, ea säi amogi edefademalä fudugilahilä, besuia imogola nea, udia dolö yafie e bëgëla mofiasebe amolima sähalea, Na dilima säla ïahago. Afädëa asigi afädë go gadola negei neebe, na made melï. Isilale udia dolö hili iligige, egowe gadola negei neebe, na made melïmelëla säi.
10 Amala säsebegi, dolö mosaloi amoli mosöa obëgëlahilä beahamelebe, hamoi hamolasilo amo, hä, wahi sebe melï.
Yesuea udia didalo afädëïe malö nowelasi
11 Holöbö nelolahilä, Yesu e Naina gaamugi moholö awäsebegi, ïe bëgëla aulo amolige, udia dolö yafie odoage gedola ebalä afiai.
12 E awäla, gaamu yala amalei amoïe idi nogila digalo mia besela galaha nebegi, dolö odoaea baagoi afädë baumolöïe, yala baagido gaula mofiaha dibegi, gausiala digai. Baagoi amoïe emeada, dolö malö afädë amomu sogobai sulo. Eme amoda, didalo sulo. Gaamugi ami fii udia dolö odoa yafiege ebalä mofiaha dilo.
13 Dafidilo Geloia udia didalo amo beala, edefademalä bobasëlahilä, ema sähalea, Dïimabula säi.
14 Amala sälahilä, Yesu e iwasala gaui amo ga madela ami awäla nea, iwasala gaui dafu amogi diigi. Amalebe, iwasala gaulo dolö amoli nefolalo. Yesuea sähalea, Malö malïsä, na dima säha. Nowemola säi.
15 Amala säsebegi, malö baagoi amo nowela galala adoi. Adosebegi, Yesuea malö amoïe eme amo hïma ï.
16 Udia dolö nefolalo amoli sulubadela fudugila bedälahilä, Godeïe ëi gauia adogola sähalea, Bea sälo edefade afädë nilï neebeawi maala, ulufadigila besela galalahilä, Godea ïe udia dolö ugila negemolö misi gabula säi.
17 Yesuea amala hamoi amo udia dolö amolia gaula afufula, Disiligi Yudiamadige, sege odoa ga madela dibe amoli sulubadelamadige, säla daidosa maadei.
Ödägi gelo Yonea ïe bëgëla aulo äudä Yesu neebea mosaloi
(Madiu 11.2-19)
18 Yoneïe bëgëla aulo amolia Yesuea nelebo hamoi amo ema säla ï. Amala säla ïasebegi, Yonea ïe bëgëla aulo äudä amole misialolahilä
19 elema sähalea, Alia Dafidilo Geloima gomalä nabulö mosalo. Afädë moholömelëla säi amoda, dile, ma, nilïa elö beaha namolöledula nabualola säla ï.
20 Amala säsebegi, ele awälahilä Yesuma sähalea, Alïda ödägi gelo Yonea di neebea misialosebegi misimelë. Ea dima gomalä nabualola säsio. Afädë moholömelëla säi amoda, dile, ma, nilïa elö beaha namolöledula nabulö mosalola säsebegi misimelëla säi.
21 Amo galada, Yesuea udia dolö olo elö elöla oloi difolalo amoli wahila digi, mugabe nafade fedai difolalo amoli nesila digila digi, si golai difolalo amoli siia bimäia, wahila digisa nelo.
22 Hä, Yesuea dolö äudä amolema säla obëgësalea, Ali Yone neebea obëgëla awälahilä, gomalä säla ïmalo. Alia walio nelebo hamose melï amoge, nabi amoge, ema säla ïahaleada, Si golai nefolalo amolige, siia beaha maadela, emo nafadei sefolalo amolige, emesala nawela, gudubu hamoi sefolalo amolige, wahisa maadela, amase, gëhe gai sefolalo amolige, nabaha maadela, baagoi difolalo amolige, nowelasisa maadela, busadäoi nefolalebe amolima Ado Mala Hedabi säla ïaha neebeola sämalo.
23 Afädëa ne beala ïe asigi afädë negei amo made digase amoda, obeägïsa neamelëlage, säla ïmolö mosalola säla ï.
24 Malö äudä Yoneïe ado gaula mosalalo amole obëgëibua, Yesuea udia dolö gegedola nefolalo amolima, Yoneïe helësëla sähalea, Sege nafadeia udia dolö aligilo made dibea ami afiai amoda, dilia edo bimolö afiai. Dili afiai amoda, giisi sedade foea auai dibe amo bimolö afiaile.
25 Amai made galëda, dili afiai amoda, edo bimolö afiai. Dolö afädëa fagulo hedabifalïmu salugai neebe amo bimolö afiaile. Nabuö. Fagulo hïdo elöi salugaloge, domaloïe molöge, nelegeige, yafie negelo amolida, ginia mosöa dilo neamelë.
26 Gaso, dili afiai amoda, edo bimolö afiai. Bea sälo afädë neebe amo bimolö afiaile. Ä, amomelë. Amai galëda, na hä, dilima sähago. Bea sälo ameada, bea sälo odoa baagila asi neamelë.
27 Ïe helësëla, gomalä dëdëla negei dialea.
Nabuö. Nïe ado säla ïlo amo, dïe dafidila mosalamolömelë. Di e baagia emesala nawemolöïe, ea dïe idi fodolasimolömelëla
säla dëdëla negei dialea.
28 Na dilima säla ïahago. Udiaea neegela ägüi sulubadela amoligida, afädëa Yone made baagila asi nea. Gaso, Godea Beaha Maadela Sigi Neebea ami ëi maade, holöbö gidogofalï ameada, Yone baagila asi neamelëla säi.
29 Udia dolö amoli sulubadelaeage, dagisi muni nelo amoliage, Yesuea säi amo nabalahilä sähalea, Godea mala hamosebe amoda, sulubadela mogoimu hamolo dialeala säi. Amala säi amoïe mida, Yonea ödägi gesa nelo amogi ilige gei nefolalo.
30 Gasoda, Felesi dolö amoliage, mala säla negei amo olelelo dolö amoliage, Yonea ili ödägi gemäia hamei made nelo amea, Godea hamei dibe ilima olei amo baagi ï.
31 Yesuea ado aso, sähamu nea sähalea, Udia dolö walio neebe gowe ili ado abodo gadoima, oodo beala sämolödu. Ilida edo gadoi neadu.
32 Ilida malësäea magaia gaamugi salea, malësä odoama uuala säia gala sähalea, Nilïa dilile bäidama dülasilebeda, dilia gosala made aligisio. Amase, nilïa oböla, dilile bobasëi gë udäi amogige, dilia bobasëla dïila made nelomelëla sälo amo gadoida ili nea.
33 Mida, ödägi gelo Yone e maala neada, beledige wani ödäge made naala nebegi, dilia sähaleada, E mugabe fedai neala sälomelë.
34 Amase, Dolöïe Malö maala neada, molö ödäge naala nebegi, dilia sähalea, Wae! Dolö goweada, molö memelela made, badoia nüloge, wani ödäge edefade naala gagaolo dolö gabu. Goda, dagisi muni neloge, nafade hamologe nefolalebe amolile damelë go beasebelela sälomelë.
35 Amala sälo gaso, Godeïe asigi falagasei amoda mogoimu dialeala ïe malö neebe amolia ulufadigilola säi.
Udia afädëa Yesuïe emogi weli söga negei
36 Felesi dolö afädëa Yesu e ea mosöa molö molö misialola säsebegi, e ami awäla molö naha sulo.
37 Nafade hamolo udia afädëge gaamu amogi sulo. Udia amea nabelebe, Yesu maala, Felesi dolö amea mosöa molö naha saleala säi amo nabalahilä, weli hedabi gafisigäi hïdo elöi ödä i igia hamoigi usi dilo amo gaula misi.
38 E hä, Yesu baagido ga madela maala nea, dïisa nelo. Siaholö amea, Yesuïe emodaia dögi. Siaholöea nahi amo, udia amo hïle busa hilïa doga digilahilä, Yesuïe emogi gaula mimisa sulo. Amalahilä, weli gafisigäi usi gaui amo, Yesuïe emodaia ami söga negei.
39 Amala hamosebegi, e misialola sälo Felesi dolö amea hïdomu helësësalea, dolö gowe bea sälo galebeda, udia ema diigisebe goweda gowe gadoi, ea nafade hamosamu filola dawadigilabio gabula helësëi.
40 Yesuea ema sähalea, Saimono-o, na dima ado afädë sämolö helësësebe amo sähagola säi. Amala säsebegi, Saimonoea sähalea, Säla Olelelo-o, sämola säi.
41 Amala säsebegi, Yesuea sähalea, Dolö äudäea muni gaui dolö afädëma muni bidi negela nelo. Elö ameada, giwi siliba hädali bia bidi negei. Amase, elö ameada, giwi siliba nabülasi bia bidi negei.
42 Elea muni beselala ïa obëgëmolö amo maade gabugi, muni eedo amea elema sähalea, Gamelä. Fisisagola säi. Hä, dia helësëseda, muni gaui dolö amoma edefademalä boba hamomolö amoda, abodoea gabula nabi.
43 Amala nabasebegi, Saimonoea sähalea, Muni edefade bidi negei fisi amealedula säi. Amala säsebegi, Yesuea sähalea, Dia hedabola helësëi gabula säi.
44 Amala sälahilä, e besuia imogola udia amoma siila nea, Saimonoma sähalea, Dia udia gowe beasebele. Ne dïe mosöa maasebegi, nïe emo nigime hëmäia, dia ne ödä osala made ïasio. Gaso, udia goweïe siaholö nïe emodaia dögi amo, oböla, hïle busa hilïa dogasisio.
45 Ne maasebegi, dia ne gaula made mimisio. Gaso, ne dafidi misia amila udia gowea, fisila made, nïe emogi gaula mimisio.
46 Dia nïe busagia weli made hëi, gaso udia gowea weli gafisigäi gaula maalahilä, nïe emogi hësio.
47 Amaimo, na dima säla ïahago. Ea ne edefademalä boba hamolahilä hamoi ameada, ea nafade yafie hamosa sulo amoda, Godea hësa maadeimelëla ulufala oleimelë. Amaimo, dolö afädëa nafade holöfalï hamoi amo hëi ameada, holöfalï boba hamolomelëla säi.
48 Amala sälahilä, Yesuea udia amoma sähalea, Dia nafade hamoi amoda, na hësa maadeimelëla säi.
49 Amala säi amo nabalahilä, molö naha sefolalo odoa amolia hilidomu didiähalea, nafade hamoi hëlo neebe egoweda, nowëdula didiäha dilo.
50 Amala didiäha dibegi, Yesuea udia amoma sähalea, Dihï Godema asigi afädë negei amea, di damula asimelë. Dalulo salugala mosalola säi.