6
Segeyo Sabadagi hamoi made hamola aialo negei
(Madiu 12.1-8; Maga 2.23-28)
1 Segeyo Sabada afädëgi, Yesu e eladi gadoi ëi widi sagai mogo amogi awäha nelo. Awäha nea, ïe bëgëla aulo amolia widi amoïe gägä amo faila, naaboea nologela iso hedefala nana awäha nelo.
2 Felesi dolö nefolalo amolia nabahalea, Segeyo Sabada gafegi made hamolo negei amo, oböla, dilia hamosebegoda edoïela nabi.
3 Amala nabasebegi, Yesuea ilima säla obëgësalea, Debidige, ebalä aulo amolige, ili sïdëa baagosalea, Debidia hamoi dëdëla negei dibe amo dilia made nidei neale.
4 Ea Godeïe mosöa nogila digala, beledi Godegali odala ï dilo amogi, gobela ïlo neebe amoliamu nülo dilo amo nealahilä, odoa hï nahalea, odoa ebalä aulo amoli muäia neala ïla säi.
5 Yesuea säla wagala sähalea, Dolöïe Malö neebe amoda, segeyo Sabadaïe Dafidilo neala säi.
Segeyo Sabadagi Yesuea dolö naabo baagoi wahi
(Madiu 12.9-14; Maga 3.1-6)
6 Segeyo Sabada elögi, Yesu e gedolo mosöa nogila digalahilä, udia dolöma ado mala säla olelesa sulo. Amida dolö afädë naabo dafädi amo baagoi sulo.
7 Felesi dolö nefolalo amoliage, mala dawadigi nefolalo amoliage, Yesuma dia nafade hamoimelëla sädelälahilä, ea segeyo Sabadagi oloi afädë wahisebelela bimolöïe, ili ga madela nea, sisila beaha nefolalo.
8 Amai gaso, ilia helësësa sebe amo dawadigilahilä, Yesuea dolö naabo baagoi sebe amoma sähalea, Di nowela mogogi namolö misiëla säi. Amalebe, dolö amo nowela fedala nelo.
9 Amala nowela nebegi, Yesuea ilima nabahalea, Segeyo Sabadagi nilïa hamomolö dofeada abodo. Hedabi hamomolö dialeale, ma, nafade hamomolö dialeale. Udia dolö hedabomäia ugila negemolö dialeale, ma, baagomäia nufulö dialealela nabi.
10 Amala nabalahilä, Yesuea udia dolö sefolalebe amoli sidawewela bealahilä, dolö amoma sähalea, Dïe naabo mogodigimola säi. Amala säi amo gadola hamosebegi, bu hedabola obëgëi.
11 Amala hamosebegi, ilia edefademalä habobalahilä, hilidomu säla didigahalea, nilïa Yesuma abilia hamomolödula säha dilo.
Yesuea abosolo giwilasi memelei
(Madiu 10.1-4; Maga 3.13-19)
12 Segeyo amo gala, Yesu e Godema adomolöïe, segebi afädëgi fedalahilä, gasi sedade Godema adosamu salea, segeyo sagai.
13 Segeyo sagasebegi, ea ïe bëgëla aulo amoli e neebea ami misiäia wei. Ili mofiasebegi, ea ili nafolala giwilasi memelei. Amalahilä, ilile ëi abosolo negei.
14 Afädëïe ëi Saimono, Yesuea e bu oböla Fida negei amoge, ïe edoo Äduluge, Yamesege, Yonege, Filibige, Badolomiuge,
15 Madiuge, Domasage, Alibiasaïe malö Yamesege, Saimono, ilia ema Selodola sälo amoge,
16 Yameseïe malö Yudasage, Yudasa Isagaliada, hobeala Yesu hololömolö amoge, amoli Yesuea memelei.
Yesuea udia dolö oloi yafie wahi
(Madiu 4.24-25; Maga 3.7-12)
17 Yesula dolö amolali segebidaia amila digafula, sege hedabi fufuia asi dibea ami nefolalo. E bëgëla aulo yafie odoa amola hiligila ami nebegi, udia dolö yafie Disiligi Yudiaïe sege dibe amo sulubadelagilage, gaamu Yalusalemelage, Daia gaamule Saidono gaamule duhulu ga madela dibea amilage, mafula gegedola negegi nelo.
18 Amoli mofiai amoda, Yesuea säse amo nabadigi, ea oloi amoli wahila digimäiage mofiai. Amase, mugabe fedai mafui amoli Yesuea nesila digisebegi, wahisa maadei.
19 Geloi ema dibe amea udia dolö amoli sulubadela ea wahisa maadese amogi, udia dolö sulubadelaea Yesuma diigimolöila helësëi.
Yesuea gumusui nefolalebe amolia obeägïsa neamelëla säi
(Madiu 5.1-12)
20 Yesuea ïe bëgëla aulo amolima siila nea sähalea,
Gumusui nefolalebe dilida, obeägïsa nea. Mida, Godea Beaha Maadela Sigi Neebe amoda, dilile dibe amogi.
21 Walio sïdëa baagosa nefolalebe dilida, obeägïsa nea. Mida, hobeala dili molö bolela molö amogi.
Walio dïisa nefolalebe dilida, obeägïsa nea. Mida, hobeala dilia ösa namolö amogi.
22 Dili Dolöïe Malö amoïe neëgi, udia dolö odoaea dilima bimolö habobasege, nesila digisege, ado nafadela säsege, dilile ëi gagadela säsege, amo gadola hamose amo sulubadelagi, dilida obeägïsa nea.
23 Ilia dilima mala amo gadoi hamoseda, segeyo amo gala dilia hïdo elöla helëla obeägïsa namialo. Nabuö. Dilile bidi edefade Hebeni mumului dialea. Mida, siiba ilile mäu nefolalo amoliage bea sälo nefolalo amolibalä amo gadola wäla hamosa nelomelë.
24 Amai gaso, walio nelegei yafie negelo dafidilo dolö nefolalebe dili, asigii gabu. Mida, dili namolö aabei hedabi amo neaha maadesalea, elö nimolö made amogi.
25 Walio molö bolela nülo sefolalebe dili, asigii gabu. Mida, hobeala dili sïdëa baagomolö amogi.
Walio ösa nefolalebe dili, asigii gabu. Mida, hobeala dili gualösa nea, dïisa namolö amogi.
26 Udia dolö sulubadelaea dilile ëi gauia adogosebe dili, asigii gabu. Mida, siiba ilile yaualali dafidi nefolalo amoliage wäfalï bea sälo nefolalo amolibalä amo gadola wäla hamosa nelomelë.
Ado nii boba hamomolö mala
(Madiu 5.38-48)
27 Yesuea ado aso, sähamu nea sähalea, Na ado säse nabase dilima sähago. Dilibalä ado nii nefolalebe amoli boba hamosa namialo. Dilima bimolö habobaha nefolalebe amolima dilia hedabi hamomalo.
28 Odoaea Godea dili neala nafademäiala säsege, Godea ili ugila negela hedabolasimäia sämalo. Dilima nafade hamosege, diliada ilile Godema adolasisa namialo.
29 Amase, afädëa dïe ba näiado go nufudaseda, ba näiado goge ema besula olemalo. Afädëa dïe gögï fagulo neala gaula awälahilä, bu elö neasege beasimalo.
30 Udia dolö sulubadelaea dima nelebo afädë ïmola ëdëgëseda, ïmalo. Amase, afädëa dïe nelebo afädë neala gaula awäseda, ïa obëgëmola egedigila sämabio.
31 Odoaea dilima mala hamomäiala hamelo amo gadola, diliage ilima amo gadola wäla hamomalo.
32 Dili boba hamolo amoli boba hamoseda, dili udia dolö hedabi neebela nowëa helësëmolödu. Nafade hamolo nefolalebe amoliage, ili boba hamolo neebe amoli boba hamolo nea.
33 Amalahilä, dilima hedabi hamolo neebe amolima hedabi hamola obëgëseda, dili udia dolö hedabi neebela nowëa helësëmolödu. Nafade hamolo neebe amoliage amo gadola wäla hamolo nea.
34 Dilia nelebo afädë ïahalea, dabe ïmäiala ïaseda, dili udia dolö hedabi neebela nowëa helësëmolödu. Nafade hamolo neebe amoliage nafade hamolo odoaea ili dabe ïmäialahilä ïlo nea.
35 Gasoda, dilibalä ado nii neebe amoli boba hamosa namialo. Ilima hedabi hamosa neada, nelebo afädë ilima ïahalea, hobeala dabe ïmäiala ïmabio. Amala hamoseda, dilia bidi edefade amo gaula, Dofä Ilibia Edefade neebe amoïe malö namolömelë. Mida, ema nesegelo made neebe amolimage, nafade hamolo neebe amolimage, mala hedabi hamolo nea.
36 Dilile Diado neebe amea ugila negelo neebe amo gadola, diliage ugila negesa namialo.
Dilia udia dolö odoaea hamosebe amo mogemabiola säi
(Madiu 7.1-5)
37 Yesuea ado aso, sähamu nea sähalea, Dilia odoaea hamose amo made mogemalo. Amala hamoseda, dilimage made mogemolömelë. Odoama asiala hamoi gabumelëla made sämalo. Amala hamoseda, dilimage asiala hamoi gabumelëla made sämolömelë. Amase, dilia odoaea nafade hamoi amo hëla fisimalo. Amala hamoseda, dilia nafade hamoi amoge hëla fisimolömelë.
38 Dilia nelebo odoagali ïmalo. Amala ïaseda, diligalige ïmolömelë. Diligali ïmolö amoda, holöfalï made. Baala ïasegi, adugi eegela salala nobala adugai ïmolömelë. Mida, dilia odoagali mogela ïase amo gadola, diligalige amo gadola wäla mogela ïmolömelë.
39 Amala sälahilä, Yesuea ilima ado besula säi. Dolö si golai elöea si golai elö amo naabogi gaula sigi aulole. Sigi awäseda, helegela balagula dögöigi digalo madele.
40 Ema olelesebe amo gadola bëgëla hamolo neebe ameada, ïe olelelo neebe amo baagilo mademelë. Gaso, ea oodo bibila hamola dawadigisa maadelahilä, olelelo amohï gadoi aligilomelë.
41 Amaimo, dia dïe didooïe sihidoa gëgelë holöbö diëda melëlo amo, amai dihïle sihidoa i gäi gadoi dibe amo helësëlo made amoda, edoïe.
42 Dia dihïle sihidoa i gäi gadoi dibe amo fädäla made beala, didooma sähalea, Nedoo, dïe sihidoa gëgelë digai dibe alogo neahagola abilia sämolö gabu. Asigi fea negelo, dihïle sihidoa i gäi gadoi difolalebe amodale neadigilahilä, hobeala dïe didooïe gëgelë dibe amo hedabola beala neadigimolöi bimolömelëla säi.
I neebe amea gägä negelo
(Madiu 7.16-20; 12.33-35)
43 Yesuea ado aso, sähamu nea sähalea, I hedabi neebe ameada, gägä nafade negelo made. Amase, i nafade neebe ameada, gägä hedabi negelo mademelë.
44 I neebe amolia gägä negesebe amo bealahilä, i gowe gadoi neebela helësëlomelë. I äyo gägäi neebea ami awälahilä, dolöea äfäeo gägä gabula failo made. Amase, buudi äyo gägäi neebea ami awälahilä, dolöea gelebi gägä gabula failo made nea.
45 Afädë hedabi neebe ameage, hïle iso asigigila hedabi dibe amo gadoi ulufadigilo nea. Amase, nafade neebe ameage, hïle iso asigigila nafade dibe amo gadoi ulufadigilo nea. Helësëlo isogi nobala adugai dibe amo gadoida, adoea ulufadigilo neala säi.
Dolö äudäea mosö ulila säi
(Madiu 7.24-27)
46 Yesuea ado aso, sähamu nea sähalea, Na ado säsebewe dilia made bëgëla hamosalea, nema, Dafidilo Geloi-e, Dafidilo Geloi-ela säha nebegoda edoïe.
47 Afädë ne mia maalahilä, na ado säsebewe nabala bëgëla hamoseda, na dilima eda dolö gowe gadoi neala säla ulufadigisagomelë.
48 Dolö amoda, afädëa mosö olelo amo gadoi nea. Dafidi ea igidaia dögöla, igi bobogamu salalahilä, mosö uli nebegi, hobeala sege digala ödä bëi edefade asi amea, mosö amo nufi gaso, fogomolöi made nelo. Mida, dolö amea mosö geloi hedabi uli amea.
49 Amai gaso, afädëa nïe ado nabala, made bëgëla hamolo neebe amoda, dolö afädëa mosö nagadaia igau hedabola sagala made uli amo gadoi nea. Ödä bëi edefade asi amea mosö amo fogoi amole fodolofalï dagabola digala, nafademolöi nafadeila säi.