5
Yesuea ado säi amo gadola hamosebegi, Saimono Fidaea seme malei nii
(Madiu 4.18-22; Maga 1.16-20)
1 Segeyo afädëgi Yesu e oeabo Genesaledi agesua ami nebegi, udia dolö yafie mafula gegedola, Godeïe ado mala nabulöïe, e neebe amo amalela digilahilä, negegi nelo.
2 Amala hamosebegi, Yesuea du äudä ödä agesua gaula misi dibe melï. Seme digilo dolö amolia du äudä amo negesiä, seme digilo selëgë amoli nigime hësa nefolalo.
3 Yesu e ödä du afädëdaia fedala nelo. Amoda Saimonoïe du. Ea Saimonoma sähalea, Ödä agesuala du holöbö eegela fisiga gamola säi. Saimonoea amala hamosebegi, Yesu e du amodaia salea, udia dolö gegedoi amolima säla olelesa sulo.
4 Ea ilima säla olelela wagalahilä, Saimonoma sähalea, Du ödä momogolumadi fulula awälahilä, dilia seme nimolöïe selëgë sadia idogomalola säi.
5 Amala säsebegi, Saimonoea säla obëgësalea, Dafidilo-o, nilïa gasi sedade digisa nea, häuala baagi sësa nelo gaso, dofä isoïe afädëge made nii. Gaso, dia säse goeada, na selëgë we sadia idogosamelëla säi.
6 Amala sälahilä, ilia amala hamosebegi, seme yafie digai amea selëgë nulimolöi hamoi.
7 Amalebegi, ilia ili gaalu hamolo odoa du elö amogi sefolalebe amolia ili ugila negemolö misiäia, naabo hähawela wei. Ili maala hiligila gauia adogola du äudä amoledaia negesebegi, helegela nobalahilä ödägi usabodelä hamoi.
8 Amala hamose amo bealahilä, Saimono Fidaea Yesuïe emo mia emo gumusula dia digalahilä sähalea, Dafidilo-o, neda nafade hamolo neawe. Ne dïgïla di mosalola säi.
9 Mida, Fidage odoa ebalä seme digisa nefolalo amoliage, seme yafie nii amo beala fudugi.
10 Saimonobalä hamoi gaalu hamolo äudä Sebediïe malö Yone Yamese eleage amo gadola wäla fudugi. Amala hamosebegi, Yesuea Saimonoma sähalea, Bedämabu. Segeyo walio wila nofela, dia dolö nelo namolömelëla säi.
11 Amalahilä, ilia du dusugala gaula agesua awäla, nelebo sulubadela dïgïla, ili Yesu bëgëla afiai.
Yesuea dolö gudubu hamoi afädë wahi
(Madiu 8.1-4; Maga 1.40-45)
12 Yesu e gaamu afädëgi nebegi, dolö domalo gudubu hamosa maadei afädë maala, Yesu beala, e mia gumusula dia digalahilä, ema egedigila sähalea, Dafidilo-o, dia ne wahimäiala asigiseda, wahilasimolöi nebegola säi.
13 Yesuea ïe naabo mogodigia galahilä, dolö amo diigisa nea sähalea, Na amala asigisa. Di wahimola säi. Amala säia gai amole, dolö amoïe gudubu amo fodolofalï hogosa helesa maadei.
14 Amala hamosebegi, Yesuea dolö amoma sähalea, Dofä elöma asiala säloeo. Gobela ïlo dolö neebea ami, di siia bimäia olemolö mosalo. Amalahilä, di wahi go udia dolöma olemolöïe, di hëmäia Mosesea nelebo odala ïmalola säla negei dibe amo gadola, odala ïmalola säla ï.
15 Amala säi gasoda, ea hamoi amoïe ado säi amo nabala didigai ameada, udia dolö yafiea ea ado säse amo nabulöge, ili oloi amoli wahilasimäiage afiala gegedoi.
16 Amala hamosebegi, Yesuea segeyo yafiegi ili dïgïla udia dolö aligilo made dibea ami aliga galahilä, Godema adosa nelo.
Yesuea dolö fii si afädë wahi
(Madiu 9.1-8; Maga 2.1-12)
17 Segeyo afädëgi, Yesuea ado mala olelesa nebegi, Felesi dolö odoage, mala säla negei amo olelelo odoage, misi sulo. Amolida Disiligi Galiliïe gaamu dibe sulubadela amilage, Yudialage, amase, gaamu Yalusalemelage mofiai sefolalo. Oloi difolalebe amoli wahimäia, Dafidilo Geloiïe geloi Yesubalä maala nelo.
18 Amala nebegi, dolö odoaea dolö afädë fii si sulo amo dafudaia gaula maalahilä, mosö Yesu neebe amogi gaula digala negedeläïe, fu hogosa nelo.
19 Gasoda, udia dolö yafie gegedoi amolia negegi amea, ilia mumusogi gaula digamolö amo fu maade gabugi, dolö amo gaula mosö fïgïdaia fedalahilä, Yesu neebe amo gaalula mosö fïgï dusuia gala, Yesuïe odagi gaalu dafu amola, udia dolö mogogi ami fisiga idogoi.
20 Ilile asigi afädë negei amo bealahilä, Yesuea dolö amoma sähalea, Ne damelë-e, dia nafade hamoi amo hësa maadeimelëla säi.
21 Amala säi amo nabalahilä, mala dawadigi amoliage, Felesi dolö amoliage, asigiamu helësësalea, dolö Gode gagadesa neebe goweda nowëdu. Godeamu udia dolöea nafade hamoi amo hëlo nea madelela helësësa sefolalo.
22 Ilia amala helësësa sefolalebe amo bealahilä, Yesuea ilima sähalea, Dilia iso asigigi go helësësa sefolalebegoda, mi edoïe.
23 Dia nafade hamoi amoli hësa maadeila sämolöle, ma, nowela nawesa namiëla sämolöle. Ado aabeida abodo.
24 Amaimo, Dolöïe Malö ameada nagadaiawi nea, udia dolö ilia nafade hamoi amoli hëla digimolöïe geloi gaula neebela dilia helësëmäiamelëla säi. Amala sälahilä, ea dolö fii si amoma sähalea, Dima sähago. Di nowela, dïe fëo go neala gaula, hä, dihï mosöa mosalola säi.
25 Amala säi amole dolö amea ilile sidaia fodolofalï nowelahilä, fëo e föla adi amo neala gaula, hï mosöa awähalea, Godeïe ëi gauia adala aligi asi.
26 Amala hamosebegi, udia dolö amoli sulubadela fudugila bedälahilä, Godeïe ëi gauia adala sähalea, Nelebo hïdo elöi melëlo made gadoi, walio nilïa beasebemelëla säi.
Yesuea Ilibai wei
(Madiu 9.9-13; Maga 2.13-17)
27 Amo hamosa maadelahilä, Yesu e awäha nea beahamelebe, dagisi muni nelo afädë ëida, Ilibai, e dagisi muni nelo mosöa ami sebe melï. Bealahilä, Yesuea ema sähalea, Ne bëgëla misiëla säsebegi,
28 Ilibai e nowela nelebo sulubadela dïgïla, Yesu bëgëla asi.
29 Amalahilä, Yesubalä molö molöïe Ilibaia dolö yafie misialola welahilä, ea mosöa molö edefade giai. Dagisi muni nelo yafiege dolö odoage elebalä gegedola molö naha sulo.
30 Amai gaso, Felesi dolö odoaeage, ili sosogo mala dawadigi nefolalo amoliage, Yesuïe bëgëla aulo nefolalo amolima gëgëla sähalea, Dilida dagisi muni nelo nefolalebe amolibaläge, nafade hamolo amolibaläge, molö ödäle naha sebegoda, edoïela säi.
31 Amala säi amo nabalahilä, Yesuea ilima säla obëgësalea, Udia dolö oloi made neebe amolida, alögoda neebea aulo made. Oloi neebe amolimu aulomelë.
32 Ne misiweda, asigi mogoi nefolalebe amoli made, nafade hamolo nefolalebe amoli asigi besumäia wemolö misimelëla säi.
Yesuea molö made naala aligiloïe ado säi
(Madiu 9.14-17; Maga 2.18-22)
33 Udia dolö nefolalo amolia Yesuma sähalea, Yoneïe bëgëla aulo nefolalo amoliage, Felesi dolöïe bëgëla aulo nefolalo amoliage, segeyo yafiegi Godema adosalea molö made naala aligilo amogi, oböla, dïe bëgëla aulo nefolalebe golia molö ödäle nahamu neebela säi.
34 Amala säsebegi, Yesuea säla obëgësalea, Dolö afädëa udia neahalea, udia dolö gegedoi amolia, udia nelo dolö amobalä gedola salea, dilida molö made molömelëla sämolöi gabule.
35 Amaimo, ili neebea amila odoaea udia nelo amo sigi moholö segeyo fu besela galamolömelë. Segeyo amogida, ili molö made naala namolömelëla säi.
36 Amala sälahilä, Yesuea ado besula sähalea, Afädëa fagulo gähe gadelala neala, fagulo goofogi baala asogelo mademelë. Amala asogeseda, fagulo gähe amo nulilahilä, fagulo gähea fagulo goofogi baala asogei amo afädëdi made bimolömelë.
37 Amo gadoi elöda, afädëa wani ödä gähe dibe amo, ödä i sugua meme gafodoea hamoi goofogi söga salelo mademelë. Amala hamoseda, wani ödä gähe amea meme gafodoea hamoi goofo amo dusulahilä, wani ödä amo awäha maadela, meme gafodoea hamoi i amoge nafademolöi nafademolömelë.
38 Amaloea, wani ödä gähe dibe amoda, ödä i meme gafodoea hamoi gähegi söga salimolö dialea.
39 Amase elöda, afädëa wani ödä siiba usi amo nalahilä, wani ödä gähe amo molö made halämolömelë. Mida, ea wani ödä siiba usi amo hedabila sämolömelëla säi.