12
Felesi dolöïe asigi musügä negela sälo mala amo idihë namialola säi
(Madiu 10.26-27)
1 Udia dolö dausini yafie gegedoi amea negegila, emoea odoa emesala dedabelesebegi, dafidi Yesuea ïe bëgëla aulo amolima säla ïahalea, Felesi dolö ilile beledi edelo yidi idihë nea, hedabola beaha namialo. Na säseweda, ilile asigi musügä negela sälo mala dibe amoïe sähamelë.
2 Nelebo sulubadela dabela negei difolalebe amolida, ulufadigisa maademolömelë. Amase, nelebo sulubadela musügä negei difolalebe amolige, dawadigisa maademolömelë.
3 Gasimi sagaia nea, ado dilia säi amoda, eso neë dibea ami nabulömelë. Mumusogi geleä sëdäwala säi amoda, mosö daiowa fedalahilä, udia dolöma uuala säha namolömelëla säi.
Godebalämu bedämolö dialea
(Madiu 10.28-31)
4 Yesuea ado aso, sähamu nea sähalea, Ne damelëla dili-e, na dilima sähago. Domalo baagomäia nufudalahilä, hobeala elö hamomolöi made neebe amolibalä bedämabio.
5 Na dili gowebalä bedämolö dialeala säha. Afädëa dolö baagomäia nufudalahilä, hobeala heli segea nufuda salimolöïe geloi neebe amobalä bedämalo. Dofä, ebalämu bedämalola sähago.
6 Haea nelësa gigiso gadoi biada, bidi holöfalï muni giwi äudä gadoia nelo madele. Amai gaso, Godea haea amoli gadoigi, isoïe afädë elabolo made neamelë.
7 Ea aso, dilile busagia busa hilï nebego sulubadela nidesa maadei neamelë. Haea gigiso gadoi sefolalebe amolida, holöbö gidogolahilä, dilida, abulümi hamoi nebego. Dilia bedämabiola säi.
Hewala made, ne Yesuïe neawela sämolöge, Gelesoma baagi ïmolöge
(Madiu 10.32-33; 12.32; 10.19-20)
8 Yesuea ado aso, sähamu nea sähalea, Na dilima sähago. Afädëa udia dolö sefolalebe amolile sidaia, neda Gelesoïe neawela säla ulufadigiseda, Dolöïe Malö ameage, Godeïe selesaia fii nefolalebe amolile sidaia, dolö egoweda nïemelëla säla ulufamolömelë.
9 Gaso, afädëa udia dolö sefolalebe amolile sidaia, neda e sosogo mademelëla säseda, Godeïe selesaia fii nefolalebe amolile sidaia, dolö amoge ne sosogo mademelëla sämolömelë.
10 Afädëa Dolöïe Malö ema ado nafadela säseda, amo hëla fisimolömelë. Gasoda, afädëa Eleloi Gesami e gagadela säseda, made hëla fisimolömelë.
11 Amaimo, ilia gedolo mosöage, gamane beaha aligilo nefolalebea amige, busa dolö odoa nefolalebea amige, dilibalä gudimolöïe sigi awäsegi, nilïa ado abilia säla obëgëmolödu, ado edo sämolödula asigia säosäola helësëmabio.
12 Mida, segeyo amo gala ado sämolö amoda, Eleloi Gesamia dilia sämolö dibe amo olemolömelëla säi.
Nelegei yafie negelo dafidilo afädë gagaoi gadoi nelo amoïe ado säi
13 Dolö afädë udia dolö sefolalo amoli mogogi ami salea, Yesuma sähalea, Säla Olelelo-o, naado baagoi amoïe, nalä negei dibe amogi, nedooea ne mogela ïmäia, dia ema säla ïmola säi.
14 Amala säsebegi, Yesuea ema naba obëgësalea, Dolö, edoeaha. Na ali mogelasilo nea, nelebo go mogemäia, ne nowëa memelela ifosisiola nabi.
15 Amala nabalahilä, ea aso, udia dolö nefolalo amolima sähalea, Nelebo sulubadela dofea dialeala helësëla made, na edefade negemolöila helësëla, asiala gesami auloea, dilia hedabola idihë namialo. Dilile namolö amoda, nelegei yafie difolalebe amoligida, maademelëla säi.
16 Amala sälahilä, Yesuea ilima ado besu gowe säla ï. Nelegei yafie negelo dafidilo dolö afädëa sagaia molö mumului yafie dilo.
17 Hä, dolö amea helësësalea, abilia hamomolödu. Nïe molö we nea negemolö mosö maade gabula helësëi.
18 Oböla, hïdo sähalea, Amaseda, na gomalä hamodelä. Na molö negelo mosö uli amoli hailahilä, bu edefade odoa oledelä. Amalahilä, amoligi nïe eladi gadoi widi dibe amoge, nïe nelebo odoage, mosö amoligi nidila negedelä.
19 Amalahilä, na nihïdo sähalea, Neda nelebo yafie hedabi negei diëgi, gäheo ï yafiegi hele salea, molö amo gadoida, negei dialea. Amalahilä, neda memalä saleada, ödä nadigi, molö nadigila hedabi samolö wedala hïdo amala säi.
20 Ea hïdomu amala sälahilä sebegi, gaso Godea ema sähalea, Dolö gagaoi gadoi di. Dida walio gasigi baagomolömelë. Amasegi, dïe nalä negei dibede amoda, nowëa nimolö gabula säi.
21 Yesuea säla wagahalea, Afädëa hïle nelebo dagulula negesalea, Godemadi nelegei made negelo amoma, amo gadola hamomolömelëla säi.
Asigia säosäoloïe säi
(Madiu 6.25-34)
22 Amala sälahilä, Yesuea ïe bëgëla aulo amolima sähalea, Amoïeda, na dilima säla ïahago. Molö edo molödula säla, dili namolö goïe asigia säosäola helësëmabio. Amase, fagulo edo salugamolödula säla, domaloïege asigia säosäola helësëmabio.
23 Molö aso, nigia galahilä, udia dolö namolö amoda, dafidilo neamelë. Amase, faguloge aso, nigia galahilä, domaloda, dafidilo neamelë.
24 Dilia haea sefolalebe amoli helësëmo. Ilia sagai sagala molö hëhela faila gegedola negelo made, amase, negelo mosöge maade, gaso ili muäia Godea ïlomelë. Haea amoli holöbö gidogolahilä, udia dolö dilida, dafidilo nea madele.
25 Dili neebe gogi nowëa asigia säosäose ameada, hïle nagadaia namolö amo fu holöfalï baalasimolödu.
26 Dilia holöfalï amo gadoi hamomolöi made galëda, nelebo odoa dibe amogi asigia säosäosa nebegoda, edoïe.
27 Dilia mama amoli memalä bäulahilä, abeahäla fedaha aligilodula helësëmo. Ilia hamoige made hamolo, amase, faguloge made hamolo neamelë. Amai gaso, na dilima säla ïahago. Solomonoea fagulo hïdo elöi salugalo amoda, mama ilile momadoi hïdo elöi amo gadoi made nelo.
28 Giisi mamala memalä bäui walio nefolalebe amolida, aiyo dolöea damula nulogi gobelo neamelë. Asigi afädë holöfalï negei nefolalebela dili, Godea giisi mama nefolalebe amolida, memalä momadolasilo. Amo gadola made, dofä baagila awäla, dili nefolalebegoge fagulo gämäia ïmolö madele.
29 Amase, dilia molö ödäge, edo naha namolödula, asigi amogi amogila nea salala helësëmabio. Amo gadola säosäomolöda, dofea mademelë.
30 Udia dolö Gode helësëlo made amolia, nelebo amoli gadoi helësësamu aligilo nea. Amalo gaso, dilile Diadoea dili nefolalebegoea nelebo amoli nimolöi dibe amoda, dawadigi neamelë.
31 Amaimo, dilia ïe Beaha Maadela Sigi Neebe amo helësëla, hogosa aligiseda, ea nelebo amoli sulubadela dilima baala ïmolömelëla säi.
Nelegei hedabi selesaia mosöa gafedela negemolö dialea
(Madiu 6.19-21)
32 Yesuea aso, sähamu nea sähalea, Sugua sibi sosogo nahui nefolalebela dili-e, bedämabio. Mida, dilile Diadoea ïe Beaha Maadela Sigi Neebe amo diligali ïmolöïe obeägïsa neamelë.
33 Dilile nelebo difolalebe amo odoama bidi neaha maadelahilä, muni neasebe amoda, udia dolö busadäoi nefolalebe amoligali ïmalo. Amalahilä, dilile muni salelo gäalimulo made amo nealahilä, selesaia mosöa amimu dilile nelebo daiala negesa namialo. Nelebo hedabi amo made maadesia ami negemalo. Amida, fa neloea ga madela made muloge, amase, gasiämoea made damuloge dialea.
34 Amala säse amoïe mida, sege dilile nelegei hedabi dibea amida, dilile bobahëla asigilo amoda, amimu diamolömelëla säi.
Hamoi hamolasilo hedabia hedabola beaha namolö dialea
(Madiu 24.42-44)
35 Yesuea aso, sähamu nea sähalea, Dilia daia fagulo salugalahilä, gamali wala gaula, daiala nefolamialo.
36 Hamoi hamolasilo dolöea, ilile dafidilo amo, dolö afädëa udia nease amoïe molö nasebea asi amo obëgëmäia, daiala beaha aligilo amo gadola, ilile dafidilo amo maalahilä, idi gai dugimola säseda, ilia e nogila digamäia, idi gai aabela dugimolöi bimolömelë.
37 Dafidilo amo maala, ïe hamoi hamolasilo amoli, süwia diala made, e beaha neëgi maaseda, ilia obeägïsa namolömelë. Na dilima dofä säla ïahago. Dolö dafidilo amea hamoi hamosalea gälo fagulo gälahilä, ilima sähalea, Dili molö muäia ïdulä, fifigimalola sälahilä, ilima molö mogela ïmolömelë.
38 E gasi mogogi maasege, sege yose gaalu maasege, ilia daiai diëgi, e maala beaseda, ilia edefademalä obeägïmolömelë.
39 Amase, dilia afädë gowe helësëmäia sähago. Mosö eedoea fa nelo gowe gala moholöla helësëi galebeda, fa neloea ïe mosö dagabola digamäia, fu made ïalabiomelë.
40 Dolöïe Malö moholö amoda, dilia gowe gala moholö gabula helësëi made neëgi, e moholö ameada, diliage daiaha namolö dialeala säi.
Ado besula hamoi hamolasilo hedabiïege, nafadeïege säi
(Madiu 24.45-51)
41 Amala säsebegi, Fidaea nabahalea, Dafidilo Geloi-e, dia ado besu säsegoda nilïmamu sähale, ma, sulubadelama sähalela nabi.
42 Amala nabasebegi, Dafidilo Geloia säla obëgësalea, Amai galëda, sigi aligilo asigi falagaseige, nulügäige neebe ameada, ïe dafidiloea ïe hamoi hamolasilo odoa sigi namiäia, ilile molö ïlo amo gadola, segeyo hï daiala negeifalïgi, mogela ïmäiala memeleloda, nowëdu.
43 Ïe dafidilo amo maalahilä beahalea, hamoi hamolasilo amea, hamoi amo gadola wäla hamosa neë beaseda, hamoi hamolasilo amo obeägïsa namolömelë.
44 Na dilima dofä sähago. Dafidilo amea hamoi hamolasilo amoma, ïe nelegei amo sulubadela sigi namialamolömelë.
45 Amaimo, hamoi hamolasilo amea asigiamu helësësalea, nïe dafidiloda, fodolo made moholö gabula helësëlahilä, ea udia dolö hamoi hamolasilo odoa nefolalebe amoli nufudadigi, molö ödäle naadigi, gagaolo ödäge nalahilä, gagaosa aligiseda,
46 ïe dafidilo segeyo gowegi, aoa gowegi moholöla helësëi made neëgi, e moholömelë. Maalahilä, ea hamoi hamolasilo amo neala nafademolöi nafadelasila, ado neadigilo neebe amolibalä namialamolömelë.
47 Hamoi hamolasilo amea, ïe dafidiloea gowe gadoi hamomalaila helësëlahilä gaso, oböla, säi amo gadola made daiala, made hamola neëgi, ïe dafidiloea e baialaea gelolafalï nufudala ïalalemolömelë.
48 Amase, hamoi hamolasiloea, ïe dafidilo amea hamomalai amo dawa made neebe amea, baialaea nufuäiala hamosa aligiseda, ïe dafidiloea e, aso, geleä nufulömelë. Amaimo, sulubadelaea yafie nii gaula neebe amolima, bu yafie obëgëla ïmalamolömelë. Amase, afädëïe naabogi yafie gausi amoma, dofä yafie baala ïa obëgëmalamolömelëla säi.
Yesuea udia dolö mogelasimolö misi
(Madiu 10.34-36)
49 Yesuea ado aso, sähamu nea sähalea, Na naga föiwe gobemolö misi amo, hä, aabela söa fedala gobemäiala hamesamelë.
50 Amai gaso, ne hä, ödägi gemolö afädë galea. Amo aso, made hamola neada, nïe iso asigigi yöi neawe.
51 Diliada, na nagadaiawi dalulasimolö gaula misi gabula helësësale. Na dilima säla ïahago. Amala made. Udia dolö neala mogelasimolö misimelë.
52 Amaimo, walio wila asogodi gogi, eme afädë sosogo bia mosö afädëgi salea, oböla, amoli äudä eamu, ohodoa eamula hilimu mogelahilä, ohodoa amolia äudä amolebalä ado neala, amase, äudä amoleage ohodoa amolibalä ado nealalahilä, moge mogela namolömelë.
53 Amalahilä, eedoea efegebalä ado neadigi, efegeage eedobalä ado neadigisa namolömelë. Amase, emeage idiwibalä ado neadigi, idiwiage emebalä ado neadigi, amase, emea efege udiabalä ado neadigi, efege udiaeage egoamebalä ado neadigisa namolömelëla Yesuea säi.
Nelebo besela galamolö amoli, mi gowe gadoila udia dolöea dawa madela säi
(Madiu 16.2-3)
54 Amala sälahilä, Yesuea udia dolö gegedoi nefolalo amolima bu sähalea, Eso digasebeamadila mu baidili maase amo bealahilä, walio sege digamolö gabula aabela säha neëgi, sege hä, dofä digalomelë.
55 Amase, eso maasido amoïe dafädimadila fo maaseda, hä, eso neëa hëgïmolö gabula säha neëgi, hä, dofä hëgïlomelë.
56 Asigi musügä negelola dili, mudaiage, nagadaiage, gomalä hamosebela melëlo amo dawadigi nea. Gaso, walio nebegoïe hamosebe amo, mi goweïe hamosebela, made dawa nefolalebegoda, edoïela säi.
Dibalä ado nii neebe amobalä aeamaloi dialea
(Madiu 5.25-26)
57 Yesuea ado aso, sähamu nea sähalea, Dilia mogoi hedabi dibe amo hamomolöïe, dihili made memelesegoda edoïe.
58 Afädëa dibalä gudimolömelëla säla, di sigi gaula awäseda, gudilo mosöa ami, aso, made besela galala, idiafa awäha nea, ebalä ado adola aeala hamogimolödale helësëmalo. Amala made hamoseda, ea di gudi mogelo dolö neebea ami dusugala gaula awäla, gudi mogelo dolö amea, di dadi gaui dolö amolima gausila, dadi gaui dolö amolia, di galabaia mosöa ami ifosimolömelë.
59 Na dima sähago. Dia nafade hamoi amoïe, ilia dima muni hamomalai amo gadoi, bidi neaha maademäia, galabaia mosöa ifosi neamu, made moholömelëla säi.