13
Së nüloea, asigi besumolö dialea
1 Segeyo amo gala, dolö odoa Yesuea säsebea ami nefolalo amolia, Galili fii dolö odoaïe ema säla ï. Galili dolö amolia Godegali odala ï gobela ïaha nebegi, Gabena Bailadia ïe ami dolö nefolalo amolima nufualoi. Nufi amolile heale odala ïïe healebalä gegoai amoïe, ilia Yesuma säla ï.
2 Amala säla ïasebegi, Yesuea säla obëgësalea, Galili dolö amoli amo gadola së mai amoda, dilia helësësalea, ilia nafade hamoi amea, Galili udia dolö odoa amoli sulubadela baagila asila helësësale.
3 Ai, amala mademelë. Na dilima säla ïahago. Dilia asigi made besuseda, dili sulubadelage amo gadola baagomolömelë.
4 Amaimo, Sailoama mosö sedade olola fedai amo dagabola digahalea, nabülasi afädëïe odoai gödölasi nufudala baagoi amolia, nafade hamoi amea, udia dolö odoa Yalusaleme neebe amoli sulubadela baagila asila helësësalela nabi.
5 Ai, amala mademelë. Na dilima säla ïahago. Dilia asigi made besuseda, dili sulubadelage amo gadola baagomolömelëla säi.
Ado besula äfäeo gägä made negeloïe säi
6 Amalahilä, Yesuea ado besula sähalea, Dolö afädëa ïe gelebi hawa sagaia ami äfäeo hawa afädë sagasi nelo. Ea äfäeo amo gägä negei dibelela bea awähamelebe, gägä made negei melï.
7 Amai gabugi, ea sagaia hamoi hamolasilo amoma sähalea, Nabuö. Na gäheo i ohodoagi, äfäeo i wagadi egowea gägä negei walebelela bea maahamu nelo amo, walioge bea misi gaso, hä, gägä made negei gabumelë. Amai gabugi, dia i go abadigimalo. Mi edoïe ea memalä naga goïe säfe go nalï naha namolöla säi.
8 Amala säsebegi, dolö amea säla obëgësalea, Dafidilo, e aso, gäheo i afädë namiäia fisigisimo. Na goïe mia naga go dagabola digilahilä, sugua gao gaisa negedelämelë.
9 Gäheo i namolömadi gogi, hä, gägä negeseda, amo dofea. Gägä made negeseda, dia hä, abadigimäiamelëla säi.
Segeyo Sabada gafegi, Yesuea udia afädë wahilasi
10 Segeyo Sabada gafegi, Yesu e gedolo mosö afädëgi nogila digalahilä, säla olelesa nelo.
11 Udia afädëma mugabe nafadea ololasi amea, gäheo i nabülasi afädëïe odoai gödölasi, ïe domalo mogola aligimolö ulï sulo amo, gedolo mosöa ami sulo. Udia amo baagi gugi amea, e dofä mogola aligimolöi made sulo.
12 Yesuea udia amo beala e misialalahilä, ema sähalea, Udia-o, di oloi amoda, na hä, fisigäimelëla säi.
13 Amala sälahilä, ïe naaboea udia amoma diigi. Amala diigi amole, udia amo hä, mogola aligilahilä, Godeïe ëi gauia adaha nelo.
14 Amala hamosebegi, gedolo mosö beaha aligilo dolö amea, segeyo Sabada gafegi Yesuea udia amo wahi gabula habobalahilä, udia dolö sefolalo amolima sähalea, Segeyo gafeia dibe amoligida, hamoi hamolo. Segeyo amoligi nea, oloi difolalebe amoli wahimäia moholö dialea. Segeyo Sabada gafegi wahimäia, moholöi mademelëla säi.
15 Amala säsebegi, Dafidilo Geloia ema säla obëgësalea, Asigi musügä negelola dili, segeyo Sabada gafegida, dili sulubadelaea sugua gao mosöa awälahilä, dilile sugua gao galëge, sugua dögi galëge, gide begela negei dibe amo fisigäla, ödä muäia sigi gaula awäla, ifosilo madele.
16 Amaimo, udia goweda, Abalahamaïe idiwi afädë amo, Saidania e gäheo i nabülasi afädëïe odoai gödölasi nafodoi sulo. Na e nafodoi amo, segeyo Sabada gafegi, fisigämolö dialea madelela säi.
17 Ea amala säla obëgësebegi, ebalä ado nii nefolalo amoli nafadela hewai. Amai gaso, udia dolö nefolalo amolia, ea nelebo hedabi hamose amo sulubadelagi, obeägïsa nelo.
Ado besula masada gägäïe säi
(Madiu 13.31-32; Maga 4.30-32)
18 Amasebegi, Yesuea sähalea, Godea Beaha Maadela Sigi Neebe amo gowe gadoimelëla, na abodo gadoima oodo beala sämolödu.
19 Amoda masada gägä gadoi dialeamelë. Dolö afädëa masada gägä afädë gaula awälahilä, ea sagaia ami sagai. Masada amoda bäulahilä, i gadoi neëgi, haea sefolalebe amolia adomo amogi, gilifa hamola dilola säi.
Ado besula yidiïe säi
(Madiu 13.33)
20 Yesuea ado aso, sähamu nea, bu elö nabahalea, Godea Beaha Maadela Sigi Neebe amoda, na abodo gadoima oodo beala sämolödu.
21 Amoda beledi edelo yidi gadoi dialeamelë. Udia afädëa falodaia balawa edefade besigala salala, beledi edelo yidi amola gegoala naabolahilä, beledi sulubadela edela bolela fedalola säi.
Dilida idi doga negei dedeleigi digamalola säi
(Madiu 7.13-14, 21-23)
22 Yesu e Yalusaleme aulo idi amogi awäha nea, gaamu dibeamadige, sege dibeamadige, säla olelesa nelo.
23 Dolö afädëa ema nabahalea, Dafidilo-o, Godeada dolö afädë afädëla damula moholölela nabi. Yesuea ilima säla obëgësalea,
24 Idi doga negei dedelei holöfalï amogi nogila digamolöïe, dilia gelola elëlisa namialo. Amoïe mida, na dilima säla ïahago. Udia dolö maleia nogila digamolöila asigila, nogila digaha gaso, ulïmolömelë.
25 Hobeala, mosö eedo amo nowela fedalahilä, mosö idi gaseda, dili maala, ifo baagido segea nea, idi galogi nufigisa nea, uuala sähalea, Dafidilo, nilï mudulä, idi gai dugimola sämolömelë. Gaso, ea dilima säla obëgësalea, Na dili dawa made. Dili guwila misilage, na dawa made neamelëla sämolömelë.
26 Amala säsegi, dilia säla obëgësalea, Nilïda dibalä molö ödäge naha aligilo amo, amase, diada nilïle idiafa nea, säla olelelomelëla sämolömelë.
27 Amala säsegi, ea bu elö sähalea, Na dili dawa made. Dili guwila misilage, na dawa made neamelë. Mala nafademu hamolo neebe dili sulubadela, nïe odagia namolö made. Moholöi mosöla sämolömelë.
28 Amala säsegi, dilia Abalahamage, Aisagage, Yeigabage, bea sälo ili sulubadelage, Godea Beaha Maadela Sigi Neebea ami neebe amo bealahilä, dili segea sogobala sadia gai nea, dilia dïisalea, bese ali nalëgësa namolömelë.
29 Amaimo, udia dolö eso maasidolage, eso digasidolage, agesu näiadodilage näiadodilage, mafula gegedolahilä, Godea Beaha Maadela Sigi Neebea ami molö naha samolömelë.
30 Nabuö. Walio udia dolö odoa hobeala nefolalebe amolida, oböla, dafidisalea, amase, dafidila nefolalebe amolida, hobeamolömelëla säi.
Yesuea Yalusaleme bobasëi
(Madiu 23.37-39)
31 Amala säha neebe amo gaalu, Felesi dolö odoa Yesu neebea maalahilä sähalea, Dida segewe dïgïla, sege odoadi mosalo. Mida, Heledoea di nufulö helësësa nea wabu.
32 Amala säsebegi, Yesuea säla obëgësalea, Dili awälahilä, ilua ügülo goma gomalä säla ïmalo. Nabuö. Walio aiyo namolö amogida, neda mugabe fedai nefolalebe amoli nesila digi, oloi difolalebe amoli wahila digisa namolömelë. Amalahilä, segeyo osodagida, na hamoi hamoi amo, hä, wagamolömelë.
33 Amase, walio aiyo gahadala amogida, ne moholö dialea. Mida, bea sälo neebe amoda, sege odoadi nufudala made baagola, ilia e Yalusaleme amimu neëgi, nufudala baagomolö dialea.
34 Yalusaleme-e, Yalusaleme-e, bea sälo nefolalo amoli nufudala baagologe di. Amase, dolö digali fisiga wei amoli igia nufideloge di. Haea gagalugoea ïe malö augia hawa neala gafedela, musügä negelo amo gadola, segeyo aboläiagi gadola, na dïe malö goli neala gegedolasideläi gaso, dihili habosio.
35 Nabuö. Godea dilile mosö dïgïla awäsegi, mosö amo memalä diamolömelë. Na dilima sähago. Dilia ne bu elö made beala nelolahilä, dilia sähalea, Dafidilo Geloiïe ëigila maahago, Godea e neala obeägïlasimäiala säsolo amo gala, dilia ne bimolömelëla Yesuea säi.