14
Yesuea dolö domalo gagalui wahi
1 Segeyo Sabada afädëgi, Yesu e Felesi ilile busa dolö afädëïe mosöa molö naa awäsebegi, udia dolö nefolalo amolia, ga madela sisila beaha nefolalo.
2 Dolö domalo gagalula nafadei afädë Yesuïe odagi gaalu ami sulo.
3 Dolö amo bealahilä, Yesuea mala säla negei amo oleleloge, Felesi dolöge sefolalo amolima nabahalea, Segeyo Sabada gafegi wahilasimolöda dofeale, ma, dofea madelela nabi.
4 Amala nabasebegi, ilia made säla obëgëi. Amasebegi, ea dolö amo neawela wahilahilä, e mosaloi.
5 Amala hamolahilä, ea ilima nabahalea, Dili sebe gogi afädëïe malö galëge, sugua gao galëge, segeyo Sabada gafegi ödä dögöigi digaseda, fodolofalï dusugala nimolölela nabi.
6 Amala nabasebegi, ilia säla obëgëmolöi made melï.
Nagadaiala namolöïe säi
7 Yesuea beahamelebe, dolö odoa molö naa misi mumusogi digafiai amolia, filo hedabidaiamu fimolö memelesebegi, ea ilima ado besu afädë gowe säla ï.
8 Dolö afädëa udia neahalea, molö molö misialola säsegi awäseda, filo hedabidaiamu fimabio. Di gadoi made, ilia dolö ëi sälo memelei neebe amoge misialaloea.
9 Amala misialai galëda, dige, dolö ëi sälo amoge welo amohï maalahilä, dima säla ïahalea, Filo di sebegoda, dolö gowegali ïmola säsegi, di nafadela hewalahilä, baagidofalï fila digamolömelë.
10 Amo gadola made, dolö afädëa di misialola wesegi awäseda, dida baagido samialo. Dia amala hamoseda, dolö di welo amohï maalahilä dima sähalea, Ne damelë-e, di filo hedabidaia guwi fimolö misiëla sämolömelë. Ea amala säse ameada, udia dolö molö naha sefolalebe amoli sulubadelaïe siigi, di ilibialasimolömelë.
11 Udia dolö hili ili ilibialo amoli sulubadela neala nagadaialasisalea, amase, afädë hï e nagadaialo neebe amoda, ilibialasimolömelëla säi.
Udia dolö dabe ïmolöi made neebe amolima mala hamomolö dialea
12 Amala sälahilä, Yesuea dolö molö molö misialola e wei amoma sähalea, Dia esoa galëge, deadi galëge, molö afädë giaseda, di damelëge, didooge, di sosogoge, amase, muni gaui dibalä sebe amolige, molö molö misialola wemabio. Hobeala, amo dabe ilia dili molö molö misialola säloea. Dabe amala säse ameada, dia hamoi amoïe bidi nii aguimelë.
13 Hä, dia molö afädë giaseda, dolö busadäoi sefolalebe amolige, domalo nafadei sefolalebe amolige, emo nafadei sefolalebe amolige, amase, si golai sefolalebe amolige, molö molö misialola weseda,
14 dia obeägïsa namolömelë. Dolö amoli gadoi nefolalebe amoliada, dia molö giala ï amo dabe made ïa obëgëmolö gaso, hobeala Godea udia dolö hedabi hamolo baagoi amoli nowelasisolo amo gala, bidi ïmolömelëla säi.
Ado besula molö edefade giaila säi
(Madiu 22.1-10)
15 Yesubalä molö naha sefolalo amoligi, afädëa ado amo nabalahilä, Yesuma sähalea, Udia dolö Godea Beaha Maadela Sigi Neebea ami nogila digala, molö naha samolö amoliada, obeägïmolömelëla säi.
16 Amala säsebegi, Yesuea säla obëgësalea, Dolö afädëa molö edefade giamolöla helësëlahilä, molö amo molö, ea udia dolö yafie misialola hobe säi.
17 Hä, dolö amea molö molö segeyo daiai amo besela galasebegi, ea ïe hamoi hamolasilo amoma, dolö dafidi hobe säi amoli bea mosalolahilä, dia ilima gomalä sämalo. Nelebo sulubadela daiai dibe ameada, dili misiëla sämalola säi.
18 Amala säsebegi, udia dolö amoli sulubadelaea, Nilïda made moholö gabumelëla säi. Afädëa sähalea, Neda sagai nofela nii dibe amo beaha namolö dibe ameada, asigii gabu, ne made moholömelëla säila sämaloi.
19 Elöea sähalea, Neda sugua gao nabülasi waliomu nealahilä, ne amo oodo beala beaha namolö awäse weada, asigii gabu, ne made moholömelëla säila sämaloi.
20 Amase, elöea sähalea, Neda, hä, walio wäla udia nii ameada, ne moholö ulï gabiola säi.
21 Amala säla obëgësebegi, hamoi hamolasilo amo obëgëlahilä, ea ado amoli ïe dafidilo amoma säla ï. Amala säla ïasebegi, ïe dafidilo amea ado amo nabala, mihalälahilä, ïe hamoi hamolasilo amoma sähalea, Di fodolofalï awäla, gaamugi aulo idi edefade dibe amoligige, amase, idi holöfalïgi aulo dibe amoligige awälahilä, dolö busadäoi sefolalebe amolige, domalo nafadei sefolalebe amolige, emo nafadei sefolalebe amolige, amase, si golai sefolalebe amolige, dia sigi maala, nïe mosöa nogila digamolö misialola säi.
22 Amala säsebegi, hamoi hamolasilo amo fodolofalï awäla, obëgëlahilä sähalea, Dafidilo-o, dia säi amo gadola hamosa maadei gaso, mosö, aso, fu dibemelëla säi.
23 Amala säsebegi, dafidilo amea hamoi hamolasilo amoma sähalea, Nïe mosö nobamäiaïe, di gaamu dïgïla segea awäla, aulo idi edefade dibe amoligige, sagai mosöa aulo idi holöfalï amoligige awälahilä, udia dolö amolima misiëla gelola sämalola säi.
24 Na dilima säla ïahago. Na dafidi hobe säi dolö amoligi, nïe molö daiai amogi, afädëa diigila, molö made gabumelëla säila Yesuea säi.
Udia dolöea dafidi hedabola helësëlahilä, Yesu bëgëla moholö dialea
(Madiu 10.37-38)
25 Segeyo afädëgi, udia dolö yafie Yesu bëgëla maaha dibegi, ea ilima besuia imogolahilä sähalea,
26 Afädë ne neebea maase amea, ïe eedole emelemage, ïe udia malölalimage, ïe edoole elefilemage, amase, hïle namolöfalï amomage, made habobaseda, eda nïe bëgëla aulo namolöi mademelë.
27 Amase, afädëa hïle i fügäi neala gaula, ne awäsewe gadola bëgëla made maasege, nïe bëgëla aulo namolöi mademelë.
28 Amaimo, dili nebegogi, afädëa sagai idihë namolöïe mosö, holöbö ilibia ulimolö helësëseda, na mosö olala agumolöïe muni dofea dialealedula helësëlahilä, mosö we muni gowe gadolaeada ulimolö gabula dafididale helësëmolö madele.
29 Ea dafidi amala made helësëla, mosö igau sagala, sedade olase amo made aguseda, udia dolö amo bease amoli sulubadelaea, e gadiabola
30 sähalea, Dolö gowea mosö oledelä mi gäwi gaso, agumolöi made gabula sämolömelë.
31 Amase, beaha aligilo gini afädëa, gini elöbalä nudula moholö neëda, ea dafidi salea helësësalea, nïe ami dausini nabülasi afädëada, gini elö amoïe ami dausini nabülasi äudä sigi maase amolibalä nudula gaalumolöiledula helësëmolö madele.
32 Helësëla beahamelële, dofea made gabula helësëseda, aso, wagadi made maaha neëgi, nudula made, fisila dalumolöïe, dolö odoaea aeala ado sämolö mosalala sälomelë.
33 Amo gadola, dili neebe gogi, afädëa ïe nelebo dibe amoli sulubadela made fisisa maadeseda, nïe bëgëla aulo namolöi mademelëla säi.
Yesuea ado besula ëbï hëdä maade, nafadeïe säi
(Madiu 5.13; Maga 9.50)
34 Yesuea ado aso, sähamu nea sähalea, Ëbïda hedabi galea. Gaso, ëbï hëdälo amo hogosa heleseda, edoea bu hëdälasimolöi gabu.
35 Ëbï amo gadoiada, molö sagai hedabola fedamäia, ugila negemolöi mademelë. Amase, nilïa sagaia ami sugua gao gaisa gedola negemolöi made. Fisimolö dialea.
Afädëa gëhea nabulöi galëda, hä, nabualola säi.