15
Ado besula sugua sibi dabadigila säi
(Madiu 18.12-14)
1 Segeyo afädëgi, dagisi muni neloge, nafade hamologe, Yesu neebea ga madela nea, ea ado säse amo nabulö misi.
2 Gaso, Felesi dolöle mala dawadigi dolölea, habobala sëdäwala sähalea, Dolö egoweada nafade hamolo neebe amolibalä damelë hamologe, ilibalä molö naha aligiloge, neamelëla säi.
3 Amala säsebegi, Yesuea ilima ado besu gowe säla ï.
4 Dili afädëa sugua sibi hädali afädë foi nelo amoligi, afädë dabadigi galëda, eada sugua sibi nabülasi sëgëlasiïe odoai sëgëlasi amolida, giisi naha namiäia ifosilahilä, afädë dabadigi amo bimolöila, awäla hogosa nea, giso, beagolelo madele.
5 Ea hä, beagolelahilä, obeägïla, hï sogobala gïdädaia gaula
6 mosöa obëgëlo. Obëgëlahilä, e damelëla ilige, ea mosö ga mamadela sefolalebe amolige, wela gegedolahilä sähalea, Nïe sugua sibi afädë dabadigi amo, hä, beagolei amogi, obeägïsa neawe. Nihïlïgïla gaalu obeägïdila sälomelë.
7 Amo gadola hamolo amoïe, na dilima säla ïahago. Udia dolö nabülasi sëgëlasiïe odoai sëgëlasi asigi mogoi neebe amoli, bu asigi besumolö made neëgi, afädëa nafade hamosa nelo amo asigi besuseda, selesaia mosöa hïdo elöla obeägïmolömelëla säla ï.
Ado besula muni dabadigila säi
8 Yesuea ado aso, sähamu nea sähalea, Udia afädëa muni giwi nabülasi gaula nea, giwi afädë mosöa ami dabadigiseda, ea hä, gele wala gaulahilä, bimolöila mosöa gëgelë doala, geleä hedabola hogosa nea, giso, beagolelo madele.
9 Ea muni amo beagolelahilä, e damelëla ilige, ea mosö ga mamadela sefolalebe amolige, wela gegedolahilä sähalea, Nïe muni giwi afädë dabadigi amo, hä, beagolei amogi, obeägïsa neawe. Nihïlïgïla gaalu obeägïdila sälomelë.
10 Amo gadola hamolo amoïe, na dilima säla ïahago. Afädëa nafade hamosa nelo amo asigi besuseda, Godeïe selesaia fii neebe amolia obeägïlomelëla säla ï.
Ado besula dolö afädëïe malö äudä sulola säi
11 Yesuea ado aso, sähamu nea sähalea, Dolö afädëïe dolö malö äudä sulo.
12 Amala salea, malö üfï amea eedoma sähalea, Naado, munige, nelebo odoage, nedoo halïma mogela ïmolö dibe gogi, nïe amo nihïma mogela ïmola säi. Amala säsebegi, eedo amea sulubadela helema mogela ï.
13 Amala hamola, segeyo ede made nelolahilä, üfï amea, ïe nelegei amo odoama bidi neaha nelolahilä, muni amo gaula, sege wagadi made, gädili elögi namolö bahïla asi. Segea ami nea, nelebo galone hamomolöi made amo hamosalea, ea muni gauia amo waeasesa maadei.
14 Amalahilä, muni gaui amo maadei amoleda, segea ami sïdë i edefade gelola besela galai. Amo gala, malö amea nelebo afädë made gaui nelo.
15 Amala nebegi, segea ami fii dolö afädëa, ïe hamoi hamomolöïe, yala isogi dia nïe sugua sigi namialai.
16 Amala sigi nea, sugua amolia falaga mai gafodo dibe amo beala hamelahilä, bolemäia neala nuduläla helësëi. Gaso, afädëa e molö made ï.
17 Amalahilä, hobeala asigi negela obëgësebegi, ea sähalea, Nïe naadoïe hamoi hamolo nefolalebe amolida, molö yafie naha diëgi, ne molö made naala wi nea, hä, dofä baagomolö gabu.
18 Gamelä, neda naado neebea obëgëla awäla, gomalä sämolö. Naado-o, na Gode selesaia mosöa neebe alima, nafade hamoimelë.
19 Hä, walio neda hedabi made. Ne dïe malöla sämolöi made neawe. Dïe hamoi hamolo amolima hamosa neebe go gadola, nemage hamomalola sämolöla säi.
20 Amala sälahilä, e nowela eedo neebea awäha nelo.
E aso, eedo neebea made besela galala, holöbö wagadi made maaha nebegi, eedoea e beala, ïe iso asigia bobasëlahilä, baluluia awäla, neawela mimi.
21 Amala hamosebegi, efege amea sähalea, Naado-o, na Gode selesaia mosöa neebe amo alima, nafade hamoimelë. Hä, walio neda hedabi made. Ne dïe malöla sämolöi made neawemelëla säi.
22 Amala säsebegi, gaso eedoea ïe hamoi hamolasilo amolima sähalea, Dilia nïe fagulo didiga salugalo hedabifalï amo, fodolofalï nea awälahilä, egali gäsimalo. Amalahilä, ïe naabo sesafogi, ulini salugasila, emo usililoge salugasimalo.
23 Amalahilä, sugua gao üdïli säfei neebe amo, dilia sigi gaula maala, nufualo. Nilï, hä, molö naala obeägïdi.
24 Mida, nïe malö go baagoi gaso, walio namolö bu obëgëla misi neebe amogige, e dabadigi gaso, nilïa beagolei amogigela säi. Amala säsebegi, ilia obeägïla molö edefademalä giala mai.
25 Amo giala nase amo gaalu, malö abulümi amoda sagaia nelo. Hobeala, e mosöa obëgësalea, mosö ga madela nea nabelebe, mosöa ami udia dolöea ilibo gaula digi, gisalï gaula, sigola digisalea, goba fedase amo nabi.
26 Amala hamosebe amo nabala, ea hamoi hamolasilo amoligi, afädë welahilä nabahalea, Ilia goda edo hamosebela nabi.
27 Hamoi hamolasilo amea säla obëgësalea, Didoo amo, hä, obëgëla misi amogi, diadoea, sugua gao üdïli säfei nelo amo nufualai. Mida, ïe malö amo, made baagola, obëgëla misi amogi.
28 Amo nabala, malö abulümi amea mihalälahilä, e mosöa nogila digamolö helësëi made nelo. Amala hamosebegi, eedo e segea doadigila fedalahilä, abulümi amo nogila digamäia, ema aeai ado odoa säla ï.
29 Gaso, ea eedoma säla obëgësalea, Ne gäheo i yafie dibalä nea, dïe hamoi baagi sëi, memalä galabaia hamoi gadoi hamolasisa nea, dïe ado neadigila made nelo. Amai gaso, dia segeyo afädëgi, na ne damelë neebe amolibalä obeägïmäia, sugua meme üdïli afädë made ïlo amo, dihï helësëmo.
30 Dïe malö go idigi nawela susugu hamolo udia amoligali, dïe muni ïala waeasesa maadei amo obëgëla maasebegi, dia sugua gao üdïli säfei nelo amo, nufuda negei gabio.
31 Amala säsebegi, ïe eedo amea säla obëgësalea, Nïe malö-o, dida segeyo sulubadelagi halïgïla nelo. Nelebo nïe dibe amo sulubadela, dïe dilo amoda.
32 Gaso, dïe didoo amo baagoi gaso, walio namolö bu obëgëla misi neebe amogige, e dabadigi gaso, nilïa beagolei amogige, walioda, nilïle iso asigia, hïdo elöla haeafula obeägïmolö dialeala säi.