20
Yesuma, dia geloi gaula nebegoda, nowëa ïla nabi
(Madiu 21.23-27; Maga 11.27-33)
1 Segeyo afädëgi, Yesu e Godeïe mosöa nea, udia dolöma säla olelela digi, Ado Mala Hedabi säla ïadigisa nebegi, gobela ïlo busa nefolalo amolige, mala dawadigi nefolalo amolige, asigi gäwi dafidilo nefolalo amolali, e neebea ami misi.
2 Ilia Yesuma nabahalea, Dia nelebo hamosebego, nowëa hamomalai hamosa. Nilïa nabedelä, dia säla ïmo. Go hamomäia, geloi go nowëa ïasiola nabi.
3 Amala nabasebegi, Yesuea ilima säla obëgësalea, Dilia nema säla obëgëmäia, nage dilima ado afädë nabahago.
4 Yonea ödägi gesa nelo amoda, abidila misi. Selesaia mosöala misile, ma, dolömadila misilela nabi.
5 Amala nabasebegi, hilidomu didiähalea, Nilïa selesaia mosöala misila säseda, ea nilïma, Ema asigi afädë made negei goda, edoïela nabulö gabu.
6 Amase, nilïa dolömadila misila säsege, udia dolö nefolalebe gowe ilia, Yone eda bea sälo afädë neala helësëlo ameada, nilï igia nufulö gabula didiäi.
7 Amala didiälahilä, ilia säla obëgësalea, Yonea geloi nii amoda, abidi niidu. Nilïa dawa mademelëla säi.
8 Amala säsebegi, Yesuea ilima säla obëgësalea, Amai galëda, na nelebo hamosebeweda, gowea hamomalai hamosa neamelëla, nage dilima made säla ïmolömelëla säi.
Ado besula sagai oodola beaha namialola säi
(Madiu 21.33-46; Maga 12.1-12)
9 Amala sälahilä, Yesuea udia dolöma ado besu gowe säla ï. Dolö afädëa i gägä negelo gelebi ëfë sagaia sagala negesiä, dolö odoaea oodola beaha namialola sälahilä, hï eda sege wagadi made, holöbö sedade namolö asi.
10 Gägä amo faimolö fu besela galasebegi, sagai eedo amea, ïe hamoi hamolasilo afädëma sähalea, Nïe sagai oodola beaha nefolalebe amolima, gägä odoa faila ïmola sämolö mosalola säi. Amala säi amo nabala, ea sämolö awäsebegi, oodola beaha nefolalo amolia, hamoi hamolasilo amo nufudala ïalalelahilä, nelebo afädë made gaui, fisiga gai.
11 Amala hamoi gabugi, sagai eedo amea, ïe hamoi hamolasilo elö amo bu mosaloi. Gaso, amoge oodola beaha aligilo amolia, hïdo elöla gadiabola nufudala ïalalelahilä, nelebo afädë made gaui, e badumu fisiga gai.
12 Amalamu hamosebegi, sagai eedo amea ïe hamoi hamolasilo osodama oböla, bu mosaloi. Awäsebegi, sagai oodola beaha aligilo amolia, e nufudala afisilahilä, yala baagido sogobala sadia gai.
13 Amalamu hamosebegi, sagai eedo amea sähalea, Amai na abilia hamomolödu. Hä, nïe malö, nihï boba hamoi neebe wema mosöla sämolö. Ilia e hawala nea, mogola hamomolöla helësësala säi.
14 Amai gaso, malö amo awäsebegi, oodola beaha aligilo amolia e bealahilä, hilido didiähalea, Sagai eedo amoïe nalä negei nimolö amoda, hä, go gabugo. Ïe nelegei dibe goda, nilïgali nedelä, eda baagomäia nufidedila sälahilä,
15 sagai yala baagido sogobala sadia galahilä, baagomäia nufimelëla säi.
Amala sälahilä, Yesuea ilima sähalea, Amala hamoi amo, sagai eedo amea dolö amolima abilia hamomolödu.
16 E maala, oodola beaha aligilo amoli nufudaha maadelahilä, sagai amoda, odoaea oodola beaha namiäia ïmolömelëla säi. Amala säsebegi, udia dolö sefolalo amolia, ado amo nabalahilä, Amala hamomolöi mademelëla säi.
17 Amala säsebegi, Yesuea sebe amoli sidawewela bealahilä sähalea, Amai galëda, Godeïe bebagi ado gowe säla dëdëla negei dibe goweda, mi edoïe säla negei dialea. Amea sähaleada,
Mosö olelo amolia, igi galone hamomolöi made gabula memelela fisi amoda, galone geloi dafidilo besela galai neamelëla
säla dëdëla negei dialea.
18 Udia dolö sulubadela igi amodaia digase amolida, dusudasimolömelë. Amase, igi amea dolö afädëdaia daala negeseda, eegela fisimolöi fisimolömelëla säi.
19 Mala dawadigi nefolalo amoliage, gobela ïlo busa nefolalo amoliage, Yesuea ado besula säi amoda, nilï helësëla säsebela helësëlahilä, segeyo amo galamu e gaudelä hamoi gaso, udia dolö nefolalebe amolibalä bedäi.
Dagisi muni ïmolö dialeale, ma, maadelela nabi
(Madiu 22.15-22; Maga 12.13-17)
20 Ilia Yesu gaumolöïe hedabola idihë nea, dolö odoaea hado desega mosäia fisiga galahilä, ilima sähalea, Dilia ea säse amo wäfalï asigi falagasei nea, nabulöi gadoi hamola, fädäla nabulö mosalola säi. Ea ado asiala säse amo nabalahilä, ado amohï, e gaumolöïe mi hogosa nelo. Amalahilä, Olomoïe gabena neebe amoïe naabogi gausimolöla helësësa nefolalo.
21 Mosaloi amoli awälahilä, Yesuma nabahalea, Säla Olelelo-o, nilïada, dia ado säsebegoge, mala säla olelesebegoge, udia dolöma mogolafalï sähala helësësamelë. Amase, udia dolö sulubadela memelela made, afädëdilamu, Godeïe idigi aulo mala amo, ilima säla olelese amoda, mogolafalïmu säla olelelomelëla helësësamelë.
22 Hä, beaha aligilo Gini Sisa neebe amogali, nilïa dagisi muni ïmolöda, dofeale, ma, dofea madelela nabi.
23 Amala nabasebegi, Yesuea, e fedogola nabasebe amo helësëlahilä, ilima sähalea,
24 Muni giwi afädë nema olemola säi. Ilia ema olesebegi, ea ilima nabahalea, Muni giwi gogi, dolö busa dibe goge, ëi dibe goge, nowëïe gabula nabi. Amala nabasebegi, ilia säla obëgësalea, Sisaïela säi.
25 Amala säsebegi, ea ilima säla obëgësalea, Amai galëda, nelebo Sisaïeda, Sisa hïma ïmalo. Godeïeda, Gode hïma ïmalola säi.
26 Amala säsebegi, dolö amolia udia dolö nefolalo amolile sidaia ami, Yesuea ado säi amea, e gaumolö ulï nelo. Ea säla obëgëi amogi, ili fudugilahilä, adola made, aumala nefolalo.
Sadiusi ilia baagoi nowemolö amoïe Yesuma nabi
(Madiu 22.23-33; Maga 12.18-27)
27 Sadiusi dolö iliada, udia dolö baagoi amolida, made nowela galamolöla sälo amoligi, odoaea Yesuma nabulöïe, e neebea misi.
28 Ilia nabahalea, Säla Olelelo-o, Mosesea, nilïa hamomäia, ado afädë dëdëla negei dibe amea sähaleada, Dolö afädëïe edooea udia neala salea, malö made sogobala baagoseda, udia didalo amo edoo elö amea nealahilä, baagoi amoïe ëigila malö sogobamolö dialeala säla dëdëla negei dialea.
29 Amaimo, edoolali gifalädalïa sulo. Abulümi amea udia afädë neala nea, malö made sogobala baagoi.
30 Baagosebegi, edoo agedu ameage,
31 amase, edoo osoda ameage, udia amo neasebegi, amalamu hahamola awäha neamu, dolö gifalädalïa amolia, malö made sogobala neamu, baagosa maadei.
32 Amala baagosa maadeibua, hobeafalï, udia amoge baagoi.
33 Amala hamoi amo, dolö gifalädalïa amolia udia afädë amomu neala sulo amo, hobea baagoi amoli nowela galasolo amo gala, udia amoda abodoweïe udia samolödula nabi.
34 Amala nabasebegi, Yesuea säla obëgësalea, Udia neadigi, dolö fila awäla digise amoda, walio nagadaia wi nea amahamelë.
35 Amaha gaso, Godea udia dolö baagoiala nowela galala, hobeala namolö dibea ami namolö dofeala helësëi amoliada, udia made neadigi, dolö made fila awäla digimolömelë.
36 Ilida, selesaia fii amoli gadoi namolö ameada, bu elö baagomolö ulï namolömelë. Baagoia amila nowela ifosi amea, ilida Godeïe malölali namolömelë.
37 Amaimo, Moseseage, i holöfalïgi nulo söa fedai amoïe dëdëla negei ameada, udia dolö baagoi amoli nowemolö amo ulufala olei. Mida, beba amogila, ea Dafidilo Geloima sähalea, Abalahamaïe Gode, Aisagaïe Gode, amase, Yeigabaïe Godemelëla säi amea olei. Sigi Obëgëi 3.6
38 Gode eda baagoi amolile made, eda udia dolö nefolalebe amolile Gode neamelë. Mida, udia dolö amoli sulubadelada, ïe siigi nefolaleamelëla säla obëgëi.
39 Amala säla obëgësebegi, mala dawadigi odoa nefolalo amolia säla obëgësalea, Säla Olelelo-o, hedabola säimelëla säi.
40 Ili bedähalea, afädëa ema ado bu elö made nabi.
Godea Afädë Memelei amoïe Yesuea udia dolöma nabi
(Madiu 22.41-46; Maga 12.35-37)
41 Yesuea udia dolö amolima nabahalea, Afädë Memelei amo eda, Debidiïe malöla sälo amoda, abeahäla sälodu.
42-43 Debidi hï Gë Udälo bebagi säla negei dibe amogi sähalea, Dafidilo Geloia nïe Dafidilo Geloima sähalea, Na dïe ado nii nefolalebe amoli, di hawala ifosimäia, dida nïe naabo dafädimadi awäla salea, beaha samialola säimelë. Gë Udälo 110.1
44 Debidia hïma, Dafidilo Geloila säi amoda, e oböla, Debidiïe malöda abeahäladula nabi.
Mala dawadigi nefolalo amolia mala nafadela hamoi
(Madiu 23.1-36; Maga 12.38-40; Ulugu 11.37-54)
45 Udia dolö nefolalo amoli sulubadelaea, ea ado säsebe amo nabaha sefolalebegi, Yesuea ïe bëgëla aulo amolima sähalea,
46 Mala dawadigi nefolalebe amoli idihë namialo. Ilia fagulo sedade salugalahilä nawesalea, magaia gaamugi awälahilä, udia dolöea ili beala, di go gabiola sämäia hameloge, gedolo mosöa dafidilo filo dibea amimu fimolö hameloge, amase, udia dolö yafie gegedola molö nasebea ami, dolö busa amolile filodaia amimu samolö hameloge, neamelë.
47 Amase, iliada udia didalo sebe amoli dahila neala, ilile mosöa nelegei dibe amo fa neala gaula aulo nea. Ilile asigi musügä negesilahilä, adoeamu Godema sedadela adolo neamelë. Dolö amala hamose amolida, së edefade muäia, baala ïmolömelëla säi.