21
Udia didalo afädëa Godegali muni negei
(Maga 12.41-44)
1 Amala sälahilä, Yesuea bea gahamelebe, nelegei yafie negelo dafidilo dolö nefolalo amolia, Godeïe mosöa muni negelo i amogi, muni ïmolö gaui amo negese melï.
2 Amala beaha nebegi, udia didalo busadäoi afädëa muni giwi holöfalï äudä muni salelo bogosi i amogi salase melï.
3 Amo bealahilä Yesuea sähalea, Na dilima dofä sähago. Udia didalo busadäoi gowea negei ameada, odoa ili sulubadelaea negei amo baagila asimelë.
4 Udia dolö egowe ili sulubadelaea muni yafie dilo amogi ï. Gaso, udia goweada, muni made gaui, hï molö nimolö muni gaui amo, hulu negesa maadesiola säi.
Godeïe mosö haila fisimolömelëla Yesuea säi
(Madiu 24.1-2; Maga 13.1-2)
5 Odoaea Godeïe mosö neebe amo beala sähalea, Igi boboga hedabi hïdo elöi ameage, udia dolö ilia Godegali galu ï ameage, mosö go hedabola momadoi gabula säsebegi, Yesuea sähalea,
6 Dilia walio nelebo bease goïe segeyo afädë maasolo amo gala, igi afädë igi elödaia made negela, sulubadela mugulula digaha maademolömelëla säi.
Yesuea yöi yafie moholömelëla säi
(Madiu 24.3-14; Maga 13.3-13)
7 Amala säsebegi, ïe bëgëla aulo amolia nabahalea, Säla Olelelo-o, nelebo hamomolö säi amolida, abola hamomolö amoïe säi. Nilïa dafidi nofe abodo gadoidale hamose amo beala, nelebo besela galamolö amoli hä, ga madesa gabula helësëmolödula nabi.
8 Amala nabasebegi, Yesuea säla obëgësalea, Odoaea dili dahila neloea, hedabola idihë namialo. Mida, dolö yafie maalahilä, nïe ëi säla sähalea, Neda emelëla säla, amase, Segeyo amo ga madefalï dialeala sämolö moholömelë. Amala säseda, dilia ili bëgëla mosabio.
9 Dilia hobeala nabahalea, gädili neebe amoli edefade nudusalea wabula säsege, udia dolöea ba beala, ilile gamanebalä nudusalea wabula säsege amo nabala, dilia bedäla hehealemabio. Nelebo amoli dafidi amala hamomolö dialea gasoda, segeyo fodolo aligila wagamolö mademelëla säi.
10 Amala sälahilä, ea ilima sähalea, Fii elöle elöle nudula digi, gini elöle elöle nudula digisa namolömelë.
11 Fogoli edefademaläge, sïdë iige, amase, olo iige, sege elö elölagi moholömelë. Mudaia hamomolöi made gadoige, edefademalä bedämolö elöla elölage moholömelë.
12 Nelebo amoli sulubadela, aso, made besela galala neëgida, ilia dili gaulahilä, sëlasisa namolömelë. Gedolo mosöa ami dilibalä gudilahilä, galabaia mosöa galabaia negemolömelë. Amase, dilia nïe ëi gaula neebe goïeda, ilia dili beaha aligilo ginile gabenale neebea ami sigi gaula awäla, ifosimolömelë.
13 Amala hamoseda, ilima ado mala ulufala säla ïmäiaïe, idi gai doga negesalea amamolömelë.
14 Amaseda, dilia dafidi ilima ado abodo säla obëgëmolödula asigia säosäola made helësëmalo.
15 Mida, na dilile nafia ado negesila, asigi falagaselasisegi, dilibalä ado nii nefolalebe amolia ado amo haila digila, made neadigimolömelë.
16 Dilile diadole diemelege, didooge, amase, dili sosogo odoage, dili damelëge, nefolalebe amolia dili hololölahilä, ado nii neebe amoligali gaula ïasegi, ilia diligi odoa baagomäia nufulömelë.
17 Amase, dili nïe ëigi nefolalebego bealahilä, sulubadelaea dilima bimolö habobamolömelë.
18 Amala hamomolö gasoda, dilile busa hilï gogi, afädë made beselala fisimolömelë.
19 Dilia aso maadela, gelola aligiseda, namolö neala gaula namolömelëla säi.
Yalusaleme nafademolömelëla Yesuea säi
(Madiu 24.15-21; Maga 13.14-19)
20 Yesuea ado aso, sähamu nea sähalea, Dilia beahaleamelële, ami dolö yafie amoli mafula, Yalusaleme nogöla amalei beaseda, gaamu amo nafademolöda, ga madefalï gabula helësëmalo.
21 Segeyo amo gala, udia dolö Disiligi Yudia nefolalebe amolida, segebi dibea ami fisäla baluluia afufumolö dialea. Udia dolö Yalusaleme isogi nefolalebe amolida, gaamu amo dïgïla näiadodi moholö dialea. Amase, udia dolö gaamu baagido nefolalebe amolida, gaamu isogi nogila made digamolö dialea.
22 Ado sulubadela säla dëdëla negei dibe amo gadola gausiala digamäia, segeyo amogida, asiala hamoi amoïe së ïmolöïe segeyomelë.
23 Segeyo amo gala, udia fagulo hagui sefolalebe amolige, malö dodo ïaha sefolalebe amolige, asigii gabu. Mida, yöi edefade nagadaiawi besela galala, udia dolö amoligali Godeïe mihalälo söga salimolömelë.
24 Ado nii neebe amoli maala, nudulo helebea ili nufudala baagomolömelë. Ilia ili nafodola gädili dibe amo sulubadelagi, sigi gaula moholömelë. Amase, fii odoa nefolalebe amolia Yalusaleme neala emesala nolealesa neamu, ilile wagamolö segeyo daiala negei amogi wagamolömelë.
Hobeala Dolöïe Malö obëgëmolöïe säi
(Madiu 24.29-31; Maga 13.24-27)
25 Yesuea ado aso, sähamu nea sähalea, Segeyo amo gala, esogige, aubegige, gasumilïgige, nofe elöi hamomolömelë. Amala hamose amo gaalu, nagadaia wi duhulu aidagula maase amogige, goba nabase amogige, fifi asi amoli edefademalä hehealela bedäla, asigia säosäosa namolömelë.
26 Udia dolöea nelebo hamose amoli beahalea, nagadaia abilia hamomolödula helësëla bedähalea, si dädäbëlela digamolömelë. Mida, muugi nelebo geloi hïdo elöi amo neala fogolasimolö amea.
27 Segeyo amo gala, Dolöïe Malö amoda, geloi edefade amole, yo digalo hïdo elöi amolebalä, mu baidilidaia maala neë, ilia bimolömelë.
28 Nelebo säi amo gadola hamola ulufadigimolöïe mi gäwiseda, dilia nowela nea, busa fädägägïa adogola namialo. Mida, Godea dili fisigäla fisigisimolö segeyo hä, ga madesagomelëla säi.
Yesuea äfäeoïe ado säi
(Madiu 24.32-35; Maga 13.28-31)
29 Amala sälahilä, Yesuea ilima ado besula gowe säla ï. Dilia äfäeoge, i odoa nefolalebe amoli sulubadelage, bimalo.
30 I bäu gähe bobagiseda, hä, sege esomolö ga made gabula, dihili amala helësëlomelë.
31 Amo gadola, dilia nelebo säi amoli hamose beaseda, Godea Beaha Maadela Sigi Neebe amo moholöda, ga made gabula helësëmalo.
32 Na dilima dofä sähago. Udia dolö walio nefolalebego baagola made, nefolalegi wäla, nelebo säi amoli sulubadela hamosa maademolömelë.
33 Mu giwige, naga föige, hogosa helemolö gaso, nïe adoda, dofä made hogosa helemolömelëla säi.
Idihë nea beaha namialoi
34 Yesuea ado aso, sähamu nea sähalea, Gagaomolöïe gagaolo ödä naala, gagaola dädäbëleloge, amase, nagadaia namolöïe säosäola helësëloge, dilile iso asigigi yöia idogola nea, segeyo amo dili mia aabela besela galala,
35 gei dibea ami hogoi awäsegi, fädälo amo gadola fädäloea, hedabola idihë namialo. Mida, segeyo amo sege föi sulubadelagi, udia dolö sulubadela nefolalebe amolima moholö ameada.
36 Segeyo sulubadelagi idihë nea, nelebo hamomolö amo sulubadela dilia sisigala awäla yomäiaïege, amase, Dolöïe Malö amoïe siigi namiäiaïege, geloi ïmäia, Godema adosamu namialo.
37 Segeyo sulubadelagi, Yesuea udia dolö amolima Godeïe mosöa ami säla olelesa nelolahilä, deadiseda, gaamugi amila doadigila awäla, segebi ëi Olibebia ami midilö afufusa nelo.
38 Udia dolö sulubadelaea yosefalï nowela, Yesuea säse amo nabulöïe, Godeïe mosöa amimu maaha nelo.