Yesu e së naala baagolahilä, bu nowei
22
(Ulugu 22–24)
Yesu nufuäia Yudasaea busa dolö amolibalä ado afädë negei
(Madiu 26.1-5, 14-16; Maga 14.1-2, 10-11; Yone 11.45-53)
1 Segeyo amo gala, Segeyo Edefadegi beledi edelo yidila made gobela molö amoïe segeyoda, ga made dilo. Ëi elöda, Baagila Asi Segeyolage sälo.
2 Gobela ïlo busa nefolalo amoliage, mala dawadigi amoliage, udia dolö nefolalebe amolibalä bedälo ameada, ilia Yesu nufulöïe idi hogosa nelo.
3 Giwilasi amoligi, afädë Yudasa emada, ilia Isagaliadala sälo amoma, hä, Saidani fedai.
4 Yudasa e gobela ïlo busa amolige, Godeïe mosö beaha aligilo amolile busa amolige neebea ami awälahilä, ilibalä säla didiähalea, ea Yesu abeahäla hamola hololömolödula didiäi.
5 Amala didiäsebegi, dolö amolia obeägïlahilä, egali muni ïmolömelëla säla negei.
6 Ilia säi amo nabala Yudasaea ülahilä, Yesu e udia dolö yafie gegedoi diëgi made, hïdo nafolai neëgi, ilile naabogi e gausimolöïe fu hogosa nelo.
Bëgëla aulo äudäea molö daiai
(Madiu 26.17-25; Maga 14.12-21; Yone 13.21-30)
7 Beledi yidila made gobelo Segeyo Edefade amo besela galai. Segeyo amo gala, Baagila Asi Segeyo amoïe sugua sibi malö nufulö dilo.
8 Amamolö gabugi, Yesuea Fidale Yonelema sähalea, Baagila Asi Segeyo amoïe nilï molö molöïe, alia daiamolö mosalola säi.
9 Amalebe, elea naba obëgësalea, Amai, diada alïa abidi daiamäia hamesebela nabi.
10 Amala nabasebegi, ea elema säla obëgësalea, Ali gaamugi awäla besela galasegi, dolö afädë ödä iigi usi gaui maaha neebe amea ali gausiala digamolömelë. E awäse amo gadola bëgëla awälahilä, mosö e nogila digase amogi, alige nogila digala,
11 mosö eedo amoma gomalä sämalo. Säla Oleleloea dima nabahalea, Ne, nïe bëgëla aulo nefolalebe amolibalä Baagila Asi Segeyo amoïe molö molöïe, mosö hogolida abidi dialeala nabila sämalo.
12 Ea alima mosö daia hogoli edefade afädë, nelebo negesa maadei dibe amo olemolömelë. Ami molö molöïe daiamalola säla ï.
13 Amala sälebe ele hä, awälahilä, nelebo ea säi amo gadolafalï gausiala digasebegi, elea Baagila Asi Segeyo amoïe molö molö ami daiai.
Yesuea beledile wani ödäle ïe bëgëla aulo amoligali ï
(Madiu 26.26-30; Maga 14.22-26; Age Golïdi 11.23-25)
14 Segeyo amogi, molö molö fu besela galasebegi, Yesula abosolo dolö amolali molö molöïe auli amo amalela fifigi.
15 Amala sefolalea, ea ilima sähalea, Ne aso, së made naala neebewegi wäla, Baagila Asi Segeyo amoïe molö dilibalä gedola molöila dofä hamesamu nelomelë.
16 Amoïe mida, na dilima säla ïahago. Na nasewe gadola made naala nea, Godea Beaha Maadela Sigi Neebea ami molö amoïe mi fädäla ulufala negei diëgi, bu molömelëla säi.
17 Amala sälahilä, ea gaabogi usi neala gaula nea, Godema nesegelahilä sähalea, Gowe nealahilä, gobe dadagabola mualo.
18 Amoïe mida, na dilima säla ïahago. Na wani ödä walio nasewe gadola, made naala nea, Godea Beaha Maadela Sigi Neebe amo besela galala neëgi, molömelëla säi.
19 Amala sälahilä, ea beledi afädë gaula nea, Godema nesegelahilä, dagabodasila iligali ï. Ïahalea, ea ilima sähalea, Egoweda nïe domalomelë. [Dili ugila negela ïahago. Nahalea, ne helësëla mualo.
20 Amo naha maadelahilä, amo gadola wäla, ea gaabogi usi amo gaula nea sähalea, Gaabogi usi goweda, asialo made ado gähe elöi nïe healea säla negesebe amoda gomelë. Dili ugila negela, nïe heale besigahawe.]
21 Gaso, Bimo! Dolö ne hololömolö amoda, nebalä aulidaia negela, molö naha saleamelë.
22 Ïe, ado säla negei dibe amo gadola, Dolöïe Malö amo bëgëla moholö gaso, e hololöla odoaïe naabogi gausise dolö amo, asigii gabula säi.
23 Amala säsebegi, ilia hilimu elöea elöma nabala, elöea elöma nabalalahilä, Nowëa amala hamomolödula säla didiäha sefolalo.
Ïe bëgëla aulo amolia hilimu dafidilo namolöda nowëla säla gëgëi
24 Amala sälahilä, odoaea nilïgi goweda baagila asi neebela helësësebe amoda, nowëdula säla gëgësa dilo.
25 Amala gëgësa dibegi, Yesuea ilima sähalea, Udia dolö fii odoaïe beaha aligilo gini neebe amoliada, gelola beaha aligilo nea, amase, ilile ëi sälo amolia gelola sigi aligila, hili ili helësëla sähaleada, Udia dolö ugila negelola sälo nea.
26 Gaso, dilida amo gadoi namolöi mademelë. Dili neebe gogi afädë dafidilo nea galëda, bu üfï hamola obëgëmolö galea. Amase, diligi beaha aligilo neebe ameada, oböla, hamoi hamolasilo gadoi hamola obëgëmolö galea.
27 Dafidilo neebe amoda, nowë. Afädë fia idogola salea, aulidaia negela, molö naha sebe amole, ma, e molö muäia deala gaula mafusa neebe amole. Afädë fia idogola salea, aulidaia negela, molö naha sebe amo dafidilo nea madele. Amai gaso, ne dilibalä neada, hamoi hamolasiloea aligilo amo gadola neebewemelë.
28 Ne mia yöi odoa besela galasebegi, dilia ne dïgïla made awäla nelomelë.
29 Nïe Naadoea Beaha Maadela Sigi Neebe amo negali ï amo gadoi wäla, nage diligali ïahago.
30 Nïe Beaha Maadela Sigi Neebea amida, dilia nïe aulidaia negela, molöle ödäle naha sefolamiäiage, amase, dili beaha aligilo filodaia salea, Isilale sosogo giwilasi amoli sigi namiäiage, ïahagomelëla säi.
Yesuea Fidama, dia ne dawa madela sämolömelëla säi
(Madiu 26.31-35; Maga 14.27-31; Yone 13.36-38)
31 Saimono-o, Saimono-o, nabuö. Eladi gadoi widi dobi amoïe isole düle gasala sadia adogola mogelo amo gadola, dilima amala hamomäiaïe, mugabe Saidania fu ïmola Godema nabimelë.
32 Gaso, dia asigi afädë negeigo made digamäia, na dïe Godema adolasimelë. Di hä, besula obëgëla maalahilä, didoolali neebe amoli, gelolasisa namialola säi.
33 Amala säsebegi, Fidaea säla obëgësalea, Dafidilo-o, di galabaia mosöa awäsege, di baagosege, neda dibalä moholöïe daiai neawela säi.
34 Amala säsebegi, Yesuea säla obëgësalea, Fida-o, na dima sähago. Walio gasigi haea gagalugo gawalia made gäla neëgi, dia nafi bu ohodoala, ne dawa madela sämolömelëla säi.
Yesuea ïe bëgëla aulo amolia muni saleloge, aduge, nudulo helebege, gaumalola säi
35 Yesuea ïe bëgëla aulo amolima nabahalea, Nïe hamoi hamola mosäia, na dili fisiga gahalea, muni saleloge, aduge, amase, emo usililoge, dilia gaula mosabiola säsebegi awäsolo amo gala, dilida nelebo gumusui afädë nelolela nabi. Ilia säla obëgësalea, Ai, amala made hamoila säi.
36 Amalebe ea ilima sähalea, Amai gaso, walio dolö afädëa muni salelo galea galëge, adu galea galëge, hä, nimolö dialea. Amase, afädë e nudulo helebe maade galëda, fagulo daia gäi amo giila muni nealahilä, nudulo helebe nimalo.
37 Amoïe na dilima säla ïahago. Godeïe bebagi ado säi dibe amoda, nema gausiala digamolö dialea. Ado amea sähalea, Udia dolöea eda ado säla negei neadigilo dolö amolibalä neala helësëmolömelëla säla dëdëla negei dialea. Mida, ne helësëla ado säla dëdëla negei dibe amo gadola, hä, walio gausiala digasebegomelëla säi.
38 Amala säsebegi, ilia ema sähalea, Dafidilo-o, bimo. Nilïa nudulo helebe äudä wi dialeamelëla säi. Amalebe, ea ilima, amo dofeala säla obëgëi.
Yesuea Olibebia Godema adoi
(Madiu 26.36-46; Maga 14.32-42)
39 Yesu e gaamua amila, hï dafidi aulo amo gadola, Olibebia moholö awäsebegi, ïe bëgëla aulo amolige ebalä asi.
40 Ili segea ami besela galalahilä, ea ilima sähalea, Nafadea dili fedogola beasegi digaloea, Godema adosa namialola säi.
41 Amala sälahilä, ili dïgïla e holöbö wagadi made, igia nidi habisia amo gadoia awälahilä, emo gumu sasagala salea, Godema adosalea,
42 Naado-o, gaabogi usi na molö gaulubewe, neala gaula moholö helësëseda, neala gaula mosalo. Amamäia gaso, na hamese we gadola made, dia hamese amo gadola hamomalola säi.
43 [Amala säha sebegi, selesaia fii afädë Hebenila maala ulufalahilä, e gelolasi.
44 Yesu e asigigi yöia idogola edefademalä säosäolahilä, Godema gelola adosebegi, ïe filïmo amoda, oböla, heale gadoi besela galala nagadaia dögi.]
45 Godema adola wagalahilä, e nowela, ïe bëgëla aulo sefolalebea ami bu obëgësamelebe, ili adidi difolalebe melï. Mida, ilile asigigi edefademalä yöi amea.
46 Bealahilä ea ilima sähalea, Abilia hamosalea adidi difolalea. Dili adidi dibego nowelahilä, Godema adomalo. Nafadea dili fedogola beasegi digaloeala säi.
Yudasaea Yesu ado nii amolile naabogi gausi
(Madiu 26.47-56; Maga 14.43-50; Yone 18.3-11)
47 Yesuea ilibalä ado amo säha nebegi, dolö yafie e neebea ami misi. Giwilasi amoligi dolö ëi Yudasaea ili sigi gaula misi. E Yesu mia maala, Yesu gaula mimi.
48 Gaso Yesuea ema nabahalea, Yudasa-o, dia Dolöïe Malö amo gaula mimila hololösalela nabi.
49 Yesu hïbalä nefolalo amolia gomalä hamodelä hamosebela bealahilä, ema nabahalea, Dafidilo, nilïa ili nudulo helebe wea nufidedulela nabi.
50 Amala nabalahilä, iligi afädëa gobela ïlo busa edefadeïe hamoi hamolasilo amo nufudalahilä, ïe gëhe dafädimadi amo dagala salisi.
51 Amala hamosebegi, Yesuea sähalea, Mala go gadola hamomabio. Fisimalola säi. Amala sälahilä, ïe naaboea gëhe amogi diigisebegi, gëhe amo bu hedabola obëgëi.
52 Amala hamolahilä, gobela ïlo busa amoliage, Godeïe mosö idihë aligilo amolile busa amoliage, amase, asigi gäwi dafidilo nefolalo amoliage, Yesu gaumolöïe misi amolima ea sähalea, Dilia helebege, baialage, gagaula mofiaigoda, fa nelo dolö gaulo amo gadola gaumolöïe mofiaile.
53 Segeyo sulubadelagi, ne dilibalä Godeïe mosöa aligilo amogida, dilia ne made gaui. Gaso, walio gasimi sagaloea beaha aligisebe goeada, hä, dilile segeyomelëla säi.
Fidaea Yesu dawa madela säi
(Madiu 26.57-58, 69-75; Maga 14.53-54, 66-72; Yone 18.12-18, 25-27)
54 Amala säsebegi, ilia Yesu gaulahilä, gobela ïlo busa edefade amoïe mosöa ami e, hä, sigi asi. Amalebe, Fida eda, holöbö hobeala, ili awäse amo bëgëla awäha nelo.
55 Mosö amoïe yala isogi, ili nulo gobela sefolalebegi, Fidage ilibalä ami sulo.
56 Nulo gobei söa fedasebea ami e sebe amo bealahilä, hamoi hamolasilo dolïsä afädëa ema siila nea, Dolö sebe gowege ebalä nelomelëla säi.
57 Amala säsebegi, Fidaea sähalea, Udia, nada e dawa mademelëla säi.
58 Oböla, holöfalï nelolahilä, hobeala dolö elö amea e bealahilä sähalea, Dige dolö amoli sosogo amogimelëla säi. Amala säsebegi, Fidaea sähalea, Dolö, go ne mademelëla säi.
59 Amala säla aoa afädë gadoi nelolahilä, dolö elöea gelola sähalea, Dolö goweda, dofä ebalä nelo. Mida, eege Galili dolömelëla säi.
60 Amala säsebegi, Fidaea sähalea, Wa! Dolö! Dia säsebegoda, na dofä dawa mademelëla säi. Amala säi amole, haea gagalugoea gäi.
61 Gagalugo gäse amo gaalu, Dafidilo Geloia besuia imogola Fidama siila nelo. Amala siila nebegi, Fidaea helësëla obëgësalea, Dafidilo Geloia ema sähalea, Walio gasigi haea gagalugo gawalia made gäla neëgi, dia nafi bu ohodoala, ne dawa madela sämolömelëla säi amo helësëi.
62 Amala helësëlahilä, e segea doadigila awäla, gäia güsäla dïisa nelo.
Ilia Yesu gagadela digi, nufuda digisa nelo
(Madiu 26.67-68; Maga 14.65)
63 Yesu sigi nelo dolö amolia e gadiabola digi, nufuda digisa nelo.
64 Faguloea ïe si usulalahilä, ema nabahalea, Dolö di nufudase egoweda, nowëa gabu. Dihï bea säla sämola säha nelo.
65 Amala sälahilä, ilia e gagadela ado nafadela yafie säha nelo.
Ilia Yesu e galïsolö dolöbalä gudi nabi
(Madiu 26.59-66; Maga 14.55-64; Yone 18.19-24)
66 Yosefalï, eso si besela galase amo gaalu, Yu udia dolö ilile asigi gäwi dafidilo galïsolö dolö hulu gegedoi nelo. Amoligida, gobela ïlo busa amolige, mala dawadigi amolige nelo. Ili gegedoi dibea ami Yesu sigi maalahilä,
67 ilia ema sähalea, Afädë Memelei amo di galëda, nilïma sämola säi. Ea säla obëgësalea, Na dilima säla ïaseda, dilia na dofä säsebela made helësëmolömelë.
68 Amase, na dilima ado afädë nabasege, dilia made säla obëgëmolö gabu.
69 Segeyo walio wila nofela, Dolöïe Malö amoda, Gode Geloi Edefade Neebe amoïe naabo dafädimadi awäla samolömelëla säi.
70 Amala säsebegi, ili sulubadelaea ema nabahalea, Amai dida Godeïe malö nealela nabi. Ea ilima säla obëgësalea, Neda dihili säsebe gomelëla säi.
71 Amala säsebegi, ilia sähalea, Ea hamoi amoïe mi edoïe odoama nalï hogomolö. Hïle nafigila säse, nilïa nabi amomelëla, säi.