23
Ilia Yesu Bailadi neebea sigi afiai
(Madiu 27.1-2, 11-14; Maga 15.1-5; Yone 18.28-38)
1 Busa dolö amoli sulubadela nowela, Yesu Bailadi neebea sigi afiai.
2 Ilia ebalä gudimolö nea, mi gäwila sähalea, Dolö goea ado halowela säla, Yu udia dolöea asiala hamomäia dusugaha neë, nilïa melëlomelë. Amase, nilïa Sisama dagisi muni negelo amoge, ea negemabiola sälahilä, Afädë Memelei beaha aligilo ginida, emelëla säsio.
3 Ilia amala säsebegi, Bailadia Yesuma nabahalea, Dida Yu udia dolöïe ginilela nabi. Amala nabasebegi, Yesuea säla obëgësalea, Dihï säse gomelëla säi.
4 Amala säsebegi, Bailadia gobela ïlo busa amolimage, udia dolö gegedoi nefolalo amolimage sähalea, Dolö gowea asiala hamoi afädë na made beasebemelëla säi.
5 Amala säsebegi, ilia gelolafalï sähalea, Dolö goea Yudia sege sulubadelamadi nawesa nea, ea ado olelese amea, udia dolö neebe amoli sulubadela gëgëlasilo nea. Dafidi Galilimadi mi gäwila hamosa nelo amo, walioda, hä, wi maala hamosa neagomelëla säi.
Ilia Yesu Heledo neebea sigi awäla gudi
6 Ilia säi amo nabalahilä, Bailadia ilima nabahalea, Dolö goda amai, Galili dolölela nabi.
7 Bailadia helësësalea, Yesu e sege Heledoea sigi neloamadila misi gabula helësëlahilä, e Heledo neebea fisiga gai. Segeyo amo galada, Heledo e Yalusaleme ami misi nelo.
8 Heledoea segeyo sedade dafidi nelo amogi, Yesu bimolöila helësësamu nelo amea, ilia e sigi maasebegi, Heledoea edefademalä obeägï. Yesuea hamolo mala säla ï amo ea nabala nelo ameada, Yesuea dolöea hamomolöi made gadoi hamose amo bimolöila hamesa nelo.
9 Amalahilä, ea Yesuma ado odoa yafie nabi. Gaso, Yesuea ema ado afädë made säla obëgëi.
10 Gobela ïlo busa ami nefolalo amoliage, mala dawadigi dolö ami nefolalo amoliage, gelola gudilahilä, ea nafade yafie hamoimelëla säha nelo.
11 Amasebegi, Heledoeage, ïe ami dolö nefolalo amoliage, Yesu gagadela gadiaboi. Amalahilä, fagulo sedade hedabi hïdo elöi afädë salugasilahilä, Bailadi neebea sigi obëgëmalola säi.
12 Dafidi Heledo Bailadileda, ado neala gasi gogoi nelo gaso, segeyo amogi, ele oböla, damelë hamoi.
Bailadia Yesu i fügäigi baala negemalola säi
(Madiu 27.15-26; Maga 15.6-15; Yone 18.38–19.16)
13 Bailadia gobela ïlo busa nefolalo amolimage, beaha aligilo dolö nefolalo amolimage, amase, udia dolö amolimage, wela gegedomalolahilä,
14 ilima sähalea, Dilia dolö gowe ne neebea sigi maalahilä, nema sähalea, Ea udia dolöea ba bimäia ado neasilo neamelëla säi amo, na e dilile si mogogi ifosiä, ea nafade edo hamoi walebelela, ema nabala hogosamu nelo. Gaso, dilia ea nafade gowe ili hamoimelëla säi amoligida, asiai afädë na made melïmelë.
15 Heledoeage, we gadola wäla bealahilä, nilï neebeawi sigi obëgëmaloi gabumelë. Hä, nabuö. Ea hamoi amoïe e baagomäia nufulöda, mi maade gabu.
16-17 Ameada, na e fëgämalola sälahilä, fisiga gamola sämolömelëla säi.
18 Bailadia amala säsebegi, udia dolö sulubadelaea gelolafalï gaalu uuala sähalea, Dolö goda nufudala baagomäia. Balabasada, nihïlïma fisigämalola uuala didigai.
19 Balabasa eada, gaamu isogi ami gamanebalä nudui amoïege, dolö nufudala baagoi amoïege, ilia e galabaia negei nelo.
20 Bailadia Yesu bahïla mosöla sämolöïe, ea ilima bu nabasebegi
21 gaso, ilia gelola uuala säla didigahalea, Eda nufualo. Nufualo. I fügäigi baala negemalola uuala säla didigahamu nelo.
22 Amala säsebegi, Bailadia ilima bu osoda sähalea, Mi edogi. Eada nafade edo hamosio. E baagomäia nufulöïe ea nafade hamoida, na made melïmelë. Amoïeda, na dolö odoama e fëgämalalahilä, mosalahawela säi.
23 Amala säi gasoda, ilia i fügäigi baala negemalola gelolafalï uuala säla didigase amea, Bailadiïe ado hado gai.
24 Amala säsebegi, Bailadia ilia hamomalola egedigisebegi amo gadola hamomalai.
25 Gamane dolöbalä nudui amoïege, dolö nufi amoïege galabaia negei dolö amoda, ilia Bailadia fisigämäia hamei amo fisigäi. Amalahilä, Yesu hili helësëse amo gadola hamomäia, ami dolö amolile naabogi gausi.
Ilia Yesu i fügäigi baala negei
(Madiu 27.32-44; Maga 15.21-32; Yone 19.17-27)
26 Ami dolö amolia Yesu sigi awäha nebegi, gaamu Sailini fii dolö afädë, ëida Saimono, mosö gägäwila asi dibea amila, Yalusaleme besela galamolö maaha nebegi, idiafa gausiala digai. Ilia e gaula, Yesuïe i fügäi ïe gïdädaia negesilahilä, Yesu awäse amo gadola gaula hobeala misialai.
27 Yafie gegedoi amoli Yesu awäse amo gadola afiahalea, iligi udia odoage gualö afiahalea, eegi asigiila didigaola aligi afiaha dilo.
28 Amasebegi, Yesuea besuia imogola nea, ilima sähalea, Yalusalemeïe idiwilali-e, ne helësëla dïimabu. Dihili diligige, dilile malögige helësëla dïimalo.
29 Nabuö. Hobeala segeyo moholö amogida, ilia sähalea, Udia fagulo made hagula, haua, malö sogobamolöi made, malö dodo dofä made ïlo sefolalebe amolia obeägïsa saleamelëla sämolömelë.
30 Segeyo amo gala
ilia segebi dibe amolima säia adahalea, Dili dagabola digala, nilï dabemalola sälahilä, gau dibe amolima säia gahalea, Nilï hagumalola
sämolömelë. Hosea 10.8
31 Mida, ilia walio i ödäla neebe amoma mala egowe gadola hamosa galëda, amai i bausoi neebe amomada, mala abodo gadoi hamomolödula säi.
32 Ami dolö amolia dolö äudä mala nafade hamolo amolege, Yesubalä gaalu nufulöïe sigi asi.
33 Ili afiala sege ëi Busa Giwi dibea ami besela galala, ilia Yesu i fügäigi ami baala negelahilä, nafade hamolo dolö äudä amolege, elö ïe naabo dafädimadi, elö ïe naabo fefeädimadila i fügäigi baala negei.
34 Amala hamosebegi, Yesuea sähalea, Naado-o, ilia gowe hamosala helësëla made hamose ameada, dia egowelile nafade hëla fisimalola säi. Amase, ami dolö amolia ïe fagulo gii amo nowëa nimabelela, sadu dahilahilä, ïe fagulo amo mogei.
35 Udia dolö nefolalo amolia sisila nefolalebegi, busa dolö nefolalo amoliage Yesu gadiabola sähalea, Ea udia dolö odoa ugila negelo. Eda Geleso, Godea Afädë Memelei amo nea galëda, amo gadola, ea hï e ugila negemäiala säi.
36 Ami dolö amoliage e dibe amo ga madela maala aligilahilä, e gadiaboi. Wani ödä gamogai amo muäia, ïe nafia disilahilä
37 sähalea, Di Yu udia dolö ilile gini nea galëda, dia dihïmu ugila negemola säi.
38 Ilia i fügäigi ïe busa daia bidigi adomoi, ado afädë dëdëla negesalea,
Egoweda, Yu udia dolöïe beaha aligilo ginila
säla dëdëlahilä, baala negesi.
39 Nafade hamolo äudä baala negei amolegi, afädëa Yesu gagadela sähalea, Dida Afädë Memelei amo madele. Dia dihïdi ugila negesalea, alïge ugila negemola säi.
40 Amala säsebegi, dolö elö amea elö amoma nemosalea, Diage dolö egowea së nasego gadola nase gogi, dia Godebalä made bedäsebele.
41 Alïa nafade hamoi amoïe së molö dibe amo gadola, ilia alïma hamosebe weda, mogola hamosebe. Be, dolö goweada, nafade made hamoimelëla säi.
42 Amala sälahilä, ea Yesuma sähalea, Yesu-o, di beaha aligilo gini hamola maasolo amo gala, dia ne helësëmalola säi.
43 Amala säsebegi, Yesuea ema sähalea, Na dima dofä sähago. Walio dida, hä, nebalä Hebeni namolömelëla säi.
Yesu hame doala asi
(Madiu 27.45-56; Maga 15.33-41; Yone 19.28-30)
44 Eso si mogogila, eso si osoda amo gadola, sege sulubadela gasilasimu dilo.
45 Mida, eso neëla made, usi amea. Gobela ïlo mosöa fagulo edefade gosai dilo amoge, mogogi gadelala digalahilä, elö eamu eamula negesi.
46 Amase, Yesuea gelolafalï uuala sähalea, Naado-o, nïe gesami dïe naabogi gausisagola säi. Amala sälahilä, hame doala asi.
47 Ami beaha aligilo busa amea, amo beala, Godeïe ëi gauia adogolahilä, sähalea, Dolö goda, dofä asigi mogoi gabula säi.
48 Amase, udia dolö amo bea gegedoi amolia, amala hamosebe amo bealahilä, hilile bidagia nulufuda, hili mosöa obëgëi.
49 Gaso, Yesu e sosogo amoli sulubadela amola, udiafalï Galilila e bëgëla mofiai amolalida, holöbö mia made nea, amo hamose amo beaha nefolalo.
Ilia Yesu igi äbägi baui
(Madiu 27.57-61; Maga 15.42-47; Yone 19.38-42)
50 Dolö asigi mogoi hedabi afädë, ëi Yosebe nelo. Eda galïsolö dolö amoligi nelo.
51 Galïsolö dolö ilia daiala negese amo gadolage, hamose amo gadolage, eada üla made säi. Eda Yudiamadi gaamu afädëïe ëi Alimadia dolö nelo. Eada Godea Beaha Maadela Sigi Neebe amo misiäia beaha nelo.
52 Dolö amea Bailadi neebea awälahilä, Yesuïe domalo nedulela nabi.
53 Amalebe, ea Yesuïe domalo gaula digala, fagulo hedabia usulalahilä, igi äbä dolö afädë baui made, gähe duwi dilo amogi bausi.
54 Segeyo amoda, Sabada segeyoïe nelebo daialo segeyo dilo. Segeyo Sabada amoda, hä, ga made dilo.
55 Udiafalï Galilila Yesu bëgëla mofiai amolia, Yosebe bëgëla awälahilä, igi äbä amoge, ea Yesuïe domalo bause amoge melï.
56 Ili hili mosöa obëgëlahilä, i heale gegoai odoage, weli gafisigäi hedabi odoage daiai. Amalahilä, Sabada segeyogi mala säla negei dibe amo gadola, ili hele sulo.