24
Yesu nowei
(Madiu 28.1-10; Maga 16.1-8; Yone 20.1-10)
1 Saleleïe mi gäwi segeyogi, yosefalï, udiafalï amolia nelebo gafisigäi daiala negei dilo amo neala gaula, Yesu bauia ami afiai.
2 Ili awäla beahamelebe, igia baui idi gai amo bauia amila, bebugula asi dibe melï.
3 Amo bealahilä, ili nogila digala beahamelebe, Dafidilo Geloi Yesuïe domaloda, maade melï.
4 Domalo maade gabugi, ili asigia säosäosa nefolalebegi, dolö fagulo falei si dëdëgïla digamolöi gäi äudä, ili mia fodolofalï maala ulufadigila nelo.
5 Ele beala, udiafalï amoli bedäla, busa fufuäla nefolalebegi, dolö amolea ilima sähalea, Dolö neebe amoïe, oböla, baagoia gui hogosegoda, edoïe.
6 Eda wi maade. E nowela asimelë. Dafidi Galili nea, ea dilima säi amo helësëla obëgëmalo.
7 Ea sähalea, Odoaea Dolöïe Malö amo nafade hamolo dolö neebe amolile naabogi gausisegi, ilia e i fügäigi baala negeseda, segeyo äudä nelolahilä, osodagi e nowemolömelë. Amala hamomolö dialeamelëla Yesuea säi amomelëla säi.
8 Amala säsebegi, ea dafidi säi amo ilia helësëla obëgëi.
9 Amalahilä, ili bauia amila obëgëla awäla, bëgëla aulo gïdälasi amolimage, udia dolö odoa ili sulubadelamage, nelebo hamoi amo sulubadela säla ïaha maadei.
10 Magadala udia Meliage, Yoanaeage, Yameseïe eme Meliage, amase, udiafalï odoa ilibalä nelo amoliage, ado amo gaula awäla abosolo ilima säla ï.
11 Amala säla ï gaso, abosolo ilia udiafalïa ado säi amoda, memalä ado gadoi gabula helësëlahilä, dofä gabula made helësëi.
12 [Amai gaso, Fida e bauia ami baluluia awäla, dosogägïla fia idogola salea, aga beahamelebe, isogi ami fagulo amomu dibe melï. Amo bealahilä, hï asigia helësësalea, amo edo hamoidula fudugila hehelësëla obëgëi.]
Dolö äudäea Yesu Emeasa idiafa melï
(Maga 16.12-13)
13 Segeyo amo galamu, bëgëla aulo amoligi, äudä sege ëi Emeasa moholö asi. Sege amoda Yalusaleme amila, gilomida gïdälasi gadoi dilo.
14 Ele idiafa awäha nea, nelebo sulubadela hamoi amoïe säsäla awäha nelo.
15 Elea amala säsäla awäha nebegi, Yesu hï eege maala baalahilä, ele awäse amo gadola, hiligila awäha nelo.
16 Gaso, elea e gabula bimolö ulï nelo.
17 Awäha nea, ea elema nabahalea, Ali awähalea, edo säsäla awäha neala nabi. Ea amala nabasebegi, elele odagi yöia idogolahilä, olobola nelo.
18 Amalebe, afädëïe ëida Giliobasa, ea ema säla obëgësalea, Udia dolö yafie Yalusaleme mafula gegedoi amoligi, salele walio wegi nelebo ami hamoi amo, di afädë diamu made dawa nealela nabi.
19 Amala nabasebegi, ea elema nabahalea, Nelebo goda edola nabi. Elea ema säla obëgësalea, Nasalese fii Yesuïe sähamelë. Eda bea sälo nea, Godeïe siigige, udia dolö sulubadelaïe siigige, ea hamoi hamoi amoge, ado säi amoge, hedabola gelola hamoimelë.
20 Gobela ïlo busa nefolalo amoliage, nilïle busa nefolalo amoliage, gamane ilia ebalä gudilahilä, baagomolö dialeala sämäia, ilile naabogi gausisebegi, ilia e i fügäigi baala negei.
21 Amala hamoi gaso, nilïa dafidi helësësaleada, afädëa Isilale udia dolö fisigäla sigi obëgëmolö amoda, e gabula sisiläfüla helësëi. Gaso, nelebo amala hamoi amo, segeyo walio neebeweda, osodamelë.
22 Amase, nilïbalä aligilo udia odoaea nilï fudugilasisio. Walio yosefalï, ilia e bauia bea awähamelebe,
23 ïe domalo made melïmelëla säsio. Made beala obëgëla maalahilä sähalea, Sosoäla awäla melëlo amo gadola, nilïa selesaia fii melïmelëla säsio. Amolea nilïma säla ïahaleada, Eda nowela neamelëla säimelëla sämolö obëgëmalasio.
24 Amala säla ïasebegi, nilïbalä aligilo odoaeage, bauia ami bea awähamelebe, udiafalï amolia säi amo gadola wäla bealahilä, iliage e made melïmelëla säi.
25 Amala säsebegi, ea elema sähalea, Ali asigi maade gabu. Bea sälo nefolalo amolia ado säla negei dibe amo sulubadela, iso asigia dofäla aabela made helësëi gabu.
26 Afädë Memelei amea, ïe ëi ilibia eleloi hïdo elöi dibe amo salugamolöïe, dafidi e nelebo amoïe së molö dilo madelela säi.
27 Amala sälahilä, Mosesea Ado säla negei dibea amila mi gäwilahilä, bea sälo nefolalo amoli sulubadelaea ado säla dëdëla negei dibe amo sulubadelagi, ïela säi dibe amo elema awala säla ïaha maadei.
28 Ili afiala sege ele samolöia ami moholö ga madela nea, Yesu eda hä, baagila moholöi awäsebegi,
29 elea adoea dofogala sähalea, Eso digala së gämolö ga madesebe, di walio alïbalä wi diahadula säi. Amala säsebegi, elebalä mosöa ami digala sulo.
30 Elebalä molö molöïe, ea beledi gaula nea, Godema nesegelahilä, dagabola elegali ï.
31 Amala hamosebegi, elele si doga negesi. Amalebegi, elea eda Yesu gabula helësëse amo gaalu, e ami wäla hogosa helei.
32 Amalebe, elea heledo sähalea, Idiafa alïbalä adodola maahalea, ea ado säla dëdëla negei dibe amoli alïma doga negela säsebegi, alïle isogi nulo wilo wäla wilasisio madelela säha sulo.
33 Amalahilä, ele fodolofalï nowela, Yalusaleme obëgëi. Elea ami beahamelebe, bëgëla aulo gïdälasi ilige, odoa ilibalä nefolalo amolige, gedola sefolalebe melï.
34 Ami sefolalo amolia sähalea, Dofä! Dafidilo Geloida, nowei nea. Saimonoma ulufaimelëla säi.
35 Amase, eleage idiafa nelebo ele mia besela galai amo ilima awala säla ïalahilä, ea beledi dagaboia gasebegi, alïa e gabula helësëimelëla säi.
Yesu e ïe bëgëla aulo sefolalebea ulufadigi
(Madiu 28.16-20; Maga 16.14-18; Yone 20.19-23)
36 Ilia ado amo, aso, säha dibegi, Yesu hï e ili mogogi ami maala nelo. [Ea ilima sähalea, Dalulo dilibalä diamiäiala säi.]
37 E maala nebegi, baagoi gesami beahala helësëla, ili edefademalä fudugila bedäi.
38 Amaha dibegi, ea ilima sähalea, Edogi yöia idogola säosäosa dialea. Dilile iso asigigi asigi äudä negei dibegoda edoïe.
39 Weda nihïne gabula helësëmäiaïe, nïe naabo emo bimo. Dilia ne hüge giwige galebe amo beaha nea, baagoi gesamida, amo gadola aligilo made ameada, ne diigila bimola säi.
40 [Amala sälahilä, ïe naabo emole ilima olei.]
41 Amasebegi, ilia obeägïla digi, fudugila bedäla digisa nelo amea, amo dofä gabula made helësëi nelo. Amalebegi, ea ilima nabahalea, Dilia molö odoa gui dibelela nabi.
42 Amalebe, ilia seme gobei dagaboi amo egali ïasebegi,
43 ea amo neala, ilile siigi nea mai.
44 Hobeala, ea ilima sähalea, Ne dilibalä dafidi nelo amogi nea, na dilima gomalä säla ï amoda gowemelë. Mosese nebegi, Ado säla dëdëla negei dibe amogige, bea sälo nefolalo amolia dëdëla negei dibe amogige, Gë Udälo bebagi dëdëla negei dibe amogige, nïela säla dëdëla negei amo sulubadela gausiala digamolö dialeala säla ïmelëla säi.
45 Amalahilä, ea Godeïe bebagi ado säla dëdëla negei dibe amoli, ilia helësëmäiaïe, ilile asigi doga negelasi.
46 Amalahilä, ea ilima sähalea, Ado säla dëdëla negei dibe amoda gowemelë. Afädë Memelei amea së nalahilä, segeyo osodagi baagoia amila nowela
47 odoaea ïe ëigi nea, udia dolöea nafade hamoi amo hëmäia, asigi besumolö dibe amoïe mala amoda, Yalusalemedale mi gäwilahilä, fifi asi difolalebe sulubadelagi, säsäla moholöla säla dëdëla negei dialea.
48 Nelebo hamola besela galai amo, dilia säla ulufaha namialo.
49 Nabuö. Naadoea diligali ïmolömelëla säla negei amo, na dilima fisiga idogomolömelë. Ilibiala geloi amo dilia neala salugamolöïe, gaamua wimu beaha namialola säi.
Yesu Hebeni fedai
(Maga 16.19-20; Abosolo 1.9-12)
50 Yesuea ili sigi sege Bedanimadi awälahilä, ïe naabo gauia adogola nea, Godea ili neala obeägïlasimäiamelëla säi.
51 Ea ili, aso, obeägïlasila säha nea, Godea e Hebeni gaula fedasebegi, ea ili dïgïla asi.
52 Amala hamosebegi, ilia ïe ëi gauia adogola, ilima edefademalä obeägïmolö nobala, Yalusaleme obëgëi.
53 Ilia segeyo sulubadelagi, Godeïe mosöa awälahilä, Godeïe ëi gauia adahamu aligilo.
Hä amo.