Ado Musügä Negei Gelesoea Yonema Ulufai Amo
Ado Dëdëi Dibe Amoïe Neala Olelo Oboba
Dafidilo Geloi Yesu Gelesoma asigi afädë negei nefolalo amoli neala sëlasisa neebe amo gaalu, ema ulufala olesebegi, Yonea beba we dëdëi. Dëdëi amoïe mida, Geleso sosogo nefolalo amolia, Geleso Yesu eda ilile Dafidilo Geloi nealahilä, së naha nea, dïgïla made mosäia, ili gelolasila beba we dëdëi.
Yonea beba we dëdëi weda, ea sosoäla awäla melï amoge, ema ulufala olei amoge, Geleso sosogo nefolalo amolima ea dëdëla ïasisebegi, ilia mi fädäla helësëi. Gasoda, Geleso sosogo made nefolalo amoliada, made helësëi nelo. Elö elöla sosoäla awäla melï amoïege, ulufala olela nowei amoïege, galone mi afädëfalï dialeala säla dëdëla negei. Galone amo hamoi amoïe mida gowe. Aligila wagamolö segeyo besela galasolo amo gala, Godeïe ado nii sulubadelage, mugabe Saidanige, Godea Dafidilo Geloi Yesu Geleso emadi aligila, nudula salolela baagila moholömelë.
Ado afädë dëdëi dibe amoda gowe. Godea udia dolöïe siaholö hëla digisa maademolömelë. Amasegi, baagomolöge, gualömolöge, dïimolöge, sëmolöge, made bimolömelë. Nelebo dafidi difolalo amoli hogosa helesa maadeimelëla säi. Ulufai 21.4 bimalo.
Yesu Gelesoea sesi gifalädalïagi udia dolö nefolalo amolima ado säla ïmaloi
1
(Ulufai 1–3)
1 Ado goweda, Yesu Gelesoea ulufai. Ulufai amoda, ea ïe hamoi hamolasilo nefolalebe amolima nelebo aabela besela galamolö ga made dibegi, ea amoli ulufala olemäia, Godea ema ï. Gelesoea nelebo hamomolö amoli, ïe selesaia fii afädëa ïe hamoi hamolasilo Yone nema, ïe hamoi hamolasilo odoa nefolalebe amolima ado gowe säla ïmalola säla ïmelëla säla ïasio.
2 Na nelebo amoli sulubadela siia beaha maadelahilä, Godea ado säi amoge, Yesu Gelesoea ulufala dofäla säi amoge, na dilima ulufala säla ïahago. Nada ado amo dofämelëla säha.
3 Ado bea säi dibe gowegi odoaea nabuäia nidelo amoliage, nabala bëgëla hamolo amoliage, obeägïsa neamelë. Mida, ïe segeyoda, ga madefalï dialea.
Esia segeamadi sesi gifalädalïa amolima Yonea ado dëdëla ïasi
4 Neda Yone. Na Bolobinisi Esia segeamadi sesi gifalädalïagi udia dolö nefolalebe dilima beba gowe dëdëla ïasisago.
Gode walio neebeweage, siiba nelo ameage, hobea moholö ameage, dilima ugila negelasilole dalulasilole ïmäia hamesa neawe. Amase, Godeïe sidaia ïe beaha aligilo filo dibea ami aligilo gesami gifalädalïa amoliage,
5 Yesu Gelesoeage, dilima ugila negelasilole dalulasilole ïmäia hamesa neawe. Yesuda asigi falagasei nea, ulufala säloge, baagoi bauiala degabo mi gäwila nowei amoge, nagadaia gini nefolalebe amolile busa neebe amoge, neamelë.
Ea nilï boba hamosa nea, nilïa nafade hamoi amea gide begei nebegi, ïe healea nilï fisigälasi.
6 Amase, sosogo afädë namiäia, nilï neala gedolasila, nilïa odala ï neala ïlo nea, ïe Eedo Godeïe hamoi hamolasilo namiäia, nilï hamolasi. Amala hamolasilo amo hïma, ëi edefadeïe yo digaloge geloige, ïemu diamolöi diamiäia hamesa neawe. Dofä amala hamomäiamelë.
7 E mu baidilidabodo maasebe godogo bimo. Udia dolö sulubadelaïe siia e bimolömelë. E gögë gäwilo amoliage, e bimolömelë. Amase, udia dolö fifi asi sege sulubadelagi sefolalebe amolia e helësëla gäia güsäla dïimolömelë. Dofä. Dofä amala hamomäiamelë.
8 Dafidilo Geloi Godea sähalea, A-ge nihï ne, Ya-ge nihï ne neawe. Ne walio neebewege, siiba nelo amoge, hobea moholöge neamelë. Neda Sulubadelaïe Geloifalï Geloi neebela säha nea.
Yonea Yesu melï
9 Neda dilile didoo Yone. Nege dilige, nilï gaalu Yesuïe ëigi neebe ameada, yöi gaula së naha nea, Godea Beaha Maadela Sigi Neebea ami nea, aso maadela, gelola aligisawemelë. Godea ado säi amoge, Yesuea ulufala dofäla säi amoge, na säla ïaha nebegi, ilia ne gaula sege duhulu södölo Fadimoso dibea ami galabaia negesi amea, ne ami nelo.
10 Amala nebegi, Dafidilo Geloiïe segeyogi, Godeïe Gesami nema salugasisio. Amase amo gaalu, ne baagido ado afädë gelola uuala melo biguli goba gadoia säse nabi.
11 Amo nabaha nebegi, ado amea sähalea, Dia siia beasebe egowelida, bebagi dëdëlahilä, Geleso sosogo gaamu gifalädalïa, Ebesage, Simenage, Fegamamuge, Daiadailage, Sadisige, Filadebiage, Eleodisiage nefolalebe amolima dëdëla fisiga gamalola säsio.
12 Nema ado säsebe amo nowëa säsebelela bimolöïe besuia imogoi. Besuia imogolahilä beahamelebe, elamu i gifalädalïa goloea hamoi dibe melï.
13 Amo beahaleamelebe, elamu i negelo dibe mogogi ami, dolö afädë dolöfä gadoi neebeo. Dolö amoda, fagulo sedade didigala gälahilä, sogobe goloea hamoi amo bidagia bobogä gäi neebeo.
14 Ïe busage, ïe busa hilïge, faleda, sugua sibi hilï falele, mu baidili falele gadoi gabio. Amase, ïe siida, nulo söa gadoi gabio.
15 Ïe emo amoïe yoda, igi aeane ëi bolonosi nulogi gobei neëi amo gadoi neebeo. Ïe adoda, ödä nawali guui goba gadoi nabimelë.
16 Ïe naabo dafädiada, gasumilï gifalädalïa gaula neebeo. Aso, beahaleamelebe, nudulo helebe si äudä helegela meifalï amo, ïe nafiadila doadigila maase melï. Amase, ïe odagi yo digai amoda, eso mogogi gelola neëlo amo gadoi neebe melïmelë.
17 Na e bealahilä, ïe emo mia baagola digala, baagoi gadoi dilo gabio. Amala dibegi, ïe naabo dafädia ne diigisalea sähalea, Made bedämalo. Dafidilaïege ne nea, hobealaïege ne neawe.
18 Neda namolöi neawe. Neda dafidi baagoi gasoda, hä, bimo, walio neda namolöi namolö neawe. Baagoïege, uguli mosöïege, idi gai dogelo giida, na gauleamelë.
19 Amai ameada, nelebo beasego dëdësaleada, walio misi difolalebe golige, nelebo hobea diamolö amolige, dia dëdësa maademalo.
20 Amaimo, gasumilï gifalädalïa nïe naabo dafädia gaula neebe dia bease goïege, elamu i negelo goloea hamoi gifalädalïa difolalebe bease goïege, galone musügä negei dilo amoda gowemelë. Gasumilï gifalädalïa amolida, Geleso sosogo gaamu gifalädalïagi nefolalebe amolile selesaia fii gifalädalïa nea. Amase, elamu i negelo gifalädalïa amolida, Geleso sosogo gaamu gifalädalïagi nefolalebe amoli neamelëla säi.