2
Ebesa sesima ado gowe dëdëla ï
1 Dolö amea sähamu nea sähalea, Dia Ebesa sesigi nefolalebe amolile selesaia fii neebe amoma ado gowe dëdëla ïmo.
Ïe naabo dafädia gasumilï gifalädalïa gaula, elamu i gifalädalïa goloea hamoi dibe mogogi ami nawesa neebe amoïe adoda gowemelë.
2 Mala dia hamolo amolige, hamoi baagi sëi hamosa nelo amoge, aso maadela, gelola aligilo amoge, na dawa. Dia dolö nafade hamolo nefolalebe amoli hamelo made nelo amoge, amase, dolö odoaea ilida abosolo dolöla wäfalï sälo amoli, dia ili dofä abosolo walebelela bimolöïe fedogola bealahilä, ili wäfalï sälo nelo gabula beagolei amoge, na helësësa.
3 Dia nïe ëi gaula neebe amea yöi gaula nea, aso maadela, gelola aligilahilä, dimamela habobala fisi made.
4 Amai gaso, mala afädë dia hamosegi, na made hamelo amoda gowe. Dia dafidi boba hamosa nelo fisi amogi.
5 Dia dafidi mala hedabi hamosa nelo amo fisila, digai nebego, bu helësëla obëgëmo. Amaimo, asigi besulahilä, mala dafidi hamosa nelo amo gadola, bu hamola obëgëmo. Amala made besuseda, ne di neebea maala, dïe elamu i negei dibea amila nihï haila nimolömelë.
6 Amai gasoda, dia hedabi afädë hamosa neebe amoda gowe. Nigolasa bëgëla aulo nefolalebe amolia hamolo amogi, dia habobai nebegomelë. Nage ilia amo hamolo amogi habobaimelë.
7 Afädëa gëhea nabulöi galëda, Godeïe Gesamia sesi amolima ado säsebego nabualo. Afädëa nudula salolela baagila aulo neebe amomada, na namolö ïlo i gägä faila molöda, dofeala sämolömelë. I amoda, Godeïe sagaia Hebeni segea neala säi.
Simena sesima ado gowe dëdëla ï
8 Dolö amea sähamu nea sähalea, Dia Simena sesigi nefolalebe amolile selesaia fii neebe amoma ado gowe dëdëla ïmo.
Afädë dafidilage nea, hobealage nea, dafidi baagola nowei neebe amoïe adoda gowemelë.
9 Dia yöi gaula së naha nebegoge, nelebo maade nebegoge, na dawa. Amai gaso, dida yafie gelola galeamelë. Odoaea nilïda Yu sosogo neala säla, ilia di gagadela ado nafadela sälo amoda, na dawamelë. Amolida Yu sosogo made, ilida Saidaniïe sosogo nefolalea.
10 Dia së molö maase amogi, bedäla made namialo. Nabuö. Mugabe busaea dili neebe gogi odoa neala, abilia hamosebelela bimolöïe, galabaia negesimolö hamosebemelë. Segeyo nabülasigi, dilia së naala yösa namolömelë. Di së naala baagomolö gabugi, nïe ëigi asigi falagasei neëda, na dima namolö gähe amoïe bidi amo ïmolömelë.
11 Afädëa gëhea nabulöi galëda, Godeïe Gesamia sesi amolima ado säsebego nabualo. Afädëa nudula salolela baagila aulo amoda, baagomolö agedu amoïe së dofä made molömelëla säi.
Fegamamu sesima ado gowe dëdëla ï
12 Dolö amea sähamu nea sähalea, Dia Fegamamu sesigi nefolalebe amolile selesaia fii neebe amoma ado gowe dëdëla ïmo.
Afädëa nudulo helebe si äudä helegela meifalï gaula neebe amoïe adoda gowemelë.
13 Di mugabe Saidaniïe beaha aligilo filo dibea ami sebe amoda, na dawa. Gaso, dia nïe ëi fisila made, gelola gaula nea, nema asigi afädë negei amo, amo wälasi nebego. Dolö afädë asigi falagasei nea, ne neala ulufalo Ädibasa nelo amo, mugabe Saidani neebea ami odoaea dilile segea e baagomäia nufudasolo amo galage, dia nïe ëi amo made fisila nelomelë.
14 Amai gaso, mala dia hamosegi, odoa na made hamelo amolida gowe. Di neebea gui odoaea Balamaea mala olelei amo gaula neebe amogi. Ea Balagama olelesalea, gomalä hamomalola Isilaleïe malöea nafade hamomäia, neala digalasila hamola olelesa nelo. Molö wäfalï godegali göa nelegela ï amo mage mosäia naala olelela digi, udia dolö susugu hamomäia olelela digisa nelo.
15 Amase, amo gadola wäla, di neebea gui odoaea Nigolasa bëgëla aulo nefolalebe amolia mala olelelo amo gaula nea.
16 Amai gabugi, asigi besumalo. Amala made hamoseda, ne fodolofalï di neebea maalahilä, nïe nafiadila nudulo helebe besela galasebe amea, udia dolö amolibalä nudumolömelë.
17 Afädëa gëhea nabulöi galëda, Godeïe Gesamia sesi amolima ado säsebego nabualo. Afädëa nudula salolela baagila aulo neebe amogali, na mena musügä negei dilo amogi odoa muäia ïmolömelë. Amase, na igi falei afädëgi ëi gähe dëdëla negei dilo amoge egali ïmolömelë. Ëi gähe dëdëla negei dibe amoda, odoaea made dawa neëgi, neala gause ameamu dawadigimolömelëla säi.
Daiadaila sesima ado gowe dëdëla ï
18 Dolö amea sähamu nea sähalea, Dia Daiadaila sesigi nefolalebe amolile selesaia fii neebe amoma, ado gowe dëdëla ïmo.
Godeïe malö amoïe adoda gowemelë. Ïe sida yo digai nulo söa gadoige, amase, ïe emoda igi aeane ëi bolonosi eleloi amo gadoige neebeo.
19 Dia mala hamolo amoge, odoa boba hamolo amoge, asigi afädë negelo amoge, odoa ugila negela hamoi hamolo amoge, aso maadela, gelola aligilo amoge, na dawa. Amase, dia walio hamoi hamosa nebegoea, dafidi hamosa nelo amo baagila awäla hamosa nebegoge, na dawamelë.
20 Amai gaso, mala afädë dia hamosegi na made hamelo amoda gowe. Udia Yesebele hï, neda bea sälo saleawela säsebe amo, dia made dofogalo amogi. Ea mala olelese ameada, nïe hamoi hamolasilo nefolalebe amolia susugu hamomäiage, molö wäfalï godegali göa nelegela ï amo muäiage, ili sigi gaula asiala aulo salea.
21 Ea dolö susugu hamosa neebe amoïe, e asigi besumäia fu ï gaso, amo made hamelo salea.
22 Hä, nabuö. Na e neala ololasisegi, e imididaia fugaulasi diamolömelë. Amase, dolö ebalä susugu hamolo amoliage, ïe mala nafade amo baagi ïala asigi made besuseda, ilige së edefademalä naha namiäia ïmolömelë.
23 Udia amoïe malö amolige baagomäia nufulömelë. Ameada, sesi sulubadelaea, na udia dolöea helësësa dibe amoge, hamesa dibe amoge, hogola dawadigisa maadesebela helësëmolömelë. Nada dili hïdo hïdolaea hamosa nelo amo gadola bidi ïmolömelë.
24 Amaimo, Daiadaila nefolalebe odoa dilia, udia amea mala olelelo amo made bëgëla, mugabe Saidaniïe mala musügä negei dialeala sälo amogi dawa made neebe dili sulubadelama gomalä säla ïahago. Yöi odoa gaula namiäia made ïala,
25 na gowemu sähago. Ne obëgëla misiäia beaha nebego gaalu, nelebo gaula nebego fëdöla gaula namialola sähago.
26 Amala hamosa nea, afädëa nudula salolela baagila awäla, na hamese amo gadola hamosa neamu hamola wagase amogali, gädili elö elölagi udia dolö nefolalebe amoli sigi namolö geloi amo ïmolömelë.
27 Ea udia dolö amoli aeane baialaea beaha aligimolömelë.
Ödä i nagaea hamoi difolalegi dusudasilo amo gadola, ili dusudasimolömelë. Gë Udälo 2.9
Naadoea geloi nema ï amo gadola wäla ïmolömelë.
28 Amase elöda, sege yose gaalu gasumilï dagäsiögöla neë besela galalo amoge ïmolömelë.
29 Afädëa gëhea nabulöi galëda, Godeïe Gesamia sesi amolima ado säsebego nabualola säi.