3
Sadisi sesima ado gowe dëdëla ï
1 Dolö amea sähamu nea sähalea, Dia Sadisi sesigi nefolalebe amolile selesaia fii neebe amoma ado gowe dëdëla ïmo.
Afädëa Godeïe gesami gifalädalïage, gasumilï gifalädalïage gaula neebe amoïe adoda gowemelë. Mala dia hamolo amolida, na dawa. Odoaea di helësëla sähalea, Eda baagoi made, saleala sälo gaso, ai, dida baagoi nebego.
2 Amai gabugi, di adi dibego nowemo. Na beaseda, dia mala hamosego nïe Godeïe siigi made hamola wagai beasebe ameada, nelebo gaula nebego made baagola dibegogi wäla, gelomalo.
3 Dia dafidi ado nabala neala gaui amo, bu helësëla obëgëmalo. Ado amo bëgëla hamolahilä, asigi besumalo. Di adi dibego made noweseda, ne fa nelo musügä mulo amo gadola moholömelë. Ne di sebea gowe gala moholölada, dia dofä made helësëmolömelë.
4 Gaso, di Sadisi gaamugi nebegogi, afädë afädëlaïe fagulogi nigime baai made neamelë. Amolida, hä, dofea neebe ameada, fagulo falei salugalahilä, nebalä nawesa namolömelë.
5 Amase, afädëa nudula salolela baagila aulo amoge, fagulo falei amo gadoimu salugamolömelë. Ïe ëi namolöi namolö bebagi dëdëla negei dibe amoda, na dofä made hëla, nïe Naadoge ïe selesaia fiige neebea ami nea, ïe ëi säla ulufamolömelë.
6 Afädëa gëhea nabulöi galëda, Godeïe Gesamia sesi amolima ado säsebego nabualola säi.
Filadebia sesima ado gowe dëdëla ï
7 Dolö amea sähamu nea sähalea, Dia Filadebia sesigi nefolalebe amolile selesaia fii neebe amoma ado gowe dëdëla ïmo.
Afädë eleloige dofäge neebe amoïe adoda gowemelë. Ea Debidiïe idi gai dogelo gii gaula nea, doga negese amoda, afädëa made gamolö. Amase, gase amoda, afädëa made dugimolömelë.
8 Mala dia hamolo amolida, na dawa. Bimo. Na dïe odagido idi doga negesi afädë dialea. Idi amoda, afädëa gamolö ulïmelë. Dïe geloida holöfalï neebe amoge, na dawa. Amaha gaso, nïe ado bëgëla hamola, nïe ëi baagi made ï.
9 Hä, nabuö. Na udia dolö mugabe Saidani sosogo amolida, di neebea maala, dïe emo mia gumusula dia didigafulasisegi, ilia na di boba hamolo gabula helësëmolömelë. Ilia nilïda Yu sosogo neala sälo amoda, dofä made, wäfalï sälo.
10 Na dima aso maadela, gelola aligimalola säi amo gadola bëgëla hamosa nelo amoïe, nagadaia nefolalebe amoli sulubadela fedogola bimolöïe sege sulubadelagi neala sëlasimolö elö elöla maasolo amo gala, na di sigi namolömelë.
11 Ne moholö amoda, ga made gabumelë. Salolei amoïe bidi dia nimolö amo elöea fedela neloea, dia nelebo gaula nebego hedabola fëdöla gaula namialo.
12 Afädëa nudula salolela baagila aulo neebe amoda, nïe Godeïe mosö igau namiäia, na neala ifosimolömelë. Eda doadigila made moholö. Na nïe Godeïe ëige, nïe Godeïe gaamu gähe amoïe ëige, amoma dëdëmolö. Gaamu amoda, Yalusaleme gähe, selesaia mosöala nïe Gode neebeala digamolö amomelë. Amase, nihïle ëi gähege ema dëdëmolömelë.
13 Afädëa gëhea nabulöi galëda, Godeïe Gesamia sesi amolima ado säsebego nabualola säi.
Eleodisia sesima ado gowe dëdëla ï
14 Dolö amea sähamu nea sähalea, Dia Eleodisia sesigi nefolalebe amolile selesaia fii neebe amoma ado gowe dëdëla ïmo.
Afädëa amala hamomäiala sälo amo, asigi falagaseige dofäge nea säla ulufalo amo, ïe aulodaiala Godea sulubadela hamosa maadei amo, ïe adoda gowemelë.
15 Mala dia hamolo amolida, na dawa. Di walio gögï madege, hëgï madege nebegoda, na dawa. Di hëgï namolö galëge, gögï namolö galëge, gelola afädëgi namiäia hamesa.
16 Di hëgï maade, gögï maade gumiäi goeada, na dida nïe nafiadila isola salimolö hamosebemelë.
17 Dia sähalea, Neda nelegei yafie negelo dafidilo dolö. Nelebo dibe amo gadoida, negesa maadei nea. Nema nelebo gumusuida, maadela säha neamelë. Amala säha neago gaso, dida asigi säosäoige, dofä bobasëi gadoige nebegoda, dihï dawa made nebego. Amase, nelebo maade, dudugïmu, si golaige nebegoda, dihï dawa made nebego.
18 Amai gabugi, dia hamomäia na helësëlasila sähago. Di nelegei yafie negelo dafidilo dolö namolöïe, nemadi nea golo nigime baai nulogi hedabomäia gobei amo bidia nimalo. Amomu made, di dudugïmu neë, udia dolöea beasegi made hewamolöïe, fagulo falei dibe amoge, bidia neala salugamalo. Amase, dïe siia bu bimolöïe, maleseni siigi negemolöïe, bidia neala hëmalo.
19 Na boba hamose amolida, nemolahilä mala säla hamogilomelë. Amalo gabugi, hamoi hedabi hamomolö amo gelola hamesa nea, asigi besumo.
20 Nabuö. Ne idi galo baagido nea, nufigisa nea uuaha neawe. Afädëa nïe ado nabala, idi gai amo doga negeseda, ne nogila digala, nege ebalä molö nadigi, eege nebalä nadigila, halïgïla molö molömelë.
21 Amaimo, na nudula salolela baagila awälahilä, nïe Naadoïe beaha aligilo filo dibea ami ebalä gedola sulo amo gadola, afädëa nudula salolela baagila aulo neebe amoda, nïe beaha aligilo filo dibea ami nebalä gedola samolöïe, fu ïmolömelë.
22 Afädëa gëhea nabulöi galëda, Godeïe Gesamia sesi amolima ado säsebego nabualola säi.