Sugua Sibi Malö amea selesaia mosöa beba afädë hogase gaalu, nelebo yöi nafade amoli nagadaia udia dolöma besela galasio
4
(Ulufai 4–11)
Selesaia mosöa nefolalebe amolia Godeïe ëi gauia adala säi
1 Wae! Ado amoli säha maadeibua, na beahamelebe, selesaia mosöa idi galo afädë doga negei dibe melï. Amo bease amo gaalu, ado afädë melo biguli gadoi dafidi säse nabi amea, nema sähalea, Hobea hamomolö dibe amo na dima oledelä, di ne neebeawi fedamola säsio.
2 Amala säha neebe amo gaalu, Godeïe Gesami e nema salugasisio. Wae! Amala hamose amo gaalu na beahamelebe, selesaia mosöa ami beaha aligilo filo dibeo. Amodaia dolö afädë sebe melï.
3 Filodaia sebe amo elelolo igi folomoi ëi yasabale, igi bëi ëi ganelianale gadoi sebeo. Beaha aligilo filo amoda, soläilo sagai igi i bäu gähe gadoi ëi emelalo gadoia amalela digi dibe melï.
4 Beaha aligilo filo dibe amo mogogi negesiä, sigi aligilo filo nabülasi äudäïe odoai biyidia nogöla amalei dibea ami, dolö asigi gäwi dafidilo nabülasi äudäïe odoai biyidiaea fagulo faleimu salugalahilä, ilile busagia beaha aligiloïe habuga goloea hamoi amo salugala, amolidaia sefolalebeo.
5 Beaha aligilo filo dibea amila, sege yabagelelage, goba hïdo elöige, hahalä edefade dagabolage, goba maase nabi. Filo dibe amoïe odagiamadi, gamali goli gifalädalïagi yola negei dibeo. Amolida, Godeïe gesami gifalädalïa amoli gabio.
6 Amase, beaha aligilo filo dibe amoïe odagiamadida, ödä duhulu gadoige ulufala bimolöi galasi hahaloi gadoi dibeo.
Hä, mogogi ami, beaha aligilo filo amo nogöla amalela, namolö aligi biyidia amoli nefolalebeo. Ilile odagidoge, baagidoge siimu aligila amalela digi nefolalebeo.
7 Namolö aligi age amoda, ilua ügülo ëi elaeono gadoi neebeo. Agedu amoda, sugua gao gawali gadoi neebeo. Osoda amoïe odagida, dolö odagi gadoi gabio. Amase, biyidu amoda, haea sëdïa hagila nawese amo gadoi neebeo.
8 Namolö aligi biyidia amoli sulubadela hïdo hïdolama augia gafeia aligi nea, ilile domalo sulubadelagige, augia hawage, siimu aligisa maadei neebeo. Ilia yoba gasigige, hele aligila made, sähalea,
Dafidilo Geloi Gode, Sulubadelaïe Geloifalï Geloi neebe amoda eleloi, eda eleloi, eda eleloi nea. Eda siiba nelo amoge, walio neebewege, hobea moholö amogela
sähamu neebeo.
9 Namolö aligi biyidia amolia beaha aligilo filodaia salea, namolöi namolö neebe amoïe ëi gauia adogola, ema ëi sälo nealage, nesegelage säsolo amo galada,
10 dolö asigi gäwi dafidilo nabülasi äudäïe odoai biyidia amolia beaha aligilo filodaia sebe amoïe odagido, gumusula dia didigafulahilä, namolöi namolö neebe amoïe ëi gauia adahamu aligilo gabio. Ilile beaha aligiloïe habuga goloea hamoi amoli giilahilä, ïe beaha aligilo filo odagido sadia idogolahilä sähalea,
11 Nilïle Gode Dafidilo Geloi-e,
dia nelebo sulubadela hamosa maadei amea,
dia nelebo sulubadela diamiäia samiäia namiäiala helësëi amea,
dia amala hamei amea nelebo sulubadela hamosa maadei ameada,
nilïa dïe ëi gauia adogomolöge,
dima ëi sälola sämolöge,
dida geloi neala sämolöge,
dïemu negesidelä di dofea nebego.
Amolida, dïe negesimolöi galeala säha neebeo.