5
Yonea beba afädë melï
1 Amase, na beahaleamelebe, afädë beaha aligilo filo dibea ami sebe amoïe naabo dafädia beba meöi afädë ba näiadoge näiadoge dëdësa maadei gaula sebe melï. Beba amo made fisigämäia, i heale gadoi gifalädalïaea baalahilä, alägädïla nofela negei gabio.
2 Amo beaha nebegi, selesaia fii geloi afädëa gelola uuala sähalea, Beba meöi go i heale gadoia baala alägädïla nofela negei dibe amoli neadigila, fisigämolö dolö dofeada, nowëaduola säse nabi.
3 Gaso, selesaia mosöa nefolalebe amoligige, nagadaia nefolalebe amoligige, naga föi hawa nefolalebe amoligige, beba amo fisigäla bimolö dofeada, afädë maade gabio.
4 Beba amo fisigäla bimolö dofeada, afädë made beagolei amogi, na edefademalä dïisa nelomelë.
5 Amasebegi, dolö asigi gäwi dafidilo amoligi, afädëa nema sähalea, Dia dïimabu. Nabuö! Fii Yuda sosogomadi ilua ügülo gadoi ëi elaeono amoda, Debidiïe yaua mäumadila dulu fedala nudula salolela baagila asi neebe amea, beba i heale gadoi gifalädalïaea alägädïla nofela negei dibego neadigilahilä, beba amo fisigämolöida, e neamelëla säsio.
Yonea Sugua Sibi Malö melï
6 Na beahaleamelebe, Sugua Sibi Malö afädë neebeo. Amoda, ilia baagomäia nufi amo gadoi gabio. Eda beaha aligilo filo mogogi nebegi, namolö aligi biyidia amoliage, dolö asigi gäwi dafidilo amoliage, e amalela nogöla digila neebeo. Emada bese gifalädalïage, si gifalädalïage neebeo. Si gifalädalïa amolida, Godea ïe gesami gifalädalïa sege dibe sulubadelagi fisiga gai amoli gabio.
7 Hä, Sugua Sibi Malö amea awälahilä, afädë beaha aligilo filodaia sebe amoïe naabo dafädia beba meöi gaula sebe amo neasio.
8 Ea beba amo neala gaula nebegi, namolö aligi biyidia amoliage, dolö asigi gäwi dafidilo nabülasi äudäïe odoai biyidia amoliage, Sugua Sibi Malö amo mia, gumusula dia didigafusio. Ili afädë afädëlaea gida gadoige, falo goloea hamoi amogi i heale höba gafisigä hedabi baëla fedamäia gobelo amea nobai amoge, gaula dia didigafui difolalebeo. I heale gobelo amoda, Godeïe udia dolöea Godema adose amo gabio.
9 Ilia gë gähe afädë udähalea,
Beba amo neala gaula nea-aaa,
i heale gadoia baala alägädïla nofela negei dibe amo neadigimolö dofeada-aaa,
dihïdi nebego-ooo.
Mida, di baagomäia nufi ameage-eee,
fii sulubadelagilage-eee,
ado sälo sulubadelagilage-eee,
gädili sulubadelagilage-eee,
gafodo elö elöi sulubadelagilage-eee,
dïe healea udia dolö Godeïe namiäia nii ameage-eee,
10 amase, sosogo afädë namiäia, dia bidia nii amoli neala gedolasila-aaa,
ili odala ï neala ïlo nea-aaa,
nilïle Godeïe hamoi hamolasilo namiäia hamolasisebegi-iii,
ilida naga föidaia beaha aligilo namolö ameage-eee,
dihïdi dofea nebego-ooola
säla udäsio.
Ilia Sugua Sibi Malö amoïe ëi gauia adogoi
11 Na aso, bu beaha nebegi, selesaia fii nidemolö asusugai yafiea, ado säse amo nabi. Selesaia fii amoliada, beaha aligilo filoge, namolö aligi biyidia amolige, dolö asigi gäwi dafidilo amolige, nogöla amalela digilahilä,
12 gë gelola udäha nea sähalea,
Sugua Sibi Malö baagomäia nufi amoma-aaa,
sigi namolö geloige-eee,
nelebo hedabige-eee,
asigi falagaseige-eee,
geloige-eee,
ïmolö amoda dofea-aaa.
Ëi sälo namolöge-eee,
ëi gauia adogomolöge-eee,
hedabifalïmu hamolola sämolöge-eee,
hï ema ïmolö amoda dofea-aaala
säla udäsio.
13 Na aso, nalabosa nebegi, Godea hamola ifosisi, selesaia mosöage, nagadaiage, naga föi hawage, ödä duhulugige, nelebo sege amoligi dibe neebe sebe amoli sulubadelaea gë udäha nea sähalea,
Afädë beaha aligilo filodaia sebe amomage-eee,
Sugua Sibi Malö neebe amomage-eee,
hedabifalïmu hamolola sämolöge-eee,
ëi sälo namolöge-eee,
ëi gauia adogomolöge-eee,
sigi namolö geloige-eee,
ïemu diamolöi diamiäiamelë-eeela
säla udäha dibeo.
14 Amala säha dibegi, namolö aligi biyidia amolia sähalea, Dofä amala hamomäiamelëla säha. Amase, dolö asigi gäwi dafidilo amolia gumusula dia didigafulahilä, elele ëi gauia adogosa neebeo.