6
Sugua Sibi Malöea i heale gadoia baala alägädïla nofela negei dibe amoli hogai
1 Na beahamelebe, Sugua Sibi Malö amea i heale gadoi gifalädalïaea baala alägädïla nofela negei dibe amoligi, afädë amo hogasio. Amo hogase amo gaalu nabelebe, namolö aligi biyidia amoligi, afädëa hahalä dagabolo amo gadola wäla sähalea, Misiëla säsio.
2 Wae! Amala säse amo gaalu, na bu beahamelebe, sugua hosi falei afädë neebeo. Amodaia fila aulo dolö afädë dadi gaula sebeo. Amoma ilia nudula salolelo habuga ïasebegi, e nudula salolelo nea, odoage nudula salolela baagila moholöïe fila awäsio.
3 Amalahilä, Sugua Sibi Malö amea i heale gadoia baala alägädïla nofela negei dibe amoligi, agedu amo hogasio. Amo hogase amo gaalu nabelebe, namolö aligi biyidia amoligi, agedu amea, Misiëla säsio.
4 Amo gaalu, sugua hosi afädë fedala aligisio. Amoda bëi nulo söa gadoi gabio. Ilia amodaia fila aulo dolö amoma nagadaia dalulo mala neadigila, udia dolöea hilimu nudusa namiäiaïe geloi ïasio. Amase, ilia nudulo helebe edefade afädëge ema ïasio.
5 Amalahilä, Sugua Sibi Malö amea i heale gadoia baala alägädïla nofela negei dibe amoligi, osoda amo hogasio. Amo hogase amo gaalu nabelebe, namolö aligi biyidia amoligi, osoda amea, Misiëla säsio. Wae! Amala säse amo gaalu, na bu beahamelebe, sugua hosi yabui afädë neebeo. Amodaia fila aulo dolö amea yöi dofela melëlo afädë ïe naaboea gaula neebeo.
6 Na amo bealahilä, namolö aligi biyidia neebea amila ado gadoi nabaha nebegi, ado amo gomalä säsio. Segeyo afädëgi hamoi hamola bidi nelo amea, eladi gadoi ëi widida, yöi gilo afädë gadoi nimolö dialea. Amase, segeyo afädëgi hamoi hamola bidi nelo amea, eladi gadoi ëi balida, yöi gilo ohodoa gadoi nimolö dialea. Amaimo, i gägä negelo ëi olibege, ëfë gägä negelo ëi gelebige, neala nafademabiola säsio.
7 Amalahilä, Sugua Sibi Malö amea i heale gadoia baala alägädïla nofela negei dibe amoligi, biyidu amo hogasio. Amo hogase amo gaalu nabelebe, namolö aligi amoligi, biyidu amea, Misiëla säsio.
8 Wae! Amala säse amo gaalu bu beahamelebe, sugua hosi folomoi afädë neebeo. Amodaia fila aulo dolö neebe amoïe ëida Baago. Uguli mosö ameada, Baago bëgëla maasio. Udia dolö sulubadela biyidiala nofela mogelahilä, biyidu amoïe neebe amolida, nudulo helebeage, sïdëage, oloeage, nagadaia sugua ilaba elö elölaeage, nufudala baagomäia, elema geloi ïasio.
9 Amalahilä, Sugua Sibi Malö amea i heale gadoia baala alägädïla nofela negei dibe amoligi, bi amo hogasio. Amo hogase amo gaalu na beahamelebe, udia dolö Godeïe ado mala gelola gaula nea, ulufala säla ïaha nebegi, dolöea nufi amolile gesami amoli odala ïlo auli hawa nefolalebeo.
10 Baagoi gesami amolia gelola uuala sähalea, Busa Dafidilo Geloi-e, eleloige, dofäge di nebego. Udia dolö nagadaia nefolalebe amolimada, dia gudilahilä, nilïle heale digai amoïe ilima së mogola ïmolö dibe amo gadola, abodo gala ïmolö gabula uuala säsio.
11 Amala säsebegi, ilia ili hïdo hïdolagali fagulo sedade falei salugamäia ïalahilä, ilima säla obëgësalea, Dilibalä hamoi gaalu afädëdi hamolasilo, didoo dialifilali, dili nufi amo gadola wäla, ilige nufudala baagomolö näba Godea daiai amo gadola gausiala digamäia, dilida aumala, aso, holöfalï beaha namialola säsio.
12 Amalahilä, na bu beahamelebe, Sugua Sibi Malö amea i heale gadoia baala alägädïla nofela negei dibe amoligi, gafe amo hogasio. Amo hogase amo gaalu, fogoli edefade gelola maala, esoda öhoeo hilï yabuia adu asi yabui amo gadoia yabulahilä, aubege sulubadela bëla heale uusa maadesio.
13 Äfäeo gägä, aso, galu diëgi, fo gelola maahalea faila hësölo amo gadola, gasumilï mudaiala nagadaia besela didigafulahilä,
14 mu giwi amo meöla galila nigia gasio. Segebi sulubadelage, ödä södölo amoli sulubadelage, diloa amila gasi awäsio.
15 Amala hamose amo gaalu, nagadaiaïe ginige, gamane beaha aligiloge, ami beaha aligiloge, nelegei yafie negelo dafidilo dolö amolige, geloi edefade amolige, galabaia hamoi gadoi hamolasilo sulubadelage, odoaïe hamoi made hamolasilo fisigäi nefolalebe sulubadelage, awäla igi äbägige, segebidaia igi boboga neebe amoli hawa amige, musügä fisa maadeimelë.
16 Amala musügä salea, segebi difolalebe amolimage, igi boboga nefolalebe amolimage, uuala säia adogosalea, Afädë beaha aligilo filodaia sebe amoïe siia nilï melëloeage, Sugua Sibi Malöea nilïma mihaläla së ïloeage, nilïdaia dagabola digala hagumo.
17 Mida, elele mihalälo segeyo edefade, hä, misi dibe amogi, nowë namolöduola säsio. Hosea 10.8; Ulugu 23.30