7
Isilale udia dolö dausinimu hädali afädëïe nabülasi biyidiaïe odoai biyidia odagia magi negei
1 Amala säsebegi, na beahamelebe, selesaia fii biyidia naga föi sulubadelaïe fäfü biyidiagi nea, fo biyidiaea naga föigi fuulo amolia, nagadaiamadige, ödä duhulumadige, i nefolalebeamadige made mosäia, gaula neebeo.
2 Amase, na beahaleamelebe, selesaia fii elö eso maasidola fedala, Gode namolöi neebe amoïe magi negelo gaula, maaha neebeo. Selesaia fii biyidia amolia naga föige, ödä duhuluge neala nafademäia, Godea geloi ï amolima, selesaia fii elöea ado gelola säia gahalea,
3 Udia dolö nilïle Godeïe hamoi hamolasilo nefolalebe amolile odagia, nilïa dafidi Godeïe magidale negedelä, dilia naga föige, ödä duhuluge, iige, neala nafademabiola säsio.
4 Magi negesa maadelahilä, magi negei amolile näba säla ïase nabi. Näba amoda, dausinimu hädali afädëïe nabülasi biyidiaïe odoai biyidiala säse nabi. Amolida, Isilale sosogo amoli sulubadelagila gabio.*
5 Yuda sosogomadilada, dausini giwilasi magi negesio. Amase,
Ulubenimadilage dausini giwilasi,
Gadamadilage dausini giwilasi,
6 Asamadilage dausini giwilasi,
Nafadalimadilage dausini giwilasi,
Manasamadilage dausini giwilasi,
7 Simeonomadilage dausini giwilasi,
Ilibaimadilage dausini giwilasi,
Isagalamadilage dausini giwilasi, amase,
8 Sebulunimadilage dausini giwilasi,
Yosebemadilage dausini giwilasi,
Bëyaminimadilage dausini giwilasimu,
magi negesa maadesio.
Udia dolö sämolö asusugaia Godeïe ëi gauia adogoi
9 Wae! Amo baagia na beahamelebe, udia dolö sämolö asusugai gafodo elö elöi sulubadelagilage, fii sulubadelagilage, gädili sulubadelagilage, ado sälo sulubadelagilage, gegedoi neebeo. Ilida, fagulo falei sedade salugalahilä, waibo bäu gadoi damula gagaula, beaha aligilo filo amoïe odagiamadige, Sugua Sibi Malö amoïe odagidoge, nowela nefolalebeo.
10 Amala nefolalea, ilia gelola uuala sähalea,
Nilï damula moholöda, nilïle Gode beaha aligilo filodaia sebe amomadilage, Sugua Sibi Malö neebe amomadilage mulo gabiola
säha nefolalebeo.
11 Selesaia fii amoli sulubadelaea beaha aligilo filo dibe amoge, dolö asigi gäwi dafidilo amolige, namolö aligi biyidia amolige, nogöla amalela nefolalea, beaha aligilo filo dibe amoïe odagido gumusula dia didigafulahilä, Godeïe ëi gauia adogola
12 sähalea,
Dofä amala hamomäia. Nilïle Godema
hedabifalïmu hamolola sämolöge,
ëi gauia adogomolöge,
asigi falagaseige,
nesegemolöge, amase,
ëi sälo namolöge,
sigi namolö geloige,
geloifalïge,
ïemu diamolöi diamiäia.
Dofä amala hamomäiala sähala
säha dibeo.
Sosogo amolia së naha nelo amoda, hä, wagai
13 Amala säse amo gaalu, dolö asigi gäwi dafidilo amoligi, afädëa nema nabahalea, Fagulo falei didigala salugai nefolalebe egowelida nowë. Golida abidila misi nefolaleala nabasio.
14 Amala nabasebegi, na säla obëgësalea, Dafidilo, dihï dawamelëla säla obëgëi. Amala säla obëgësebegi, ea nema sähalea, Egowelida, yöi edefade elö elöla yafie dibea amila doadigila misi nefolaleagomelë. Egoweliada ilile fagulo sedade Sugua Sibi Malö amoïe healea hësa nea, fagulo amolida, falesa maadei, amoli misi nefolaleagomelë.
15 Amala hamoi ameada, Godeïe beaha aligilo filo amoïe odagido nea, ilia gasi segeyo sulubadelagi, ïe mosöa ami nea, ïe hamoi hamolasisamu aligilo neebeo. Amase, beaha aligilo filodaia sebe ameada, ili sigi namolömelë.
16 Ili sïdëa bu elö made baagola, ödäge bu elö made halämolö gabio. Amase, esoea made hëgïla, nelebo hëgïlo dibe odoaeage, ili dofä made hëgïmolö gabio.
17 Mida, Sugua Sibi Malö beaha aligilo filo mogogi neebe amea, sugua sibi sigi aligilo amo gadola, ilile sigi aligilo namolömelë. Ea ili namolö ïlo ödä gü dibea ami sigi awäsegi, Godea ilile siaholö hëla digisa maademolömelëla säsio.