8
Beba i heale gadoia baala alägädïla nofela negei dibe amoligi, gifalädalü amo hogasio
1 Sugua Sibi Malö amea i heale gadoia baala alägädïla nofela negei dibe amoligi, gifalädalü amo hogasebegi, selesaia mosöa ado afädë made adola, sau sagala neamu, molö gobei deala molöi gadoi hamosio.
2 Amala hamose amo gaalu, na beahamelebe, selesaia fii gifalädalïa Godeïe odagia aligilo amolima melo biguli gifalädalïa ïasio.
3 Amase, selesaia fii elö odala ïlo auli dibea ami maala neebeo. Eada falo goloea hamoi i heale höba gafisigä hedabi baëla fedamäia gobelo amo gaula neebeo. Amala nebegi, beaha aligilo filo dibe amoïe odagiamadi, ea odala ïlo auli goloea hamoi dibedaia gobemäiaïe, i heale gafisigä hedabi yafie ema ïasio. I heale amo gobese höba amola, Godeïe udia dolö sulubadelaea ema adose amola, gedolahilä fedamäia ïasio.
4 Selesaia fiia falo goloea hamoi ïe naaboea gaula neebe amodaia, i heale amo gobese höba amola, Godeïe udia dolöea Godema adose amola, Gode neebea gadogo fedasio.
5 Amalahilä, selesaia fii amea falo gaula neebe amogi, odala ïlo auli dibea ami nulo gobei dibe amo dea salala nobalahilä, nagadaia sadia idogosio. Amala sadia idogosebegi, hahalä edefade dagabolage, goba hïdo elöige, sege yabagelelage, fogolige maasio.
Selesaia fii biyidiaea melo biguli amoli fuusio
6 Hä, selesaia fii gifalädalïa amolia melo biguli gifalädalïa gaula nefolalo amea fuumolöïe, dadaiala aligisio.
7 Selesaia fii amoligi, age amea melo biguli amo fuuse amo gaalu, sege gägäge, nulo healebalä gegoalage, nagadaia sadia idogosio. Amala hamoi ameada, sege sulubadela ohodoala mogelahilä, osoda amoïe nagage iige, amase, giisi sulubadelage, wisa maadesio.
8 Amasebegi, selesaia fii agedu amea melo biguli amo fuuse amo gaalu, nelebo afädë segebi edefade wilo amo gadoi duhulugi sadia idogosio. Duhulu amo ohodoala mogelahilä, osoda amo heale uula besela galasio.
9 Duhulugi hamola ifosisi sefolalo amoli ohodoala mogelahilä, osoda amo baagosa maadesio. Amase, ödä sibi duhulugi aulo amolige, ohodoala mogelahilä, osoda amo nafadesa maadesio.
10 Amasebegi, selesaia fii osoda amea melo biguli amo fuuse amo gaalu, gasumilï edefade gele wai yo gadoi, mudaiala digala, ödä afufui dibe amogige, ödä gü besela galasebea amige, sulubadela ohodoala mogelahilä, osoda amogi digasio.
11 Gasumilï amoïe ëida, Gamogai Nafade. Ödä sulubadela ohodoala mogelahilä, osoda amo gamogaha maadesio. Udia dolö yafiea ödä gamogai amo nase amolida, baagosa maadesio.
12 Amasebegi, selesaia fii biyidu amea melo biguli amo fuuse amo gaalu, eso ohodoala mogela digi, aube ohodoala mogela digi, gasumilï sulubadela ohodoala mogela digilahilä, osoda amo nufudasio. Ameada, osoda amolile yo amoda, usisa maadesio. Amai ameada, yoba ohodoala mogelahilä, osoda amoïe yoda, maade gabio. Amase, gasige amo gadola wäla dibeo.
13 Amala hamosebegi, na beaha nea nabelebe, haea sëdïa gadoi afädë mudabodo nawesa nea, gelola uuala sähalea, Ae! Asigii gabu. Selesaia fii ohodoa amolia melo biguli odoa fuumolö hamosebe amogi, udia dolö nagadaia nefolalebe amoli asigii gabula säsio.