15
Selesaia fii gifalädalïaea neala nafadelasilo geloi gifalädalïa gaula neebeo
1 Na aso, beahaleamelebe, selesaia mosöa melëlo made gadoi nofe elöi beala fudugilo amo gadoi melï. Amoda gomalä. Selesaia fii gifalädalïa nefolalebe amolia udia dolö neala nafadelasilo geloi gifalädalïa hamola wagamolöïe gaula nefolalebeo. Neala nafadelasilo geloi gifalädalïa amoli hamosa maadesebegi, Godeïe mihalälo edefade amo wagamolö amea, neala nafadelasila hamola wagamolöïe säi gabio.
2 Aso, amala beaha nea beahamelebe, ödä duhulu edefade afädë galasi gadoi nulo söabalä gegoai dibeo. Amase, duhulu galasi gadoi agesua ami, udia dolöea sugua ilaba gadoi amobaläge, sugua hï e gadoi ausulubo hamoi amobaläge, amase, ïe ëiïe näba amobaläge, nudula salolela baagila asi amoli nefolalebeo. Ami nowela nefolalea, gida gadoi Godea ï amoli gaula nefolalebeo.
3 Gida amoli gaula nefolaleada, Godeïe hamoi hamolasilo Moseseïe gë udälo amoge, Sugua Sibi Malö amoïe gë udälo amoge udäha nefolalebeo. Ilia gë udäi amoda gowe.
Dafidilo Geloi Gode, Sulubadelaïe Geloifalï Geloi neebe-eee,
dia hamosa aligilo amo beala, hïdo elöla fudugilo-ooo.
Gädili amolile gini-iii,
dïe malada, mogoige, dofäge nea-aaa.
4 Dafidilo Geloi-e, dimu hedabi hïdo elöi nebego-ooo.
Ameada, dibalä nowëa made bedälahilä-aaa,
dïe ëi ilibia amo made olesa namolödu-uuu.
Dïe mala mogoi hamolo amo ulufai ameada-aaa,
udia dolö fii odoa nefolalebe amoli sulubadela maala-aaa,
dïe odagiamadi nea, dïe ëi gauia adogomolömelë-eeela
säla udäsio.
5 Amo baagia na bu beahamelebe, selesaia mosöa ami Godeïe mosö idi gai doga negei dibeo. Amoda, Gode ilibalä neala helësëlo balai mosö gabio.
6 Selesaia fii gifalädalïa amolia neala nafadelasilo geloi gifalädalïa gaula nefolalo amolida, mosöa amila doadigila maasio. Ilida, fagulo nigime baai made, eleloi hedabi amo gälahilä, sogobe goloea hamoi amo ilile bidagia bobogä gäi maasio.
7 Maasebegi, namolö aligi biyidia nefolalo amoligi, afädëa falo gifalädalïa goloea hamoi difolalo amoligi, Gode namolöi namolö neebe amoïe mihalälo usi nobai dilo amo, selesaia fii gifalädalïa amolima neala sogosa maadesio.
8 Amala sogosa maadesebegi, Godeïe yo digalomadilage, ïe geloimadilage, höba fedase amea, ïe mosö amo nobasio. Amala nobasebegi, neala nafadelasilo geloi gifalädalïa selesaia fii gifalädalïa amolia gaula nelo amea nufudala made wagaia, afädëa mosö amogi nogila digamolöi made gabio.